བོད་ལྗོངས་ཉིན་རེའི་ཚགས་པར་ཁང་དུ་ལྷ་ས་ནས་ཟླ་4ཚེས་6ཉིན་གནས་ཚུལ་འབྱོར་གསལ། གོང་ཚེས་ཉིན་གྱི་ཕྱི་དྲོ་རང་སྐྱོང་ལྗོངས་སྲིད་གཞུང་གཞུང་ལས་ཐིང་གིས་གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་ལོའི་བྱེད་སྒོའི་འབྲེལ་གཏུག་ས་ཚིགས་ཡིན་པའི་ལྷོ་ཁ་ས་ཁུལ་འཕྱོངས་རྒྱས་རྫོང་ལྷ་ཡུལ་ཤང་ར་མ་སྒང་གྲོང་ཚོའི་མང་ཚོགས་ལ་དངུལ་ཞལ་འདེབས་རྒྱག་པའི་བྱེད་སྒོ་སྤེལ་བ་རེད།

    2011ལོ་ནི་ལྗོངས་ཏང་ཨུད་ཀྱི་གཏན་འབེབས་བྱས་པའི་གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་ལོ་ཡིན་ཞིང་། གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་ལོའི་བྱེད་སྒོ་ནི་2007ལོར “ལས་བྱེད་པ་ཆིག་ཁྲི་གཞི་རིམ་དུ་བསྐྱོད་པའི ”བྱེད་སྒོ་སྤེལ་རྗེས་ལྗོངས་ཡོངས་ཀྱིས་སྒྲིག་འཛུགས་བྱས་པའི་རྒྱ་ཁྱོན་ཆེ་ཤོས་དང་། མི་གྲངས་མང་ཤོས། དུས་ཚོད་རིང་ཤོས་བཅས་ཡིན་པའི་གཅིག་སྡུད་ཐོག་གཞི་རིམ་དུ་བསྐྱོད་པའི་རྒྱུན་མཐུད་བྱེད་སྒོ་ཞིག་ཡིན་པ་རེད། རང་སྐྱོང་ལྗོངས་སྲིད་གཞུང་གཞུང་ལས་ཐིང་གི་འབྲེལ་གཏུག་ས་ཚིགས་ཡིན་པའི་ལྷོ་ཁ་ས་ཁུལ་འཕྱོངས་རྒྱས་རྫོང་ལྷ་ཡུལ་ཤང་ར་མ་སྒང་གྲོང་ཚོ་ནི་འཕྱོགས་རྒྱས་རྫོང་གི་དཀའ་ངལ་ཅུང་ཆེ་བའི་སྲིད་འཛིན་གྲོང་ཚོ་ཞིག་ཡིན་ཞིང་། ཟླ་3ཚེས་1ཉིན་ནས་བཟུང་གྲོང་ཚོར་བཅའ་སྡོད་རང་སྐྱོང་ལྗོངས་སྲིད་གཞུང་གི་ལས་དོན་ཚོགས་ཆུང་གྲོང་ཚོར་བསྡད་ནས་ལས་དོན་སྤེལ་ཡོད་པ་རེད། ལྗོངས་ཏང་ཨུད་ཀྱི་གཞི་རིམ་འཛུགས་སྐྱོང་ལ་ཤུགས་སྣོན་རྒྱག་པའི་ལོའི་བྱེད་སྒོའི་གཞུང་ལས་ཁང་གི་འབོད་སྐུལ་དང་ལེན་ཧུར་ཐག་བྱས་ནས་མང་ཚོགས་ལ་དོན་དངོས་མང་ཙམ་སྒྲུབ་པ་དང་། བྱ་བ་བཟང་པོ་མང་ཙམ་སྒྲུབ་པ། དཀའ་གནད་མང་ཙམ་སེལ་རོགས་བཅས་བྱེད་ཆེད་རང་སྐྱོང་ལྗོངས་སྲིད་གཞུང་གཞུང་ལས་ཐིང་གིས་ལས་བྱེད་པ་དང་ལས་བཟོ་ཡོངས་ནས་འབྲེལ་གཏུག་ས་ཚིགས་ཀྱི་མང་ཚོགས་ལ་དངུལ་ཞལ་འདེབས་ཧུར་ཐག་བརྒྱབ་སྟེ་གཅེས་སེམས་མཚོན་པར་བྱས་ནས་ཞིང་འབྲོག་མང་ཚོགས་ཀྱིས་ཏང་དང་སྲིད་གཞུང་གི་ཐུགས་ཁུར་དང་དྲོ་སྐྱིད་ངོ་མ་ཚོར་ཐུབ་པ་དང་ལྗོངས་སྲིད་གཞུང་ལས་ཁུངས་ཀྱི་ལས་བྱེད་པ་དང་ལས་བཟོ་ཡོངས་ཀྱི་བརྩེ་དུང་ཟབ་མོ་ཚོར་ཐུབ་པ་བྱེད་དགོས་པའི་འབོད་སྐུལ་བྱས་པ་རེད།

    བསྡོམས་རྩིས་ལ་གཞིགས་ན། རང་སྐྱོང་ལྗོངས་སྲིད་གཞུང་གཞུང་ལས་ཐིང་གི་ལས་བྱེད་པ་དང་ལས་བཟོ་ཡོངས་ཀྱིས་ད་རེས་ར་མ་སྒང་གྲོང་ཚོའི་མང་ཚོགས་ལ་དངུལ་སྒོར་48500 ཞལ་འདེབས་ཕུལ་ཡོད་པ་རེད།