བོད་ལྗོངས་ཉིན་རེའི་ཚགས་པར་ཁང་དུ་ལྷ་ས་ནས་གནས་ཚུལ་འབྱོར་གསལ། ཟླ་4ཚེས་13ཉིན་རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་བློ་བཟང་རྒྱལ་མཚན་གྱིས་ལྗོངས་སྲིད་གཞུང་ཁྲིམས་ལུགས་གཞུང་དོན་ཁང་དང་ལྗོངས་ཡིག་འབུལ་ངོ་བཅར་ཅུས་སུ་བརྟག་ཞིབ་གནང་སྐབས་ལྗོངས་སྲིད་གཞུང་ཁྲིམས་ལུགས་གཞུང་དོན་ཁང་དང་ལྗོངས་ཡིག་འབུལ་ངོ་བཅར་ཅུས་ཀྱི་རྒྱ་ཆེའི་ལས་བྱེད་པ་དང་ལས་བཟོ་ཚོས་ངེས་པར་དུ་སྤྱི་ཡོངས་སེམས་ལ་འཆང་བ་དང་། མང་ཚོགས་སེམས་ནང་འཇོག་པ། རང་འཁྲིའི་ལས་ཀར་གཞི་འཛུགས་པ་བཅས་བྱས་ཏེ་སྲིད་གཞུང་གི་ཁྲིམས་ལུགས་དང་ཡིག་འབུལ་ངོ་བཅར་ལས་དོན་གྱི་ཆུ་ཚད་མཐོ་རུ་འགྲོ་རྒྱུར་སྐུལ་འདེད་ཏན་ཏིག་གཏོང་དགོས་ཞེས་ནན་གསུངས་གནང་བ་རེད།

    རང་སྐྱོང་ལྗོངས་སྲིད་གཞུང་ཁྲིམས་ལུགས་གཞུང་དོན་ཁང་དུ་བརྟག་ཞིབ་གནང་སྐབས་བློ་བཟང་རྒྱལ་མཚན་གྱིས་ལྗོངས་སྲིད་གཞུང་ཁྲིམས་ལུགས་གཞུང་དོན་ཁང་གིས་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ལྟེ་བའི་ལས་དོན་ལ་དམ་པོར་དམིགས་པ་དང་འཕེལ་རྒྱས་དང་བརྟན་ལྷིང་གི་སྤྱི་ཡོངས་ལ་དམ་པོར་དམིགས་ནས་ཁྲིམས་ལྟར་སྲིད་འཛིན་པ་དང་སྲིད་གཞུང་གི་ཁྲིམས་ལུགས་འཛུགས་སྐྱོང་ལས་དོན་གྱི་བསམ་ཕྱོགས་དངོས་འབྲེལ་གསལ་པོ་བཟོ་དགོས། སྲིད་གཞུང་ལ་ཁྲིམས་ལུགས་སྒྲིག་གཞིའི་ཇུས་འདོན་དང་ལས་རོགས་ཀྱི་ནུས་པ་མུ་མཐུད་འདོན་སྤེལ་ཡག་པོ་བྱས་ནས་སྲིད་གཞུང་གིས་ཇུས་ཐག་གཅོད་རྒྱུར་བཅའ་ཁྲིམས་ཀྱི་འགན་སྲུང་བྱས་ཐོག་དཔལ་འབྱོར་དང་སྤྱི་ཚོགས་འཕེལ་རྒྱས་གཏོང་ཆེད་གཡས་གཞོགས་གཡོན་འདེགས་བྱེད་དགོས་པའི་བླང་བྱ་བཏོན་པ་རེད།

    རང་སྐྱོང་ལྗོངས་ཡིག་འབུལ་ངོ་བཅར་ཅུས་སུ་བརྟག་ཞིབ་གནང་སྐབས་བློ་བཟང་རྒྱལ་མཚན་གྱིས་ད་ལོ་ནས་བཟུང་རང་ལྗོངས་ཀྱི་ཡིག་འབུལ་ངོ་བཅར་ལས་དོན་ལ་གྲུབ་འབྲས་ལེགས་ཙམ་ཐོབ་པ་དེ་ནི་རྒྱལ་ཡོངས་སུ་ཡིག་འབུལ་ངོ་བཅར་གྱི་སྤྱི་འབོར་དམའ་ཤོས་ཡིན་པ་དང་ཚོགས་སྤྱིའི་རང་བཞིན་གྱི་དོན་རྐྱེན་ཚབས་ཆེན་ཐོན་མེད་པའི་གནས་ཚུལ་བཟང་པོ་ཐོག་མཐའ་བར་གསུམ་དུ་མཐའ་འཁྱོངས་བྱས་ནས་རང་ལྗོངས་སུ་མཐུན་སྦྱོར་བརྟན་ལྷིང་གི་རྣམ་པ་བཟང་པོ་མཐའ་འཁྱོངས་བྱེད་ཆེད་ལེགས་སྐྱེས་ཕུལ་ཡོད་ཅེས་གསུངས་པ་རེད། བློ་བཟང་རྒྱལ་མཚན་གྱིས་གཙོ་གནད་དུས་སྐབས་ཀྱི་ཡིག་འབུལ་ངོ་བཅར་ལས་དོན་དམ་འཛིན་ཡག་པོ་བྱས་ནས་ཏང་དབུ་བཪྙེས་ནས་ལོ་90འཁོར་བ་དང་བོད་ཞི་བས་བཅིངས་འགྲོལ་བཏང་ནས་ལོ་60འཁོར་བར་སྤྱི་ཚོགས་ཀྱི་ཁོར་ཡུག་བཟང་པོ་ཞིག་གཏོད་དགོས། བོད་ཀྱི་དོན་དངོས་དང་ཟུང་འབྲེལ་དམ་ཟབ་བྱེད་པ་དང་ཞིབ་འཇུག་དང་བཀོད་སྒྲིག་ནན་ཏན་བྱས་ནས་མང་ཚོགས་ཀྱི་ལས་དོན་སྤྱད་དེ་ཡིག་འབུལ་ངོ་བཅར་ལས་དོན་ལ་གཅིག་འདོམས་བྱེད་པའི་ལམ་སྲོལ་གསར་པ་འཛུགས་རྒྱུར་འཚོལ་ཞིབ་བྱེད་དགོས་པའི་བླང་བྱ་བཏོན་གནང་བ་རེད།