བོད་ཆུ་འབྲུག་ལོའི་ལོ་གསར་འཆར་ཉེར་ཡོད་པའི་སྐབས་ཀྱི་ཚེས་18ཉིན་གྱི་ཕྱི་དྲོ་རང་སྐྱོང་ལྗོངས་སྲིད་གཞུང་གཞུང་དོན་ཐིང་གི་ལས་བྱེད་པ་དང་ལས་བཟོ་རྣམས་དགའ་སྤྲོ་མཉམ་འཛོམས་ཀྱིས་བོད་ཀྱི་ལོ་གསར་ལ་ལྷན་འཛོམས་རྟེན་འབྲེལ་ཞུ་བའི་ཚོགས་འདུ་འཚོགས་ནས་ཕན་ཚུན་སྨོན་འདུན་ཞུ་བ་དང་ཐུན་མོང་ཐོག་ལོ་གསར་ལ་རྟེན་འབྲེལ་ཞུས་པ་རེད།
རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་པད་མ་འཕྲིན་ལས་ཕེབས་པ་དང་འབྲེལ་གསུང་བཤད་ཀྱང་གནང་བ་རེད།
རང་སྐྱོང་ལྗོངས་སྲིད་གཞུང་ཏང་ཙུའི་ཁོངས་མི་དྲུང་ཆེ་ཀའོ་དབྱང་གིས་རང་སྐྱོང་ལྗོངས་སྲིད་གཞུང་གཞུང་དོན་ཐིང་གི་ཚབ་ཞུས་ནས་ཤིས་ཚིག་གསུངས་པ་རེད།
པད་མ་འཕྲིན་ལས་ཀྱིས་གསུང་བཤད་གནང་སྐབས་དང་ཐོག་རང་སྐྱོང་ལྗོངས་སྲིད་གཞུང་དང་སྲིད་གཞུང་གི་འགོ་ཁྲིད་བློ་མཐུན་རྣམས་ཀྱི་ཚབ་ཞུས་ནས་ལས་འཁྱུར་དང་ལས་བྲལ་ངལ་གསོ་བསྐྱོན་མཁན་གྱི་བློ་མཐུན་རྒན་གྲས་དང་དེ་བཞིན་སྲིད་གཞུང་གཞུང་དོན་ཐིང་གི་ལས་བྱེད་ལས་བཟོ་ཡོངས་ལ་བོད་ཀྱི་ལོ་གསར་གྱི་སྨོན་འདུན་ཞུས་གནང་བ་རེད།
པད་མ་འཕྲིན་ལས་ཀྱིས་2012ལོ་ནི་རང་ལྗོངས་ཀྱི་དཔལ་འབྱོར་དང་སྤྱི་ཚོགས་ལེགས་ལ་མྱུར་བའི་སྒོ་ནས་འཕེལ་རྒྱས་འགྲོ་རྒྱུར་སྐུལ་འདེད་གཏོང་བ་དང “ལོ་ལྔ་ཚན་བཅུ་གཉིས་པའི ”འཆར་འགོད་ཀྱི་དམིགས་ཚད་ལས་འགན་ཁག་ལེགས་སྒྲུབ་བྱེད་པའི་གལ་འགངས་ཤིན་ཏུ་ཆེ་བའི་ལོ་ཞིག་རེད། རང་སྐྱོང་ལྗོངས་སྲིད་གཞུང་གཞུང་དོན་ཐིང་གི་ལས་བྱེད་པ་དང་ལས་བཟོ་ཡོངས་ཀྱིས་ལྗོངས་སྲིད་གཞུང་གཞུང་དོན་ཐིང་ཏང་ཙུའི་འགོ་ཁྲིད་འོག་བློ་གཅིག་སེམས་གཅིག་གིས་འཕེལ་རྒྱས་དོན་གཉེར་བྱེད་པ་དང་། ནུས་ཤུགས་ཡོད་རྒུས་བརྟན་ལྷིང་འགན་ལེན་བྱེད་པ། རང་འགན་གཙང་སྒྲུབ་བྱེད་པ་བཅས་ཀྱི་ཐོག་ནས་ཚད་གཞི་མཐོ་པོ་དང་རེ་བ་ནན་པོས་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་དཀྲིས་པའི་ལས་འགན་ཁག་ལེགས་སྒྲུབ་ཡག་པོ་བྱ་རྒྱུའི་རེ་བ་ཡོད་ཅེས་གསུངས་པ་རེད།
བོད་ཀྱི་ལོ་གསར་ལ་ལྷན་འཛོམས་རྟེན་འབྲེལ་ཞུ་བའི་ཚོགས་འདུའི་ཐོག་རང་སྐྱོང་ལྗོངས་གླུ་གར་ཚོགས་པའི་འཁྲབ་སྟོན་པ་ཚོས་ངོ་མཚར་ཆེ་བའི་རིག་རྩལ་ལེ་ཚན་འཁྲབ་སྟོན་བྱས་པ་རེད།