ཟླ་11ཚེས་3ཉིན་གྱི་ཕྱི་དྲོ་རང་ལྗོངས་ཀྱིས་ཏང་གི་ཚོགས་ཆེན་བཅོ་བརྒྱད་པར་ཞུགས་མཁན་འཐུས་མིར་ཕེབས་སྐྱེལ་ཞུ་བའི་བཞུགས་མོལ་ཚོགས་འདུ་འཚོགས་ཤིང་། རང་སྐྱོང་ལྗོངས་ཏང་ཨུད་ཀྱི་རྒྱུན་ལས་ཧྲུའུ་ཅི་གཞོན་པ་ཧའོ་ཕུང་བཞུགས་མོལ་ཚོགས་འདུར་ཞུགས་པ་དང་འབྲེལ་གསུང་བཤད་ཀྱང་གནང་བ་དང་། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཝུའུ་དབྱིང་ཅེས་བཞུགས་མོལ་ཚོགས་འདུའི་ཐོག་རང་ལྗོངས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་འགྲོ་ཚུལ་ངོ་སྤྲོད་གནང་བ་རེད།
རང་སྐྱོང་ལྗོངས་ཀྱི་འགོ་ཁྲིད་མགོན་པོ་བཀྲ་ཤིས་དང་། ཆིན་དབྱི་ཀྲི། ཆེ་དགྲ་ལྷ། ཏུང་ཡུན་ཧུའུ་བཅས་ཕེབས་པ་དང་ཏེང་ཞའོ་ཀང་གིས་གཙོ་སྐྱོང་གནང་བ་རེད།
ཝུའུ་དབྱིང་ཅེས་དང་ཐོག་རང་སྐྱོང་ལྗོངས་ཏང་ཨུད་དང་ལྗོངས་ཡོངས་ཀྱི་ཏང་ཡོན་ཁྲི་23ལྷག་ཙམ་གྱི་ཚབ་ཞུས་ནས་ཚོགས་ཆེན་བཅོ་བརྒྱད་པར་ཞུགས་མཁན་རང་ལྗོངས་ཀྱི་འཐུས་མིར་མཇལ་དར་སྒྲོན་པ་དང་འབྲེལ་ཏང་གི་ཚོགས་ཆེན་བཅུ་བདུན་པ་འཚོགས་ཚུན་རང་ལྗོངས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་འགྲོ་ཚུལ་ངོ་སྤྲོད་གནང་བ་རེད།
ཧའོ་ཕུང་གིས་ཏང་གི་ཚོགས་ཆེན་བཅོ་བརྒྱད་པར་ཞུགས་མཁན་རང་ལྗོངས་ཀྱི་འཐུས་མི་ནི་ལྗོངས་ཡོངས་ཀྱི་རིམ་ཁག་ཏང་རྩ་འཛུགས་དང་རྒྱ་ཆེའི་ཏང་ཡོན་ཚོས་རིམ་པ་བཞིན་འོས་སྦྱོར་དང་རིམ་པ་བཞིན་བདམས་ནས་ཐོན་པ་དང་། འཐབ་ཕྱོགས་ཁག་དང་ཁྱབ་ཁོངས་ཁག་ནས་ཡོང་བ་ཡིན་པས་ལྗོངས་ཡོངས་ཀྱི་རིམ་ཁག་ཏང་རྩ་འཛུགས་དང་རྒྱ་ཆེའི་གུང་ཁྲན་ཏང་ཡོན་གྱི་བསམ་འདུན་གྱི་ཚབ་བྱེད་པ་དང་ལྗོངས་ཡོངས་ཀྱི་ཏང་རྩ་འཛུགས་ཚང་མ་དང་ཏང་ཡོན་ཚང་མས་རེ་བ་བཅོལ་ཡོད། དེར་བརྟེན་འཐུས་མི་ཚང་མས་ཚོགས་ཆེན་བཅོ་བརྒྱད་པའི་འཐུས་མིའི་གཟི་བརྗིད་མཚན་སྙན་གཅེས་སྤྲས་ལྡབ་འགྱུར་བྱས་ཏེ་དུས་དང་རྣམ་པ་ཀུན་ཏུ་རང་ཉིད་ཀྱི་ཕྲག་ཏུ་འཁུར་བའི་བརྗིད་ཉམས་ལྡན་པའི་ལས་འགན་དང་མཆོག་ཏུ་གྱུར་པའི་འགན་འཁྲི་བློ་ལ་ངེས་པ་དང་འཐུས་མིའི་འགན་འཁྲི་ལེགས་པར་བསྒྲུབས་ཏེ་རྒྱ་ཆེའི་ཏང་ཡོན་དང་མང་ཚོགས་ཀྱི་བསམ་འཆར་དང་རེ་བ་གང་ལེགས་མཚོན་པར་བྱས་ཏེ་ལྗོངས་ཡོངས་ཀྱི་རིམ་ཁག་ཏང་རྩ་འཛུགས་དང་། རྒྱ་ཆེའི་ཏང་ཡོན། མི་རིགས་ཁག་གི་ལས་བྱེད་པ་དང་མང་ཚོགས་བཅས་ཀྱི་ཡིད་ཆེས་དང་རེ་བ་ཆུད་ཟོས་སུ་མི་འགྲོ་བ་བྱེད་དགོས་ཞེས་མཛུབ་སྟོན་གནང་བ་རེད། ཏང་གི་ཚོགས་ཆེན་བཅོ་བརྒྱད་པའི་འཐུས་མིས་ཚོགས་ཆེན་གྱི་དགོངས་དོན་སློབ་སྦྱོང་ལག་བསྟར་ཡག་པོ་བྱ་རྒྱུ་ནི་གཟི་བརྗིད་ལྡན་པའི་ལས་འགན་ཞིག་ཡིན་ལ་དོར་ཐབས་མེད་པའི་འགན་འཁྲི་ཞིག་ཀྱང་རེད། ཏང་གི་ཚོགས་ཆེན་བཅོ་བརྒྱད་པ་རྒྱལ་ཁའི་ངང་གྲོལ་རྗེས་ཀྲུང་དབྱང་གི་བླང་བྱ་དང་རང་སྐྱོང་ལྗོངས་ཏང་ཨུད་ཀྱི་བཀོད་སྒྲིག་ལྟར་འཐུས་མི་ཚོས་ཚོགས་ཆེན་བཅོ་བརྒྱད་པའི་དགོངས་དོན་ནན་ཏན་ངང་སློབ་སྦྱོང་དང་ལག་བསྟར་བྱ་རྒྱུ་དེ་ཆབ་སྲིད་ལས་འགན་ཨང་དང་པོར་བརྩིས་ནས་ཚོགས་ཆེན་བཅོ་བརྒྱད་པའི་དགོངས་དོན་སློབ་སྦྱོང་དང་། དྲིལ་བསྒྲགས། ལག་བསྟར་བཅས་བྱས་ཏེ་ཚོགས་ཆེན་བཅོ་བརྒྱད་པའི་ཐོག་བཏོན་པའི་དམིགས་ཚད་ལས་འགན་ལ་ཕྱོགས་ཏེ་དཔའ་མཛངས་རྟུལ་ཕོད་ངང་མདུན་སྐྱོད་བྱ་རྒྱུའི་བླང་བྱ་བཏོན་གནང་བ་རེད།