ཟླ་1ཚེས་9ཉིན་རང་སྐྱོང་ལྗོངས་སྲིད་གྲོས་སྐབས་དགུ་པའི་ཚོགས་འདུ་ཐེངས་ལྔ་པར་ཞུགས་མཁན་ཨུ་ཡོན་ཚོས་སྲིད་གཞུང་གི་ལས་དོན་སྙན་སྒྲོན་དང་། འཆར་གཞིའི་སྙན་སྒྲོན། སྔོན་རྩིས་སྙན་སྒྲོན། སྲིད་གྲོས་ཀྱི་གྲོས་ཆོད (འཆར་ཟིན )ཁག་གཉིས་བཅས་ལ་དམིགས་ནས་ཚོགས་ཆུང་ཁག་བགོས་ཀྱི་གྲོས་བསྡུར་གནང་བ་རེད།
རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་དང་། རང་སྐྱོང་ལྗོངས་སྲིད་གྲོས་ཏང་ཙུའུ་ཡི་ཧྲུའུ་ཅི། རང་སྐྱོང་ལྗོངས་ཏང་ཨུད་འཐབ་ཕྱོགས་གཅིག་གྱུར་པུའི་པུའུ་ཀྲང་བཅས་ཡིན་པའི་མགོན་པོ་བཀྲ་ཤིས་དང་རང་སྐྱོང་ལྗོངས་སྲིད་གྲོས་ཀྱི་ཀྲུའུ་ཞི་གཞོན་པ་པ་སངས་དོན་གྲུབ་དང་། སྒྲུབ་ཁང་ཐུབ་བསྟན་མཁས་གྲུབ། ཅིན་དབྱི་མིང་། ཆའོ་ཡོན་ཀྲུང་། ལིའུ་ཆིང་ཧུའེ། རྫོང་ལོ་བྱམས་པ་མཁས་གྲུབ། ས་ལུང་ཕུན་ལགས་བཅས་ལས་རིགས་ཁག་གི་ཚོགས་ཆུང་གྲོས་བསྡུར་ནང་ཞུགས་པ་རེད།
ཚོགས་ཆུང་ཁག་བགོས་ཀྱི་གྲོས་བསྡུར་བྱ་ཡུལ་དུ་རིམ་གྲས་ཁག་གི་ཨུ་ཡོན་ཚོས་ཀྲུའུ་ཞི་པད་མ་འཕྲིན་ལས་ཀྱིས་གནང་བའི་སྲིད་གཞུང་གི་ལས་དོན་སྙན་སྒྲོན་ནི་ཏང་གི་སྐབས་བཅུ་བདུན་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་དྲུག་པ་དང་ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ལྔ་པའི་དགོངས་དོན་དང་ཀྲུང་དབྱང་གི་དཔལ་འབྱོར་ལས་དོན་ཚོགས་འདུའི་དགོངས་དོན་ལ་དམ་པོར་དམིགས་ནས་ལུགས་མཐུན་གཞུང་དྲང་ངང་2011ལོའི་ལས་དོན་དང་གྲུབ་འབྲས་ལ་ཕྱོགས་སྡོམ་དང་། དངོས་ཐོག་བདེན་འཚོལ་ངང་ལྷག་པའི་གནད་དོན་མཚོན་པ། ཚན་རིག་དང་ལུགས་དང་མཐུན་པའི་ངང་འདི་ལོའི་ལས་དོན་བཀོད་སྒྲིག་བཅས་བྱས་ཡོད་པས་མཛུབ་ཁྲིད་རང་བཞིན་དང་བཀོལ་སྤྱོད་རང་བཞིན་ཧ་ཅང་ཆེན་པོ་ལྡན་ཁར་མི་སེམས་ལ་ངར་ཤུགས་འཕེལ་བ་དང་བློ་སྟོབས་ལ་ལྕག་སྐུལ་ཐེབས་པ་ཞིག་ཡོད་པས་རྦད་དེ་མོས་མཐུན་ཡོད་ཅེས་ངོས་འཛིན་མགྲིན་གཅིག་ཏུ་གནང་བ་རེད།
ཨུ་ཡོན་ཚོས་འདས་ཟིན་པའི་ལོ་གཅིག་ནི “ལོ་ལྔ་ཚན་བཅུ་གཉིས་པའི ”འཆར་འགོད་འགོ་ཚུགས་ཀྱི་ལོ་ཞིག་ཡིན་ཞིང་། རང་ལྗོངས་ཀྱིས་ཏང་ཀྲུང་དབྱང་གི་བྱམས་བརྩེའི་ཐུགས་ཁུར་དང་རྒྱལ་ཡོངས་མི་དམངས་ཀྱི་སྒེར་སེམས་མེད་པའི་རོགས་སྐྱོར་དང་རང་སྐྱོང་ལྗོངས་ཏང་ཨུད་ཀྱི་འགྱུར་མེད་སྟོབས་ལྡན་གྱི་འགོ་ཁྲིད་འོག “ལྟེ་བ་གཅིག ”དང “དོན་ཆེན་གཉིས ”“འགན་ལེན་བཞི ”བཅས་ལ་དམ་པོར་དམིཌ་ནས་ཐབས་བརྒྱ་ཇུས་སྟོང་ངང་འཕེལ་རྒྱས་ལ་དམ་འཛིན་དང་། འཕེལ་རྒྱས་གཏོང་སྟངས་བསྒྱུར་བ། བརྟན་ལྷིང་འགན་ལེན། ཞི་མཐུན་ལ་སྐུལ་འདེད། གསོན་ཤུགས་ཆེ་རུ་གཏོང་བ། དམངས་འཚོར་ཕན་འདོགས་པ་བཅས་བྱས་པ་དང “ཐོན་ལས་དང་པོ་གོང་མཐོར་གཏོང་བ་དང་། ཐོན་ལས་གཉིས་པ་རྒྱ་ཆེར་གཏོང་བ། ཐོན་ལས་གསུམ་པ་སྟོབས་ཆེར་གཏོང་བ ”བཅས་ཀྱི་དཔལ་འབྱོར་འཕེལ་རྒྱས་ཀྱི་འཐབ་ཇུས་ལ་དམ་པོར་དམིགས་ནས་བདེ་སྡོད་ལས་བརྩོན་མངོན་གསལ་དོད་པོ་ཡོང་བ་བྱས་པས་ཞིང་འབྲོག་མང་ཚོགས་ཀྱི་ཐོན་སྐྱེད་དང་འཚོ་བའི་ཆ་རྐྱེན་རྒྱུན་མཐུད་ངང་ལེགས་སུ་ཕྱིན་པ་དང་། མ་འཇོག་དང་འཛད་སྤྱོད་ལ་དམ་འཛིན་ནན་པོ་བྱས་པས་དཔལ་འབྱོར་འཕར་བའི་སྒུལ་ཤུགས་དེ་བས་ཆེ་རུ་ཕྱིན་པ། རྒྱ་སྟོབས་ཆེ་རུ་གཏོང་རྒྱུ་མཐའ་འཁྱོངས་བྱས་པས་ཁྱད་ལྡན་ལེགས་ཆའི་ཐོན་ལས་མགྱོགས་མྱུར་འཕེལ་རྒྱས་ཕྱིན་པ། དམངས་འཚོ་སྔོན་དུ་བྱ་རྒྱུར་ཤུགས་སྣོན་བརྒྱབ་པས་སྤྱི་པའི་ཞབས་ཞུའི་ཆུ་ཚད་ཚད་གཞི་ཆེན་པོས་མཐོ་རུ་ཕྱིན་པ། དྭངས་ཤིང་གཙང་བའི་རི་ཆུ་ཀླུང་གསུམ་སྲུང་སྐྱོང་བྱས་པས་སྣོད་བཅུད་འཛུགས་སྐྱོང་དང་ཁོར་ཡུག་སྲུང་སྐྱོང་ལ་བརྟན་པོའི་ངང་སྐུལ་འདེད་གཏོང་ཐུབ་པ་བྱུང་བ། ཡུན་རིང་བདེ་འཁོད་དང་ཞི་མཐུན་བརྟན་ལྷིང་གི་དུས་བབ་བཟང་པོ་རྒྱུན་ཆད་མེད་པར་སྲ་བརྟན་དུ་འགྲོ་རྒྱུར་སྐུལ་འདེད་ཐུབ་པ། ཡོམ་འགོག་གེགས་སེལ་གྱི་ལས་དོན་ལ་རྒྱལ་ཁ་གལ་ཆེན་ཐོབ་པ་བཅས་བྱུང་ནས་རང་སྐྱོང་ལྗོངས་མི་དམངས་འཐུས་ཚོགས་སྐབས་དགུ་པའི་ཚོགས་འདུ་ཐེངས་བཞི་པའི་ཐོག་གཏན་འཁེལ་བྱས་པའི་དམིགས་ཚད་དང་ལས་འགན་ཁག་ཕུན་སུམ་ཚོགས་པོའི་ངང་ལེགས་གྲུབ་བྱུང་སྟེ “ལོ་ལྔ་ཚན་བཅུ་གཉིས་པའི ”འཆར་འགོད་འགོ་ཚུགས་མ་ཐག་རྒྱལ་ཁ་ཐོབ་ཡོད་ཅེས་གསུངས་པ་རེད།
འདི་ལོའི་ལས་དོན་སྐོར་གླེང་སྐབས་ཨུ་ཡོན་ཚོས་འདི་ལོ་ནི “ལོ་ལྔ་ཚན་བཅུ་གཉིས་པའི ”འཆར་འགོད་ཁྱོན་ཡོངས་ནས་ལག་བསྟར་དང་རང་སྐྱོང་ལྗོངས་ཏང་གི་འཐུས་མི་ཚོགས་ཆེན་ཐེངས་བརྒྱད་པའི་དགོངས་དོན་དོན་འཁྱོལ་བྱེད་པའི་གལ་ཆེའི་ལོ་ཞིག་ཡིན་པས་འདི་ལོའི་ལས་དོན་ཡག་པོ་བསྒྲུབ་རྒྱུ་ནི་ཧ་ཅང་གལ་འགངས་ཆེ་བ་ཞིག་ཡིན། སྲིད་གཞུང་གི་ལས་དོན་སྙན་སྒྲོན་ནང་ཕྱོགས་ལྔའི་ཐད་ཀྱི་ལས་འགན་གཙོ་བོ་གླེང་ཡོད་པ་དང་འབད་བརྩོན་གྱི་ཁ་ཕྱོགས་དང་སྟབས་བསྟུན་གྱི་སྲིད་ཇུས་དང་བྱ་ཐབས་བཏོན་ཡོད་པ་དེ་ནི་ང་ཚོས་སླད་ཕྱིན་འབད་འཐབ་ཧུར་ཐག་བྱེད་པའི་ཁ་ཕྱོགས་དང་རྒྱུན་ཆད་མེད་པར་མདུན་སྐྱོད་བྱེད་པའི་སྒུལ་ཤུགས་ཤིག་ཡིན་ཞེས་གཅིག་རྗེས་གཉིས་མཐུད་ངང་གསུངས་པ་རེད།