བོད་ལྗོངས་ཉིན་རེའི་ཚགས་པར་ཁང་དུ་ལྷ་ས་ནས་ཟླ་4ཚེས་12ཉིན་གནས་ཚུལ་འབྱོར་གསལ། གོང་ཚེས་ཉིན་གྱི་ཕྱི་དྲོ་རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་ཀུང་ཕུའུ་ཀོང་རང་སྐྱོང་ལྗོངས་སྡོད་ཁང་དང་གྲོང་ཁྱེར་དང་གྲོང་གསེབ་འཛུགས་སྐྲུན་ཐིང་དུ་བརྟག་ཞིབ་གནང་བར་ཕེབས་པ་དང་འབྲེལ་འབྲེལ་ཡོད་སྙན་ཞུ་གསན་གནང་བ་རེད།
ཀུང་ཕུའུ་ཀོང་དང་བཅས་པས་སྔ་རྗེས་སུ་རང་སྐྱོང་ལྗོངས་ཨར་སྐྲུན་བཪྙན་འཕྲིན་སློབ་གསོའི་ལྟེ་གནས་དང་། ལྗོངས་ཐད་གཏོགས་ལས་ཁུངས་ཀྱི་ལས་ཤག་འཛུགས་སྐྲུན་གྱི་དུས་ཐེངས་དང་པོའི་ལས་གྲྭ་འཛུགས་སྐྲུན་བྱ་ཡུལ། ལྗོངས་ཐད་གཏོགས་ལས་ཁུངས་ཀྱི་ལས་ཤག་འཛུགས་སྐྲུན་གྱི་དུས་ཐེངས་གཉིས་པའི་ལས་གྲྭ་འཛུགས་སྐྲུན་བྱ་ཡུལ་སོགས་ཀྱི་ས་ཆ་དངོས་སུ་བརྟག་ཞིབ་གནང་བར་ཕེབས་ནས་ལས་གྲྭ་ཁག་གི་འཕེལ་རིམ་གནས་ཚུལ་མཁྱེན་རྟོགས་ཞིབ་ཕྲ་གནང་ཞིང་། ཀུང་ཕུའུ་ཀོང་གིས་བརྟག་ཞིབ་གནས་སྐབས་ལྗོངས་ཐད་གཏོགས་ལས་ཁུངས་ཀྱི་ལས་ཤག་འཛུགས་སྐྲུན་ཡག་པོ་བྱེད་པ་དེས་རྒྱ་ཆེའི་ལས་བྱེད་པ་དང་ལས་བཟོའི་སྡོད་ཁང་གི་ཆ་རྐྱེན་ལེགས་སུ་གཏོང་བ་དང་། གཞི་རིམ་རྩ་འཛུགས་འཛུགས་སྐྱོང་དང་རྨང་གཞིའི་ལས་དོན་ལ་ཤུགས་སྣོན་རྒྱག་པ། ལས་བྱེད་པའི་དཔུང་ཁག་བརྟན་པོ་ཡོང་བ་བྱེད་པ། སྤྱི་ཚོགས་བརྟན་ལྷིང་སྲུང་སྐྱོང་བྱེད་པ་སོགས་ཚང་མར་ནུས་པ་གལ་ཆེན་ཐོན་རྒྱུ་ཡིན་པས་འབྲེལ་ཡོད་སྡེ་ཚན་ཁག་གིས་ངེས་པར་དུ་འགོ་ཁྲིད་ལ་ཤུགས་སྣོན་རྒྱག་པ་དང་། འབྲེལ་བ་བྱ་རྒྱུར་དམ་འཛིན་བྱེད་པ། མཐུན་སྦྱོར་ལ་ཤུགས་སྣོན་རྒྱག་པ། ལས་ཀའི་དུས་བཅད་བཟོ་བ། སྔ་ཙམ་ལས་འགོ་འཛུགས་པ་བཅས་བྱས་ཏེ་ལས་གྲྭ་དེ་དག་སྤུས་ལེགས་ཀྱི་ལས་གྲྭ་དང་དཔེ་སྟོན་གྱི་ལས་གྲྭར་འཛུགས་སྐྲུན་བྱས་ཏེ་སྲིད་གཞུང་དང་རྒྱ་ཆེའི་མི་དམངས་མང་ཚོགས་བློ་ཡིད་ཚིམས་པོ་ཡོང་བ་བྱེད་དགོས་པའི་ནན་གསུངས་གནང་བ་རེད།
མཇུག་ཏུ་ཀུང་ཕུའུ་ཀོང་གིས་འདི་ལོ་ནི་རྟེན་འབྲེལ་ཆེ་མོའི་ལོ་ཞིག་ཡིན་པས་ལྗོངས་སྡོད་ཁང་དང་གྲོང་ཁྱེར་དང་གྲོང་གསེབ་འཛུགས་སྐྲུན་ཐིང་གིས་རྟེན་འབྲེལ་ཆེ་མོའི་རྣམ་གྲངས་འཛུགས་སྐྲུན་གྱི་ལས་དོན་ལ་སྣེ་ཁྲིད་དེ་འགན་ཡག་པོ་འཁུར་ནས་འབྲེལ་ཡོད་སྡེ་ཚན་གྱིས་འགན་འཁུར་བའི་རྟེན་འབྲེལ་ཆེ་མོའི་རྣམ་གྲངས་ལ་ལག་རྩལ་ཐད་ནས་རྒྱབ་སྐྱོར་བྱེད་པ་དང་། བོད་ཀྱི་དོན་དངོས་དང་ཟུང་འབྲེལ་བྱས་ཏེ་ས་ཁང་བདག་ཁོངས་ཐོན་ལས་ཀྱི་ཐོན་དབང་དང་། ཐོན་ཁུངས། ཨར་ལས་ཁྲོམ་རའི་ལྟ་སྐུལ་དོ་དམ་བཅས་ཀྱི་ལས་དོན་དང་དེ་བཞིན་ཨར་ལས་ལས་རིགས་ཀྱི་བདེ་འཇགས་ཐོན་སྐྱེད་སོགས་ལ་ཤུགས་སྣོན་རྒྱག་དགོས་པའི་ནན་གསུངས་གནང་བ་རེད།