མིག་སྔར་རང་སྐྱོང་ལྗོངས་མི་དམངས་སྲིད་གཞུང་དང་ཀྲུང་གོ་རང་བྱུང་སོལ་རླངས་ཚོགས་པ་ཀུང་སིའི་དབར 《བོད་ཀྱི་རང་བྱུང་སོལ་རླངས་མཁོ་འདོན་གྱི་འབྲེལ་ཡོད་ལས་དོན་གྱི་གྲོས་མཐུན 》བཞག་ཅིང་། འདི་ནི་གྲོས་མཐུན་བཞག་པའི་མཛད་སྒོ་འཚོག་སའི་གནས་ཚུལ་ཡིན་པ།
རང་ལྗོངས་ཀྱི་ནུས་རྒྱུའི་འཛད་སྤྱོད་གྲུབ་ཆ་ལེགས་སུ་བཏང་ནས་ལྷ་ས་གྲོང་ཁྱེར་གྱི་རང་བྱུང་སོལ་རླངས་མཁོ་འདོན་འགན་ལེན་བྱ་ཆེད་ཉེ་ཆར་རང་སྐྱོང་ལྗོངས་མི་དམངས་སྲིད་གཞུང་དང་ཀྲུང་གོ་རྡོ་སྣུམ་རང་བྱུང་སོལ་རླངས་ཚོགས་པ་ཀུང་སིའི་དབར 《བོད་དུ་རང་བྱུང་སོལ་རླངས་མཁོ་འདོན་གྱི་འབྲེལ་ཡོད་ལས་དོན་གྱི་མཉམ་ལས་གྲོས་མཐུན 》བཞག་པ་རེད།
རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཁྲེན་ཆོན་གོ་དང་། ཀྲུང་གོ་རྡོ་སྣུམ་རང་བྱུང་སོལ་རླངས་ཚོགས་པ་ཀུང་སིའི་ཏུང་ཧྲི་ཀྲང་ཏང་ཙུའི་ཧྲུའུ་ཅི་ཅང་ཅེ་མིང་། རང་སྐྱོང་ལྗོངས་ཏང་ཨུད་ཀྱི་རྒྱུན་ལས་ཧྲུའུ་ཅི་གཞོན་པ་ཧའོ་ཕུང་། རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་ལྷ་ས་གྲོང་ཨུད་ཀྱི་ཧྲུའུ་ཅི་ཆེ་དགྲ་ལྷ། རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་རྩ་འཛུགས་པུའི་པུའུ་ཀྲང་ལེའང་ཐེན་ཀེང་བཅས་གྲོས་མཐུན་བཞག་པའི་མཛད་སྒོར་ཕེབས་ཡོད། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་པད་མ་འཕྲིན་ལས་དང་ཀྲུང་གོ་རྡོ་སྣུམ་རང་བྱུང་སོལ་རླངས་ཚོགས་པ་ཀུང་སིའི་སྤྱི་ཁྱབ་ཅིང་ལི་ཀྲོའུ་ཅི་ཕིང་རྣམ་གཉིས་ཀྱིས་ཕྱོགས་གཉིས་པོའི་ཚབ་ཞུས་ནས་གྲོས་མཐུན་བཞག་གནང་བ་རེད།
གྲོས་མཐུན་བཞག་པའི་མཛད་སྒོ་མ་འཚོག་གོང་ཕྱོགས་གཉིས་པོས་ལས་ཀའི་ཐད་གྲོས་མོལ་གནང་བ་རེད།
ཁྲེན་ཆོན་གོས་ཀྲུང་གོ་རྡོ་སྣུམ་རང་བྱུང་སོལ་རླངས་ཚོགས་པ་ཀུང་སིས་ཡུན་རིང་ནང་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་ཤུགས་ཆེའི་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ་དང་ཀྲུང་གོ་རྡོ་སྣུམ་རང་བྱུང་སོལ་རླངས་ཚོགས་པ་ཀུང་སིར་གཡུར་ཟའི་གྲུབ་འབྲས་ཐོབ་པ་དང་རྒྱལ་དམངས་དཔལ་འབྱོར་ཆེད་མངོན་གསལ་དོད་པའི་ལེགས་སྐྱེས་ཕུལ་བར་གུས་བཀུར་ཞུས་གནང་ཁར་བོད་མི་དམངས་ལ་ཀྲུང་གོ་རྡོ་སྣུམ་རང་བྱུང་སོལ་རླངས་ཚོགས་པ་ཀུང་སིས་མཛའ་བརྩེ་ཟབ་མོ་བཅངས་ཏེ་ལྷ་སའི་དྲོད་རླངས་མཁོ་འདོན་ལས་གྲྭར་རྒྱབ་སྐྱོར་གནང་བར་གུས་འདུད་ཞུས་པ་རེད།
ཁྲེན་ཆོན་གོས་ལྷ་སར་དགུན་དུས་སུ་དྲོད་རླངས་མཁོ་འདོན་བྱ་རྒྱུ་ནི་ལོ་མང་རིང་བོད་ལ་འཕྲད་པའི་དཀའ་གནད་ཅིག་ཡིན་པ་མ་ཟད། རྒྱ་ཆེའི་གྲོང་མི་ཚོས་སྐོམ་པས་ཆུ་འདོད་པ་ལྟར་རེ་སྒུག་བྱེད་པའི་དོན་ཆེན་ཞིག་ཀྱང་ཡིན་པ་དང་དེ་ནི་མི་རིགས་ཁག་གི་མི་དམངས་མང་ཚོགས་ཀྱི་བདེ་སྐྱིད་དང་འབྲེལ་བ་ཡོད་པའི་དམངས་འཚོའི་འདུ་འགོད་ཅིག་ཡིན་པ་མ་ཟད་ཞི་མཐུན་བརྟན་ལྷིང་ལ་སྲུང་སྐྱོང་བྱ་རྒྱུར་ཕན་པ་ཡོད་པའི་དམངས་སེམས་འདུ་འགོད་ཅིག་ཀྱང་ཡིན་ཞིང་། མིག་སྔར་དགུན་དུས་སུ་དྲོད་རླངས་མཁོ་འདོན་བྱ་རྒྱུའི་ལས་དོན་གྱི་འཕེལ་རིམ་བདེ་བླག་བྱུང་ནས་འདི་ལོ་དགུན་ཁ་ལྷ་ས་གྲོང་ཁྱེར་གྱི་ཁྱིམ་ཚང་40%ལ་དྲོད་རླངས་མཁོ་འདོན་བྱ་རྒྱུའི་དམིགས་ཚད་མངོན་འགྱུར་ཡོང་རེ་ཡོད་པར་བརྟེན་ཀྲུང་གོ་རྡོ་སྣུམ་རང་བྱུང་སོལ་རླངས་ཚོགས་པ་ཀུང་སིས་རོགས་སྐྱོར་བྱེད་ཤུགས་སྔར་བས་ཆེ་རུ་བཏང་སྟེ་རང་བྱུང་སོལ་རླངས་སྤུས་ལེགས་འདང་ངེས་མཁོ་འདོན་བྱེད་རྒྱུའི་འགན་ལེན་བྱས་ནས་བོད་ཀྱི་མི་རིགས་ཁག་གི་མི་དམངས་ལ་ཏང་དང་སྲིད་གཞུང་གི་དྲོ་སྐྱིད་ཚོར་ཐུབ་པ་བྱེད་རྒྱུའི་རེ་བ་ཞུ་རྒྱུ་དང་ཕྱོགས་མཚུངས་ཀྲུང་གོ་རྡོ་སྣུམ་རང་བྱུང་སོལ་རླངས་ཚོགས་པ་ཀུང་སིས་བོད་དུ་འཕེལ་རྒྱས་གཏོང་བའི་གོམ་སྟབས་མགྱོགས་སུ་བཏང་སྟེ་ལེགས་ཆ་ཕན་གསབ་བྱེད་པ་དང་། མཉམ་ལས་བྱེད་ཟབ་ཏུ་གཏོང་བ། ཆུ་ཚད་མཐོ་རུ་གཏོང་བ། གཞི་ཁྱོན་ཆེ་རུ་གཏོང་བ་བཅས་བྱས་ཐོག་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་དང་ཁེ་ལས་རྒྱ་སྟོབས་ཆེ་རུ་གཏོང་རྒྱུར་རོགས་རམ་བྱས་ནས་གཉིས་ཁེ་གཉིས་ཕན་མངོན་འགྱུར་ཡོང་རྒྱུའི་ཐུགས་རེ་གནང་བ་རེད།
ཅང་ཅེ་མིང་གིས་ཀྲུང་གོ་རྡོ་སྣུམ་རང་བྱུང་སོལ་རླངས་ཚོགས་པ་ཀུང་སིའི་འཕེལ་རྒྱས་ཀྱི་གནས་ཚུལ་ངོ་སྤྲོད་སྟབས་བདེ་གནང་བ་མ་ཟད་ཀྲུང་གོ་རྡོ་སྣུམ་རང་བྱུང་སོལ་རླངས་ཚོགས་པ་ཀུང་སིས་བོད་དུ་འཕེལ་རྒྱས་གཏོང་རིང་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་རྒྱབ་སྐྱོར་ཤུགས་ཆེན་གནང་བར་ཐུགས་རྗེ་ཆེ་ཞུས་གནང་ཞིང་། ཁོང་གིས་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་རང་བྱུང་སོལ་རླངས་དེ་ནུས་རྒྱུ་གཙོ་བོར་བརྩིས་ནས་ལྷ་ས་གྲོང་ཁྱེར་གྱི་དྲོད་རླངས་མཁོ་འདོན་གྱི་གནད་དོན་ཐག་གཅོད་བྱ་རྒྱུའི་གཏན་འབེབས་གནང་བ་དེ་བོད་ཀྱི་ནུས་རྒྱུའི་གྲུབ་ཆར་འགྱུར་ལྡོག་གཏོང་བ་དང་མང་ཚོགས་ཀྱི་འཚོ་བའི་སྤུས་ཚད་མཐོ་རུ་གཏོང་རྒྱུར་ལམ་ཚད་རྡོ་རིང་གི་འགངས་ཆེའི་དོན་སྙིང་ལྡན་ཡོད་པས་མིང་དོན་མཚུངས་པའི་དམངས་སེམས་འདུ་འགོད་དང་ཕན་སྦྱར་འདུ་འགོད་ཅིག་ཡིན། ལྷ་ས་གྲོང་ཁྱེར་གྱི་དྲོད་རླངས་མཁོ་འདོན་གྱི་ལས་གྲྭར་བློས་འགེལ་ཆོག་པའི་ནུས་རྒྱུ་འགན་ལེན་བྱ་རྒྱུ་ནི་ཀྲུང་གོ་རྡོ་སྣུམ་རང་བྱུང་སོལ་རླངས་ཚོགས་པ་ཀུང་སིའི་གཞན་ལ་དཀྲི་ཐབས་བྲལ་བའི་འགན་འཁྲི་ཞིག་ཡིན་པར་བརྟེན་ཀྲུང་གོ་རྡོ་སྣུམ་རང་བྱུང་སོལ་རླངས་ཚོགས་པ་ཀུང་སིས་ཏང་དང་རྒྱལ་ཁབ་ཀྱི་ལས་ཀའི་ཁྱོན་ཡོངས་ཀྱི་མཐོ་ཚད་ཐོག་ནས་ཆབ་སྲིད་ཀྱི་འདུ་ཤེས་དང་། ཁྱོན་ཡོངས་ཀྱི་འདུ་ཤེས། དམངས་འཚོའི་འདུ་ཤེས་བཅས་ཟབ་ཏུ་བཏང་ནས་ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ལྔ་པའི་དགོངས་དོན་ལག་བསྟར་དོན་འཁྱོལ་ནན་ཏན་བྱས་ཐོག་ལྷ་ས་གྲོང་ཁྱེར་གྱི་དྲོད་རླངས་མཁོ་འདོན་གྱི་ལས་གྲྭ་འགན་ལེན་དང་བོད་ཀྱི་རྡོ་སྣུམ་དང་རང་བྱུང་སོལ་རླངས་མཁོ་འདོན་ལ་འགན་ལེན་ཧུར་ཐག་བྱེད་པ་དང་དུས་མཚུངས་བོད་ཀྱི་བྱ་གཞག་ཁག་ལ་རྒྱབ་སྐྱོར་བྱེད་ཤུགས་སྔར་བས་ཆེ་རུ་བཏང་སྟེ་ཐོན་ལས་བོད་སྐྱོར་དང་། ཚན་རྩལ་བོད་སྐྱོར། ཤེས་ལྡན་པའི་བོད་སྐྱོར་བཅས་ཀྱི་ལས་དོན་ཡག་པོ་སྒྲུབ་ཐོག་བོད་ཀྱི་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ཡོང་ཆེད་ལེགས་སྐྱེས་ཧུར་ཐག་འབུལ་རྒྱུ་ཡིན་ཞེས་གསུངས་པ་རེད།