ཟླ་11ཚེས་1ཉིན་གྱི་ཕྱི་དྲོར་ལྗོངས་ཏང་ཨུད་ཀྱི་རྒྱུན་ཨུ་ལྷ་ས་གྲོང་ཨུད་ཀྱི་ཧྲུའུ་ཅི་ཆེ་དགྲ་ལྷས་ལྷ་ས་གྲོང་ཁྱེར་གྱི་གྲོང་ཁུལ་ཪྙིང་པའི་ཁྱད་ལྡན་རྣམ་པ་སྲུང་སྐྱོང་ལས་གྲྭའི་དུས་འགོའི་གྲ་སྒྲིག་ལས་དོན་ཁག་ལ་རྟོག་ཞིབ་གནང་བ་རེད།

    ཆེ་དགྲ་ལྷ་དང་བཅས་པ་ཁྲེང་ཀོན་ཆུས་ཨུད་ཀྱི་སྒོ་ར་དང་། བར་སྐོར་ཚོང་རའི་ས་ཆ་འདེམས་ས། གྲོང་ཨུད་ཏང་གི་སློབ་གྲྭ་སོགས་སུ་སྔ་རྗེས་སུ་ཕེབས་ཏེ་བརྟག་ཞིབ་གནང་ནས་ལས་གྲྭ་དང་འབྲེལ་བའི་བར་སྐོར་ཁྲོམ་གཞུང་གི་ཁྲོམ་བཀྱག་2600གནས་སྤོ་དང་ཐོན་ཁུངས་བསྡུ་སྒྲིལ་སོགས་ཀྱི་གནས་ཚུལ་ཐད་རྩད་འདྲི་དང་མཁྱེན་རྟོགས་ཞིབ་ཕྲ་གནང་བ་མ་ཟད། བཞུགས་མོལ་ཚོགས་འདུ་འཚོགས་ནས་ཕྱོགས་ཁག་གི་བསམ་འཆར་ཞིབ་ཕྲ་གསན་པ་རེད།

    ཆེ་དགྲ་ལྷས་ཇུས་འགོད་ཚན་པའི་ཇུས་འགོད་ཀྱི་ཇུས་གཞི་ཧ་ཅང་བཟང་བ་དང་། ལྷ་ས་འདི་ཉིད་འཛམ་གླིང་གི་ཡུལ་སྐོར་བྱ་ཡུལ་དུ་བསྐྲུན་པ་དང་འཛམ་གླིང་རིག་གནས་ཤུལ་བཞག་སྲུང་སྐྱོང་སྔར་བས་བྱེད་པའི་དོན་དངོས་དང་རྦད་དེ་འཚམས་ཤིང་། ཇུས་འགོད་ལས་མི་རྩ་བར་འཛིན་པའི་རྩ་དོན་མཚོན་པ་དང་མི་རིགས་ཀྱི་ཁྱད་ཆོས་ཀྱིས་ཕྱུག་ལ་མི་རིགས་ས་ཁུལ་གྱི་ཁྱད་ཆོས་སྒོ་ཀུན་ནས་མཚོན་ཡོད་ཅེས་བསྟན་པ་རེད།

    ཆེ་དགྲ་ལྷས་གོམ་སྟབས་རྗེས་མར་ཇུས་འགོད་ཚན་པས་བོད་ཀྱི་ཁྱད་ཆོས་དང་ལྷ་སའི་དོན་དངོས་དང་ཟུང་འབྲེལ་གྱིས་ཇུས་འགོད་བྱེད་སྐབས་མི་རིགས་རིག་གནས་ཀྱི་ཁྱད་ཆོས་མང་ཙམ་སྣོན་པ་དང་ལོ་རྒྱུས་རིག་གནས་ཟབ་མོའི་འདུ་ཤེས་ཆེ་རུ་གཏོང་དགོས་པ། གློག་བཞུ་སོགས་ཀྱི་ཇུས་འགོད་ཐད་ཞིབ་ཕྲའི་གནས་ཚུལ་ལ་དོ་སྣང་གིས་མི་རིགས་ཀྱི་ཁྱད་ཆོས་དང་མཐུན་པ་གསར་གཏོད་བྱ་རྒྱུར་ཤུགས་སྣོན་རྒྱག་དགོས་པ། རང་སྐྱོང་ལྗོངས་དང་ལྷ་ས་གྲོང་ཁྱེར་གྱི་འབྲེལ་ཡོད་སྡེ་ཚན་དབར་འབྲེལ་གཏུག་དང་མཐུན་སྦྱོར་བྱ་རྒྱུར་ཤུགས་སྣོན་བརྒྱབ་སྟེ་ལས་གྲྭའི་འོས་འགུག་འོས་དཔོད་ཀྱི་ལས་དོན་ཡག་པོ་བསྒྲུབས་ནས་སྟོབས་ཤུགས་ཆེ་བ་དང་ཆུ་ཚད་མཐོ་བའི་བཟོ་སྐྲུན་ཨར་རྒྱག་ཁེ་ལས་གྲོང་ཁུལ་ཪྙིང་པའི་ཁྱད་ལྡན་རྣམ་པ་སྲུང་སྐྱོང་ལས་གྲྭའི་ནང་ཞུགས་རྒྱུར་གདན་དྲངས་ནས་2013ལོའི་ཟླ་7པའི་ཟླ་མཇུག་གོང་ལས་གྲྭ་མཇུག་འགྲིལ་ཐུབ་པའི་བརྩོན་ལེན་བྱས་ཏེ་རྒྱལ་ཁབ་ཕྱི་ནང་གི་ཡུལ་སྐོར་བར་མི་རིགས་ཀྱི་ཁྱད་ཆོས་ཟབ་མོ་ལྡན་པའི་བར་སྐོར་གནའ་གྲོང་ཞིག་མངོན་པ་བྱེད་དགོས་པའི་བླང་བྱ་བཏོན་གནང་བ་རེད།

    ཤེས་རྟོགས་བྱུང་བར་གཞིགས་ན། ལྷ་ས་གྲོང་ཁྱེར་གྲོང་ཁུལ་ཪྙིང་པའི་ཁྱད་ལྡན་རྣམ་པ་སྲུང་སྐྱོང་ལས་གྲྭའི་འཆར་འགོད་རྒྱ་ཁྱོན་སྨི་ངོས་གྲུ་ཁྲི་75ཟིན་པ་དང་། འཆར་འགོད་ཁུལ་གྱི་ཁྱབ་ཁོངས་ནི་པེ་ཅིང་དཀྱིལ་ལམ་གྱི་ལྷོ་དང་། རྡོ་སེང་གེ་ལམ་གྱི་ཤར། ཅང་སུའུ་ལམ་གྱི་བྱང་། གླིང་སྐོར་ཤར་ལམ་གྱི་ནུབ་བཅས་ཡིན་ཞིང་། སྒྱུར་བཀོད་བྱས་རྗེས་ཀྱི་ཁྱད་ལྡན་ཁྲོམ་གཞུང་དེ་ཚོས་གཞི་དཀར་པོ་གཙོ་བོ་ཡིན་ལ་ཚོས་གཞི་ནག་པོ་སོགས་ས་མཐོའི་བཟོ་སྐྲུན་ཁ་མདོག་གིས་རམ་འདེགས་བྱ་རྒྱུ་རེད།