ཟླ་11ཚེས་4ཉིན་གྱི་སྔ་དྲོ་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཝུའུ་དབྱིང་ཅེས་ཆེད་མངགས་གོང་དཀར་གནམ་ཐང་དང་། ལྷ་ས་མེ་འཁོར་བབས་ཚུགས། གནམ་ཐང་མྱུར་བགྲོད་གཞུང་ལམ་གྱི་ཞིབ་བཤེར་ས་ཚིགས་བཅས་སུ་ཕེབས་ནས་ཏང་གི་ཚོགས་ཆེན་བཅོ་བརྒྱད་པའི་རིང་གི་ལྷ་ས་གྲོང་ཁྱེར་གྱི་བརྟན་ལྷིང་སྲུང་སྐྱོང་དང་བདེ་འཇགས་འགན་ལེན་ལས་དོན་གྱི་བྱ་ཐབས་དོན་འཁྱོལ་བྱེད་ཚུལ་ལ་ཞིབ་བཤེར་ལྟ་སྐུལ་གནང་ཞིང་། ཁོང་གིས་ལྷག་བསམ་རྣམ་དག་ངང་འགན་འཁྲི་འཁུར་བ་དང་། ཁྲིམས་ལྟར་ཁྲིམས་ལག་ལེན་བསྟར་བ། བྱ་ཐབས་ལ་ཤུགས་སྣོན་རྒྱག་པ། འགན་འཁྲིར་ངོ་གནོང་མི་དགོས་པ་བཅས་ཀྱི་ཐོག་ནས་ཏང་གི་ཚོགས་ཆེན་བཅོ་བརྒྱད་པའི་རིང་གི་བརྟན་ལྷིང་སྲུང་སྐྱོང་དང་བདེ་འཇགས་འགན་ལེན་གྱི་ལས་དོན་བློ་ཐག་ཆོད་པོས་ལེགས་པོ་བསྒྲུབས་དགོས་པའི་བླང་བྱ་བཏོན་པ་རེད། ལྷ་ས་གོང་དཀར་གནམ་ཐང་དུ་ཝུའུ་དབྱིང་ཅེས་སྔ་རྗེས་སུ་ལས་ཡུལ་དངོས་ཀྱི་བཀོད་འདོམས་ལྟེ་གནས་དང་། གནམ་གྲུ་སྒུག་སའི་ཚོམས་ཆེན་གྱི་བདེ་འཇགས་ཞིབ་བཤེར་ཁྲུའུ་རུ་ཕེབས་ནས་གནམ་ཐང་གི་བཀོད་འདོམས་དང་། བདེ་འཇགས་འགན་ལེན། ལས་དོན་བཀོད་སྒྲིག་སོགས་འབྲེལ་ཡོད་གནས་ཚུལ་མཁྱེན་རྟོགས་ཞིབ་ཕྲ་གནང་ཞིང་། ཁོང་གིས་ཏང་གི་ཚོགས་ཆེན་བཅོ་བརྒྱད་པ་འཚོག་ཉེར་ཡོད་པས་རང་ལྗོངས་འདི་ཉིད་ཚོགས་ཆེན་བཅོ་བརྒྱད་པའི་རིང་གི་བརྟན་ལྷིང་སྲུང་སྐྱོང་དང་བདེ་འཇགས་འགན་ལེན་ལས་དོན་གྱི་འགག་སྒྲོལ་དུས་མཚམས་སུ་སླེབས་ཡོད་པས་གནམ་ཐང་གི་བདེ་འཇགས་སྲུང་སྐྱོང་དང་། བརྟན་ལྷིང་སྲུང་སྐྱོང་། འཕུར་སྐྱོད་བདེ་འཇགས་འགན་ལེན་བཅས་ཀྱི་འགན་འཁྲི་ལྕི་པོ་ཡོད། དམངས་སྤྱོད་མཁའ་འགྲུལ་དོ་དམ་སྡེ་ཚན་དང་དེ་བཞིན་འབྲེལ་ཡོད་ཚན་པས་འགན་འཁྲིའི་འདུ་ཤེས་ཟབ་ཏུ་གཏོང་བ་དང་། བརྟན་ལྷིང་ཨང་དང་པོར་འཇོག་པའི་རྩ་དོན་སེམས་ལ་བརྟན་པོ་ངེས་ནས་བདེ་འཇགས་དོ་དམ་བྱེད་ཤུགས་སྔར་བས་ཆེ་རུ་གཏོང་བ་དང་། གནས་ཁག་གི་བདེ་འཇགས་ཞིབ་བཤེར་བྱ་ཐབས་ལ་ཤུགས་སྣོན་རྒྱག་པ། ཏན་ཏིག་ཞིབ་ཚགས་དང་། ཡག་ཐོག་ཡག་བརྩེགས་ཀྱི་ལས་དོན་སྤེལ་ནས་གནམ་ཐང་གི་བདེ་འཇགས་དང་བརྟན་ལྷིང་འགན་ལེན་བྱེད་པ་དང་། འགྲུལ་པ་སྐྱིད་སྣང་དོད་ལ་བདེ་འཇགས་ཡོང་བའི་འགན་ལེན་བྱེད་པ། ལས་ཀའི་གྲུབ་འབྲས་དངོས་ཀྱི་ཐོག་ནས་བོད་ཀྱི་དཔལ་འབྱོར་འཕེལ་རྒྱས་དང་སྤྱི་ཚོགས་ཞི་མཐུན་ཡོང་རྒྱུར་སྐུལ་འདེད་བཏང་སྟེ་ཏང་གི་ཚོགས་ཆེན་བཅོ་བརྒྱད་པ་རྒྱལ་ཁའི་ངང་འཚོག་རྒྱུར་ལེགས་སྐྱེས་འབུལ་དགོས་ཞེས་ནན་བཤད་གནང་བ་རེད།
ལྷ་ས་མེ་འཁོར་བབས་ཚུགས་སུ་ཝུའུ་དབྱིང་ཅེས་སྔ་རྗེས་སུ་བབས་ཚུགས་སུ་འཛུལ་སའི་བདེ་བཤེར་ཁྲུའུ་དང་བདེ་འཇགས་ཞིབ་བཤེར་ལས་སྒྲུབ་ཀྱི་སྤྱི་བདེ་མི་དམངས་ཉེན་རྟོག་པ་དང་དྲག་ཆས་དཔོན་དམག་ཚོར་འཚམས་འདྲི་གནང་བ་དང་། ཁོང་ཚོས་དུས་ཡུན་རིང་པོ་ལས་གནས་བརྟན་སྲུང་དང་དཀའ་སྤྱད་འབད་བརྩོན་བྱས་པར་སྙིང་དབུས་ནས་ཐུགས་རྗེ་ཆེ་ཞུས་ཤིང་། ཁོང་གིས་ལས་སྒྲུབ་སྤྱི་བདེ་མི་དམངས་ཉེན་རྟོག་པ་དང་དྲག་ཆས་དཔོན་དམག་ཡོངས་ཀྱིས་ཏང་དང་མི་དམངས་ལ་ཚད་མཐོའི་འགན་འཁུར་བའི་སྙིང་སྟོབས་ཀྱི་ཐོག་ནས་བརྟན་ལྷིང་སྲུང་སྐྱོང་གི་བྱ་ཐབས་དང་བདེ་སྐྱོང་དོ་དམ་དོན་འཁྱོལ་ཏན་ཏིག་བྱེད་པ་དང་། ཐོལ་བྱུང་དོན་རྐྱེན་ཐག་གཅོད་ཀྱི་གྲ་སྒྲིག་གང་ལེགས་བྱེད་པ། ཐོལ་བྱུང་དོན་རྐྱེན་ཐོན་མ་ཐག་མྱུར་དུ་ཤེས་པ་དང་ལམ་སེང་ཐག་གཅོད་ཐུབ་པའི་འགན་ལེན་བྱེད་པ་བཅས་ཀྱི་ཐོག་ནས་ཏང་དང་མི་དམངས་བློ་ཡིད་ཚིམས་པའི་གཡུར་ཟའི་གྲུབ་འབྲས་ཤིག་གཏོད་དགོས་ཞེས་གསུངས་པ་རེད།
ཝུའུ་དབྱིང་ཅེས་ད་དུང་གནམ་ཐང་མྱུར་བགྲོད་གཞུང་ལམ་གྱི་ལམ་མདོའི་བདེ་བཤེར་ས་ཚིགས་སུ་ཕེབས་ནས་ཞིབ་བཤེར་ས་ཚིགས་ཀྱི་ལས་རེས་དང་། ཕར་འགྲོ་ཚུར་འོང་བྱེད་མཁན་མི་སྣ་ཐོ་འགོད་སོགས་ཀྱི་གནས་ཚུལ་ལ་མཁྱེན་རྟོགས་ཞིབ་ཕྲ་གནང་ཞིང་། ཁོང་གིས་རྒྱ་ཆེའི་མི་དམངས་ཉེན་རྟོག་པ་ཚོས་བློ་གཅིག་སེམས་གཅིག་གིས་དམངས་ལ་ཞབས་འདེགས་ཞུ་བའི་བསམ་བློ་བརྟན་པོ་བཙུགས་ཏེ་རང་འགན་གཙང་སྒྲུབ་དང་འགན་སེམས་རྣམ་དག་གི་ཐོག་ནས་ཏང་དང་མི་དམངས་ཀྱིས་སྤྲད་པའི་བླ་ན་མེད་པའི་འགན་འཁྲི་འཁུར་དགོས་པ་དང་། ཚད་ལྡན་ཁྲིམས་འཛིན་དང་། ཤེས་དཔལ་ལས་སྒྲུབ། ཞི་འཇམ་ཞབས་ཞུ། གཤིས་འཇམ་གྱི་སྐད་ཆ་དང་ལྷད་མེད་ཀྱི་འཛུམ་མདངས་ལ་བརྟེན་ནས་མང་ཚོགས་ཀྱི་བསམ་ཤེས་དང་རྒྱབ་སྐྱོར་སྔར་བས་མང་བ་ཐོབ་ཐུབ་པ་བྱས་ཏེ་ཚང་མས་རང་འགུལ་ངང་བདེ་འཇགས་ཞིབ་བཤེར་བྱ་རྒྱུར་སློབ་གསོ་ཁྲིད་སྟོན་གྱིས་ཐུན་མོང་ཐོག་སྤྱི་པའི་བདེ་འཇགས་སྒྲིག་ལམ་སྲུང་སྐྱོང་བྱེད་དགོས་པའི་བླང་བྱ་བཏོན་གནང་བ་རེད།
ཝུའུ་དབྱིང་ཅེས་ཏང་གི་ཚོགས་ཆེན་བཅོ་བརྒྱད་པའི་རིང་གི་བདེ་འཇགས་འགན་ལེན་དང་བརྟན་ལྷིང་སྲུང་སྐྱོང་གི་ལས་དོན་ཡག་པོ་བསྒྲུབས་ནས་ཞི་མཐུན་བརྟན་ལྷིང་དང་དགའ་སྟོན་རྟེན་འབྲེལ་གྱི་སྤྱི་ཚོགས་ཀྱི་ཁོར་ཡུག་གཏོད་རྒྱུ་ནི་རང་ལྗོངས་ཀྱི་རིམ་ཁག་ཏང་ཨུད་དང་སྲིད་གཞུང་གིས་ངེས་པར་དུ་སྒྲུབ་དགོས་པའི་ཆབ་སྲིད་ཀྱི་ལས་འགན་གལ་ཆེན་ཞིག་ཡིན། ལྗོངས་ཡོངས་ཀྱི་ཕྱོགས་ཁག་གི་བརྟན་ལྷིང་སྲུང་སྐྱོང་སྟོབས་ཤུགས་ཀྱིས་དགོས་གཏུགས་ཀྱི་སེམས་པ་དང་བདེ་འཇགས་སྲུང་སྐྱོང་གི་འགན་འཁྲིའི་སེམས་པ་དང་ལས་འགན་སྒྲུབ་སེམས་ལ་བརྟེན་ནས་ལྗོངས་ཡོངས་ཀྱི་སྤྱི་ཚོགས་བརྟན་ལྷིང་སྲུང་སྐྱོང་ལས་དོན་གྱི་བཪྙན་འཕྲིན་ཁ་པར་ཚོགས་འདུའི་དགོངས་དོན་ལག་བསྟར་དོན་འཁྱོལ་གཏིང་ཟབ་བྱས་ཏེ་བསམ་བློ་དང་བྱ་སྤྱོད་ཀྲུང་དབྱང་གི་བླང་བྱ་དང་ལྗོངས་ཏང་ཨུད་དང་སྲིད་གཞུང་གི་བཀོད་འདོམས་ཐོག་གཅིག་གྱུར་ཡོང་བ་བྱེད་དགོས། “གནས་ཚུལ་ཆེ་འབྲིང་ཆུང་གསུམ་གང་ཡང་མི་ལྷགས་པའི ”དམིགས་ཚད་ལས་འགན་ལ་དམ་པོར་དམིགས་ནས་འཕྲལ་སྡོམ་སྔོན་ཇུས་འཐུས་སྒོ་ཚང་དུ་གཏོང་བ་དང་། མཐུན་སྦྱོར་མཉམ་འགུལ་ལ་ཤུགས་སྣོན་རྒྱག་པ། གནས་ཚུལ་མྱུར་དུ་ཤེས་རྟོགས་ཐུབ་པའི་ནུས་པ་ཆེ་རུ་གཏོང་བ་བཅས་ཀྱི་ཐོག་ནས་དུས་གང་དང་གནས་ཚུལ་གང་འདྲ་ཞིག་གི་འོག་ཏུའང་ལས་ཀར་གྲུབ་འབྲས་ཐོབ་པའི་འགན་ལེན་བྱེད་དགོས། ལྗོངས་ཡོངས་ཀྱི་རིམ་ཁག་ཏང་སྲིད་ལས་ཁུངས་དང་། ཁེ་ལས་བྱ་གཞག་ཚན་པའི་ལས་བྱེད་ལས་བཟོ་དང་རྒྱ་ཆེའི་མང་ཚོགས་ཚོས་རང་ལྗོངས་ཀྱི་བརྟན་ལྷིང་སྲུང་སྐྱོང་ལས་དོན་ཐད་སྤྱད་པའི་དམིགས་བསལ་གྱི་བྱ་ཐབས་ལ་བསམ་ཤེས་གང་ལེགས་བྱེད་པ་དང་རྒྱ་ཆེའི་ལས་སྒྲུབ་ཉེན་རྟོག་པ་ཚོར་རྒྱབ་སྐྱོར་དང་གཞོགས་འདེགས་བྱས་ཏེ་བརྟན་ལྷིང་སྲུང་སྐྱོང་གི་བྱ་ཐབས་ཁག་དང་ཐོ་འགོད་དང་ཞིབ་བཤེར་གྱི་གཏན་འབེབས་ཞིབ་ཕྲ་སོགས་ལ་བརྩི་སྲུང་ནན་པོ་ཞུས་ནས་ཐུན་མོང་ཐོག་ཏང་གི་ཚོགས་ཆེན་བཅོ་བརྒྱད་པ་རྒྱལ་ཁའི་ངང་འཚོག་རྒྱུར་སྟོབས་ཤུགས་ལེགས་སྐྱེས་འབུལ་དགོས་པའི་ནན་བཤད་གནང་བ་རེད།