ཉེ་ཆར་ཆབ་མདོ་ས་ཨུད་ཀྱིས་ཚོགས་འདུ་འཚོགས་ནས་སྔོན་གཏོད་ལེགས་བརྩོན་དང་རྨང་བརྟན་དམངས་ཕན་གྱི་བྱེད་སྒོ་སྔར་བས་ཡག་པོ་སྤེལ་བ་དང་སློབ་གསོ་དང་རིག་གནས་བྱ་གཞག་གོང་འཕེལ་འགྲོ་རྒྱུར་སྐུལ་འདེད་གཏོང་བ་སོགས་ཀྱི་ལས་དོན་ཞིབ་འཇུག་དང་བཀོད་སྒྲིག་བྱས་ཤིང་། ལྗོངས་ཏང་ཨུད་ཀྱི་རྒྱུན་ལས་ཨུ་ཡོན་ཆབ་མདོ་ས་ཨུད་ཀྱི་ཧྲུའུ་ཅི་ནོར་བུ་དོན་གྲུབ་ཀྱིས་ཚོགས་འདུ་གཙོ་སྐྱོང་གནང་བ་དང་འབྲེལ་གསུང་བཤད་ཀྱང་གནང་བ་རེད།
ནོར་བུ་དོན་གྲུབ་ཀྱིས་རང་སྐྱོང་ལྗོངས་ཀྱི་ཆབ་མདོའི་ལས་དོན་སྐོར་གྱི་ཚོགས་འདུའི་ཐོག་བྱ་ཐབས་དུ་མ་སྤྱད་རྒྱུའི་གཏན་འབེབས་བྱས་ཏེ་ཆབ་མདོ་འདི་ཉིད་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ཡོང་རྒྱུར་སྐུལ་འདེད་བཏང་ནས་ཆབ་མདོར་ཐོབ་དཀའ་བའི་ལོ་རྒྱུས་ཀྱི་གོ་སྐབས་ཐོབ་པ་བྱ་ཆེད་འཕེལ་རྒྱས་ཀྱི་ཁ་ཕྱོགས་གསལ་པོ་འདོན་ཐོག་རེ་བ་གསར་པའང་བཅོལ་ཡོད་པ་རེད། རྒྱ་ཆེའི་ལས་བྱེད་པ་དང་མང་ཚོགས་ཀྱིས་གོ་སྐབས་དམ་འཛིན་བྱས་ནས་གོ་སྐབས་དེ་བེད་ཡག་པོ་སྤྱོད་པ་དང་བེད་སྤྱོད་འདང་ངེས་བྱས་ཏེ་འཕེལ་རྒྱས་དང་བརྟན་ལྷིང་གི་གྲུབ་འབྲས་གསར་པའི་ཐོག་ནས་ལྗོངས་ཏང་ཨུད་དང་སྲིད་གཞུང་གིས་ཐུགས་ཁུར་དང་གཅེས་སྐྱོང་གནང་བར་དྲིན་ལན་འཇལ་དགོས་ལུགས་བཏོན་གནང་བ་རེད།
ནོར་བུ་དོན་གྲུབ་ཀྱིས་སློབ་གསོ་འདི་ཉིད་འཐབ་ཇུས་ཀྱི་གནས་བབ་གལ་ཆེན་དང་དམངས་འཚོའི་སྤྱི་ཡོངས་ཀྱི་ཐོག་བཞག་སྟེ་ཇུས་འགོད་འདིང་ནས་དམིགས་ཚད་ཁ་གསལ་བཟོ་བ་དང་། འགོ་ཁྲིད་ལ་ཤུགས་སྣོན་རྒྱག་པ། བྱ་ཐབས་ལ་ཤུགས་སྣོན་རྒྱག་པ། མ་འཇོག་བྱེད་ཤུགས་ཆེ་རུ་གཏོང་བ་བཅས་བྱས་ཁར་སློབ་གསོའི་རྨང་གཞིའི་སྒྲིག་བཀོད་འཛུགས་སྐྲུན་བྱེད་མགྱོགས་སུ་བཏང་ནས་སློབ་གསོའི་སྒྲིག་སྲོལ་དང་ལམ་སྲོལ་སྒྱུར་བཅོས་དང་གསར་གཏོད་བྱས་ཏེ་ཆབ་མདོ་ལྟེ་བར་བྱེད་པ་དང་རྫོང་ཁག་གཙོ་གནད་དུ་བྱས་ཏེ་སློབ་གསོའི་དགེ་རྒན་གྱི་ལེགས་ཆ་གཏོད་དེ་སློབ་གསོའི་མི་མངོན་པའི་ནུས་པ་དང་ཕན་ནུས་འདོན་སྤེལ་གང་ལེགས་ཀྱིས་སློབ་ཆུང་དང་། དམའ་རིམ་སློབ་འབྲིང་། མཐོ་རིམ་སློབ་འབྲིང་བཅས་གཞི་གཅིག་ཅན་དུ་གྱུར་བའི་སློབ་གསོའི་ལམ་ལུགས་ཤིག་ཆགས་པ་བྱས་ཏེ་སློབ་གསོ་དང་སློབ་ཁྲིད་ཀྱི་ཆུ་ཚད་རྒྱུན་ཆད་མེད་པར་མཐོ་རུ་གཏོང་དགོས་པའི་བླང་བྱ་བཏོན་གནང་བ་རེད།