བོད་ལྗོངས་ཉིན་རེའི་ཚགས་པར་ཁང་དུ་ལྷ་ས་ནས་ཟླ་4ཚེས་24ཉིན་གནས་ཚུལ་འབྱོར་གསལ། གོང་ཚེས་ཉིན་2011ལོའི་རང་ལྗོངས་ཀྱི་མཐོ་སློབ་སློབ་ཐོན་སློབ་མ་ཁག་དང་པོའི་ཡོངས་བསྒྲགས་རྒྱུགས་སྤྲོད་བསྡུ་ལེན་གྱི་ཡིག་ཐོག་རྒྱུགས་སྤྲོད་བྱས།

    རང་སྐྱོང་ལྗོངས་ཀྱི་འབྲེལ་ཡོད་སྡེ་ཚན་གྱི་འགན་འཁུར་བློ་མཐུན་ཚོའི་ཕེབས་རོགས་འོག་རང་སྐྱོང་ཏང་ཨུད་ཀྱི་རྒྱུན་ཨུ། རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཝུའུ་དབྱིང་ཅེས་བོད་ལྗོངས་སློབ་ཆེན་གྱི་ནོར་དཔལ་སློབ་གླིང་དང་བོད་ལྗོངས་ལས་རིགས་ལག་རྩལ་སློབ་གླིང་(ནུབ་འདབས་སློབ་ཁུལ )གི་རྒྱུགས་རར་ཕེབས་ཏེ་རྒྱུགས་སྤྲོད་གནས་ཚུལ་ལ་སྐོར་ཞིབ་གནང་བ་རེད།

    གང་དུ་ཕེབས་ཀྱང་ཝུའུ་དབྱིང་ཅེས་ཐེངས་འདིའི་རྒྱུགས་སྤྲོད་ཀྱི་འབྲེལ་ཡོད་གནས་ཚུལ་བཀའ་འདྲི་ཞིབ་ཕྲ་གནང་བ་དང་རྒྱུགས་སྤྲོད་ལས་དོན་མི་སྣར་བྱམས་བརྩེའི་འཚམས་འདྲི་གནང་བ་མ་ཟད། རྒྱུགས་སྤྲོད་སློབ་མས་རྒྱུགས་རར་དྲིས་ལན་འདེབས་ཚུལ་ལའང་གཟིགས་ཤིང་། ཝུའུ་དབྱིང་ཅེས་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་མཐོ་སློབ་སློབ་ཐོན་སློབ་མའི་ཡོངས་བསྒྲགས་རྒྱུགས་སྤྲོད་བསྡུ་ལེན་ལས་དོན་ལ་སྔ་ཕྱི་བར་གསུམ་དུ་ཚད་མཐོའི་མཐོང་ཆེན་གནང་གི་ཡོད། མཐོ་སློབ་སློབ་ཐོན་སློབ་མའི་ཡོངས་བསྒྲགས་རྒྱུགས་སྤྲོད་བསྡུ་ལེན་ལས་དོན་དེ་རྒྱུགས་སྤྲོད་སློབ་མ་ཚང་མའི་བདེ་རྩར་ཐུག་པའི་ཁེ་ཕན་དང་འབྲེལ་བ་ཡོད་པས་འབྲེལ་ཡོད་སྡེ་ཚན་ཁག་གིས་རྒྱུགས་སྤྲོད་ལས་དོན་གྱི་གལ་ཆེའི་རང་བཞིན་དང་དགོས་ངེས་རང་བཞིན་ལ་ངོས་འཛིན་ལེགས་པར་བྱས་ཏེ་མི་རྩ་བར་འཛིན་རྒྱུ་མཐའ་འཁྱོངས་ཀྱིས་རྒྱུགས་སྤྲོད་ལས་དོན་སྒྲིག་འཛུགས་དང་བཀོད་སྒྲིག་ཞིབ་ཚགས་བྱས་ནས་ད་རེས་ཀྱི་རྒྱུགས་སྤྲོད་ལས་འགན་ཕུན་སུམ་ཚོགས་པོའི་ངང་ལེགས་སྒྲུབ་བྱེད་དགོས་ཞེས་བསྟན་གནང་བ་རེད།