བོད་ལྗོངས་ཉིན་རེའི་ཚགས་པར་ཁང་དུ་ལྷ་ས་ནས་གནས་ཚུལ་འབྱོར་གསལ། ཟླ་4ཚེས་29ཉིན་གྱི་ཉིན་དགུང་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཀྲང་ཆིང་ལི་དང་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་པད་མ་འཕྲིན་ལས་རྣམ་གཉིས་ཀྱིས་ལྷ་སར་ཀྲུང་གོ་ཧ་ཡང་ལས་རིགས་ཀུང་སིའི་ཏང་ཙུའུ་ཡི་ཧྲུའུ་ཅི་དང་། སྤྱི་ཁྱབ་ཅིང་ལི། ཀྲུང་གོ་ཧ་ཡང་ལས་རིགས་མ་རྐང་ཚད་ཡོད་ཀུང་སིའི་ཏུང་ཧྲི་ཀྲང་། CEOབཅས་ཡིན་པའི་ཞུང་ཝུའེ་ཕིང་དང་རྒྱལ་ཁབ་ས་ཆ་ཐོན་ཁུངས་པུའི་འབྲེལ་ཡོད་འགན་འཁུར་བློ་མཐུན་བཅས་པ་དང་མཇལ་འཛོམས་གནང་བ་རེད།
ཀྲང་ཆིང་ལི་དང་པད་མ་འཕྲིན་ལས་རྣམ་གཉིས་ཀྱིས་སྤྱི་ཁྱབ་ཅིང་ལི་ཞུང་ཝུའེ་ཕིང་དང་བཅས་པ་རང་ལྗོངས་སུ་ལས་དོན་ལ་ཞིབ་བཤེར་དང་མཛུབ་ཁྲིད་གནང་བ་དང་བོད་ལྗོངས་དབང་ཆེན་གཏེར་ལས་ཚད་ཡོད་ཀུང་སིར་སྒོ་བྱང་འགེལ་བའི་མཛད་སྒོར་ཞུགས་པར་ཆེད་མངགས་ཕེབས་པར་དགའ་བསུ་ཞུས་པ་དང་སྦྲགས་རྒྱལ་ཁབ་ས་ཆ་ཐོན་ཁུངས་པུའུ་ཡིས་ལོ་མང་རིང་བོད་ཀྱི་ལས་དོན་ཁག་ལ་དོ་ཁུར་དང་རྒྱབ་སྐྱོར་གནང་བ་དང་ལྷག་པར་དུ་ཀྲུང་གོ་ཧ་ཡང་ལས་རིགས་ཀུང་སིས་ཆབ་མདོ་ས་ཁུལ་བྲག་གཡབ་རྫོང་ལ་སྒེར་སེམས་མེད་པའི་སྒོ་ནས་རོགས་སྐྱོར་ཤུགས་ཆེན་གནང་བར་སྙིང་དབུས་ནས་ཐུགས་རྗེ་ཆེ་ཞུས་ཤིང་། ཀྲང་ཆིང་ལི་ཡིས་ལོ་མང་རིང་ཀྲུང་གོ་ཧ་ཡང་ལས་རིགས་ཀུང་སིས་ཀྲུང་དབྱང་གི་འབོད་སྐུལ་དང་ལེན་ཧུར་ཐག་ཞུས་ཏེ་ཆབ་མདོ་ས་ཁུལ་བྲག་གཡབ་རྫོང་ལ་ཁ་གཏད་རོགས་སྐྱོར་བྱ་རྒྱུ་དེ་གཟི་བརྗིད་ལྡན་པའི་ཆབ་སྲིད་ཀྱི་ལས་འགན་དང་དོར་ཐབས་མེད་པའི་འགན་འཁྲི་ཞིག་ཏུ་བརྩིས་ཏེ་ཕུལ་དུ་བྱུང་བའི་བོད་སྐྱོར་ལས་བྱེད་པ་འདེམས་གཏོང་བྱས་པ་དང་བོད་སྐྱོར་རྣམ་གྲངས་ཁག་གཅིག་ལག་བསྟར་བྱས་པས་བྲག་གཡབ་རྫོང་གི་དཔལ་འབྱོར་དང་སྤྱི་ཚོགས་འཕེལ་རྒྱས་མགྱོགས་པོ་བྱུང་བ་དང་། གྲོང་ཁྱེར་དང་གྲོང་གསེབ་ཀྱི་རྣམ་པར་འགྱུར་ལྡོག་ཅུང་ཆེན་པོ་བྱུང་བ། བྱ་སྤྱོད་ངོ་མའི་ཐོག་ནས་ས་གནས་དེ་གའི་ལས་བྱེད་པ་དང་མང་ཚོགས་ཀྱི་ཚད་མཐོའི་གདེང་འཇོག་ཐོབ་པ་བྱས་ཡོད། ད་ལྟ་ཀྲུང་གོ་ཧ་ཡང་ལས་རིགས་ཀུང་སིས་ཁ་གཏད་རོགས་སྐྱོར་བྱེད་ཤུགས་མུ་མཐུད་ཆེ་རུ་གཏོང་བ་དང་དུས་མཚུངས་ད་དུང་ང་ཚོ་དང་གཏེར་ཁའི་ཐོན་ཁུངས་ཁྱབ་ཁོངས་སུ་མཉམ་ལས་བྱེད་ཤུགས་སྔར་བས་ཆེ་རུ་གཏོང་རྒྱུ་ཡིན་ཞིང་། ད་རེས་བོད་ཀྱི་རྔམས་ཆེན་གཏེར་ལས་ཚད་ཡོད་ཀུང་སིར་སྒོ་བྱང་བཀལ་བ་དེ་ཐོག་ནས་ཕྱོགས་གཉིས་པོས་གཏེར་ཁའི་ཐོན་ཁུངས་གསར་སྤེལ་ཁྱབ་ཁོངས་ཀྱི་མཉམ་ལས་ཐད་དོན་དངོས་རང་བཞིན་གྱི་གོམ་པ་སྤོས་པ་མཚོན་པ་དང་དེ་ལས་བོད་ཀྱི་གཏེར་ཁའི་ཐོན་ཁུངས་ཚན་རིག་དང་མཐུན་པའི་སྒོ་ནས་གསར་སྤེལ་དང་གཞི་ཁྱོན་ལྡན་པའི་སྒོ་ནས་གསར་སྤེལ་བྱ་རྒྱུར་སྐུལ་འདེད་ནུས་ལྡན་ཐེབས་རྒྱུ་རེད་ལ་བོད་ཀྱི་དཔལ་འབྱོར་དང་སྤྱི་ཚོགས་ལེགས་ལ་མྱུར་བའི་སྒོ་ནས་འཕེལ་རྒྱས་འགྲོ་རྒྱུར་སྐུལ་འདེད་ཐེབས་ངེས་ཀྱང་རེད་ཅེས་གསུངས་པ་རེད། ཀྲང་ཆིང་ལི་ཡིས་ཀྲུང་གོ་ཧ་ཡང་ལས་རིགས་ཀུང་སིས་བོད་ཀྱི་གཏེར་ཁའི་ཐོན་ཁུངས་གསར་སྤེལ་བྱེད་རིང་གཙོ་གནད་འབུར་ཐོན་དང་། གཙོ་གནད་ཚད་བརྒལ། གཅིག་གྱུར་འཆར་འགོད། ཁོར་ཡུག་ལ་སྣང་ཆེན་བཅས་བྱ་རྒྱུ་དང་ཁེ་ལས་འཕེལ་རྒྱས་ཡོང་བ་བྱེད་པ་དང་ཆབས་ཅིག་ས་གནས་དེ་གའི་ཞིང་འབྲོག་མང་ཚོགས་ལ “དཔག་བསམ་ལྗོན་ཤིང ”བཙུགས་ནས་གསར་སྤེལ་དང་འཛུགས་སྐྲུན་ནང་ཞུགས་མཁན་མང་ཚོགས་ལ་ཕན་པ་དེ་བས་མང་བ་ཐོབ་པ་བྱ་རྒྱུའི་རེ་བ་ཡོད་ཅེས་དང་རང་སྐྱོང་ལྗོངས་ཀྱི་རིམ་ཁག་ཏང་ཨུད་དང་སྲིད་གཞུང་གིས་ཀྱང་ཀྲུང་གོ་ཧ་ཡང་ལས་རིགས་ཀུང་སིར་མ་འཇོག་ཁོར་ཡུག་རྩེ་གྲ་ཞིག་སྐྲུན་པ་དང་ལས་ཀའི་ཆ་རྐྱེན་ལེགས་པོ་ཞིག་གཏོད་པའི་ཐོག་ནས་ཀྲུང་གོ་ཧ་ཡང་ལས་རིགས་ཀུང་སིས་བོད་ཀྱི་གཏེར་ཁའི་ཐོན་ཁུངས་གསར་སྤེལ་ནང་ཞུགས་རྒྱུར་རྒྱབ་སྐྱོར་ཧུར་ཐག་བྱ་རྒྱུ་ཡིན་ཞེས་གསུངས་པ་རེད།
ཞུང་ཝུའེ་ཕིང་གིས་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་ཀྲུང་གོ་ཧ་ཡང་ལས་རིགས་ཀུང་སིར་ཐུགས་ཁུར་དང་རྒྱབ་སྐྱོར་གནང་བར་སྙིང་དབུས་ནས་ཐུགས་རྗེ་ཆེ་ཞུས་པ་དང་འབྲེལ་ཀྲུང་གོ་ཧ་ཡང་ལས་རིགས་ཀུང་སིའི་འཕེལ་རྒྱས་འགྲོ་ཚུལ་དང་། འབྱུང་འགྱུར་གྱི་འཆར་གཞི། དེ་བཞིན་བོད་དུ་ཐོན་ཁུངས་གསར་སྤེལ་བྱ་རྒྱུའི་བསམ་ཚུལ་བཅས་ཀྱང་ངོ་སྤྲོད་སྟབས་བདེ་ཞིག་ཞུས་ཤིང་། ཁོང་གིས་སླད་ཕྱིན་ཆབ་མདོ་ས་ཁུལ་བྲག་གཡབ་རྫོང་ལ་ཁ་གཏད་རོགས་སྐྱོར་བྱེད་པའི་ལས་དོན་སྔར་རྒྱུན་བཞིན་སྤེལ་རྒྱུ་དང་ཆབས་ཅིག་གཏེར་ཁའི་ཐོན་ཁུངས་རྩད་ཞིབ་གསར་སྤེལ་ཐད་བོད་རང་སྐྱོང་ལྗོངས་དང་མཉམ་ལས་བྱེད་ཤུགས་ཀྱང་རྒྱུན་ཆད་མེད་པར་ཆེ་རུ་གཏོང་རྒྱུ་ཡིན་ཞིང་། གསར་སྤེལ་དང་སྲུང་སྐྱོང་གཉིས་ཟུང་འབྲེལ་བྱས་ཏེ་ས་གནས་དེ་གའི་ལས་ཞུགས་དང་ཞིང་འབྲོག་པར་འབབ་འཕར་ཡོང་རྒྱུར་སྐུལ་ཁྲིད་བྱས་ནས་བོད་ཀྱི་དཔལ་འབྱོར་དང་སྤྱི་ཚོགས་ལེགས་ལ་མྱུར་བའི་སྒོ་ནས་འཕེལ་རྒྱས་འགྲོ་ཕྱིར་ལེགས་སྐྱེས་འབུལ་རྒྱུ་ཡིན་ཞེས་གསུངས་པ་རེད།
རང་སྐྱོང་ལྗོངས་ཀྱི་འགོ་ཁྲིད་རྡོ་རྗེ་ཚེ་རིང་དང་ཀའོ་དབྱང་མཇལ་འཛོམས་ནང་ཞུགས་ཡོད་ལ་རང་སྐྱོང་ལྗོངས་ཀྱི་འབྲེལ་ཡོད་སྡེ་ཚན་གྱི་འགན་འཁུར་བློ་མཐུན་ཡང་མཇལ་འཛོམས་ནང་ཞུགས་ཡོད་པ་རེད།