ཟླ་1ཚེས་27ཉིན་གྱི་ཕྱི་དྲོ་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་པད་མ་འཕྲིན་ལས་ཀྱིས་ལྷ་སར་དུས་ཆེན་རིང་སྔར་བཞིན་ལས་གནས་བརྟན་སྲུང་བྱེད་མཁན་སྤྱི་བདེ་མེ་ཟོན་དཔོན་དམག་ལ་བྱམས་བརྩེའི་ངང་གཟིགས་པར་ཕེབས་ཤིང་། འདི་ནི་པད་མ་འཕྲིན་ལས་ཀྱིས་ཕོ་བྲང་པོ་ཏ་ལའི་མེ་ཟོན་རུ་ཆེན་གྱི་དཔོན་དམག་ལ་གཟིགས་པའི་གནས་ཚུལ་ཡིན་པ།

    ཟླ་1ཚེས་27ཉིན་གྱི་ཕྱི་དྲོ་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་པད་མ་འཕྲིན་ལས་ཀྱིས་ལྷ་སར་དུས་ཆེན་རིང་སྔར་བཞིན་ལས་གནས་བརྟན་སྲུང་བྱེད་མཁན་སྤྱི་བདེ་མེ་ཟོན་དཔོན་དམག་ལ་བྱམས་བརྩེའི་ངང་གཟིགས་པ་དང་འབྲེལ་གནས་གལ་ཆེན་གྱི་མེ་ཟོན་བདེ་འཇགས་ལས་དོན་ལ་ཞིབ་བཤེར་གནང་བ་རེད།

    བོད་ལྗོངས་སྤྱི་བདེ་མེ་ཟོན་སྤྱི་ཁྱབ་རུ་ཁག་གི་ཆབ་སྲིད་ཨུ་ཡོན་ཁྱུང་སྲས་ཀྱིས་ལྷན་དུ་གཟིགས་པར་ཕེབས་པ་རེད།

    པད་མ་འཕྲིན་ལས་དང་བཅས་པ་དང་ཐོག་ཕོ་བྲང་པོ་ཏ་ལའི་མེ་ཟོན་རུ་ཆེན་དང་ཐང་ཆེན་མངགས་གཏོང་ཁང་དུ་ཕེབས་ནས་དུས་ཆེན་རིང་སྔར་བཞིན་ལས་གནས་བརྟན་སྲུང་བྱེད་མཁན་ལས་རེས་སྒྲུབ་མཁན་དཔོན་དམག་ལ་གཟིགས་པ་དང་འཚམས་འདྲི་གནང་བ་རེད། ཁོང་གིས་ཕོ་བྲང་པོ་ཏ་ལའི་མེ་ཟོན་རུ་ཆེན་ནི་དཔའ་བོའི་དཔེ་བཟང་རུ་ཆེན་ཞིག་ཡིན་པ་དང་ཕོ་བྲང་པོ་ཏ་ལར་བཅའ་སྡོད་བྱས་ཏེ་མེ་ཟོན་ལས་འགན་འཁུར་ཚུན་རྒྱ་ཆེའི་མེ་ཟོན་དཔོན་དམག་གིས་སྐད་གྲགས་མེད་པ་དང་སྒེར་སེམས་མེད་པའི་ངང་ལེགས་སྐྱེས་འབུལ་བ་དང་མེ་ཟོན་བདེ་འཇགས་ལས་དོན་དང་བརྟན་ལྷིང་སྲུང་སྐྱོང་གཉིས་ཀ་འཐུས་ཤོར་མི་འགྲོ་བ་རྒྱུན་འཁྱོངས་བྱས་ནས་ཕོ་བྲང་པོ་ཏ་ལའི་མེ་ཟོན་བདེ་འཇགས་འགན་ལེན་དང་འཛམ་གླིང་གི་རིག་གནས་ཤུལ་བཞག་སྲུང་སྐྱོང་ཐད་ལེགས་སྐྱེས་མངོན་གསལ་དོད་པོ་ཕུལ་བས་ལྗོངས་ཡོངས་ཀྱི་མི་རིགས་ཁག་གི་མང་ཚོགས་ཀྱི་བསྔགས་བརྗོད་རྒྱ་ཆེར་ཐོབ་པ་དང་ཏང་དང་མི་དམངས་ཀྱིས་བློས་འགེལ་ཆོག་པའི་དཔུང་ཁག་ཅིག་རེད། རེ་བར་ཁྱེད་ཚོས་མུ་མཐུད་གྲུབ་འབྲས་དར་སྤེལ་གཏོང་བ་དང་མངགས་བཅོལ་གལ་ཆེན་བརྟན་པོར་ངེས་ནས་ཏང་དང་མི་དམངས་ཀྱིས་དཀྲིས་པའི་གཟི་བརྗིད་ལྡན་པའི་ལས་འགན་ལེགས་སྒྲུབ་ཡག་པོ་བྱས་ཐོག་ཕོ་བྲང་པོ་ཏ་ལའི་མེ་ཟོན་བདེ་འཇགས་འགན་ལེན་བྱེད་དགོས་ཞེས་གསུངས་པ་རེད།

    བོད་ལྗོངས་སྤྱི་བདེ་མེ་ཟོན་སྤྱི་ཁྱབ་རུ་ཁག་གི་ཆ་འཕྲིན་འཕྲིན་གཏོང་བཀོད་འདོམས་ལྟེ་གནས་སུ་པད་མ་འཕྲིན་ལས་ཀྱིས་ད་དུང་བཪྙན་ལམ་བརྒྱུད་ས་ཆ (གྲོང་ཁྱེར )ཁག་གི་མེ་ཟོན་ཉིང་ལག་རུ་ཁག་བཀོད་འདོམས་ལྟེ་གནས་ཀྱི་ལས་རེས་སྒྲུབ་མཁན་གྱི་ལས་གནས་བརྟན་སྲུང་བྱེད་ཚུལ་ཞིབ་བཤེར་གནང་བ་རེད། ཁོང་གིས་དུས་ཡུན་རིང་པོའི་ནང་བོད་ལྗོངས་སྤྱི་བདེ་མེ་ཟོན་དཔུང་སྡེས་བོད་ཀྱི་འཕེལ་རྒྱས་དང་བརྟན་ལྷིང་དང་མི་རིགས་ཁག་གི་མི་དམངས་ཀྱི་བདེ་ཐང་དང་བདེ་སྐྱིད་ཆེད་ལེགས་སྐྱེས་འགངས་ཆེན་ཕུལ་བ་དང་ལྷག་པར་དུ་དཔྱིད་གསར་དུས་ཆེན་གྱི་གུང་གསེང་རིང་ཁྱེད་ཚོས་ལུས་སྲོག་བློས་གཏོང་བྱ་རྒྱུར་མི་སྐྲག་པ་དང་བསྟུད་མར་དམག་འཐབ་བྱེད་པའི་སྤྱོད་ཚུལ་དར་སྤེལ་བཏང་ནས་ལས་གནས་བརྟན་སྲུང་བྱས་ཐོག་ལྗོངས་ཡོངས་སུ་མེ་ཟོན་བདེ་འཇགས་ཁོར་ཡུག་བཟང་པོ་ཞིག་བཏོད་དེ་ལྗོངས་ཡོངས་ཀྱི་མི་རིགས་ཁག་གི་མི་དམངས་དགའ་སྤྲོའི་དཔལ་ལ་རོལ་བའི་དཔྱིད་གསར་དུས་ཆེན་ཞིག་གཏོང་རྒྱུ་ཡོང་བ་བྱས་པས་ངས་ལྗོངས་ཏང་ཨུད་དང་སྲིད་གཞུང་དང་ལྗོངས་ཏང་ཨུད་ཀྱི་ཧྲུའུ་ཅི་ཁྲེན་ཆོན་གོ་ཡི་ཚབ་ཞུས་ནས་ཁྱེད་ཚོར་ལྷག་བསམ་ཟོལ་མེད་ངང་ཐུགས་རྗེ་ཆེ་ཞུ་རྒྱུ་དང་བླ་ན་མེད་པའི་གུས་འདུད་ཞུ་རྒྱུ་ཡིན་ཞེས་གསུངས་པ་རེད།

    པད་མ་འཕྲིན་ལས་དང་བཅས་པས་ད་དུང་ཀྲུང་གོ་རྡོ་སྣུམ་ཀུན་བདེ་གླིང་སྣུམ་སྣོན་ས་ཚིགས་སུ་ཕེབས་ནས་གནས་གལ་ཆེན་གྱི་མེ་ཟོན་བདེ་འཇགས་ལས་དོན་ལ་ཞིབ་བཤེར་གནང་ཞིང་། ཁོང་གིས་ཀྲུང་གོ་རྡོ་སྣུམ་བོད་ལྗོངས་ཕྱིར་ཚོང་ཀུང་སིས་ལས་རིགས་ཀྱི་ཚད་གཞི་རྒྱུན་འཁྱོངས་བྱས་ཏེ་ས་གནས་ས་ཐོག་གི་དོ་དམ་བྱེད་ཤུགས་ཆེ་རུ་དང་སྣུམ་མཛོད་ས་ཚིགས་དང་དབོར་འདྲེན་འཁོར་རིགས་ཀྱི་བདེ་འཇགས་ལ་ལྟ་སྡོམ་བྱེད་ཤུགས་ཆེ་རུ་བཏང་ཐོག་དོགས་ཟོན་བྱེད་ཐབས་ཞིབ་ཚགས་སུ་གཏོང་བ་དང་། འཕྲལ་སྒྲུབ་ལས་རེས་བརྟན་སྲུང་ཐད་ཤུགས་སྣོན་རྒྱག་པ། འཕྲལ་སྒྲུབ་སྔོན་ཇུས་འཐུས་ཚང་དུ་གཏོང་བ་བཅས་བྱས་ནས་འཁོར་རྒྱུག་བདེ་འཇགས་ཡོང་བའི་འགན་ལེན་བྱེད་དགོས་པའི་བླང་བྱ་བཏོན་པ་རེད།