ཚེ་རིང་དཔལ་འབྱོར་ནི་གྲོང་ཚོའི་ལས་བྱེད་པ་དཀྱུས་མ་ཞིག་དང་ཤང་དུ་གདན་ཞུ་བྱས་པའི་སྨན་པ་ཞིག་ཡིན་ཞིང་། སྤྱིར་བཏང་གི་ལས་གནས་དེའི་ཐོག་ཁོང་གིས་ལོ་བཅུ་ཕྲག་ཁ་ཤས་ཉིན་གཅིག་ལྟར་མང་ཚོགས་ཀྱི་སྣེ་འཁྲིད་དེ་བདེ་སྐྱིད་ལྡན་པའི་ཡངས་ཤིང་རྒྱ་ཆེ་བའི་ལམ་བུའི་ཐོག་བསྐྱོད་ནས་བྱ་སྤྱོད་ངོ་མའི་ཐོག་ནས་གུང་ཁྲན་ཏང་ཡོན་ཞིག་གི་བླ་ན་མེད་པའི་སྤྱོད་བཟང་མངོན་པར་བྱས་ཡོད།

    2003ལོར་སྙན་རོང་རྫོང་ཁྲ་འདམ་ཤང་གྲོང་ཚོ་བཞི་པའི་ཚུན་ཀྲང་དུ་བདམས་ཐོན་བྱུང་རྗེས་ཚེ་རིང་དཔལ་འབྱོར་གྱི་ཕྲག་ཐོག་གི་ལས་འགན་དེ་བས་ལྕི་རུ་སོང་ཡོད་ལ་ངལ་གསོའི་དུས་ཚོད་ཀྱང་དེ་བས་ཉུང་དུ་སོང་ཡོད། ཤང་འཕྲོད་བསྟེན་ཁང་དུ་ཉིན་གང་གི་ལས་ལ་བྲེལ་རྗེས་ཁོང་གིས་ངལ་དུབ་ལ་མ་འཛེམས་པར་མང་ཚོགས་ཀྱི་ཁྱིམ་དུ་བསྐྱོད་དེ་བདེ་སྡུག་འདྲི་བ་དང་ཁོང་ཚོའི་འཚོ་བའི་གནས་ཚུལ་དང་འཕྲལ་དུ་ཐག་གཅོད་བྱེད་དགོས་པའི་གནད་དོན་ཤེས་རྟོགས་ཞིབ་ཕྲ་བྱས་པ་དང་སྦྲགས་སེམས་ནུས་ཡོད་རྒུས་རོགས་རམ་བྱེད་ཀྱི་ཡོད། བདེ་སྡོད་ལས་གྲྭ་ལག་བསྟར་བྱས་ནས་ལོ་5སོང་ཚུན་ཁོང་གིས་གྲོང་ཚོའི་ལས་བྱེད་པའི་སྣེ་འཁྲིད་དེ་མ་མཐའི་འཚོ་བ་འགན་ལེན་དུད་ཚང་དང “འགན་ལེན་ལྔའི་དུད་ཚང ”ལ་བདེ་སྡོད་ཁང་པ་བསྐྲུན་པ་དང་དུས་མཚུངས་ཐབས་ལམ་མང་པོའི་ཐོག་ནས་ཁོང་ཚོར་འཛིན་ཆས་ཉོ་རོགས་དང་གྱོན་གོས་དང་འབྲུ་རིགས་ཉོ་རོགས་བྱས་ནས་མང་ཚོགས་དབུལ་པོ་གཅིག་ཀྱང་འཁྱགས་ལྟོགས་མི་ཐེབས་པ་བྱས་ཡོད། དུས་ཡུན་རིང་པོའི་ནང་བློ་རྩེ་གཅིག་སྒྲིམ་གྱིས་གྲོང་ཚོའི་ལས་ལ་གཞོལ་བས་ཁོང་གི་གཟུགས་པོ་ངལ་དུབ་ཆེ་དྲགས་པའི་དབང་གིས་དུས་རྟག་ཏུ་མཆིན་ནད་ཀྱིས་མནར་རུང་ཁོང་གིས་གྲོང་ཚོའི་ལས་དོན་ཐད་ཉིན་གཅིག་ཀྱང་འཐུས་ཤོར་མི་ཡོང་བ་བྱེད་ཀྱི་ཡོད། དེར་བརྟེན་རྒྱ་ཆེའི་མང་ཚོགས་ཚོས “ཚེ་རིང་དཔལ་འབྱོར་ནི་མང་ཚོགས་ཀྱི་ཁེ་ཕན་མཆོག་ཏུ་འཛིན་མཁན་གྱི་ཏང་ཡོན་ཡག་པོ་ཞིག་རེད། ཁོང་ནི་ང་ཚོའི་སྙིང་ཉེ་བ་དང་ལམ་སྣེ་འཁྲིད་མཁན ”ཞིག་རེད་ཅེས་བརྗོད་ཀྱི་ཡོད།

    སྒེར་སེམས་མེད་པའི་ལེགས་སྐྱེས་ཕུལ་བ་དང་མཆོག་ཏུ་གྱུར་པའི་མི་གཤིས་ཡོད་པའི་དབང་གིས་མང་ཚོགས་ཁྲོད་ཚེ་རིང་དཔལ་འབྱོར་ལ་སྙན་གྲགས་ཆེན་པོ་ཡོད། མཚོ་སྔོན་ཞིང་ཆེན་རྫ་སྟོད་རྫོང་དང་ཁྲ་འདམ་ཤང་དབར་རྩྭ་རའི་རྩོད་གཞི་ཐོན་སྐབས་ཁོང་གིས་མ་སྐུལ་དང་ལེན་ངང་དོན་ནས་མཐུན་སྦྱོར་བྱས་པས་མཐར་ཕྱོགས་གཉིས་པོའི་མང་ཚོགས་འཆམ་མཐུན་བྱུང་བ་དང་འབྲེལ་མཛའ་གྲོགས་ཀྱི་འབྲེལ་བའང་འཛུགས་ཐུབ་ཡོད། ཁྲ་འདམ་ཤང་དུ་གངས་སྐྱོན་ཕོག་སྐབས་རྫ་སྟོད་རྫོང་གི་མང་ཚོགས་ཚོས་རང་འགུལ་ངང་གནོད་འཚེ་ཕོག་པའི་མང་ཚོགས་ལ་རིན་མི་དགོས་པར་རྩྭ་ར་བེད་སྤྱོད་བྱེད་དུ་བཅུག་ནས་ཁོང་ཚོ་དཀའ་ངལ་ལས་སྒྲོལ་རོགས་བྱས་ཡོད། ཁྲ་འདམ་ཤང་དང་གྲོང་ཚོ་གཞན་དབར་འགལ་བ་ཐོན་སྐབས་ཁོང་གིས་རང་འགུལ་ངང་འགལ་བ་ཐག་གཅོད་བྱེད་པར་འགྲོ་རྒྱུའི་རེ་བ་བཏོན་ནས་མང་ཚོགས་ལ་བསམ་བློའི་སློབ་གསོ་གཏོང་བའི་ལས་དོན་ངང་རྒྱུད་རིང་པོའི་ངང་བསྒྲུབས་ཏེ་འགལ་བ་དང་རྩོད་གཞི་གྲུབ་འབྲས་ལྡན་པའི་ངང་ཐག་གཅོད་བྱས་ཡོད། བོད་ལུགས་གསོ་རིག་སྨན་པའི་ཁྱིམ་རྒྱུད་དུ་སྐྱེས་པའི་ཚེ་རིང་དཔལ་འབྱོར་སྨན་པ་བྱས་ནས་ལོ་23སོང་བའི་རིང་ཁྱིམ་རྒྱུད་ཀྱི་སྨན་པའི་ཀུན་སྤྱོད་བཟང་པོ་རྒྱུན་འཛིན་མཐའ་གཅིག་ཏུ་བྱས་ཏེ་ནད་པ་གཉེན་ཉེ་ལྟར་བརྩིས་ནས་བློ་དཀར་སེམས་དཀར་དང་བློ་བརྟན་འགྱུར་མེད་ཀྱིས་རང་གི་ཕུགས་བསམ་མངོན་འགྱུར་ཡོང་བ་བྱེད་ཀྱི་ཡོད། ཉིན་མོ་དང་མཚན་མོ་ནམ་ཡིན་དང་ཡང་ན་ཆར་རླུང་གངས་སེར་གང་ཞིག་ཡིན་རུང་ནད་པ་གང་དུ་ཡོད་ཚེ་ཁོང་ཡང་དེ་གར་ཡོད། ཁྲ་འདམ་ཤང་གི་ནད་པ་མང་པོར་ཁོང་གིས་སྨན་བཅོས་གནང་མྱོང་ཡོད་པ་མ་ཟད། ད་དུང་ཁོང་གིས་ལོ་ལྟར་ནད་པ་མི་ཐེངས་ཆིག་སྟོང་ཙམ་ལ་ནད་བལྟ་གི་ཡོད་པ་དང་རྒྱུན་གཏན་གྱི་ནད་བཅོས་ཚད་ཀྱང་90%ཡན་ཟིན་གྱི་ཡོད། ཚེ་རིང་དཔལ་འབྱོར་གྱིས་རྩེར་སོན་གྱི་སྨན་བཅོས་ལག་རྩལ་ལ་བརྟེན་ནས་སྲོག་ཉེན་ཡོད་པའི་ནད་པ་མང་པོ་དུས་ཐོག་ཏུ་སྨན་བཅོས་བྱས་ཡོད་པས་མི་རྣམས་ཀྱིས་ཁོང་ལ་མི་ཡུལ་གྱི་ལྷ་རྗེ་ཞེས་བརྗོད་ཀྱི་ཡོད།