དཔྱིད་གསར་དུས་ཆེན་རིང་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཁྲེན་ཆོན་གོ་རང་སྐྱོང་ལྗོངས་བྱིས་པའི་ཕན་བདེ་ཁང་དུ་ཕེབས་ནས་དྭ་ཕྲུག་དང་དབང་པོ་སྐྱོན་ཅན་བྱིས་པ་དང་སློབ་གྲྭའི་དགེ་རྒན་དང་ལས་བཟོ་ཚོར་བྱམས་བརྩེའི་ངང་གཟིགས་པ་དང་འཚམས་འདྲི་གནང་ནས་ཁོང་ཚོར་དུས་ཆེན་གྱི་འཚམས་འདྲི་དང་དཔྱིད་གསར་གྱི་སྨོན་འདུན་ཞུས་པ།
2011ལོའི་ཟླ་མཆོད་དུས་ཆེན་ཉིན་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཁྲེན་ཆོན་གོས་རང་སྐྱོང་ལྗོངས་བྱིས་པའི་ཕན་བདེ་ཁང་དུ་ཕྲུ་གུ་ཚོར་གཟིགས་པར་ཕེབས་ཏེ་ཁོང་ཚོ་དང་མཉམ་དུ་ཟླ་མཆོད་དུས་ཆེན་དགའ་གཏོང་གནང་ཞིང་། དེ་ནས་ཞལ་གྱེས་མཚམས་སུ་ཁྲེན་ཆོན་གོས་ཕྲུ་གུ་ཚོར་2012ལོའི་དཔྱིད་གསར་དུས་ཆེན་ལ་གཟིགས་པར་ཕེབས་རྒྱུའི་ཞལ་བཞེས་གནང་བ་རེད། ཟླ་བ་འགའ་ཞིག་རིང་ཁྲེན་ཆོན་གོས་ཞལ་བཞེས་གནང་བ་དེ་ཐུགས་སུ་བརྟན་པོར་བཞག་གནང་ཡོད་ལ་ཕྲུ་གུ་ཚོའི་འཚོ་བར་ད་བར་ཐུགས་ཁུར་ཡང་གནང་གི་ཡོད་པ་རེད། དཔྱིད་གསར་དུས་ཆེན་རིང་ཁྲེན་ཆོན་གོས་ཞལ་བཞེས་གནང་བ་ལྟར་རང་སྐྱོང་ལྗོངས་བྱིས་པའི་ཕན་བདེ་ཁང་དུ་ཕྲུ་གུ་ཚོར་སླར་ཡང་གཟིགས་པར་ཕེབས་ཏེ་ཁོང་ཚོ་དང་མཉམ་དུ་དཔྱིད་གསར་དུས་ཆེན་དགའ་གཏོང་གནང་བ་རེད།
བོད་དམག་ཁུལ་ཁང་གི་ཆབ་སྲིད་ཨུ་ཡོན་ལང་ཡིའུ་ལེའང་དང་། རང་སྐྱོང་ལྗོངས་ཏང་ཨུད་ཀྱི་རྒྱུན་ལས་ཨུ་ཡོན་ལྷ་ས་གྲོང་ཨུད་ཀྱི་ཧྲུའུ་ཅི་ཆེ་དགྲ་ལྷ། རང་སྐྱོང་ལྗོངས་ཏང་ཨུད་ཀྱི་རྒྱུན་ལས་ཨུ་ཡོན་དྲུང་ཆེ་ཏེང་ཞའོ་ཀང་བཅས་གཟིགས་པར་ལྷན་དུ་ཕེབས་པ་རེད།
སྤོ་བོ་ཁྲེན་ལགས་ཕན་བདེ་ཁང་དུ་ཕེབས་རྒྱུ་ཡིན་པ་གོ་ཐོས་བྱུང་བའི་ཕྲུ་གུ་ཚོས་ཉིན་འདིར་ཞོགས་པ་སྔ་པོ་ནས་ཡར་ལངས་ཏེ་གྱོན་ཆས་གསར་པ་གྱོན་ནས་བྱིས་པའི་ཕན་བདེ་ཁང་གི་ཚོགས་ཁང་ནང་ཕེབས་སྒུག་ཞུས་ནས་ཡོད་ཅིང་། ཁྲེན་ཆོན་གོས་དེ་མ་ཉིད་དུ་ཕྲུ་གུ་ཚོའི་འཁྲིས་སུ་ཕེབས་ཏེ་ཕྲུ་གུ་ཚོའི་ལག་ནས་བཟུང་གནང་བ་དང་ཁོང་ཚོའི་མགོ་བོར་བྱིལ་བྱིལ་གནང་བཞིན་ཐུགས་བརྩེ་ཆེན་པོས་ཕྲུ་གུ་ཚོའི་འཚོ་བ་དང་སློབ་སྦྱོང་གི་གནས་ཚུལ་བཀའ་འདྲི་གནང་བ་རེད།
རང་ཉིད་ཀྱིས་པང་དུ་བཏབ་མྱོང་བའི་པད་སྒྲོན་ཆུང་བ་མདུན་གྲས་སུ་ཡོད་པ་གཟིགས་སྐབས་ཁྲེན་ཆོན་གོ་ཡིས་པད་སྒྲོན་གྱི་ལག་ཆུང་ནས་བཟུང་གནང་སྟེ “སྤོའོ་ང་ངོ་ཤེས་ཀྱི་འདུག་གམ། རང་འདི་ལོ་ལོ་བཞི་རུ་སླེབས་ཀྱི་ཡོད་པ་རེད་པ། དེ་རིང་དཔྱིད་གསར་དུས་ཆེན་ཡིན་པས་སྐྱིད་པོ་འདུག་གམ ”ཞེས་བཀའ་འདྲི་གནང་བས་པད་སྒྲོན་ཆུང་བས་ངོ་ཚ་སྨིན་པོས་མགོ་བོ་ལྕོག་ལྕོག་བྱས།
ཁྲེན་ཆོན་གོ་ཡིས་བརྩེ་བ་ཟབ་མོས་ཚང་མར “ཕྲུ་གུ་ཚོ། ཁྱེད་ཚོ་ཆུང་བྱིས་པའི་དུས་ནས་ཕ་མ་དང་ཁྱིམ་ཚང་དང་བྲལ་ནའང་ཁྱེད་ཚོ་གཅིག་པུ་མིན། ཁྱེད་ཚོར་བདེ་སྐྱིད་ལྡན་ཤོས་ཀྱི་ཁྱིམ་ཚང་ཞིག་ཡོད་པ་ནི་ང་ཚོའི་རླབས་ཆེན་མེས་རྒྱལ་རེད། ཁྱེད་ཚོར་དྲོ་སྐྱིད་ལྡན་ཤོས་ཀྱི་ཁྱིམ་ཚང་ཞིག་ཡོད་པ་ནི་ཁྱེད་ཚོའི་དགའ་སྐྱིད་ལྡན་པའི་ཕན་བདེ་ཁང་རེད། ཁྱེད་ཚོར་བྱམས་བརྩེ་ཆེ་ཤོས་ཀྱི་གཉེན་ཉེ་ཡོད་པ་ནི་ཁྱེད་ཚོར་དགའ་ཞེན་བྱེད་མཁན་དགེ་རྒན་དང་སྤྱི་ཚོགས་ཐོག་གི་བརྩེ་ལྡན་མི་སྣ་རེད། ཁྱེད་ཚོ་གྲོགས་པོ་ཆུང་ཆུང་གཞན་པ་ཚོ་དང་འདྲ་བར་དྲོ་སྐྱིད་ལྡན་པའི་མེས་རྒྱལ་ཁྱིམ་ཚང་ཆེན་པོའི་ནང་བདེ་ཐང་ངང་འཚར་ལོངས་ཡོང་ངེས་རེད ”ཅེས་གསུངས་པ་རེད།
ཁྲེན་ཆོན་གོ་ཡིས་ཕྲུ་གུ་ཚོར་གྱོན་ཆས་དང་། བཟའ་བཅའ། སློབ་ཆས་སོགས་གནང་བ་དང་ཆབས་ཅིག་ཚང་མར་སློབ་སྦྱོང་ཡག་པོ་ཉིན་བཞིན་ཡར་རྒྱས་ཡོང་བ་བྱས་ཏེ་ཕྱིས་སུ་སྤྱི་ཚོགས་རིང་ལུགས་བོད་ལྗོངས་གསར་པ་འཛུགས་སྐྲུན་བྱ་ཕྱིར་ལེགས་སྐྱེས་འབུལ་དགོས་པ་དང་རླབས་ཆེན་མེས་རྒྱལ་གྱི་རྐང་འཛིན་མི་སྣར་འགྱུར་བ་བྱེད་དགོས་ཞེས་ལྕག་སྐུལ་གནང་བ་རེད།
ཕྲུ་གུ་ཚོར་ཅའོ་ཙེ་ཚ་པོ་དང་བྲོ་བ་ཆེ་བའི་ཁ་ལག་ཟ་རྒྱུ་ཡོད་མེད་ལ་ཁྲེན་ཆོན་གོ་ཡིས་ཐུགས་ཁུར་ཆེན་པོ་གནང་ཞིང་། ཁོང་གིས་རང་སྐྱོང་ལྗོངས་བྱིས་པ་ཕན་བདེ་ཁང་གི་ཟ་ཁང་དུ་ཕེབས་ཏེ་དུས་ཆེན་རིང་ལྟོ་ཆས་གྲ་སྒྲིག་བྱས་ཚུལ་བཀའ་འདྲི་ཞིབ་ཕྲ་གནང་བ་རེད། ཅའོ་ཙེ་བཟོ་བའི་ཤ་རྣམས་གྲ་སྒྲིག་ཟིན་ལ་ཚལ་ཡང་ཕུན་སུམ་ཚོགས་པོ་ཡོད་པ་གཟིགས་རྗེས་ཁྲེན་ཆོན་གོ་ཐུགས་ལྷོད་ལ་བབས་ཤིང་། ཁོང་གིས་ཟ་ཁང་གི་མ་བྱན་ཚོར་ངེས་པར་དུ་གྲ་སྒྲིག་ཡག་པོ་བྱས་ནས་ཕྲུ་གུ་ཚོར་ལྟོ་གྲོད་པ་རྒྱགས་པ་དང་བཅུད་ལྡན་པ་ཞིག་བཟའ་རྒྱུ་ཡོང་བ་བྱེད་དགོས་ཞེས་བཀའ་མངགས་གནང་བ་རེད།
ཁྲེན་ཆོན་གོ་ཡིས་ད་དུང་རང་སྐྱོང་ལྗོངས་ཕན་བདེ་ཁང་གི་ལས་དོན་མི་སྣ་ཚོར་བྱམས་བརྩེའི་འཚམས་འདྲི་གནང་བར་ཕེབས་ཏེ་ཁོང་ཚོར་ཁྱེད་ཚོས་ཕྲུ་གུ་ཚོའི་ཆེད་དུ་རང་ཉིད་ཀྱི་ནང་མི་སྤུན་མཆེད་ཚོ་དང་འཛོམས་རྒྱུ་འདོར་བ་མ་ཟད། ད་དུང་ཕྲུ་གུ་ཚོར་ཡང་ལྷག་བསམ་རྣམ་དག་ངང་ལྟ་རྟོག་གནང་བར་ངས་སྙིང་དབུས་ནས་ཐུགས་རྗེ་ཆེ་ཞུ་རྒྱུ་ཡིན་ཞེས་གསུངས་པ་རེད།