བོད་ལྗོངས་ཉིན་རེའི་ཚགས་པར་ཁང་དུ་ལྷ་ས་ནས་ཟླ་4ཚེས་13ཉིན་གནས་ཚུལ་འབྱོར་གསལ། ཟླ་4ཚེས་13ཉིན་ལྗོངས་ཏང་ཨུད་ཀྱི་རྒྱུན་ཨུ་ལྷ་ས་གྲོང་ཨུད་ཀྱི་ཧྲུའུ་ཅི་ཆིན་དབྱི་ཀྲིས་ཆེད་མངགས་ཆུ་ཤུར་རྫོང་དང་སྟོད་ལུང་བདེ་ཆེན་རྫོང་དུ་གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་ལོའི་བྱེད་སྒོ་སྤེལ་ཚུལ་ལ་བརྟག་ཞིང་གནང་བར་ཕེབས་པ་དང་གྲོང་ཚོར་བཅའ་སྡོད་ལས་དོན་ཚོགས་ཆུང་ལ་གཟིགས་པ་དང་སྦྲགས་དུས་མཚམས་རྗེས་མའི་ལས་དོན་ཐད་བླང་བྱ་བཏོན་གནང་བ་རེད།

    གྲོང་ཚོར་བཅའ་སྡོད་ལས་དོན་ཚོགས་ཆུང་གིས་ཏང་གི་བྱེད་ཕྱོགས་དང་སྲིད་ཇུས་དུད་ཚང་ཚང་མར་དྲིལ་བསྒྲགས་ཡག་པོ་བྱ་རྒྱུ་གཞི་རིམ་དུ་དོན་འཁྱོལ་ངོ་མ་བྱུང་བ་མཁྱེན་རྟོགས་བྱུང་རྗེས་ཆིན་དབྱི་ཀྲི་དགྱེས་ཚོར་ཆེན་པོ་བྱུང་ཞིང་། ཁོང་གིས་ལས་དོན་ཚོགས་ཆུང་ཁག་གིས་གྲོང་ཚོར་བཅའ་སྡོད་བྱས་ནས་ཟླ་བ་གཅིག་དང་ཟླ་ཕྱེད་ཙམ་ཕྱིན་པའི་དུས་ཚོད་ནང་ཕྱོགས་ཚང་མའི་ཐད་ཀྱི་ལས་དོན་ཡག་པོ་བསྒྲུབས་འདུག་ལ་ཕན་འབྲས་ཀྱང་རགས་ཙམ་ཐོབ་འདུག གོམ་སྟབས་རྗེས་མར་ལས་དོན་ཚོགས་ཆུང་ཁག་གིས་ཏང་དང་མང་ཚོགས་དབར་དང་ལས་བྱེད་པ་དང་མང་ཚོགས་དབར་གྱི་འབྲེལ་བ་སྔར་བས་ཟབ་ཏུ་གཏོང་བ་དང་། ཏང་གིས་སྲིད་འཛིན་པའི་རྨང་གཞི་སྔར་བས་སྲ་བརྟན་དུ་གཏོང་བ། གཞི་རིམ་གྱི་གནས་ཚུལ་ལ་རྒྱུས་ལོན་བྱེད་པ་བཅས་ཀྱི་ཐོག་ནས་མི་སེར་ཚོས་བསམ་བློ་གང་གཏོང་བ་དང་། གང་བསམས་པ། རེ་བ་གང་བྱེད་པ་བཅས་སེམས་ནང་བཅངས་ཏེ་ལས་ཀའི་སྤུས་ཚད་དང་ཆུ་ཚད་གོང་མཐོར་གཏོང་དགོས་པ་དང་། ཏང་དབུ་བཪྙེས་ནས་ལོ་ངོ་90དང་བོད་ཞི་བས་བཅིངས་འགྲོལ་བཏང་ནས་ལོ་ངོ་60འཁོར་བ་གོ་སྐབས་སུ་བྱས་ཏེ་ཏང་གི་སྲིད་ཇུས་དྲིལ་བསྒྲགས་ཡག་པོ་བྱེད་པ་དང་སྔར་ལས་ལྷག་པའི་སྒོ་ནས་མང་ཚོགས་ཚོའི་བསམ་བློ་བཅིངས་འགྲོལ་དང་འདུ་ཤེས་གསར་བརྗེས་བྱེད་རོགས་ཀྱིས་འབབ་འཕར་ཕྱུག་འགྱུར་གྱི་རེ་བ་མངོན་འགྱུར་བྱེད་དགོས་པ། རྫོང་དང་། ཤང་། གྲོང་ཚོ་བཅས་ཀྱི་སྐབས་བརྗེའི་འདེམས་བསྐོའི་གོ་སྐབས་སྤྱད་དེ་གཞི་རིམ་ཚན་ཁག་གི་ཁོངས་མི་ཡག་པོ་འདེམས་དགོས་པ། གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་ལོའི་བྱེད་སྒོ་དང་སྔོན་གཏོད་ལེགས་བརྩོན་གྱི་བྱེད་སྒོ་ཟུང་འབྲེལ་བྱས་ཏེ་མང་ཚོགས་ཚོར་དཀའ་ངལ་སེལ་རོགས་དང་། དོན་དངོས་སྒྲུབ་རོགས། བྱ་བཟང་སྒྲུབ་རོགས་བཅས་བྱེད་དགོས་ཞེས་གསུངས་པ་རེད།