ཉིན་ཤས་གོང་རང་སྐྱོང་ལྗོངས་དང་སི་ཁྲོན་ཞིང་ཆེན་གྱིས་ཁྲེང་ཏུར་འཐབ་ཇུས་མཉམ་ལས་སྒྲོམ་གཞིའི་གྲོས་མཐུན་ལ་མིང་རྟགས་བཀོད་ཅིང་། འདི་ནི་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་པད་མ་འཕྲིན་ལས་དང་སི་ཁྲོན་ཞིང་ཨུད་ཀྱི་ཧྲུའུ་ཅི་གཞོན་པ་ཧྲེང་ཀྲང་ཅང་ཅུས་ཧྥུང་ཁག་སོ་སོས་ཕྱོགས་གཉིས་པོའི་ཚབ་གནང་སྟེ་འཐབ་ཇུས་མཉམ་ལས་སྒྲོམ་གཞིའི་གྲོས་མཐུན་ལ་མིང་རྟགས་བཀོད་པའི་གནས་ཚུལ་ཡིན་པ།
ཉིན་ཤས་གོང་རང་སྐྱོང་ལྗོངས་དང་སི་ཁྲོན་ཞིང་ཆེན་གྱིས་ཁྲེང་ཏུར་འཐབ་ཇུས་མཉམ་ལས་སྒྲོམ་གཞིའི་གྲོས་མཐུན་ལ་མིང་རྟགས་བཀོད་པ་དེ་ཐོག་ནས་ཁྲོན་བོད་ཞིང་ཆེན་དང་རང་སྐྱོང་ལྗོངས་གཉིས་ཐོན་ཁུངས་མཉམ་སྤྱོད་དང་། ལེགས་ཆ་གསབ་རེས། གཉིས་ཁེ་གཉིས་ཕན། མཉམ་ལས་འཕེལ་རྒྱས་བཅས་ཀྱི་དུས་མཚམས་གསར་པར་བསྐྱོད་པ་དང་ཁྲོན་བོད་ཞིང་ཆེན་དང་རང་སྐྱོང་ལྗོངས་གཉིས་ཀྱིས་ཚན་རིག་དང་མཐུན་པའི་འཕེལ་རྒྱས་དང་། ཞི་མཐུན་བརྟན་ལྷིང་། མི་རིགས་མཐུན་སྒྲིལ། དམངས་འཚོ་ལེགས་གཏོང་བཅས་ཀྱི་ཆེད་ཐུན་མོང་ཐོག་འབད་བརྩོན་ཧུར་ཐག་བྱེད་པའི་ལེའུ་གསར་པ་ཞིག་ཕྱེ་བ་མཚོན་ཡོད།
མིང་རྟགས་བཀོད་པའི་མཛད་སྒོ་མ་འཚོག་གོང་ཕྱོགས་གཉིས་ཀྱིས་བཞུགས་མོལ་གནང་ཞིང་། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཁྲེན་ཆོན་གོ་དང་སི་ཁྲོན་ཞིང་ཨུད་ཀྱི་ཧྲུའུ་ཅི་ལིའུ་ཆི་པའོ་ཡིས་གསུང་བཤད་གནང་བ་དང་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་པད་མ་འཕྲིན་ལས་དང་སི་ཁྲོན་ཞིང་ཨུད་ཀྱི་ཧྲུའུ་ཅི་གཞོན་པ་ཧྲེང་ཀྲང་ཅང་ཅུས་ཧྥུང་ཁག་སོ་སོས་བོད་དང་སི་ཁྲོན་ཞིང་ཆེན་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་གནས་ཚུལ་ངོ་སྤྲོད་གནང་བ་རེད། རང་སྐྱོང་ལྗོངས་ཀྱི་འགོ་ཁྲིད་ལང་ཡིའུ་ལེའང་དང་། ཀྲོའུ་ཁྲུན་ལའེ། བདེ་སྐྱིད། ལིའུ་ཆིན་ཧུའེ་བཅས་དང་སི་ཁྲོན་ཞིང་ཆེན་གྱི་འགོ་ཁྲིད་ལི་ཁྲུན་ཁྲེང་དང་། ཝུའེ་ཧུང་། ཡེ་དབན་ཡུང་། ཁྲེན་ཀོང་ཀྲེ ལི་ཁྲུང་ཞི། ཝང་ཉིང་། ཧྥང་ཞའོ་ཧྥང་བཅས་བཞུགས་མོལ་ཚོགས་འདུ་དང་མིང་རྟགས་འགོད་པའི་མཛད་སྒོར་ཕེབས་པ་རེད། པད་མ་འཕྲིན་ལས་དང་ཅང་ཅུས་ཧྥུང་གིས་ཕྱོགས་གཉིས་ཀྱི་ཚབ་ཞུས་ཏེ་འཐབ་ཇུས་མཉམ་ལས་སྒྲོམ་གཞིའི་གྲོས་མཐུན་ལ་མིང་རྟགས་བཀོད་པ་རེད།
ཁྲེན་ཆོན་གོས་གསུང་བཤད་གནང་སྐབས་བོད་རང་སྐྱོང་ལྗོངས་ཏང་ཨུད་དང་སྲིད་གཞུང་དང་ལྗོངས་ཡོངས་ཀྱི་མི་རིགས་ཁག་གི་མི་དམངས་ཁྲི་300ཡི་ཚབ་ཞུས་ཏེ་སི་ཁྲོན་ཞིང་ཆེན་གྱིས་བོད་ཀྱི་ལས་དོན་ལ་མཐོང་ཆེན་དང་ཐུགས་ཁུར་དང་ཡུན་རིང་ནང་བོད་ལ་རྒྱབ་སྐྱོར་དང་རོགས་རམ་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན། སི་ཁྲོན་ཞིང་ཆེན་གྱིས་བློ་མཐུན་ཧུའུ་ཅིན་ཐའོ་ཡིས་སྤྱི་ཁྱབ་ཧྲུའུ་ཅི་གནང་བའི་ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག་ཞིང་ཆེན་དེ་ཡོངས་ཀྱི་གོང་འོག་ཚང་མས་དཀའ་སྤྱད་འབད་བརྩོན་དང་འབད་འབུངས་ལྷོད་མེད་བྱས་པ་བརྒྱུད་ཡོམ་འགོག་གེགས་སེལ་དང་སླར་གསོ་བསྐྱར་སྐྲུན་གྱི་རྒྱལ་ཁ་གལ་ཆེན་ཐོབ་པ་དང་དཔལ་འབྱོར་དང་སྤྱི་ཚོགས་འཕེལ་རྒྱས་ཐད་སྐྱེ་བོ་ཀུན་གྱིས་དོ་སྣང་བྱེད་པའི་འོད་སྟོང་འབར་བའི་གྲུབ་འབྲས་ཐོབ་པར་སྤྲོ་སེམས་འཁོལ་བའི་སྨོན་འདུན་ཞུ་རྒྱུ་ཡིན་ཞེས་གསུངས་པ་རེད།
ལིའུ་ཆི་པའོ་ཡིས “5·12”དབུན་ཁྲོན་དུ་ས་ཡོམ་ཆེན་པོ་བརྒྱབ་རྗེས་བོད་ཀྱིས་སི་ཁྲོན་གྱི་ཡོམ་འགོག་གེགས་སེལ་དང་གེགས་རྗེས་སླར་གསོ་བསྐྱར་སྐྲུན་གྱི་ལས་དོན་ལ་སྒེར་སེམས་མེད་པའི་རོགས་སྐྱོར་དང་ཤུགས་ཆེའི་རྒྱབ་སྐྱོར་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན་ཞེས་གསུངས་པ་རེད།