ཟླ་1ཚེས་25ཉིན་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཁྲེན་ཆོན་གོས་ཆབ་མདོ་ས་ཁུལ་དུ་བརྟན་ལྷིང་སྲུང་སྐྱོང་གི་ལས་དོན་ལ་ཞིབ་བཤེར་དང་བཀོད་སྒྲིག་གནང་ཞིང་། འདི་ནི་ཁྲེན་ཆོན་གོས་ཆབ་མདོ་ཡན་ལག་དམག་ཁུལ་ཁང་དུ་ཆབ་མདོར་བཅའ་སྡོད་མི་དམངས་བཅིངས་འགྲོལ་དམག་དང་། དྲག་ཆས་ཉེན་རྟོག་དཔུང་སྡེའི་དཔོན་དམག སྲིད་ཁྲིམས་དང་སྤྱི་བདེའི་མི་དམངས་ཉེན་རྟོག་པའི་འཐུས་མི་བཅས་ལ་བྱམས་བརྩེའི་ངང་གཟིགས་པ་དང་འཚམས་འདྲི་གནང་བའི་གནས་ཚུལ་ཡིན་པ།

    ཚེས་25ཉིན་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཁྲེན་ཆོན་གོས་ཆབ་མདོ་ས་ཁུལ་དུ་བརྟན་ལྷིང་སྲུང་སྐྱོང་ལས་དོན་ལ་ཞིབ་བཤེར་གནང་བ་དང་འབྲེལ་དཔུང་སྡེའི་དཔོན་དམག་དང་སྤྱི་བདེའི་མི་དམངས་ཉེན་རྟོག་པར་འཚམས་འདྲིའང་གནང་ཞིང་། ཁོང་གིས་བརྟན་ལྷིང་ནི་ཐམས་ཅད་ལས་ལྷག་པའི་བསམ་བློ་བརྟན་པོ་བཙུགས་ནས་ཚད་མཐོའི་མཐོང་ཆེན་དང་ཉེན་ཟོན་དྲན་བརྡ་རྟག་ཏུ་བཏང་སྟེ་བརྟན་ལྷིང་སྲུང་སྐྱོང་གི་ལམ་སྲོལ་སྔར་བས་འཐུས་ཚང་དུ་གཏོང་བ་དང་། བརྟན་ལྷིང་བྱ་ཐབས་ནན་དུ་གཏོང་བ། བརྟན་ལྷིང་སྲུང་སྐྱོང་གི་སྟོབས་ཤུགས་ཆེ་རུ་གཏོང་བ་བཅས་ཀྱི་སྒོ་ནས་གནད་དོན་ཆེན་པོ་མི་ལྷག་པ་དང་། འབྲིང་བའང་མི་ཐོན་པ། ཆུང་བའང་མི་ཐོན་པ་གང་ཐུབ་བྱེད་པའི་དམིགས་ཚད་ཧུར་ཐག་སྒྲུབ་དགོས་པའི་ནན་བཤད་གནང་བ་རེད།

    ཁྲེན་ཆོན་གོ་ཆབ་མདོ་རྫོང་ཆབ་མདོ་གྲོང་རྡལ་གྱི་དམངས་ཕན་ཉེན་རྟོག་ཞབས་ཞུ་ས་ཚིགས་སུ་ཕེབས་ནས་དེར་ལས་རེས་སྒྲུབ་མཁན་མི་དམངས་ཉེན་རྟོག་པར་འཚམས་འདྲི་དང་ལས་སྒྲུབ་ཐོ་འགོད་ལ་ཞིབ་བཤེར་ནན་པོ་གནང་བ་དང་འབྲེལ་ས་གནས་དེ་གའི་བདེ་འཇགས་དང་། ཉེན་རྟོག་ས་ཚིགས། འཛུགས་སྐྲུན་འཆར་འགོད་བཅས་ཀྱི་གནས་ཚུལ་མཁྱེན་རྟོགས་ཞིབ་ཕྲ་གནང་ཞིང་། ཁོང་གིས་དུས་ཚོད་དམ་འཛིན་བྱས་ནས་ཉེན་རྟོག་ས་ཚིགས་འཛུགས་སྐྲུན་གང་མགྱོགས་བྱེད་པ་དང་ས་ཁུལ་དེ་ཡོངས་ཀྱི་གྲོང་མཁར་དང་གྲོང་རྡལ་ལ་དྲ་མིག་ཅན་གྱི་དོ་དམ་བྱ་ཐབས་གང་མགྱོགས་བཟོས་ཏེ་བརྟན་ལྷིང་སྲུང་སྐྱོང་སྒོ་ཀུན་ནས་ཐུབ་པ་བྱེད་དགོས་པ་དང་། བརྒྱབ་ཟིན་པའི་དམངས་ཕན་ཉེན་རྟོག་ཞབས་ཞུ་ས་ཚིགས་ཀྱིས་འཐབ་ས་དང་པོར་གནས་པ་དང་། གནས་ཚུལ་འཕྲལ་དུ་ཤེས་པ། ཉིན་མཚན་མེད་པར་ལས་ཀ་བྱེད་པ་བཅས་ཀྱི་ལེགས་ཆ་འདོན་སྤེལ་གང་ལེགས་བྱེད་དགོས་པ་དང་། མི་དམངས་ཉེན་རྟོག་པའི་སྟོབས་ཤུགས་ཆེ་རུ་གཏོང་བ། སྒྲིག་ཆས་སྤུས་དག་སྤྲོས་པ། བརྟན་ལྷིང་སྲུང་སྐྱོང་གི་བྱ་ཐབས་འཐུས་ཚང་དུ་གཏོང་བ་བཅས་ཀྱི་ཐོག་ནས་དུས་དང་རྣམ་པ་ཀུན་ཏུ་འཐབ་རྩོད་བྱེད་པའི་གྲ་སྒྲིག་དང་མི་དམངས་མང་ཚོགས་ལ་སྟབས་བདེ་ཡོང་བ་བྱེད་པ་དང་། ཁ་ཕྲལ་ཉེས་གསོག་པ་ཟིལ་གྱིས་མནན་ཏེ་སྤྱི་ཚོགས་ཞི་མཐུན་བརྟན་ལྷིང་ཡོང་བ་བྱེད་དགོས་ཞེས་གསུངས།

    ཁྲེན་ཆོན་གོས་ལྗོངས་ཡོངས་ཀྱི་རིམ་ཁག་སྡེ་ཚན་དང་བརྟན་ལྷིང་སྲུང་སྐྱོང་བྱེད་མཁན་ཕྱོགས་ཁག་གིས་བརྟན་ལྷིང་ཡོང་བ་བྱ་རྒྱུའི་རྩ་བ་དེ་དུས་དང་རྣམ་པ་ཀུན་ཏུ་དམ་པོར་བཟུང་ནས་བརྟན་ལྷིང་སྲུང་སྐྱོང་བྱ་རྒྱུ་དེ་འགྱུར་མེད་ལས་འགན་དང་འགན་འཁྲི་དང་པོར་བརྩི་བ་དང་བཀོད་འཐབ་དང་པོ་ལེགས་པར་བཏིང་ནས་རང་འགུལ་དམག་འཐབ་ཡག་པོ་བརྒྱབ་སྟེ་སྤྱི་ཚོགས་ཀྱི་དུས་བབ་ཞི་མཐུན་བརྟན་ལྷིང་ཡོང་བ་བྱེད་དགོས་པ་དང་། བརྟན་ལྷིང་ཡོང་བ་བྱེད་པའི་བྱ་ཐབས་ཁག་དོན་འཁྱོལ་ཡག་པོ་བྱེད་པ་དང་། དམ་འཛིན་སྔ་ཙམ་བྱེད་པ་དང་། ཆུང་ཙག་ནས་དམ་འཛིན་བྱེད་པ། དམ་འཛིན་མགྱོགས་པོ་བྱེད་པ། དམ་འཛིན་ཡག་པོ་བྱེད་པ་བཅས་ལ་གཞིས་འཛུགས་དགོས་པ། ཉེ་དུས་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་བཟོས་པའི་བརྟན་ལྷིང་སྲུང་སྐྱོང་གི་བྱ་ཐབས་བཅུ་པོ་རྣམས་ཚགས་ཚུད་པོ་དང་བློ་བརྟན་འགྱུར་མེད་གྱི་སྒོ་ནས་ལག་ལེན་བསྟར་ནས་ས་ཁུལ་དེ་གའི་དོན་དངོས་དང་ཟུང་འབྲེལ་བྱེད་པ་དང་། གནས་ཚུལ་དང་དུས་བབ་གསར་པར་དམིགས་ནས་བྱ་ཐབས་དག་སྔར་བས་ཞིབ་ཕྲ་བཟོ་བ་དང་དོན་ཐོག་ཏུ་འཁྱོལ་ཐུབ་པ་བྱས་ཏེ་དགྲ་ཡའི་ཕྱོགས་གཏོགས་དང་ཏཱ་ལའི་རུ་ཚོགས་ཀྱི་སིམ་འཛུལ་གྱི་གཏོར་བཤིག་བྱེད་སྤྱོད་ལ་བག་ཟོན་དང་བཀག་འགོག་མཐའ་གཅིག་ཏུ་བྱས་ནས་གནད་དོན་ཆེན་པོ་མི་ལྷག་པ་དང་། འབྲིང་བའང་མི་ཐོན་པ། ཆུང་བའང་མི་ཐོན་པ་བྱེད་པའི་དམིགས་ཚད་ཧུར་ཐག་འགྲུབ་དགོས་པ། ཁ་གཏད་གཅོག་པའི་འཕྲལ་སྡོམ་ནུས་པ་ཆེ་རུ་གཏོང་བར་སྤྱི་ཚོགས་བརྟན་ལྷིང་མེད་པའི་ཉེན་ཚབས་ལ་ཚོད་སྐོར་བྱེད་ལམ་འཕྲལ་དུ་བཟོས་ནས་ཉེན་བརྡ་གཏོང་ནུས་དང་འཕྲལ་སྡོམ་ཐག་གཅོད་ལམ་སྲོལ་འཐུས་སྒོ་ཚང་དུ་གཏོང་བ་དང་དམག་འཐབ་དངོས་རྒྱག་པའི་བླང་བྱ་དང་འཚམས་པའི་སྔོན་ཇུས་ཁག་འཐུས་ཚང་དུ་གཏོང་བ་དང་ཕྱོགས་བསྡུས་ནང་སྦྱོང་ལ་ཤུགས་སྣོན་བརྒྱབ་སྟེ་ས་གནས་ས་ཐོག་ཏུ་ཚོད་འཛིན་དང་ཐག་གཅོད་བྱ་ནུས་ཆེ་རུ་བཏང་ནས་ཐོལ་བྱུང་དོན་རྐྱེན་ཐོན་སྐབས་འཕྲལ་དུ་ཁ་གཏད་གཅོག་ཐུབ་པ་དང་ཐག་གཅོད་ཐུབ་པ་དང་གནད་དོན་ཐོན་མ་ཐག་མེད་པ་བཟོ་ཐུབ་པ་བྱེད་དགོས་པ། བརྟན་ལྷིང་སྲུང་སྐྱོང་གི་སྒྲིག་ལམ་ནན་པོ་བསྲུངས་ནས་རིམ་ཁག་སྡེ་ཚན་དང་རྒྱ་ཆེའི་ཏང་ཡོན་ལས་བྱེད་པ་དང་ལྷག་པར་དུ་རིམ་ཁག་ཏང་སྲིད་ཀྱི་འགོ་ཁྲིད་བློ་མཐུན་གཙོ་བོ་དང་བརྟན་ལྷིང་སྲུང་སྐྱོང་ཚན་པའི་བློ་མཐུན་ཚོས་ཉིན་མཚན་དབྱེར་མེད་ལས་གནས་བརྟན་སྲུང་དང་བཀའ་སྲུང་ཅི་སྒྲུབ་བྱས་ནས་སྲུང་སྐྱོང་གི་འགན་འཁྲི་འཁུར་བ་དང་། རང་འགན་གཙང་སྒྲུབ་བྱེད་པ། དུས་བདེ་ཞི་འཇགས་ཡོང་བ་བྱེད་དགོས་པ། གྲོང་ཚོ་དང་དགོན་སྡེར་བཅའ་སྡོད་རྒྱ་ཆེའི་ལས་བྱེད་པས་དཀའ་ངལ་ཁྱད་དུ་བསད་དེ་ལས་གནས་བརྟན་སྲུང་དང་རང་འགན་གཙང་སྒྲུབ་དང་ནུས་ཤུགས་ཡོད་རྒུས་ལས་དོན་ཁག་ཡག་པོ་སྒྲུབ་དགོས་པ་ལས་རང་དགར་ལས་གནས་ནས་བྲལ་བ་དང་འགན་འཁྲི་མི་འཁུར་བ་གཏན་ནས་བྱེད་མི་རུང་། ལས་གནས་བརྟན་སྲུང་མི་བྱེད་པ་དང་། འགན་མི་འཁུར་བ། འགན་འཛོལ་བྱུང་བ། བརྟན་ལྷིང་ཐད་གནད་དོན་ལྷགས་རིགས་བཅས་ལ་འགན་འཁྲི་གཙོ་བོ་འཁུར་མཁན་དང་། ཁག་བགོས་དོ་དམ་བྱེད་མཁན། ཐད་ཀར་འགན་འཁྲི་ཡོད་མཁན་བཅས་སོ་སོའི་འགན་འཁྲི་རྩད་གཅོད་ནན་པོ་བྱེད་དགོས་པ་བཅས་ཀྱི་ནན་བཤད་གནང་བ་རེད།