ཟླ་11ཚེས་11ཉིན་གྱི་ཕྱི་དྲོ་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཝུའུ་དབྱིང་ཅེས་ལྷ་སར་བཪྙན་ལམ་ཚོགས་འདུ་གཙོ་སྐྱོང་གིས་འཚོགས་ཏེ་ས་ཁུལ་དང་གྲོང་ཁྱེར་ཁག་གི་བརྟན་ལྷིང་སྲུང་སྐྱོང་བཀོད་འདོམས་ལྟེ་གནས་ཀྱི་མི་སྣས་ལས་གནས་བརྟན་སྲུང་བྱེད་ཚུལ་ལ་ཞིབ་བཤེར་གནང་བ་དང་སྦྲགས་འཐབ་ཕྱོགས་དང་པོའི་ལས་སྒྲུབ་མི་སྣར་འཚམས་འདྲི་ཡང་གནང་བ་རེད།
ལྗོངས་ཏང་ཨུད་ཀྱི་རྒྱུན་ཨུ་སྲིད་ཁྲིམས་ཨུ་ལྷན་གྱི་ཧྲུའུ་ཅི་ཏེང་ཞའོ་ཀང་ཚོགས་འདུར་ཞུགས་ཡོད་པ་རེད།
ཝུའུ་དབྱིང་ཅེས་དང་ཐོག་རང་སྐྱོང་ལྗོངས་ཏང་ཨུད་དང་སྲིད་གཞུང་དང་། ཧྲུའུ་ཅི་ཁྲེན་ཆོན་གོ་དང་། ཀྲུའུ་རེན་བྱམས་པ་ཕུན་ཚོགས། ཀྲུའུ་ཞི་པད་མ་འཕྲིན་ལས། རྒྱུན་ལས་ཀྲུའུ་ཞི་གཞོན་པ་ཧའོ་ཕུང་བཅས་ཀྱིས་ས་ཁུལ་དང་གྲོང་ཁྱེར་ཁག་གི་དུས་ཡུན་རིང་པོར་ལས་གནས་བརྟན་སྲུང་དང་བསྟུད་མར་འཐབ་རྩོད་བྱས་ནས་རང་ལྗོངས་ཀྱི་བརྟན་ལྷིང་སྲུང་སྐྱོང་ལས་དོན་ཐད་འབད་འཐབ་བྱེད་བཞིན་པའི་རྒྱ་ཆེའི་ལས་སྒྲུབ་དཔོན་དམག་དང་། སྲིད་ཁྲིམས་ལས་བྱེད་པ་དང་ཉེན་རྟོག་པ། ལས་བྱེད་པ་དང་ལས་བཟོ་ཚོར་ཐུགས་སྣང་གཤིན་པོའི་འཚམས་འདྲི་གནང་ལུགས་དང་སྙིང་ཐག་པ་ནས་ཐུགས་རྗེ་ཆེ་ཞུ་ལུགས་བརྒྱུད་བསྒྲགས་གནང་བ་དང་། དེ་ནས་ས་ཁུལ་དང་གྲོང་ཁྱེར་ཁག་གི་བརྟན་ལྷིང་སྲུང་སྐྱོང་ལས་དོན་སྙན་ཞུ་མཁྱེན་རྟོགས་ཞིབ་ཕྲ་གནང་རྗེས་ཁོང་གིས་ས་ཁུལ་དང་གྲོང་ཁྱེར་ཁག་ལ་འགོ་ཁྲིད་ཀྱི་འགན་འཁྲིའི་ལམ་ལུགས་དང་། སྡེ་ཚན་གྱི་འགན་འཁྲིའི་ལམ་ལུགས། ལས་གནས་ཀྱི་འགན་འཁྲིའི་ལམ་ལུགས་བཅས་ལ་སྔར་བས་ཤུགས་སྣོན་གྱིས་མི་ལས་གནས་སུ་ཡོད་པ་དང་ལས་གནས་སེམས་སུ་ཡོད་པ་བྱས་ནས་ལྷོད་གཡེང་སྤུ་ཙམ་ཡང་མི་གཏོང་བར་ལས་དོན་གྱི་འགན་འཁྲི་ཁག་ས་གནས་དེ་གའི་ཏང་སྲིད་སྡེ་ཚན་དང་ཚན་པ་དང་མི་རེ་རེའི་ཐོག་དོན་འཁྱོལ་ཏན་ཏིག་བྱེད་རྒྱུ་དང་། གཞི་རིམ་དུ་སྔར་བས་ཟབ་སྐྱོད་བྱས་ནས་མང་ཚོགས་དང་འབྲེལ་བ་དམ་ཟབ་བྱེད་པ་དང་། མང་ཚོགས་ལ་ཡིད་ཆེས་བྱེད་པ། མང་ཚོགས་ལ་བརྟེན་པ། མང་ཚོགས་སྐུལ་སློང་བྱེད་པ་བཅས་བྱས་ནས་བརྟན་ལྷིང་སྲུང་སྐྱོང་དང་འཕེལ་རྒྱས་ལ་སྐུལ་གཏོང་བྱེད་པའི་ཐོག་ནས་མང་ཚོགས་ཚོའི་སྟོབས་གསར་དམག་དཔུང་གི་ནུས་པ་འདོན་སྤེལ་གང་ལེགས་བྱེད་རྒྱུ། མི་དམངས་ཀྱི་རེ་འདོད་རྒྱ་ཁྱབ་ངང་གསན་ལེན་བྱེད་པ་དང་ཡང་ན་མི་དམངས་ཀྱི་རེ་འདོད་དང་བསྟུན་ཏེ་དཀའ་ངལ་དང་གནད་དོན་ཐག་གཅོད་བྱེད་རྒྱུ། འགལ་བ་སྣ་ཚོགས་དུས་ཐོག་ཏུ་ཐག་གཅོད་བྱས་ནས་ཡུལ་ཕྱོགས་བརྟན་ལྷིང་དང་མཐུན་སྒྲིལ་ཡོང་རྒྱུ་འགན་ལེན་བྱེད་རྒྱུ། ཏང་གི་ཚོགས་ཆེན་བཅོ་བརྒྱད་པ་དྲིལ་བསྒྲགས་བྱེད་ཤུགས་ཆེར་གཏོང་དང་རྒྱ་ཆེའི་ལས་བྱེད་པ་དང་ལས་བཟོ་སྒྲིག་འཛུགས་ཀྱིས་ཚོགས་འདུའི་འབྲེལ་ཡོད་ཆ་འཕྲིན་དང་ནང་དོན་ཤེས་སུ་བཅུག་ནས་སློབ་སྦྱོང་གི་མཐོ་རླབས་ཤིག་འཕྱུར་བ་བྱེད་རྒྱུ། སྡེ་ཚན་ཁག་གི་འགན་ནུས་འདོན་སྤེལ་གང་ལེགས་བྱེད་པ་དང་། ཕྱོགས་ཁག་གི་ཐོན་ཁུངས་དང་སྟོབས་ཤུགས་བསྡུ་སྒྲིལ་ནུས་ལྡན་བྱེད་པ། རོགས་ལས་གཞོགས་འདེགས་ལམ་སྲོལ་འཐུས་ཚང་དུ་གཏོང་བ་བཅས་བྱས་ནས་ཁུར་མཉམ་ལེན་དང་དོན་སྤྱི་སྒྲུབ་ཀྱི་མཉམ་ཤུགས་ཧྲིལ་པོ་ཞིག་ཆགས་པར་བྱས་ཏེ་བདེ་འཇགས་འགན་ལེན་བྱེད་པ་དང་། བརྟན་ལྷིང་ལས་དོན་ཐད་གྲུབ་འབྲས་སྔར་བས་ཆེ་བ་ཐོབ་རྒྱུའི་འགན་ལེན་བྱེད་པ། ཞི་མཐུན་བརྟན་ལྷིང་གི་སྤྱི་ཚོགས་ཁོར་ཡུག་ཧུར་ཐག་བཏོད་དེ “གནད་དོན་ཆེ་འབྲིང་ཆུང་གསུམ་གང་ཡང་མི་ལྷགས་པའི ”དམིགས་ཚད་མངོན་འགྱུར་ཡོང་རྒྱུ་འགན་ལེན་བྱེད་རྒྱུ་བཅས་ཀྱི་བླང་བྱ་བཏོན་གནང་བ་རེད།
བཪྙན་ལམ་སྦྲེལ་མཐུད་ཁྲོད་ས་ཁུལ་དང་གྲོང་ཁྱེར་ཁག་གི་འབྲེལ་ཡོད་འགན་ཁུར་བས་མིག་སྔར་ས་ཁུལ་དང་གྲོང་ཁྱེར་ཁག་གི་སྤྱི་ཚོགས་དུས་བབ་སྤྱིའི་ཆ་ནས་བརྟན་ལྷིང་ཡིན་ལ་སླད་ཕྱིན་ད་དུང་བརྟན་ལྷིང་སྲུང་སྐྱོང་བྱེད་ཐབས་ཐད་རྒྱུན་ཆད་མེད་པར་ཤུགས་སྣོན་བརྒྱབ་ནས་ལས་དོན་སྔོན་ཇུས་སྔར་བས་འཐུས་ཚང་དུ་གཏོང་བ་དང་། བྱེད་ཐབས་ཞིབ་ཕྲར་གཏོང་བ། མཉམ་འགུལ་བྱེད་ཤུགས་ཆེ་རུ་གཏོང་བ་བཅས་བྱས་ནས་ཁ་ཕྲལ་གཏོར་བཤིག་གི་ཇུས་ངན་ཡོད་ཚད་ཐལ་བའི་རྡུལ་དུ་བརླག་རྒྱུ་དང་། རང་སྐྱོང་ལྗོངས་ཏང་ཨུད་དང་སྲིད་གཞུང་གིས་གཏན་འབེབས་བྱས་ཟིན་པའི་བཀོད་སྒྲིག་ཁག་བློ་བརྟན་འགྱུར་མེད་ངང་དོན་འཁྱོལ་བྱས་ནས་མིག་སྔའི་བརྟན་ལྷིང་སྲུང་སྐྱོང་ལས་དོན་ནང་ནུས་ཤུགས་ཡོད་རྒུས་ཞུགས་ཏེ་གྲ་སྒྲིག་ཨང་བསར་དང་། ཡང་འབད་བསྐྱར་འབད། གྲུབ་འབྲས་དར་སྤེལ། ལས་གནས་བརྟན་སྲུང་། འཁུར་བསམ་རྣམ་དག་བཅས་བྱས་ནས་རང་ལྗོངས་སུ “གནད་དོན་ཆེ་འབྲིང་ཆུང་གསུམ་གང་ཡང་མི་ལྷགས་པ་བྱ་རྒྱུ ”ནུས་ཤུགས་ཡོད་རྒུས་འགན་ལེན་གྱིས་ཕུལ་དུ་བྱུང་བའི་གྲུབ་འབྲས་ཀྱི་ཐོག་ནས་ཏང་གི་ཚོགས་ཆེན་བཅོ་བརྒྱད་པར་ལེགས་སྐྱེས་འབུལ་རྒྱུ་ཡིན་ཞེས་བཤད་པ་རེད།