ཟླ་1ཚེས་25ཉིན་གྱི་ཕྱི་དྲོ་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་པད་མ་འཕྲིན་ལས་ཀྱིས་ལྷ་སར་དུས་ཆེན་རིང་ལས་གནས་བརྟན་སྲུང་བྱེད་མཁན་སྤྱི་བདེའི་མི་དམངས་ཉེན་རྟོག་པར་གཟིགས་པར་ཕེབས་ཤིང་། འདི་ནི་པད་མ་འཕྲིན་ལས་ཀྱིས་པེ་ཅིང་ནུབ་ལམ་དམངས་ཕན་ཉེན་རྟོག་ཞབས་ཞུ་ས་ཚིགས་ཀྱི་སྤྱི་བདེ་མི་དམངས་ཉེན་རྟོག་པར་གཟིགས་པར་ཕེབས་པའི་གནས་ཚུལ་ཡིན་པ།

    ཟླ་1ཚེས་25ཉིན་ནི་ལུགས་ཪྙིང་ལོའི་དཔྱིད་གསར་དུས་ཆེན་གྱི་ཚེས་གསུམ་ཡིན་པ་དང་གནའ་གྲོང་ལྷ་ས་སྔར་བཞིན་དཔྱིད་གསར་དུས་ཆེན་གྱི་དགའ་སྤྲོ་འཁོལ་བའི་རྣམ་པའི་ཁྲོད་དུ་གནས་ཡོད། ཕྱི་དྲོ་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་པད་མ་འཕྲིན་ལས་ཀྱིས་འཁོར་ཉུང་སྤྲོས་སྤོང་གི་ཐོག་ནས་དུས་ཆེན་རིང་ལས་གནས་བརྟན་སྲུང་བྱེད་མཁན་སྤྱི་བདེའི་མི་དམངས་ཉེན་རྟོག་པར་གཟིགས་པར་ཕེབས་པ་རེད།

    པད་མ་འཕྲིན་ལས་ཀྱིས་སྔ་རྗེས་སུ་ནོར་སྟོད་ལམ་དང་། པེ་ཅིང་ནུབ་ལམ། ཉང་བྲན་དཀྱིལ་ལམ། འཁར་རྔ་མདོང་ལམ་བཅས་ཀྱི་དམངས་ཕན་ཉེན་རྟོག་ཞབས་ཞུ་ས་ཚིགས་དང་པེ་ཅིང་དཀྱིལ་ལམ་མངགས་གཏོང་ཁང་དུ་ལས་རེས་སྒྲུབ་མཁན་མི་དམངས་ཉེན་རྟོག་པར་གཟིགས་པར་ཕེབས་པ་མ་ཟད། ཉེན་རྟོག་ཞབས་ཞུའི་ས་ཚིགས་ཀྱི་མི་སྣ་བཀོད་སྒྲིག་དང་། གོ་མཚོན། ཉེན་རྟོག་ལས་རེས་མི་སྣའི་སྡོད་བྱའི་གནས་ཚུལ་བཅས་བཀའ་འདྲི་ཞིབ་ཕྲ་གནང་བ་དང་ཉེན་རྟོག་ཞབས་ཞུ་ས་ཚིགས་ཀྱི་ཉེན་རྟོག་གི་སྣེ་ལེན་དང་ཡུལ་དངོས་ཀྱི་ཐག་གཅོད་བྱེད་ཚུལ་མཁྱེན་རྟོགས་གནང་བ་རེད།

    ཉེན་རྟོག་ཞབས་ཞུའི་ས་ཚིགས་སུ་ལས་རེས་སྒྲུབ་མཁན་མི་དམངས་ཉེན་རྟོག་པས་གོ་རིམ་ཡོད་པའི་སྒོ་ནས་གནད་དོན་ཐག་གཅོད་བྱེད་ཚུལ་གཟིགས་སྐབས་པད་མ་འཕྲིན་ལས་དགྱེས་ཚོར་ཆེན་པོ་བྱུང་བ་མ་ཟད་ཉེན་རྟོག་ཞབས་ཞུ་ས་ཚིགས་ཀྱི་མི་དམངས་ཉེན་རྟོག་པས་ལས་གནས་བརྟན་སྲུང་དང་འགན་འཁྲི་ནན་ཏན་ངང་སྒྲུབ་པར་ཁས་ལེན་གང་ལེགས་གནང་ཞིང་། ཁོང་གིས་ནང་མི་མཉམ་འཛོམས་ཀྱི་བཀྲ་ཤིས་པའི་ཉིན་མོ་འདིར་ཁྱེད་ཚོས་ཕྱོགས་གཅིག་གི་བདེ་འཇགས་སྲུང་ཆེད་ཚང་མའི་དོན་དུ་རང་ཁྱིམ་བློས་གཏོང་གིས་ལས་གནས་སྔར་བཞིན་བརྟན་སྲུང་བྱས་པར་རང་ཉིད་ཀྱིས་རང་སྐྱོང་ལྗོངས་ཏང་ཨུད་དང་སྲིད་གཞུང་དང་ལྗོངས་ཡོངས་ཀྱི་མི་རིགས་ཁག་གི་མི་དམངས་ཚོའི་ཚབ་ཞུས་ནས་ཁྱེད་རྣམ་པར་བླ་ན་མ་མཆིས་པའི་གུས་འདུད་དང་སྙིང་དབུས་ནས་ཐུགས་རྗེ་ཆེ་ཞུ་རྒྱུ་མ་ཟད། ཁྱེད་ཚོ་བརྒྱུད་དེ་ཁྱེད་ཚོར་བསམ་ཤེས་དང་རྒྱབ་སྐྱོར་བྱེད་མཁན་ནང་མི་ཚོར་ཡང་ལྷག་བསམ་ཟོལ་མེད་ཀྱི་ཐུགས་རྗེ་ཆེ་ཞུ་རྒྱུ་ཡིན་ཞེས་གསུངས་པ་རེད།

    གྲོང་ཁྱེར་དུ་ལས་མི་བྱེད་པར་ཡོང་བའི་ཅ་ཧྲི་ཀྲུང་དང་ཁྲེན་ཀྲུང་ཧྭ་གཉིས་པོའི་དབར་གྲོས་མཐུན་གྱི་རྩོད་གཞི་བྱུང་ནས་ལྷ་ཀླུ་ཟམ་པའི་དམངས་ཕན་ཉེན་རྟོག་ཞབས་ཞུའི་ས་ཚིགས་སུ་ཡོང་བས་ལས་རེས་སྒྲུབ་མཁན་མི་དམངས་ཉེན་རྟོག་པས་སྤྲོ་སེམས་འཁོལ་བའི་སྣེ་ལེན་ཞུས་པ་དང་མི་དམངས་ཉེན་རྟོག་པའི་ངང་རྒྱུད་རིང་བའི་བར་འདུམ་འོག་རྩོད་གཞི་བསལ་ནས་མཐར་ལག་པ་བཏང་སྟེ་འདུམ་མགྲིག་བྱུང་བ་རེད། པད་མ་འཕྲིན་ལས་ཀྱིས་གནས་ཚུལ་དེ་མཁྱེན་རྟོགས་བྱུང་སྐབས་དགྱེས་ཚོར་ཆེན་པོ་བྱུང་བ་དང་ཁོང་གིས་དམངས་ཕན་ཉེན་རྟོག་ཞབས་ཞུའི་ས་ཚིགས་ཀྱིས་བཙུགས་པའི་བཅའ་ཁྲིམས་ཀྱི་བློ་འདྲིའི་སྟེགས་བུ་དེས་མང་ཚོགས་ཚོའི་རྒྱུན་གཏན་གྱི་རྩོད་གཞི་སེལ་རྒྱུར་སྟབས་བདེ་ཧ་ཅང་ཆེན་པོ་བྱུང་བ་དེ་ཐོག་ནས་ཉེན་རྟོག་ཞབས་ཞུའི་ས་ཚིགས་ཀྱི་དམངས་ཕན་ཞབས་ཞུ་དང་། བརྟན་ལྷིང་སྲུང་སྐྱོང་། ཞི་མཐུན་བསྐྲུན་པ་བཅས་ཀྱི་གལ་ཆེའི་ནུས་པ་འདོན་སྤེལ་ཐུབ་ལུགས་མཚོན་གྱི་ཡོད་ཅེས་གསུངས་ཤིང་། ཁོང་གིས་རང་ལྗོངས་ཀྱི་སྤྱི་བདེ་སྡེ་ཚན་ལ་ཉེན་རྟོག་ཞབས་ཞུའི་ས་ཚིགས་ཀྱི་ནུས་པ་ཟམ་མི་ཆད་པར་འཐུས་སྒོ་ཚང་དུ་གཏོང་བ་དང་ཚོར་སྣང་སྐྱེན་པོའི་ནུས་པ་སྔར་བས་ཆེ་རུ་བཏང་སྟེ་སྤྱི་ཚོགས་ཀྱི་དོ་དམ་གསར་གཏོད་ལ་ཤུགས་སྣོན་བརྒྱབ་ནས་བོད་ཀྱི་སྤྱི་ཚོགས་ཡུན་རིང་བདེ་འཁོད་ཆེད་འགན་སྲུང་ནུས་ལྡན་བྱེད་དགོས་པ་དང་། ལམ་སྲོལ་འཐུས་ཚང་དུ་གཏོང་བ་དང་། སྔོན་ཚུད་ནས་ཉེན་བརྡ་བཏང་ནས་འཕྲལ་སྡོམ་ཐག་གཅོད་ཀྱི་ལམ་སྲོལ་འཐུས་སྒོ་ཚང་དུ་བཏང་སྟེ་རྒྱུན་གཏན་རང་བཞིན་གྱི་ཕྱོགས་བསྡུས་ནང་སྦྱོང་ལ་ཤུགས་སྣོན་རྒྱག་དགོས་པ། གསོ་སྦྱོང་བྱེད་ཤུགས་ཆེར་གཏོང་དང་འཇོན་ཐང་ཆེ་རུ་བཏང་ནས་དམག་ཉེན་དམངས་མཐུན་སྦྱོར་མཉམ་འགུལ་མཐའ་འཁྱོངས་ཀྱིས་བརྟན་ལྷིང་སྲུང་སྐྱོང་གི་ཤུགས་ཆེའི་མཉམ་ཤུགས་ཤིག་ཆགས་པ་བྱེད་དགོས་པ་བཅས་ཀྱི་བླང་བྱ་བཏོན་གནང་བ་དང་། ཁོང་གིས་ལྗོངས་ཡོངས་ཀྱི་རྒྱ་ཆེའི་སྤྱི་བདེ་མི་དམངས་ཉེན་རྟོག་པ་དང་དྲག་ཆས་ཉེན་རྟོག་དཔོན་དམག་ཚོར་དོགས་ཟོན་ཆེར་བསྐྱེད་དང་བག་ཟོན་ནན་པོ་བྱས་ནས་རང་ལྗོངས་ཀྱི་སྤྱི་ཚོགས་ཞི་མཐུན་བརྟན་ལྷིང་འགན་ལེན་དང་མི་རིགས་ཁག་གི་མང་ཚོགས་ཚོ་དགའ་སྤྲོ་འཆམ་མཐུན་གྱི་དཔྱིད་གསར་དུས་ཆེན་ཞིག་གཏོང་ཐུབ་པའི་འགན་ལེན་བྱེད་དགོས་པའི་ཐུགས་རེ་གནང་བ་རེད།