བོད་ལྗོངས་ཉིན་རེའི་ཚགས་པར་ཁང་དུ་ནག་ཆུ་ནས་ཟླ་4ཚེས་27ཉིན་གློག་འཕྲིན་འབྱོར་གསལ། “ལྔ་གཅིག ”རྒྱལ་སྤྱིའི་ངལ་རྩོལ་དུས་ཆེན་འཆར་ཉེར་ཡོད་པའི་དུས་ཏེ་ཟླ་4ཚེས་25ཉིན་ནས་ཚེས་27ཉིན་བར་རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་ཏུང་མིང་ཅུན་དང་རང་སྐྱོང་ལྗོངས་སྲིད་གྲོས་ཀྱི་ཀྲུའུ་ཞི་གཞོན་པ་ལྗོངས་སྤྱི་ཁྱབ་བཟོ་ཚོགས་ཀྱི་ཀྲུའུ་ཞི་དབྱངས་ཅན་དང་བཅས་པས་ནག་ཆུ་ས་ཁུལ་དུ་མཚོ་བོད་ཐད་རྒྱུག་དང་སྤེལ་རྒྱུག་དྲ་སྦྲེལ་ལས་གྲྭའི་འཛུགས་སྐྲུན་ནང་ཞུགས་མཁན་བཟོ་པ་དང་དྲག་ཆས་ཉེན་རྟོག་གི་དཔོན་དམག་ལ་འཚམས་འདྲི་གནང་བ་དང་གཟིགས་པར་ཕེབས་པ་རེད།

    ཏུང་མིང་ཅུན་གྱིས་རྒྱ་ཆེའི་ལས་གྲྭའི་འཛུགས་སྐྲུན་པ་ཚོས་འཛམ་གླིང་ཡང་རྩེར་དུས་ཡུན་རིང་པོ་འབད་འཐབ་བྱས་ནས་འཛམ་གླིང་ཐོག་གི་ས་བབ་མཐོ་ཤོས་དང་། སྐུད་ལམ་རིང་ཤོས། ཨར་ལས་བྱེད་དཀའ་ཤོས་བཅས་ཀྱི “གློག་ཤུགས་མཁའ་ལམ ”སྐྲུན་ཕྱིར་སྐད་གྲགས་མེད་པར་ལེགས་སྐྱེས་འབུལ་བའི་ཐོག་ནས་མཐུན་སྒྲིལ་འབད་འཐབ་དང་། འགག་སྒྲོལ་དཀའ་སེལ། རང་སྲོག་བློས་གཏོང་བཅས་ཀྱི་སྙིང་སྟོབས་མངོན་གྱི་ཡོད། ཁོང་ཚོ་ནི་མིང་དོན་མཚུངས་པའི “གློག་ཤུགས་འཛུགས་སྐྲུན་གྱི་ལྕགས་ལྟ་བུའི་དམག་མི ”ཞིག་རེད་ཅེས་གསུངས་པ་རེད།

    ཏུང་མིང་ཅུན་གྱིས་ལས་གྲྭའི་འཛུགས་སྐྲུན་ཚན་པར་ལས་བཟོར་ཐུགས་ཁུར་ཏན་ཏིག་བྱེད་པ་དང་། ལས་བཟོར་གཅེས་སྐྱོང་ཟབ་མོ་བྱེད་པ། སྨན་བཅོས་འགན་ལེན་གྱི་བྱེད་ཐབས་དོན་འཁྱོལ་ཏན་ཏིག་བྱེད་པ། རྒྱབ་ཕྱོགས་མཁོ་སྒྲུབ་ཀྱི་འགན་ལེན་ལས་དོན་ཡག་པོ་སྒྲུབ་པ་བཅས་ཀྱི་ཐོག་ནས་རྒྱ་ཆེའི་འཛུགས་སྐྲུན་པ་ཚོའི་ཚེ་སྲོག་བདེ་འཇགས་དང་གཟུགས་གཞི་བདེ་ཐང་ལ་འགན་ལེན་བྱེད་དགོས་པ་དང་རང་སྐྱོང་ལྗོངས་ཀྱི་འབྲེལ་ཡོད་སྡེ་ཚན་དང་ས་གནས་སྲིད་གཞུང་ལ་མཐུན་སྦྱོར་ཞབས་ཞུའི་ལས་དོན་ཧུར་ཐག་སྤེལ་བ་དང་། རྒྱབ་སྐྱོར་ཤུགས་ཆེན་བྱེད་པ། མཐུན་སྦྱོར་དམ་ཟབ་བྱེད་པ་བཅས་བྱས་ཏེ་ལས་གྲྭའི་འཛུགས་སྐྲུན་ལ་ཕན་ནུས་ཆེ་བ་དང་། མྱུར་པོ། སྤུས་ལེགས་བཅས་ཀྱི་ཞབས་ཞུ་དང་འཛུགས་སྐྲུན་གྱི་ཁོར་ཡུག་ཡག་པོ་ཞིག་མཁོ་འདོན་བྱས་ནས་ཐུན་མོང་ཐོག་ལས་གྲྭའི་འཛུགས་སྐྲུན་ལ་སྐུལ་འདེད་མགྱོགས་པོ་གཏོང་དགོས་པའི་བླང་བྱ་བཏོན་གནང་བ་རེད།