ཟླ་2ཚེས་5ཉིན་གྱི་ཕྱི་དྲོ་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་སྲིད་ཁྲིམས་ཨུ་ལྷན་གྱི་ཧྲུའུ་ཅི་ཧའོ་ཕུང་དྲག་ཆས་ཉེན་རྟོག་བོད་ལྗོངས་སྤྱི་ཁྱབ་རུ་ཁག་ཏུ་དམག་གྲབས་ལས་སྒྲུབ་ལས་དོན་ལ་ཞིབ་བཤེར་མཛུབ་ཁྲིད་གནང་བར་ཕེབས་པ་རེད། རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་དང་། ལྗོངས་ཏང་ཨུད་སྲིད་ཁྲིམས་ཨུ་ལྷན་གྱི་ཧྲུའུ་ཅི་གཞོན་པ། སྤྱི་བདེ་ཐིང་ཏང་ཨུད་ཀྱི་ཧྲུའུ་ཅི་དང་ཐིང་ཀྲང་བཅས་ཡིན་པའི་ལི་ཀྲའོ། དྲག་ཆས་ཉེན་རྟོག་བོད་ལྗོངས་སྤྱི་ཁྱབ་རུ་ཁག་གི་སྤྱི་ཁྱབ་རུ་དཔོན་ཀུའོ་དབྱི་ལི་བཅས་ལྷན་དུ་ཞིབ་བཤེར་མཛུབ་ཁྲིད་གནང་བར་ཕེབས་ཡོད་པ་རེད།
ཧའོ་ཕུང་སྤྱི་ཁྱབ་རུ་ཁག་གི་དམག་རྒྱག་བཀོད་འདོམས་ལྟེ་གནས་སུ་ཕེབས་ནས་སྡོད་བྱའི་ལས་སྒྲུབ་སྒྲིག་ལམ་ལ་ཞིབ་བཤེར་གནང་བ་རེད། དྲག་ཆས་ཉེན་རྟོག་བོད་ལྗོངས་སྤྱི་ཁྱབ་རུ་ཁག་གི་དམག་གྲབས་ལས་སྒྲུབ་དང་དེ་བཞིན་དོ་དམ་ལས་དོན་གྱི་བཪྙན་ཕབ་པར་གཞིར་གཟིགས་པ་དང་སྤྱི་ཁྱབ་རུ་ཁག་གི་ལས་དོན་སྙན་ཞུ་གསན་རྗེས་ཁོང་གིས་དྲག་ཆས་ཉེན་རྟོག་བོད་ལྗོངས་སྤྱི་ཁྱབ་རུ་ཁག་གི་ལས་དོན་ཁག་ལ་ཁས་ལེན་གང་ལེགས་གནང་བ་མ་ཟད། བོད་སྡོད་དྲག་ཆས་ཉེན་རྟོག་དཔོན་དམག་ཚོས་དུས་ཆེན་རིང་དཀའ་སྤྱད་ཀྱིས་ལས་དོན་སྒྲུབ་པར་བྱམས་བརྩེའི་འཚམས་འདྲི་དང་སྙིང་དབུས་ནས་ཐུགས་རྗེ་ཆེ་ཞུས་གནང་བ་རེད།
ཧའོ་ཕུང་གིས་སྤྱི་ཁྱབ་རུ་ཁག་ལ་གོམ་སྟབས་རྗེས་མར་བརྟན་ལྷིང་སྲུང་སྐྱོང་གི་ལས་དོན་ཇི་ལྟར་ཡག་པོ་བསྒྲུབ་རྒྱུའི་ཐད་བླང་བྱ་ཁ་གསལ་བཏོན་གནང་བ་རེད། ཁོང་གིས་སྤྱི་ཚོགས་ཁྱོན་གྱི་སྔོན་འགོག་ཚོད་འཛིན་ལས་དོན་ནུས་ཤུགས་གང་ཡོད་ཀྱིས་ཡག་པོ་བསྒྲུབས་པ་དང་ལམ་གྱི་འགག་མདོར་ཞིབ་བཤེར་ས་ཚིགས་འཛུགས་རྒྱུ་དང་། གནད་ཆེའི་ས་ཆར་ཉེན་ཟོན་བྱེད་པ། དྲག་ཆས་ཉེན་ཟོན་སྐོར་གཡེང་བྱེད་པ། ཉེན་རྟོག་ཞབས་ཞུའི་ས་ཚིགས་ཀྱི་ལས་སྒྲུབ་བཅས་སྒྲིག་འཛུགས་ནན་ཏན་བྱས་ནས་ལྗོངས་ཡོངས་སུ “གནད་དོན་ཆེ་འབྲིང་མི་ཐོན་པ་དང་གནད་དོན་ཆུང་ཙག་ཀྱང་མི་ཐོན་རྒྱུའི ”འགན་ལེན་བྱེད་དགོས་པ་དང་། ཪྙོག་འཛིང་དང་དཀའ་ངལ་ཆེ་བའི་གནས་ཚུལ་ཐག་གཅོད་བྱ་རྒྱུར་གཞི་བཙུགས་ཏེ་ཐོལ་བྱུང་དོན་རྐྱེན་སྣ་ཚོགས་ཐག་གཅོད་ཀྱི་འཕྲལ་སྡོམ་སྔོན་བཀོད་ཇུས་གཞི་སྔར་བས་འཐུས་སྒོ་ཚང་དུ་གཏོང་བ་དང་དངོས་ཇུས་ཅན་དང་དངོས་འཐབ་ཅན་གྱི་ནང་སྦྱོང་ལ་ཤུགས་སྣོན་བརྒྱབ་སྟེ་གནས་ཚུལ་འཕྲད་ཚེ་དུས་ཐོག་དང་། བློས་གཏོང་ཆུང་ཤོས། ལྡོག་ཕྱོགས་ཀྱི་ཤུགས་རྐྱེན་ཐེབས་ཉུང་ཤོས། བློ་ཐག་རྦད་བཅད་ཀྱི་རྣམ་འགྱུར། གཟབ་ནན་ཆེ་ཤོས་ཀྱི་བྱ་ཐབས་བཅས་ལ་བརྟེན་ནས་ཕན་འབྲས་ཆེན་པོ་ཐོན་པའི་ཐག་གཅོད་བྱ་རྒྱུའི་འགན་ལེན་བྱེད་དགོས་པ། དྲག་ཆས་ཉེན་རྟོག་དཔུང་སྡེའི་དམག་འཐབ་རུ་ཁག་དང་། དྲིལ་བསྒྲགས་རུ་ཁག ལས་དོན་རུ་ཁག་བཅས་ཀྱི་ནུས་པ་འདོན་སྤེལ་གང་ལེགས་བྱས་ནས་དཔུང་སྡེའི་བཅའ་སྡོད་བྱ་ཡུལ་དང་གནས་སྐབས་ལས་སྒྲུབ་ས་ཚིགས་དང་བརྟན་ལྷིང་སྲུང་སྐྱོང་བྱེད་སྤྱོད་ཁྲོད་ཀྱི་མང་ཚོགས་ཀྱི་ལས་དོན་ཧུར་ཐག་ངང་ཡག་པོ་བསྒྲུབས་ཏེ་དཔུང་སྡེར་ལས་འགན་ཡག་པོ་བསྒྲུབ་ཕྱིར་ཆ་རྐྱེན་ཡག་པོ་ཞིག་གཏོད་དགོས་པ། བསམ་བློ་དང་སློབ་གསོའི་ལས་དོན་སྔར་བས་ཡག་པོ་སྒྲུབ་པ་དང་དཔོན་དམག་ཚོར་ཡུན་རིང་དམག་འཐབ་དང་། བསྟུད་མར་དམག་འཐབ། དཀའ་སྤྱད་དམག་འཐབ་བཅས་ཀྱི་བསམ་བློ་བརྟན་པོ་འཛུགས་རྒྱུའི་ཁྲིད་སྟོན་བྱས་ནས་བྱ་སྤྱོད་ངོ་མའི་ཐོག་ནས་འགན་འཁྲི་ཟོལ་མེད་ལག་བསྟར་གྱིས་བོད་ཀྱི་སྤྱི་ཚོགས་ཧྲིལ་པོའི་བརྟན་ལྷིང་ནུས་ཤུགས་ཡོད་རྒུས་སྲུང་སྐྱོང་བྱེད་དགོས་པ་བཅས་ཀྱི་ནན་བཤད་གནང་བ་རེད།