བོད་ལྗོངས་ཉིན་རེའི་ཚགས་པར་ཁང་དུ་ལྷ་ས་ནས་གནས་ཚུལ་འབྱོར་གསལ། ཟླ་4ཚེས་28ཉིན་གྱི་སྔ་དྲོ་རྒྱ་ཆེའི་ངལ་རྩོལ་པར་དུས་ཆེན་གྱི་སྨོན་འདུན་ཞུ་ཆེད་དང་གཙོ་གནད་གློག་ཤུགས་ལས་གྲྭའི་འཛུགས་སྐྲུན་ལ་དོ་ཁུར་ཟབ་མོ་གནང་ཆེད་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཀྲང་ཆིང་ལི་ལྷུན་གྲུབ་རྫོང་དུ་ཡོད་པའི་མཚོ་བོད་སྤེལ་རྒྱུག་དང་ཐད་རྒྱུག་དྲ་སྦྲེལ་ལས་གྲྭའི་ལྷ་སའི་བརྗེ་རྒྱུག་ས་ཚིགས་ཀྱི་ལས་ཡུལ་དུ་ཕེབས་ནས་མཚོ་བོད་སྤེལ་རྒྱུག་དང་ཐད་རྒྱུག་དྲ་སྦྲེལ་ལས་གྲྭའི་འཛུགས་སྐྲུན་གནས་ཚུལ་ལ་རྟོག་ཞིབ་གནང་བ་དང་འབྲེལ་ལས་ཡུལ་ཐོག་དཀའ་སྤྱད་ངལ་རྩོལ་བྱེད་མཁན་གློག་ཤུགས་ལས་དོན་པ་དང་ལྗོངས་ཡོངས་ཀྱི་མི་རིགས་ཁག་དང་ལས་རིགས་ཁག་གི་ངལ་རྩོལ་པར “ལྔ་གཅིག ”རྒྱལ་སྤྱིའི་ངལ་རྩོལ་དུས་ཆེན་གྱི་སྨོན་འདུན་ཞུས་གནང་བ་རེད།

    ལྷུན་གྲུབ་རྫོང་གི་གང་སར་དཔྱིད་དཔལ་རབ་ཏུ་བཞད་ཅིང་། ཀྲང་ཆིང་ལི་དང་བཅས་པས་རང་སོ་སོའི་ལས་གནས་ཐོག་དཀའ་སྤྱད་ལས་ཀ་བྱེད་མཁན་གློག་ཤུགས་ལས་དོན་པ་དང་འཛུགས་སྐྲུན་ནང་ཞུགས་མཁན་དྲག་ཆས་ཉེན་རྟོག་དཔོན་དམག་ལ་བྱམས་བརྩེའི་ངང་གཟིགས་པ་དང་འཚམས་འདྲི་གནང་ནས་ཚང་མར “ལྔ་གཅིག ”རྒྱལ་སྤྱིའི་ངལ་རྩོལ་དུས་ཆེན་གྱི་སྨོན་འདུན་ཞུས་གནང་བ་དང་། ཀྲང་ཆིང་ལིས་ལྷ་སའི་བརྗེ་རྒྱུག་ས་ཚིགས་ཀྱི་ཕྱོགས་བསྡུས་ཐོག་བརྩེགས་ཁང་དང་། ལྟེ་བའི་ཚོད་འཛིན་ཐོག་བརྩེགས་ཁང་ ། སྤེལ་རྒྱུག་གི་མཉམ་སྒྲིག་གློག་ཆས་ཁང་སོགས་ཀྱི་འཛུགས་སྐྲུན་གནས་ཚུལ་ལ་གཟིགས་ཞིབ་ནན་ཏན་གནང་བ་དང་རྣམ་གྲངས་ཀྱི་འགན་འཁུར་བློ་མཐུན་གྱིས་ཞུས་པའི་གནས་ཚུལ་ངོ་སྤྲོད་གསན་པ་དང་འབྲེལ་ལས་གྲྭའི་འཕེལ་རིམ་དང་། བདེ་འཇགས་དོ་དམ། སྣོད་བཅུད་སྲུང་སྐྱོང་བཅས་ཀྱི་འབྲེལ་ཡོད་གནས་ཚུལ་བཀའ་འདྲི་ཞིབ་ཚགས་གནང་བ་རེད། ཁོང་གིས་ལྗོངས་ཡོངས་ཀྱིས་སྤྲོ་སེམས་དང་ཧུར་སེམས་ཀྱིས་ཁེངས་བཞིན་དུ་ཏང་དབུ་བཪྙེས་ནས་ལོ་ངོ་90དང་བོད་ཞི་བས་བཅིངས་འགྲོལ་བཏང་ནས་ལོ་ངོ་60འཁོར་བར་བསུ་བ་ཞུ་བའི་སྐབས་སུ་མཚོ་བོད་སྤེལ་རྒྱུག་དང་ཐད་རྒྱུག་དྲ་སྦྲེལ་ལས་གྲྭའི་ལྷ་སའི་བརྗེ་རྒྱུག་ས་ཚིགས་སུ་ཚ་ཚ་འུར་འུར་ངང་འཛུགས་སྐྲུན་བྱེད་པའི་རྣམ་པ་མཐོང་སྐབས་དགའ་པོ་དང་བློ་བདེ་པོ་བྱུང་ལ་སེམས་འགུལ་ཡང་ཐེབས་བྱུང་། ཁྱེད་རྣམ་པས་དཀའ་ངལ་ལ་མི་སྐྲག་པར་ལས་ཀ་ཧུར་ཐག་བྱས་པའི་དབང་གིས་ལས་གྲྭའི་འཛུགས་སྐྲུན་གྱི་འཕེལ་རིམ་བདེ་བླག་བྱུང་བ་དང་གཏམ་བཟང་ཡང་ཡང་ཁྱབ་ནས་དུས་མཚམས་རང་བཞིན་གྱི་རྒྱལ་ཁ་གལ་ཆེན་ཐོབ་པ་མ་ཟད། ལོ་གཅིག་སྔ་སྣུར་གྱིས་ལས་མཇུག་འགྲིལ་ནས་གཉེར་སྐྱོང་བྱེད་འགོ་ཚུགས་པས་ཁྱེད་རྣམ་པའི “འབད་བརྩོན་ཆེན་པོས་ཚད་བརྒལ་ཡོང་བ་བྱེད་པ་དང་རྩེར་སོན་དོན་གཉེར་བྱེད་པའི ”ཁེ་ལས་ཀྱི་སྙིང་སྟོབས་དང “གསོ་རླུང་མི་འདང་རུང་སྙིང་སྟོབས་མི་ཉམས་པ་དང་། གསོ་རླུང་མི་འདང་རུང་བློ་གྲོས་མི་ཉམས་པ། དཀའ་ངལ་ལ་མི་སྐྲག་པ། ས་བབ་མཐོ་རུང་བརྩོན་གཉེར་དེ་བས་ཆེ་བ ”བཅས་ཀྱི་མཚོ་བོད་དྲ་སྦྲེལ་གྱི་སྙིང་སྟོབས་ཀྱིས་ང་ལ་སེམས་འགུལ་ཆེན་པོ་ཐེབས་བྱུང་། ཁྱེད་རྣམ་པ་དང་ཁྱེད་རྣམ་པའི་ལས་དོན་ལ་སེམས་ཁུར་དང་རྒྱབ་སྐྱོར་བྱེད་མཁན་གཉེན་ཉེ་ཚོར་བྱམས་བརྩེའི་འཚམས་འདྲི་དང་བླ་ན་མེད་པའི་གུས་འདུད་ཞུ་རྒྱུ་ཡིན་ཞེས་གསུངས་པ་རེད།

    ལས་གྲྭའི་འཛུགས་སྐྲུན་རྣམ་གྲངས་པུའུ་རུ་ཀྲང་ཆིང་ལིས་མཚོ་བོད་སྤེལ་རྒྱུག་དང་ཐད་རྒྱུག་དྲ་སྦྲེལ་ལས་གྲྭའི་འཛུགས་སྐྲུན་པ་དང་དོ་དམ་མི་སྣ་དང་བཞུགས་མོལ་གནང་བ་དང་། རྒྱལ་ཁབ་གློག་དྲ་ཀུང་སིའི་སྤྱི་ཁྱབ་ཅིང་ལིའི་ལས་རོགས་དང་། མཚོ་བོད་སྤེལ་རྒྱུག་དང་ཐད་རྒྱུག་དྲ་སྦྲེལ་ལས་གྲྭའི་སྤྱི་ཁྱབ་བཀོད་འདོམས་པུའི་སྤྱི་ཁྱབ་བཀོད་འདོམས་པ། ནུབ་བྱང་གློག་དྲ་ཀུང་སིའི་སྤྱི་ཁྱབ་ཅིང་ལི་དང་ཏང་ཙུའི་ཧྲུའུ་ཅི་བཅས་ཡིན་པའི་ཡུས་ཤིན་ཆང་གིས་ཞུས་པའི་ལས་དོན་སྙན་སེང་གསན་རྗེས་ཀྲང་ཆིང་ལིས་གསུང་བཤད་གལ་ཆེན་གནང་ཞིང་། ཁོང་གིས་མཚོ་བོད་སྤེལ་རྒྱུག་དང་ཐད་རྒྱུག་དྲ་སྦྲེལ་ལས་གྲྭ་ནི་རྒྱལ་ཁབ་ཀྱི་ནུབ་རྒྱུད་ཐོན་འབྱེད་ཆེ་མོའི་གཙོ་གནད་རྣམ་གྲངས་ཀྱི་གྲས་ཤིག་དང་བོད་ཀྱི་གློག་མི་འདང་བའི་གནད་དོན་རྩ་བའི་ཐོག་ནས་ཐག་གཅོད་བྱས་ཏེ་མཚོ་སྔོན་ཞིང་ཆེན་དང་བོད་རང་སྐྱོང་ལྗོངས་གཉིས་ཀྱི་མཆོང་སྐྱོད་ལྟ་བུའི་འཕེལ་རྒྱས་ལ་ཞབས་འདེགས་ཞུ་བའི་བྱེད་ཐབས་གལ་ཆེན་ཞིག་ཡིན་ལ་ད་བར་འཛམ་གླིང་ཐོག་ས་བབ་མཐོ་ཤོས་དང་མཐོ་གྲང་ཁུལ་དུ་བསྐྲུན་པའི་གཞི་ཁྱོན་ཆེ་ཤོས་ཀྱི་གློག་འདྲེན་ལས་གྲྭ་ཆེ་ཤོས་ཤིག་ཀྱང་རེད། ལས་གྲྭ་དེ་བསྐྲུན་པ་དེས་ནུབ་བྱང་གློག་དྲ་དང་བོད་ཀྱི་གློག་དྲ་ཕན་ཚུན་སྦྲེལ་རྒྱུ་ཐོག་མར་མངོན་འགྱུར་བྱུང་ནས་བོད་ཀྱི་གློག་ཤུགས་དྲ་སྦྲེལ་མེད་པའི་ལོ་རྒྱུས་རྦད་དེ་མཇུག་འགྲིལ་རྒྱུ་ཡིན་པ་དེ་རང་ལྗོངས་ཀྱི་གློག་ཁུངས་གྲུབ་ཆ་ལེགས་སྒྲིག་བྱེད་པ་དང་། ནུས་རྒྱུའི་བདེ་འཇགས་འགན་ལེན་བྱེད་པ། ནུས་རྒྱུ་རྒྱུན་མཐུད་ངང་འཕེལ་རྒྱས་ཡོང་རྒྱུར་སྐུལ་འདེད་གཏོང་བ་བཅས་དང་རང་ལྗོངས་ཀྱི་ཕུན་སུམ་ཚོགས་པའི་ཆུ་ནུས་ཐོན་ཁུངས་གསར་སྤེལ་བྱེད་པ་དང་ཆུ་ཤུགས་གློག་ཕྱིར་འདྲེན་བྱེད་པའི་བགྲོད་ལམ་བསྐྲུན་རྒྱུ་བཅས་ཀྱི་ངོས་ནས་བརྗོད་ན་དོན་སྙིང་གལ་ཆེན་དང་གཏིང་ཟབ་རྒྱང་རིང་གི་ཤུགས་རྐྱེན་ལྡན་ཡོད་པས་བོད་ཀྱི་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ལ་སྐུལ་འདེད་གཏོང་རྒྱུར་སྒུལ་ཤུགས་གསར་པ་བསྣན་ངེས་རེད།

    མཚོ་བོད་སྤེལ་རྒྱུག་དང་ཐད་རྒྱུག་དྲ་སྦྲེལ་ལས་གྲྭར་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གིས་ཚད་མཐོའི་མཐོང་ཆེན་གནང་ནས་ཀྲུང་དབྱང་ཆབ་སྲིད་ཅུས་ཀྱི་རྒྱུན་ཨུ་རྒྱལ་སྲིད་སྤྱི་ཁྱབ་ཁང་གི་ཙུང་ལི་གཞོན་པ་བློ་མཐུན་ལི་ཁེ་ཆང་གིས་དམངས་སེམས་འདུ་འགོད་དེ་འཛུགས་སྐྲུན་ཡག་པོ་དང་དོ་དམ་ཡག་པོ་བྱས་ནས་སྔ་ཙམ་ཕན་འབྲས་ཐོན་པ་བྱེད་དགོས་པའི་གལ་ཆེན་མཆན་བཀོད་མཛུབ་སྟོན་ཆེད་མངགས་གནང་ཡོད་པ་དང་། ན་ནིང་གི་ཟླ་7ཚེས་29ཉིན་ནས་ལས་གྲྭ་བསྐྲུན་འགོ་ཚུགས་ཚུན་ལས་གྲྭའི་འཛུགས་སྐྲུན་དང་འབྲེལ་བའི་ཕྱོགས་ཁག་དང་ལྷག་དོན་དུ་རྒྱལ་ཁབ་གློག་དྲ་ཀུང་སིས་བློ་མཐུན་ལི་ཁེ་ཆང་གི་གལ་ཆེའི་མཆན་བཀོད་མཛུབ་སྟོན་གྱི་དགོངས་དོན་དོན་འཁྱོལ་ནན་ཏན་བྱས་ནས་གཅིག་གྱུར་གྱིས་འཆར་འགོད་དང་མཐུན་སྦྱོར་དང་ཕྱར་བ་གྲུ་འདེགས་ཀྱིས་ཚད་མཐོའི་མཐོང་ཆེན་དང་། ཇུས་འགོད་ཀྱི་ཚད་གཞི་མཐོ་བ། ཚན་རིག་གི་འདུ་ཤེས་ཟབ་པ། ལས་གྲྭའི་སྤུས་ཚད་ཡག་པ་བཅས་བྱེད་ཐུབ་པ་བྱས་པ་དང་། འཛུགས་སྐྲུན་ནང་ཞུགས་མཁན་ཚང་མས་གསར་བརྗེའི་དཔའ་བོའི་རིང་ལུགས་ཀྱི་སྙིང་སྟོབས་དང “བོད་སྐྱོད་པ་རྒན་གྲས་ཀྱི་སྙིང་སྟོབས ”དར་སྤེལ་ཤུགས་ཆེན་བཏང་ནས “བདེ་འཇགས་དང་བློས་འགེལ་ཆོག་པ་དང་། སྤུས་ལེགས་དང་ནུས་ཆེ། རང་བརྟེན་གསར་གཏོད། ཁོར་ཡུག་སྲུང་སྐྱོང་། འབད་འཐབ་ལེགས་སྐྱེས། སྔོ་ལྗང་མཐུན་སྦྱོར ”བཅས་ཀྱི་བླང་བྱ་གཞིར་བཟུང་འཛམ་གླིང་ཐོག་ས་བབ་མཐོ་ཤོས་ཀྱི་གློག་འདྲེན་ལས་གྲྭ་སྤུས་དག་ཅིག་གཏོད་རྒྱུར་བརྩོན་ལེན་བྱས་པས་ཁྱེད་ཚོའི་རླབས་ཆེའི་བྱ་སྤྱོད་དེས་འཛམ་གླིང་ཡང་རྩེའི་ཐོག “གློག་ཤུགས་མཁའ་ལམ ”གྱི་ངོ་མཚར་གཏོད་བཞིན་ཡོད་པ་དེས་དངོས་པོ་དང་བསམ་པའི་མཛད་རྗེས་རྡོ་རིང་ཞིག་མཚོ་སྔོན་ཞིང་ཆེན་དང་བོད་རང་སྐྱོང་ལྗོངས་མི་དམངས་ཀྱི་སེམས་ནང་འཇོག་ངེས་རེད་ཅེས་གསུངས་པ་རེད།

    ཀྲང་ཆིང་ལིས་འཛུགས་སྐྲུན་ནང་ཞུགས་མཁན་ཚན་པ་དང་མི་སྣ་ཚང་མས་ངེས་པར་དུ་ལས་གྲྭའི་འཕེལ་རིམ་མགྱོགས་སུ་བཏང་ནས་རྣམ་གྲངས་རེ་རེ་བཞིན་གྲལ་སྒྲིག་པ་དང་དོན་དག་རེ་རེ་བཞིན་དོན་འཁྱོལ་དམ་འཛིན་གྱིས་ལས་དུས་དུས་བཅད་བཟོ་ཐུབ་པ་བྱས་ཏེ་ལོ་མཇུག་ཏུ་ལས་གྲྭ་ལེགས་སྒྲུབ་ཀྱིས་སྤྱོད་འགོ་ཚུགས་རྒྱུའི་འགན་ལེན་བྱེད་པ་དང་། ངེས་པར་དུ་སྤུས་ཚད་ལ་འགན་ལེན་གྱིས་ལོ་རྒྱུས་ཀྱི་ཚོད་བགམ་དང་ལག་ལེན་གྱི་ཉམས་སད་ཐེག་ཐུབ་པའི་ལས་གྲྭ་སྤུས་དག་ཅིག་བསྐྲུན་པ། ངེས་པར་དུ་བདེ་འཇགས་ལ་འགན་ལེན་གྱིས་ལས་གྲྭའི་བདེ་འཇགས་དུས་ནམ་ཡང་ཨང་དང་པོར་འཇོག་པ། ངེས་པར་དུ་ཁོར་ཡུག་སྲུང་སྐྱོང་ལ་དོ་སྣང་གིས་ལས་གྲྭའི་འཛུགས་སྐྲུན་དེ་ཐོན་ཁུངས་གྲོན་ཆུང་དང་ཁོར་ཡུག་མཐུན་འཕྲོད་ཀྱི་དཔེ་སྟོན་ལས་གྲྭ་ཞིག་ཏུ་གཏོད་རྒྱུ་བཅས་བྱས་ནས་ཇུས་འགོད་རྩེར་སོན་དང་། དཔུང་ཁག་རྩེར་སོན། ལས་གྲྭ་རྩེར་སོན། དོ་དམ་རྩེར་སོན། ཕན་འབྲས་རྩེར་སོན་བཅས་བརྩོན་ལེན་གྱིས་མཚོ་བོད་སྤེལ་རྒྱུག་དང་ཐད་རྒྱུག་དྲ་སྦྲེལ་ལས་གྲྭ་དེ་མཚོ་སྔོན་ཞིང་ཆེན་དང་བོད་རང་སྐྱོང་ལྗོངས་མི་དམངས་ལ་བདེ་སྐྱིད་བསྐྲུན་པའི་དམངས་ཕན་འདུ་འགོད་དང་། བློ་ཡིད་ཚིམས་པའི་འདུ་འགོད། ཕན་སྦྱར་འདུ་འགོད་བཅས་ལ་དངོས་འབྲེལ་འགྱུར་བ་བྱེད་པ་དང་མིང་དོན་མཚུངས་པའི “གློག་ཤུགས་མཁའ་ལམ ”ཞིག་ཏུ་གྱུར་བ་བྱས་ཏེ་གཡུར་ཟའི་འབྲས་བུའི་ཐོག་ནས་ཏང་དང་མི་དམངས་ལ་བློ་ཡིད་ཚིམས་པའི་རྒྱུགས་ཤོག་ཤིག་ཕུལ་ནས་ཏང་དབུ་བཪྙེས་ནས་ལོ་ངོ་90དང་བོད་ཞི་བས་བཅིངས་འགྲོལ་བཏང་ནས་ལོ་ངོ་60འཁོར་བར་ལག་རྟགས་ཆེན་པོ་ཞིག་འབུལ་དགོས་པའི་ཐུགས་རེ་བཏོན་གནང་བ་རེད།