ཟླ་10ཚེས་26ཉིན་གྱི་སྔ་དྲོ་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་པད་མ་འཕྲིན་ལས་ཀྱིས་ཆུ་ཤུར་རྫོང་མཉེས་ཐང་བཟོ་ལས་གླིང་ཁུལ་གྱི་སྤང་རྒྱན་མེ་ཏོག་བཟོ་ཚོང་ཚད་ཡོད་ཀུང་སིར་བརྟག་ཞིབ་གནང་ཞིང་། ཁོང་གིས་ཁ་བཏགས་ཆུང་ཆུང་དེ་ཐོན་ལས་ཆེན་པོ་ཞིག་ཏུ་བསྐྲུན་ཏེ་བོད་ས་གནས་འདི་ག་ནས་ཁ་བཏགས་ཐོན་སྐྱེད་བྱེད་པའི་ལས་དོན་ཡག་པོ་བསྒྲུབས་པ་དང་གོ་སྐབས་དམ་འཛིན་གྱིས་དུས་བབ་དང་བསྟུན་ནས་མི་རིགས་ཀྱི་ཁྱད་ཆོས་ལྡན་པའི་ཐོན་ལས་ཀྱི་སྤུས་རྟཌ་ཧུར་ཐག་བཏོད་དེ་མི་རིགས་ཀྱི་ཁྱད་ལྡན་ཐོན་ལས་རྒྱ་སྟོབས་ཆེ་རུ་གཏོང་དགོས་པའི་ནན་བཤད་གནང་བ་རེད།
རང་སྐྱོང་ལྗོངས་སྲིད་གྲོས་ཀྱི་ཀྲུའུ་ཞི་གཞོན་པ་ལྗོངས་མི་རིགས་ཆོས་ལུགས་ལས་དོན་ཨུ་ལྷན་གྱི་ཀྲུའུ་རེན་བློ་བཟང་འགྱུར་མེད་དང་རང་སྐྱོང་ལྗོངས་སྲིད་གཞུང་ཏང་ཙུའི་ཁོངས་མི་དྲུང་ཆེ་ཀའོ་དབྱང་བརྟག་ཞིབ་གནང་སྐབས་ལྷན་དུ་ཕེབས་ཡོད་པ་རེད།
སྤང་རྒྱན་མེ་ཏོག་བཟོ་ཚོང་ཚད་ཡོད་ཀུང་སིར་པད་མ་འཕྲིན་ལས་དང་བཅས་པ་སྔ་རྗེས་སུ་ལག་ཤེས་འཐག་བསླས་འཁོར་ཁང་དང་། བལ་གསེད་འཁོར་ཁང་། ཁ་བཏགས་བཟོ་ཁང་། ཁ་བཏགས་ཀྱི་རྒྱུ་ཆ་འཇོག་ཁང་། ཐོན་རྫས་གཤོམ་ཁང་སོགས་སུ་ཐོན་སྐྱེད་ཀྱི་བཟོ་རྩལ་དང་། ཐོན་སྐྱེད་ཀྱི་བརྒྱུད་རིམ། ཐོན་ཟོག་བྲིན་ཚོང་བཅས་ཀྱི་གནས་ཚུལ་ལ་རྟོག་ཞིབ་གང་ལེགས་གནང་བ་དང་། བཟོ་པ་ཚོ་དང་བྱམས་བརྩེའི་ངང་གླེང་མོལ་གནང་སྟེ་བཟོ་པ་ཚོའི་ལས་ཀ་དང་འཚོ་བའི་གནས་ཚུལ་བཀའ་འདྲི་གནང་བ་རེད། ཁ་བཏགས་བཟོ་ཁང་དུ་པད་མ་འཕྲིན་ལས་ཀྱིས་སྤང་རྒྱན་མེ་ཏོག་བཟོ་ཚོང་ཚད་ཡོད་ཀུང་སིའི་ཁ་བཏགས་ཐོན་སྐྱེད་ལག་རྩལ་དེ་ནང་སའི་ཐོན་སྐྱེད་ལག་རྩལ་དང་འདྲ་པོ་ཡོད་པ་གཟིགས་སྐབས་དགྱེས་ཚོར་ཆེན་པོ་བྱུང་ཞིང་། ཁོང་གིས་དགེ་ཕྲུག་ལ་ལག་རྩལ་སློབ་བཞིན་ཡོད་པའི་ནང་སའི་དགེ་རྒན་དབྱང་ལི་ལ “ཁྱེད་ཚོས་སྔོན་ཐོན་གྱི་འཐག་བསླས་ལག་རྩལ་འཁྱེར་ཡོང་བ་དེ་བོད་ཀྱི་ཁ་བཏགས་ཐོན་ལས་འཕེལ་རྒྱས་ཐད་དགོས་གལ་ཆེན་པོ་ཡོད་ལ་ཁ་བཏགས་ཐོན་ལས་འཕེལ་རྒྱས་གཏོང་བར་ས་གནས་འདི་གའི་ལག་རྩལ་མི་སྣ་གསོ་སྐྱོང་བྱ་རྒྱུ་དེ་འགག་རྩ་ཡིན ”ཞེས་གསུངས་པ་མ་ཟད་ད་དུང་ཁོང་གིས་དབྱང་ལི་ཡི་དགེ་ཕྲུག་ལྷ་མོར་ཁ་བཏགས་བཟོ་བའི་ལག་རྩལ་སློབ་སྦྱོང་ཡག་པོ་དང་ཁོང་དུ་ཆུད་པ་བྱས་ཏེ་བཟོ་རྩལ་གསར་པ་ཁོང་དུ་ཆུད་མཁན་གྱི་བོད་ས་གནས་འདི་གའི་ཁ་བཏགས་འཐག་བསླས་ལག་རྩལ་མི་སྣ་ཨང་དང་པོར་འགྱུར་བ་བྱས་ནས་མི་རིགས་ཀྱི་ཁྱད་ལྡན་ཐོན་རྫས་གཏོད་རྒྱུའི་ཐད་སྟོབས་ཤུགས་སྐྱེས་སུ་འབུལ་དགོས་པའི་སྐུལ་མའང་གནང་བ་རེད།
བརྟག་ཞིབ་གནང་རིང་པད་མ་འཕྲིན་ལས་ཀྱིས་ད་དུང་བོད་ལྗོངས་སྤང་རྒྱན་མེ་ཏོག་བཟོ་ཚོང་ཚད་ཡོད་འགན་འཁྲི་ཀུང་སིའི་འགན་འཁུར་བས་ཁེ་ལས་ཀྱི་གནས་ཚུལ་ངོ་སྤྲོད་བྱས་པ་གསན་པ་རེད།
པད་མ་འཕྲིན་ལས་ཀྱིས་རང་ལྗོངས་ཀྱི་དམངས་གཉེར་ཁེ་ལས་ཀྱིས་འཕེལ་རྒྱས་ཀྱི་བརྒྱུད་རིམ་ཁྲོད་གཙོ་གནད་ཁོང་དུ་ཆུད་པ་དང་ཚད་བརྒལ་འཚོལ་ཞིབ་ཀྱིས་སྤུས་རྟགས་ཁྲོམ་རའི་ཐོག་བཏོན་ཏེ་ཕན་འབྲས་མཐོ་རུ་གཏོང་ཐུབ་པའི་ལམ་བུའི་ཐོག་བསྐྱོད་རྒྱུ་མཐའ་འཁྱོངས་བྱེད་པ་དང་ལྷག་པར་དུ་མི་རིགས་ཀྱི་ཁྱད་ཆོས་ལྡན་པའི་ཐོན་རྫས་སྤུས་རྟགས་གཏོད་པ་དང་ཁྲོམ་རའི་འགྲན་ནུས་ཤུགས་ཆེན་ལྡན་པའི་ཁྱད་ལྡན་སྤུས་རྟགས་གཏོད་དེ་དཔལ་འབྱོར་གྱི་ཕན་འབྲས་དང་སྤྱི་ཚོགས་ཀྱི་ཕན་འབྲས་གཉིས་ཀ་ཐོན་པ་བྱས་ནས་རང་ལྗོངས་ཀྱི་ཁྱད་ལྡན་ཐོན་ལས་འཕེལ་རྒྱས་གསར་པ་ཡོང་བ་བྱེད་དགོས་པའི་ནན་བཤད་གནང་བ་རེད།
རང་སྐྱོང་ལྗོངས་ཀྱི་འབྲེལ་ཡོད་སྡེ་ཚན་གྱི་འགན་འཁུར་བློ་མཐུན་བརྟག་ཞིབ་གནང་སྐབས་ལྷན་དུ་ཕེབས་ཡོད།