ཟླ་10ཚེས་28ཉིན་གྱི་སྔ་དྲོ་རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་སྲིད་ཁྲིམས་ཨུ་ཡོན་ལྷན་ཁང་གི་ཧྲུའུ་ཅི་ཏེང་ཞའོ་ཀང་གིས་ལྷ་ས་གྲོང་ཁྱེར་ཁྲེང་ཀོན་ཆུས་ཀྱི་བརྟན་ལྷིང་སྲུང་སྐྱོང་གི་འཐབ་ས་དང་པོར་ཕེབས་ནས་བརྟན་ལྷིང་སྲུང་སྐྱོང་གི་ལས་དོན་ལ་ལྟ་སྐུལ་ཞིབ་བཤེར་གནང་བ་དང་འཐབ་ས་དང་པོ་བརྟན་སྲུང་བྱེད་མཁན་ལས་སྒྲུབ་དཔོན་དམག་དང་། སྤྱི་བདེའི་མི་དམངས་ཉེན་རྟོག་པ། གཞི་རིམ་གྱི་ལས་བྱེད་པ་དང་མང་ཚོགས་བཅས་ལ་གཟིགས་པ་དང་འཚམས་འདྲི་གནང་བ་མ་ཟད། བརྟན་ལྷིང་སྲུང་སྐྱོང་ལས་དོན་སྐོར་གྱི་རང་སྐྱོང་ལྗོངས་ཀྱི་ཉེ་དུས་ཀྱི་འཐབ་ཇུས་བཀོད་སྒྲིག་རབ་དང་རིམ་པ་ལག་བསྟར་དོན་འཁྱོལ་གཏིང་ཟབ་བྱས་ཏེ་ཏང་གི་ཚོགས་ཆེན་བཅོ་བརྒྱད་པའི་བདེ་འཇགས་འགན་ལེན་དང་བརྟན་ལྷིང་སྲུང་སྐྱོང་གི་འགག་སྒྲོལ་ལས་དོན་ཡག་པོ་སྒྲུབ་དགོས་པའི་བཀོད་སྒྲིག་ཀྱང་གནང་བ་རེད།
རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་དང་། ལྗོངས་སྤྱི་བདེ་ཐིང་ཏང་ཨུད་ཀྱི་ཧྲུའུ་ཅི། ཐིང་ཀྲང་བཅས་ཡིན་པའི་ལི་ཀྲའོ་དང་བོད་ལྗོངས་སྤྱི་བདེ་མེ་ཟོན་སྤྱི་ཁྱབ་རུ་ཁག་གི་སྤྱི་ཁྱབ་རུ་དཔོན་ཀའོ་ཡུས་ཞང་སོགས་ཞིབ་བཤེར་གནང་སྐབས་ལྷན་དུ་ཕེབས་ཡོད་པ་རེད།
ཏེང་ཞའོ་ཀང་དང་བཅས་པས་སྔ་རྗེས་སུ་གཙུག་ལག་ཁང་གི་ཐང་ཆེན་དང་། བར་སྐོར་གནའ་གྲོང་དོ་དམ་ཨུ་ཡོན་ལྷན་ཁང་། ལྷ་ས་གྲོང་ཁྱེར་ཁྲེང་ཀོན་ཆུས་བརྟན་ལྷིང་སྲུང་སྐྱོང་གི་འཐབ་ས་དང་པོའི་བཀོད་འདོམས་པུའུ་སོགས་སུ་ཕེབས་ནས་བརྟན་ལྷིང་སྲུང་སྐྱོང་ལས་དོན་སྤེལ་ཚུལ་ལ་ཞིབ་བཤེར་དང་མཛུབ་ཁྲིད་གནང་བ་རེད། ཁྲེང་ཀོན་ཆུས་ཀྱི་བརྟན་ལྷིང་སྲུང་སྐྱོང་ལས་དོན་སྙན་ཞུ་གསན་རྗེས་ཏེང་ཞའོ་ཀང་གིས་ལྷ་ས་གྲོང་ཁྱེར་དང་ཁྲེང་ཀོན་ཆུས་ཀྱིས་ལྗོངས་ཏང་ཨུད་དང་སྲིད་ཁྲིམས་ཨུ་ཡོན་ལྷན་ཁང་དང་རང་སྐྱོང་ལྗོངས་བརྟན་ལྷིང་སྲུང་སྐྱོང་བཀོད་འདོམས་པུའི་འཐབ་ཇུས་བཀོད་སྒྲིག་ལག་བསྟར་དོན་འཁྱོལ་མཐའ་གཅིག་ཏུ་བྱས་པ་དང་། བརྟན་ལྷིང་སྲུང་སྐྱོང་གི་བྱེད་ཐབས་ཁག་ཏན་ཏིག་དང་ནུས་ལྡན་ངང་བསྒྲུབས་པ། ལས་དོན་དོན་འཁྱོལ་གཏིང་ཟབ་བྱས་པ་བཅས་ཀྱི་ཐོག་ནས་ལྗོངས་ཡོངས་སུ་རྒྱུན་མཐུད་ངང་བརྟན་ལྷིང་ཡོང་ཆེད་ལེགས་སྐྱེས་མངོན་གསལ་དོད་པོ་ཕུལ་བར་གདེང་འཇོག་གང་ལེགས་གནང་བ་རེད། མིག་སྔའི་བརྟན་ལྷིང་སྲུང་སྐྱོང་ལས་ཀར་འཕྲད་པའི་དུས་བབ་ལ་དབྱེ་ཞིབ་གཏིང་ཟབ་བྱེད་སྐབས་ཏེང་ཞའོ་ཀང་གིས་ཏང་གི་ཚོགས་ཆེན་བཅོ་བརྒྱད་པའི་བདེ་འཇགས་འགན་ལེན་དང་བརྟན་ལྷིང་སྲུང་སྐྱོང་གི་འགག་སྒྲོལ་ལས་དོན་སྤེལ་བཞིན་ཡོད་པའི་སྐབས་དེར་ལྗོངས་ཡོངས་ཀྱི་ཞི་མཐུན་བརྟན་ལྷིང་སྲུང་སྐྱོང་ཐད་འཕྲད་པའི་ཉེན་ཁ་དང་འགྲན་རྩོད་ཧ་ཅང་མངོན་གསལ་དོད་པོ་ཡོད་ལ་དུས་བབ་ཀྱང་ནམ་རྒྱུན་དང་མི་འདྲ་བར་ཪྙོག་འཛིང་ཆེ་ལ་ཛ་དྲག་པ་ཞིག་ཡོད་སྟབས་ལྷ་ས་གྲོང་ཁྱེར་འདི་ཉིད་ནི་ཐོག་མཐའ་བར་གསུམ་དུ་ཏཱ་ལའི་རུ་ཚོགས་ཀྱིས་སིམ་འཛུལ་དང་གཏོར་བཤིག་གཏོང་ཡུལ་གྱི་ས་ཁུལ་གཙོ་བོ་ཞིག་ཡིན་ལ་ཁྲེང་ཀོན་ཆུས་ནི་ལྗོངས་ཡོངས་ཀྱི་བརྟན་ལྷིང་སྲུང་སྐྱོང་ལས་ཀའི་སྤྱི་ཡོངས་ཀྱི་གལ་ཆེའི་ནང་གི་འགངས་ཆེ་ཞིག་དེ་བས་ཡིན་པས་ངེས་པར་དུ “བརྟན་ལྷིང་ནི་མཐའ་དག་ལས་ལྷག་པ་དང་ཡོད་ཚད་བརྟན་ལྷིང་ལ་ཞབས་འདེགས་ཞུ་བའི ”བསམ་བློ་བརྟན་པོ་བཙུགས་ཏེ་བྱ་ཐབས་སྔོན་ལ་སྤེལ་རྒྱུར་གཞི་ཚུགས་པ་དང་རང་འགུལ་དམག་འཐབ་ཡག་པོ་བརྒྱབ་ནས་རང་སྐྱོང་ལྗོངས་ཀྱིས་གཏན་ལ་ཕབ་པའི་འཐབ་ཇུས་བཀོད་སྒྲིག་ཁག་ལག་བསྟར་དོན་འཁྱོལ་ནན་པོ་བྱས་ཏེ་ཏང་གི་ཚོགས་ཆེན་བཅོ་བརྒྱད་པའི་བདེ་འཇགས་འགན་ལེན་དང་བརྟན་ལྷིང་སྲུང་སྐྱོང་གི་ལས་དོན་ཡག་པོ་སྒྲུབ་ཆེད་འབུལ་དགོས་ངེས་ཀྱི་ལེགས་སྐྱེས་འབུལ་དགོས་ཞེས་བསྟན་གནང་བ་རེད།