བོད་ལྗོངས་ཉིན་རེའི་ཚགས་པར་ཁང་དུ་རྩེད་ཐང་ནས་གློག་འཕྲིན་འབྱོར་གསལ། ཉེ་ཆར་རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་སྐལ་བཟང་ཚེ་རིང་གིས་རང་སྐྱོང་ལྗོངས་ཞིང་འབྲོག་ཐིང་དང་། ཆུ་བེད་ཐིང་། ཞིང་ལས་གསར་སྤེལ་གཞུང་ལས་ཁང་སོགས་ཚན་པའི་འགན་འཁུར་བ་གཙོ་བོ་ཁྲིད་དེ་ལྷོ་ཁ་ས་ཁུལ་དུ་བསྐྱོད་ནས་དཔྱིད་དུས་ཀྱི་ཞིང་ལས་ཐོན་སྐྱེད་དང་། ཞིང་འབྲོག་ལས་ཀྱི་ཁྱད་ལྡན་ཐོན་ལས། ཞིང་ཁའི་ཆུ་བེད་གཞི་རྩའི་འཛུགས་སྐྲུན། ཞིང་ལས་གསར་སྤེལ་གྱི་དབུལ་སྐྱོར་རྣམ་གྲངས་འཛུགས་སྐྲུན། ཞིང་འབྲོག་མང་ཚོགས་ཀྱི་ཆེད་ལས་མཉམ་ལས་རྩ་འཛུགས་འཛུགས་སྐྲུན་དང་དེ་བཞིན་ཤང་ཧྲིལ་པོར་དབུལ་སྐྱོར་ལས་དོན་ལ་སྐུལ་འདེད་གཏོང་བའི་ཐད་བརྟག་ཞིབ་གནང་བ་རེད།
བརྟག་ཞིབ་གནང་སྐབས་སྐལ་བཟང་ཚེ་རིང་དང་བཅས་པས་སྔ་རྗེས་སུ་གོང་དཀར་རྫོང་གི་རྒྱལ་གཞུང་ཆུ་མཛོད་དང་། ལྷུན་རྩེ་རྫོང་གི་ཨ་ཝོ་མདོ་ཆུ་མཛོད། འཕྱོངས་རྒྱས་རྫོང་གི་འཕྱོངས་འགོ་ཆུ་མཛོད་སོགས་སུ་ཕེབས་ནས་ཆུ་མཛོད་ཀྱི་འཁོར་རྒྱུག་དོ་དམ་དང་ཆུ་གསོག་ཚུལ་ལ་གཟིགས་པ་དང་ཞིང་ཁའི་ཆུ་འདྲེན་ལས་གྲྭའི་འཛུགས་སྐྲུན་གྱི་གནས་ཚུལ་མཁྱེན་རྟོགས་གནང་རྗེས་སྐལ་བཟང་ཚེ་རིང་གིས་རིམ་ཁག་སྡེ་ཚན་ཁག་གིས་ཞིང་ཆུ་འདྲེན་བྱེད་ཀྱི་ལས་གྲྭ་འཛུགས་སྐྲུན་དང་དོ་དམ་བྱེད་ཤུགས་སྔར་བས་ཆེ་རུ་བཏང་སྟེ་ཕྱོགས་བསྡུས་ཀྱི་ཕན་འབྲས་འདོན་སྤེལ་བྱ་རྒྱུར་དོ་སྣང་ཆེན་པོ་བྱས་ནས་འབྲུ་རིགས་ཀྱི་བདེ་འཇགས་འགན་ལེན་བྱེད་དགོས་ཞེས་བསྟན་གནང་བ་རེད།
ལྷུན་རྩེ་རྫོང་ལྷུན་རྩེ་གྲོང་རྡལ་སྦྲ་འོར་གྲོང་ཚོའི་བ་གླང་གི་རྒྱུད་པ་ལེགས་སུ་གཏོང་བའི་མཐུན་ཚོགས་དང་། ལྷོ་ཁ་ས་ཁུལ་རྒྱུད་བཟང་བོད་བྱ་གསོ་སྤེལ་ལྟེ་གནས། སྣེ་གདོང་རྫོང་བཞོན་མ་གསོ་ཚགས་རྟེན་གཞི། ཀུན་བཟང་བྱ་རིགས་གསོ་ཚགས་མཉམ་ལས་ཁང་སོགས་སུ་ཕེབས་ནས་མང་ཚོགས་ཀྱི་ཐོན་སྐྱེད་དང་ཡོང་འབབ་ཀྱི་གནས་ཚུལ་ཞིབ་ཕྲའི་ངང་མཁྱེན་རྟོགས་གནང་སྟེ་རིམ་ཁག་ཞིང་འབྲེལ་སྡེ་ཚན་གྱིས་ཁྱད་ལྡན་ཞིང་འབྲོག་ལས་ཀྱི་འདེགས་གནས་དེ་ཚན་རྩལ་ཡར་ཐོན་དང་གསར་གཏོད་ཐོག་འཇོག་པ་དང་། ཚད་བརྒལ་ཡོང་ས་དེ་རྒྱ་སྟོབས་ཆེ་རུ་གཏོང་བ་དང་སྤུས་ཀ་ལེགས་སུ་གཏོང་བ་དང་རིམ་པ་མཐོ་རུ་གཏོང་བའི་ཐོག་འཇོག་པ། གནས་བབ་དེ་ལྷད་མེད་དང་སྤྱི་གནོད་མེད་པའི་སྤུས་རྟགས་འཕེལ་རྒྱས་གཏོང་རྒྱུའི་ཐོག་གཏན་འཁེལ་བྱེད་པ། གཞི་འཛུགས་ས་དེ་ཞིང་འབྲོག་ལས་ཐོན་འབབ་འཕར་བ་དང་ཕན་འབྲས་ཆེ་རུ་གཏོང་བ་དང་ཞིང་འབྲོག་མང་ཚོགས་ཀྱི་ཡོང་འབབ་འཕར་བ་བྱེད་པའི་ཐོག་འཇོག་པ་བཅས་བྱས་ཏེ་རྣམ་གྲངས་གསར་སྤེལ་དང་འཛུགས་སྐྲུན་ནང་ལེགས་ཆ་ལྡན་པའི་ཁྱད་ལྡན་ཐོན་ལས་སྐྱེད་བསྲིང་བྱ་རྒྱུར་དོ་སྣང་ཆེན་པོ་བྱས་ནས་ཞིང་འབྲོག་ལས་ཀྱི་ཁྱད་ལྡན་ཐོན་ལས་ཀྱི་ཁྱབ་འགྱེད་སྐུལ་ཁྲིད་ནུས་པ་འདོན་སྤེལ་གང་ལེགས་བྱས་ཏེ་ཞིང་འབྲོག་མང་ཚོགས་ཀྱི་ཡོང་འབབ་འཕར་རྒྱུར་འགན་ལེན་བྱེད་དགོས་ཞེས་བསྟན་གནང་བ་རེད།