ཟླ་1ཚེས་16ཉིན་གྱི་སྔ་དྲོ་ལྗོངས་ཡོངས་ཀྱི་སྤྱི་བདེའི་ལས་དོན་ཚོགས་འདུ་དེ་ལྷ་སར་འཚོགས་ནས་རྒྱལ་ཡོངས་ཀྱི་སྤྱི་བདེ་ཐིང་ཀྲང་དང་ཅུས་ཀྲང་ཚོགས་འདུའི་དགོངས་དོན་བརྒྱུད་བསྒྲགས་སློབ་སྦྱོང་བྱས་པ་དང་ལྗོངས་ཡོངས་ཀྱི་སྤྱི་བདེ་ལས་ཁུངས་ཀྱི་2011ལོའི་ལས་དོན་གྱི་དཔྱད་ཞིབ་དཔྱད་བསྡུར་གནས་ཚུལ་བརྡ་ཁྱབ་བཏང་བ་མ་ཟད། འདི་ལོའི་ལྗོངས་ཡོངས་ཀྱི་སྤྱི་བདེའི་ལས་དོན་བཀོད་སྒྲིག་ཀྱང་བྱས་པ་རེད། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་སྲིད་ཁྲིམས་ཨུ་ཡོན་ལྷན་ཁང་གི་ཧྲུའུ་ཅི་ཧའོ་ཕུང་ཕེབས་པ་མ་ཟད་གསུང་བཤད་ཀྱང་གནང་བ་རེད།

    ཧའོ་ཕུང་གིས་གསུང་བཤད་གནང་སྐབས་2011ལོ་ནི་བོད་ཀྱི་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ལ་སྐུལ་འདེད་གཏོང་བའི་ལོ་རྒྱུས་འཕེལ་རིམ་ཁྲོད་ཀྱི་སྤྱིར་བཏང་མིན་པའི་ལོ་གཅིག་ཡིན་པས་ལྗོངས་ཡོངས་ཀྱི་རིམ་ཁག་སྤྱི་བདེ་ལས་ཁུངས་དང་ད་ལྟ་དམག་སྐུལ་དང་ལེན་ཞུ་བཞིན་པའི་སྤྱི་བདེའི་དཔུང་སྡེས་ཀྲུང་དབྱང་གི་བཀོད་སྒྲིག་བླང་བྱ་ལག་བསྟར་དོན་འཁྱོལ་ནན་ཏན་བྱེད་པ་དང་ལྗོངས་ཏང་ཨུད་དང་། སྲིད་གཞུང་། སྤྱི་བདེ་པུའུ་བཅས་ཀྱི་སྲ་ཞིང་བརྟན་པའི་འགོ་ཁྲིད་འོག་བརྟན་ལྷིང་ནི་ཐམས་ཅད་ལས་ལྷག་པའི་བསམ་བློ་བརྟན་པོ་བཙུགས་ཏེ་རང་ཉིད་ཀྱིས་མ་བྱས་ན་སུས་བྱེད་བསམ་པ་དང་བསྟུད་མར་དམག་འཐབ་རྒྱག་པའི་སྙིང་སྟོབས་ཐོག་ནས་བརྟན་ལྷིང་དང་འབྲེལ་བ་ཡོད་པའི་ཉེན་ཁ་དང་འགྲན་སློང་རབ་དང་རིམ་པར་བབ་བརླིང་ཁ་གཏད་ཧུར་ཐག་བཅག་ནས་བོད་ཞི་བས་བཅིངས་འགྲོལ་བཏང་ནས་ལོ་60འཁོར་བའི་རྟེན་འབྲེལ་མཛད་སྒོའི་བདེ་འཇགས་འགན་ལེན་ལས་དོན་ཕུན་སུམ་ཚོགས་པོའི་ངང་ལེགས་སྒྲུབ་བྱས་ཡོད་ཅེས་གསུངས་པ་རེད།

    ཧའོ་ཕུང་གིས་མིག་སྔར་རང་ལྗོངས་ཀྱི་ཁ་ཕྲལ་ལ་ངོ་རྒོལ་བྱེད་པའི་འཐབ་རྩོད་དེ་ཪྙོག་འཛིང་ཧ་ཅང་ཆེ་བའི་དུས་མཚམས་གསར་པར་སླེབས་པ་དང་རང་ལྗོངས་ཀྱི་བརྟན་ལྷིང་ལ་ཤུགས་རྐྱེན་ཐེབས་པའི་རྒྱུ་རྐྱེན་སྔར་བས་སྣ་མང་དང་། སྔར་བས་ཪྙོག་འཛིང་། སྔར་བས་མངོན་གསལ་དོད་པོ་བཅས་ཡོད། ལྗོངས་ཡོངས་ཀྱི་རིམ་ཁག་སྤྱི་བདེ་ལས་ཁུངས་དང་ད་ལྟ་དམག་སྐུལ་དང་ལེན་ཞུ་བཞིན་པའི་སྤྱི་བདེའི་དཔུང་སྡེས་རྒྱལ་ཡོངས་ཀྱི་སྲིད་ཁྲིམས་ལས་དོན་ཚོགས་འདུ་དང་རྒྱལ་ཡོངས་ཀྱི་སྤྱི་བདེ་ཐིང་ཀྲང་དང་ཅུས་ཀྲང་ཚོགས་འདུའི་དགོངས་དོན་ལག་བསྟར་ནན་ཏན་བྱེད་པ་དང་ལྗོངས་ཡོངས་ཀྱི་སྲིད་ཁྲིམས་ཀྱི་བརྟན་ལྷིང་སྲུང་སྐྱོང་གི་ཕྱོགས་བསྡུས་ལས་དོན་ཚོགས་འདུའི་བཀོད་སྒྲིག་དང་བླང་བྱ་གཞིར་བཟུང་བདེ་སྡོད་ཉེན་བསམ་དང་རང་འགུལ་ངང་ཕར་རྒོལ་བྱས་ནས་སྔ་ཙམ་དམ་འཛིན་དང་། ཆུང་ས་ནས་དམ་འཛིན། དམ་འཛིན་མགྱོགས་པོ། དམ་འཛིན་ཡག་པོ་བཅས་བྱ་རྒྱུར་གཞི་བཙུགས་ཏེ་བོད་ཀྱི་བརྟན་ལྷིང་སྲུང་སྐྱོང་ཡག་པོ་དང་རྒྱལ་ཁབ་ཀྱི་བདེ་འཇགས་ལས་དོན་ཁག་འགན་ལེན་ཏན་ཏིག་བྱེད་དགོས་པའི་ནན་བཤད་གནང་བ་རེད།

    ཧའོ་ཕུང་གིས་བདེ་འཇགས་དང་ཞི་མཐུན་བརྟན་ལྷིང་མཐའ་གཅིག་ཏུ་ཡོང་རྒྱུ་དམིགས་ཚད་དུ་བྱས་ནས་ཏང་གི་ཚོགས་ཆེན་བཅོ་བརྒྱད་པ་རྒྱལ་ཁའི་ངང་སྐོང་ཚོགས་བྱ་རྒྱུར་ཞི་མཐུན་བརྟན་ལྷིང་གི་སྤྱི་ཚོགས་ཁོར་ཡུག་ཅིག་གཏོད་རྒྱུའི་ལས་འགན་ཨང་དང་པོ་དེ་ཕུན་སུམ་ཚོགས་པོའི་ངང་ལེགས་འགྲུབ་ཡོང་བ་བྱེད་དགོས་པ་དང་། མི་དམངས་ལ་ཞབས་འདེགས་ཞུ་བ་དང་ཉེས་གསོག་ལ་རྡུང་རྡེག་གཏོང་རྒྱུ་འགན་འཁྲི་ཨང་དང་པོར་བརྩིས་ནས་སྤྱི་ཚོགས་དོ་དམ་གྱི་དཀའ་གནད་ནུས་ཤུགས་ཡོད་རྒུས་སེལ་བ་དང་། སྤྱི་བདེའི་འགན་ནུས་ལ་གཞི་ཚུགས་པ། རྨང་གཞིའི་ལས་དོན་སྒྲུབ་ཤུགས་ཆེ་རུ་གཏོང་བ་བཅས་བྱས་ནས་ཚན་རིག་དང་མཐུན་པའི་འཕེལ་རྒྱས་དང་མཆོང་སྐྱོད་ལྟ་བུའི་འཕེལ་རྒྱས་ལ་སྐུལ་འདེད་གཏོང་རིང་སྤྱི་ཚོགས་དོ་དམ་ཁྱབ་ཁོངས་ཀྱི་གནད་དོན་མངོན་གསལ་དོད་པོ་ཐག་གཅོད་བྱེད་པ་དང་ཁ་ཕྲལ་ལ་ངོ་རྒོལ་བྱེད་པའི་འཐབ་རྩོད་གཏིང་ཟབ་ཏུ་གཏོང་བ་དང་བརྟན་ལྷིང་སྲུང་སྐྱོང་གི་ལས་དོན་ལ་ཤུགས་སྣོན་རྒྱག་རིང་སྤྱི་ཚོགས་དོ་དམ་ལས་དོན་གྱི་བྱ་ཐབས་འཐུས་སྒོ་ཚང་དུ་གཏོང་བའི་ཐོག་ནས་སྤྱི་པའི་བདེ་འཇགས་དོ་དམ་ཁྱོན་ཡོངས་ལ་ཁྱབ་པ་དང་། གྲོང་ཁྱེར་དྲ་བ་ཅན་དུ་འགྱུར་བའི་དོ་དམ་ལ་ཕན་འབྲས་དངོས་ཐོན་པ་བྱེད་པ། དྲ་བའི་བདེ་འཇགས་དེ་ཆུ་ཚད་ཐོག་སླེབས་པ་བཅས་བྱེད་དགོས་པ། ཚན་ཁག་དམ་འཛིན་ཡག་པོ་དང་དཔུང་ཁག་གི་སྣེ་ཡག་པོ་ཁྲིད་རྒྱུ་དེ་གལ་ཆེའི་ནང་གི་གལ་ཆེར་བརྩིས་ནས་སྤྱི་བདེའི་དཔུང་ཁག་གི་དམག་འཐབ་ནུས་པ་སྒོ་ཀུན་ནས་ཆེ་རུ་གཏོང་དགོས་པ། སྔར་བས་དཔའ་ངར་ཆེར་བསྐྱེད་ཀྱི་བསམ་པའི་ཉམས་འགྱུར་དང་འབད་འབུངས་ཡར་བརྩོན་གྱི་ཞུམ་མེད་སྤྱོད་ཚུལ་ཐོག་ནས་ཁ་ཕྲལ་ལ་ངོ་རྒོལ་དང་བརྟན་ལྷིང་སྲུང་སྐྱོང་གི་རང་འགུལ་དམག་འཐབ་ཡག་པོ་བརྒྱབ་སྟེ་རང་ལྗོངས་ཀྱི་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ལ་སྐུལ་མ་གཏོང་ཆེད་ལེགས་སྐྱེས་གསར་པ་སྔར་བས་ཆེ་བ་འབུལ་དགོས་པ་བཅས་ཀྱི་བླང་བྱ་བཏོན་གནང་བ་རེད།