བོད་ལྗོངས་ཉིན་རེའི་ཚགས་པར་ཁང་དུ་ལྷ་ས་ནས་ཟླ་4ཚེས་18ཉིན་གནས་ཚུལ་འབྱོར་གསལ། ཟླ་4ཚེས་18ཉིན་གྱི་སྔ་དྲོ་རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་དང་། རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ། སྲིད་ཁྲིམས་ཨུ་ལྷན་གྱི་ཧྲུའུ་ཅི་གཞོན་པ་བཅས་ཡིན་པའི་བློ་བཟང་རྒྱལ་མཚན་དང་བཅས་པས་སྲིད་ཁྲིམས་ཁོངས་གཏོགས་སུ “སྲོལ་རྒྱུན་དར་སྤེལ་གཏོང་བ་དང་། དད་སེམས་བརྟན་དུ་གཏོང་བ། དམངས་ཀྱི་ཆེད་དུ་ཁྲིམས་ལག་བསྟར་བྱེད་པ ”བཅས་ཀྱི་བརྗོད་བྱ་གཙོ་བོའི་སློབ་གསོའི་ལག་ལེན་བྱེད་སྒོ་སྤེལ་ཚུལ་ལ་བརྟག་ཞིབ་གནང་བ་རེད།

    རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་ལྗོངས་སྲིད་ཁྲིམས་ཨུ་ལྷན་གྱི་ཧྲུའུ་ཅི་གཞོན་པ་ལི་ཀྲའོ་བརྟག་ཞིབ་གནང་སྐབས་ལྷན་དུ་ཕེབས་ཡོད་པ་རེད། ལྗོངས་སྤྱི་བདེ་ཐིང་དུ་བརྟག་ཞིབ་གནང་སྐབས་བློ་བཟང་རྒྱལ་མཚན་གྱིས “སྲོལ་རྒྱུན་དར་སྤེལ་གཏོང་བ་དང་། དད་སེམས་བརྟན་དུ་གཏོང་བ། དམངས་ཀྱི་ཆེད་དུ་ཁྲིམས་ལག་བསྟར་བྱེད་པ ”བཅས་ཀྱི་བརྗོད་བྱ་གཙོ་བོའི་སློབ་གསོའི་ལག་ལེན་བྱེད་སྒོའི་ལྗོངས་སྤྱི་བདེ་ཐིང་འགོ་ཁྲིད་ཚོགས་ཆུང་གཞུང་དོན་ཁང་དུ་གཟིགས་ཞིབ་གནང་བ་དང་བྱེད་སྒོ་སྤེལ་ཚུལ་མཁྱེན་རྟོགས་ཞིབ་ཕྲ་གནང་ཞིང་། བློ་བཟང་རྒྱལ་མཚན་གྱིས་ལྗོངས་སྤྱི་བདེ་ཐིང་གིས་བརྗོད་བྱ་གཙོ་བོའི་སློབ་གསོའི་ལག་ལེན་བྱེད་སྒོ་སྤེལ་ཚུལ་སྐོར་གྱི་སྙན་སེང་གསན་རྗེས་རང་ལྗོངས་ཀྱི་རིམ་ཁག་སྤྱི་བདེ་ལས་ཁུངས་ལ་བརྗོད་བྱ་གཙོ་བོའི་སློབ་གསོའི་ལག་ལེན་བྱེད་སྒོ་གོ་སྐབས་སུ་བྱས་ཏེ་སྤྱི་བདེའི་ལས་དོན་གྱི་དོན་དངོས་དང་ཟུང་འབྲེལ་བྱེད་པ་དང་བསམ་བློའི་ངོས་འཛིན་སྔར་བས་གཅིག་གྱུར་ཡོང་བ་བྱས་ཏེ་སྤྱི་བདེའི་ཁོངས་གཏོགས་ཀྱི་བརྗོད་བྱ་གཙོ་བོའི་སློབ་གསོའི་ལག་ལེན་བྱེད་སྒོ་ཏན་ཏན་ཏིག་ཏིག་ངང་ཡག་པོ་སྤེལ་དགོས་པ་དང་། ལས་ཁུངས་དང་གཞི་རིམ་དབར་གྱི་འབྲེལ་བར་དམིགས་སུ་བཀར་ནས་མཐོང་ཆེན་བྱས་ནས་མང་ཚོགས་ཀྱི་ལྟ་བ་མཐའ་འཁྱོངས་བྱེད་པ་དང་། མང་ཚོགས་ཀྱི་འབོད་སྒྲ་ཉན་པ། ཉེན་རྟོག་པ་དང་མང་ཚོགས་དབར་འབྲེལ་བ་བཟང་པོ་ཞིག་འཛུགས་པ་བཅས་བྱས་ཏེ་སྤྱི་ཚོགས་བརྟན་ལྷིང་སྲུང་སྐྱོང་དང་མི་སེར་གྱི་བདེ་འཇགས་འགན་ལེན་བྱ་ཆེད་ལེགས་སྐྱེས་དེ་བས་ཆེ་བ་འབུལ་དགོས་པའི་བླང་བྱ་བཏོན་གནང་བ་རེད།

    ལྗོངས་ཁྲིམས་འཛིན་ཐིང་དུ་བརྟག་ཞིབ་གནང་སྐབས་བློ་བཟང་རྒྱལ་མཚན་གྱིས་ལྗོངས་ཡོངས་ཀྱི་ཁྲིམས་འཛིན་ཁོངས་གཏོགས་སུ “སྲོལ་རྒྱུན་དར་སྤེལ་གཏོང་བ་དང་། དད་སེམས་བརྟན་དུ་གཏོང་བ། དམངས་ཀྱི་ཆེད་དུ་ཁྲིམས་ལག་བསྟར་བྱེད་པ ”བཅས་ཀྱི་བརྗོད་བྱ་གཙོ་བོའི་སློབ་གསོའི་ལག་ལེན་བྱེད་སྒོ་སྤེལ་ཚུལ་གསན་རྗེས་རྒྱ་ཆེའི་ལས་བྱེད་པ་དང་ཉེན་རྟོག་པ་ཚོར་ཡང་འབད་བསྐྱར་འབད་བྱས་ཏེ་ལྗོངས་ཏང་ཨུད་དང་སྲིད་གཞུང་གི་ལྟེ་བའི་ལས་དོན་ལ་དམ་པོར་དམིགས་པ་དང་འཕེལ་རྒྱས་དང་བརྟན་ལྷིང་གི་སྤྱི་ཡོངས་ལ་དམ་པོར་དམིགས་ཐོག་བོད་ཀྱི་ཁྲིམས་འཛིན་སྲིད་འཛིན་ལས་དོན་གྱི་དོན་དངོས་དང་ཟུང་འབྲེལ་བྱེད་པ་དང་གཙོ་གནད་སྔར་བས་མངོན་གསལ་དོད་པོ་ཡོང་བ་བྱས་ཏེ་ཁྲིམས་འཛིན་སྲིད་འཛིན་ལས་དོན་འཕེལ་རྒྱས་ཁྲོད་འཕྲད་པའི་མངོན་གསལ་དོད་པའི་གནད་དོན་ཐག་གཅོད་བྱ་རྒྱུར་འབད་བརྩོན་བྱེད་དགོས་པ་དང་། ཁྲིམས་ལུགས་དཔུང་ཁག་འཛུགས་སྐྱོང་ལ་ཤུགས་སྣོན་བརྒྱབ་ནས་ཁྲིམས་འཛིན་སྲིད་འཛིན་ལས་དོན་ཁག་དོན་ཐོག་ཏུ་འཁྱོལ་རྒྱུར་སྐུལ་འདེད་ཏན་ཏིག་གཏོང་དགོས་པའི་ཐུགས་རེ་གནང་བ་རེད།

    རྒྱལ་ཁབ་བདེ་འཇགས་ཐིང་དུ་བརྟག་ཞིབ་གནང་སྐབས་བློ་བཟང་རྒྱལ་མཚན་གྱིས་ལོ་མང་རིང་རང་ལྗོངས་ཀྱི་རྒྱལ་ཁབ་བདེ་འཇགས་ལས་ཁུངས་ཀྱིས་དཀའ་ཚེགས་ཆེ་ལ་ཞིབ་ཅིང་ཕྲ་བའི་ལས་དོན་འབོར་ཆེན་ཞིག་སྒྲུབ་ནས་རྒྱལ་ཁབ་ཀྱི་ཁེ་ཕན་གཙོ་བོ་དང་བོད་ཀྱི་རྒྱུན་མཐུད་བརྟན་ལྷིང་སྲུང་སྐྱོང་བྱ་ཆེད་ལེགས་སྐྱེས་གལ་ཆེན་ཕུལ་བར་ཀྲུང་དབྱང་དང་ལྗོངས་ཏང་ཨུད་དང་སྲིད་གཞུང་གི་ཁས་ལེན་གང་ལེགས་ཐོབ་ཡོད་ཅེས་གསུངས་ཤིང་། བློ་བཟང་རྒྱལ་མཚན་གྱིས་སྲིད་ཁྲིམས་ལས་ཁུངས་ཀྱི་སྡེ་ཚན་ཁག་ལ་ཕྲག་ཐོག་ཏུ་འཁུར་བའི་རྒྱལ་ཁབ་ཀྱི་བདེ་འཇགས་དང་། སྤྱི་ཚོགས་བརྟན་ལྷིང་། མི་དམངས་ཀྱི་བདེ་འཇགས་བཅས་སྲུང་སྐྱོང་བྱེད་པ་སོགས་ཐད་ཀྱི་འགན་འཁྲི་གལ་ཆེན་སེམས་ལ་བརྟན་པོར་ངེས་ནས་ཡང་འབད་བསྐྱར་འབད་བྱེད་དགོས་པའི་སྐུལ་ལྕག་གནང་བ་རེད།

    ལི་ཀྲའོ་ཡིས་བརྟག་ཞིབ་གནང་སྐབས་ལྗོངས་ཡོངས་ཀྱི་སྤྱི་བདེ་དང་། ཁྲིམས་འཛིན། རྒྱལ་ཁབ་བདེ་འཇགས་བཅས་ཀྱི་ལས་བྱེད་པ་དང་ཉེན་རྟོག་པ་ཚོས་དཔའ་ངར་ཆེ་ཞིང་གཉའ་མི་ཆག་པ་དང་། ཤི་རྒྱུར་མི་སྐྲག་པ། བསྟུད་མར་དམག་འཐབ་བྱེད་པ་བཅས་ཀྱི་གཟི་བརྗིད་སྲོལ་རྒྱུན་དང་སྤྱོད་ཚུལ་བཟང་པོ་མུ་མཐུད་དར་སྤེལ་བཏང་སྟེ་དོན་དངོས་དང་ཟུང་འབྲེལ་བྱེད་པ་དང་། གཙོ་གནད་མངོན་གསལ་དོད་པ། བཀོད་སྒྲིག་དང་འཆར་འགོད་ཞིབ་ཚགས་བཅས་བྱས་ཏེ་བརྗོད་བྱ་གཙོ་བོའི་སློབ་གསོའི་ལག་ལེན་བྱེད་སྒོ་ཁག་ཏན་ཏན་ཏིག་ཏིག་ངང་ཡག་པོ་སྤེལ་ནས་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཡོང་ཆེད་སྤྱི་ཚོགས་ཀྱི་བདེ་འཇགས་ཁོར་ཡུག་བཟང་པོ་ཞིག་གཏོད་དགོས་ཞེས་གསུངས་པ་རེད། རང་སྐྱོང་ལྗོངས་སྲིད་གཞུང་དང་། རང་སྐྱོང་ལྗོངས་ཏང་ཨུད། སྲིད་ཁྲིམས་ཨུ་ལྷན་བཅས་ཀྱི་འབྲེལ་ཡོད་འགན་འཁུར་བློ་མཐུན་བརྟག་ཞིབ་གནང་སྐབས་ལྷན་དུ་ཕེབས་ཡོད་པ་རེད།