ཟླ་2ཚེས་2ཉིན་གྱི་ཕྱི་དྲོ་རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་ལྷ་ས་གྲོང་ཨུད་ཀྱི་ཧྲུའུ་ཅི་ཆེ་དགྲ་ལྷས་ལྷ་སར་སྡོད་ཁང་དང་གྲོང་ཁྱེར་དང་གྲོང་གསེབ་འཛུགས་སྐྲུན་པུའུ་གྲོང་ཁྱེར་འཛུགས་སྐྲུན་སི་ཡི་སི་ཀྲང་གཞོན་པ་ལིའུ་ཧོ་མིང་གིས་སྣེ་ཁྲིད་པའི་གྲོང་ཁྱེར་དུ་དྲོད་རླངས་མཁོ་འདོན་བྱེད་མཁན་རིགས་གཅིག་མཁས་ཅན་ཚོགས་ཆུང་དང་བཅས་པར་མཇལ་འཕྲད་གནང་བ་རེད།
རིགས་གཅིག་མཁས་ཅན་ཚོགས་ཆུང་གིས་ལྷ་ས་གྲོང་ཁྱེར་དུ་དྲོད་རླངས་མཁོ་འདོན་ལས་དོན་སྤེལ་བའི་ནུས་རྒྱུའི་རིགས་དང་། ཕན་འབྲས་དངོས། དྲོད་རླངས་མཁོ་འདོན་བྱེད་སྟངས་བཅས་དང་དེ་བཞིན་འཁོར་རྒྱུག་མ་གནས་སོགས་འབྲེལ་ཡོད་གནས་ཚུལ་གྱི་ངོ་སྤྲོད་གསན་རྗེས་ཆེ་དགྲ་ལྷས་སྡོད་ཁང་དང་གྲོང་ཁྱེར་དང་གྲོང་གསེབ་འཛུགས་སྐྲུན་པུས་དུས་ཡུན་རིང་པོའི་ནང་ལྷ་ས་གྲོང་ཁྱེར་གྱི་ལས་དོན་ཁག་དང་ལྷག་པར་དུ་སྡོད་ཁང་དང་གྲོང་ཁྱེར་དང་གྲོང་གསེབ་འཛུགས་སྐྲུན་འཆར་འགོད་སོགས་ཐད་ཀྱི་ལས་དོན་ལ་ཐུགས་ཁུར་དང་། རྒྱབ་སྐྱོར། རོགས་རམ་བཅས་གནང་བར་ཐུགས་རྗེ་ཆེ་ཞུས་པ་རེད།
ལྷ་ས་གྲོང་ཁྱེར་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་གནས་ཚུལ་ངོ་སྤྲོད་རགས་ཙམ་གནང་རྗེས་ཆེ་དགྲ་ལྷས་ལྷ་ས་གྲོང་ཁྱེར་དུ་དྲོད་རླངས་མཁོ་འདོན་ལས་དོན་ལག་བསྟར་བྱེད་པ་དེ་ནི་རང་སྐྱོང་ལྗོངས་ཏང་ཨུད་དང་སྲིད་གཞུང་དང་ལྷ་ས་གྲོང་ཨུད་དང་གྲོང་ཁྱེར་སྲིད་གཞུང་གིས་བཏོན་པའི་འཐབ་ཇུས་དང་བྱེད་ཐབས་འགངས་ཆེན་ཞིག་ཡིན་པ་དང་ལྷ་ས་གྲོང་ཁྱེར་གྱི་སྡེ་ཚན་ཁག་གིས་ངེས་པར་དུ་ཕྱར་བ་གྲུ་འདེགས་དང་ནུས་ཤུགས་ཡོད་རྒུས་གྲོང་ཁྱེར་དུ་དྲོད་རླངས་མཁོ་འདོན་བྱེད་པའི་ལས་དོན་ཡག་པོ་སྒྲུབ་དགོས། དྲོད་རླངས་མཁོ་འདོན་ལས་གྲྭའི་ནང་ནུས་རྒྱུ་གཙང་མ་སྤྱོད་རྒྱུ་མཐའ་འཁྱོངས་བྱེད་པ་དང་དྲོད་རླངས་མཁོ་འདོན་བྱེད་པའི་མ་གནས་དམའ་རུ་བཏང་ནས་གྲོང་ཁྱེར་གྱི་ཡོང་འབབ་དམའ་བའི་ཚོགས་སྤྱིས་གྲང་ངར་ཆེ་བའི་དགུན་དུས་སུ་ཏང་དང་སྲིད་གཞུང་གི་ཐུགས་ཁུར་དང་དྲོ་སྐྱིད་གང་ལེགས་ཚོར་ཐུབ་པ་བྱེད་དགོས། དུས་མཚུངས་རང་སྐྱོང་ལྗོངས་དང་ལྷ་ས་གྲོང་ཁྱེར་གྱི་འབྲེལ་ཡོད་སྡེ་ཚན་དང་གྲོང་ཁྱེར་དུ་བཅའ་སྡོད་ཚན་པས་ངེས་པར་དུ་གྲོང་ཁྱེར་གྱི་དྲོད་རླངས་མཁོ་འདོན་ལས་དོན་གྱི་འགོ་ཁྲིད་ཚོགས་ཆུང་གི་སྣེ་ཁྲིད་འོག་དྲོད་རླངས་མཁོ་འདོན་ལས་གྲྭ་བདེ་བླག་ངང་ལག་བསྟར་བྱ་རྒྱུར་ནུས་ཤུགས་ཡོད་རྒུས་གཞོགས་འདེགས་བྱེད་པ་དང་། དུས་ཚོད་དམ་འཛིན་དང་བསམ་ཕྱོགས་གསལ་བཟོ་བྱས་ཏེ་དྲོད་རླངས་མཁོ་འདོན་ལས་གྲྭའི་དུས་འགོའི་གྲྭ་སྒྲིག་ལས་དོན་ཡག་པོ་བསྒྲུབས་ཐོག་ལས་གྲྭ་གང་མགྱོགས་ལག་བསྟར་བྱ་རྒྱུར་རྨང་གཞི་ཡག་པོ་འདིང་དགོས། སྡོད་ཁང་དང་གྲོང་ཁྱེར་དང་གྲོང་གསེབ་འཛུགས་སྐྲུན་པུའུ་ཡིས་གྲོང་ཁྱེར་དུ་དྲོད་རླངས་མཁོ་འདོན་བྱེད་པའི་ལག་རྩལ་དང་སྲིད་ཇུས་སོགས་ཐད་སྔར་བཞིན་རྒྱབ་སྐྱོར་གནང་རེ་ཡོད་ཅེས་གསུངས་པ་རེད། ཀྲུང་གོ་འཛུགས་སྐྲུན་ཇུས་འགོད་ཁང་དང་། ཀྲུང་གོ་གྲོང་ཁྱེར་འཆར་འགོད་དང་ཇུས་འགོད་ཞིབ་འཇུག་ཁང་། ཀྲུང་གོ་འཛུགས་སྐྲུན་ཚན་རིག་ཞིབ་འཇུག་ཁང་། པེ་ཅིང་སོལ་རླངས་དང་ཚ་ཤུགས་ཇུས་འགོད་ཁང་། པེ་ཅིང་ཤིན་ཡུས་ཚན་རྩལ་ཚད་ཡོད་ཀུང་སི་བཅས་ཀྱི་གྲོང་ཁྱེར་དུ་དྲོད་རླངས་མཁོ་འདོན་བྱེད་པའི་རིགས་གཅིག་མཁས་ཅན་མཇལ་འཕྲད་ཁྲོད་ཞུགས་ཡོད་པ་རེད།