བོད་ལྗོངས་ཉིན་རེའི་ཚགས་པར་ཁང་དུ་གནས་ཚུལ་འབྱོར་གསལ། ཟླ་3ཚེས་30ཉིན་གྱི་ཕྱི་དྲོར་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཀྲང་ཆིང་ལིས་ལྷ་སར་ཀྲུང་གོ་རྒྱལ་ཁབ་གློག་ཤུགས་ཚོགས་པ་ཀུང་སིའི་སྤྱི་ཁྱབ་ཅིང་ལི་གཞོན་པ་ཏང་ཙུའི་ཁོངས་མི་དབྱང་ཧའེ་པིན་བཅས་པ་དང་མཇལ་འཛོམས་གནང་བ་རེད།
ཀྲང་ཆིང་ལིས་དང་ཐོག་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཚབ་ཞུས་ནས་སྤྱི་ཁྱབ་ཅིང་ལི་གཞོན་པ་དབྱང་ཧའེ་པིན་དང་བཅས་པ་ཕེབས་པར་དགའ་བསུ་ཞུས་པ་དང་ཀྲུང་གོ་རྒྱལ་ཁབ་གློག་ཤུགས་ཚོགས་པ་ཀུང་སིས་ལོ་མང་རིང་བོད་ཀྱི་ལས་དོན་ཁག་དང་ལྷག་པར་དུ་ནུས་རྒྱུ་འཛུགས་སྐྲུན་ལ་ཐུགས་ཁུར་དང་རྒྱབ་སྐྱོར་གནང་བར་སྙིང་དབུས་ནས་ཐུགས་རྗེ་ཆེ་ཞུས་ཤིང་། ཁོང་གིས་ཀྲུང་གོ་རྒྱལ་ཁབ་གློག་ཤུགས་ཚོགས་པ་ཀུང་སིས་བོད་ཀྱི་ནུས་རྒྱུ་གསར་སྤེལ་དང་འཛུགས་སྐྲུན་ཐད་རྔུལ་ཆུ་དང་སེམས་ནུས་འབོར་ཆེན་བཏོན་ནས་ཕན་འབྲས་ཤིན་ཏུ་ཆེ་བའི་ལས་དོན་མང་པོ་བསྒྲུབས་ཡོད། ད་རེས་སྤྱི་ཁྱབ་ཅིང་ལི་གཞོན་པ་དབྱང་ཧའེ་པིན་དང་བཅས་པ་སླར་ཡང་ཆེད་མངགས “ལོ་ལྔ་ཚན་བཅུ་གཉིས་པའི ”གློག་ཤུགས་འཛུགས་སྐྲུན་རྣམ་གྲངས་བྱེད་འགོ་བཙུགས་པ་དང་ནུས་རྒྱུ་འཛུགས་སྐྲུན་གྱི་ལས་དོན་ལ་རྟོག་ཞིབ་གནང་བར་ཕེབས་པ་མ་ཟད་ལུང་ཡོན་ཡངས་པ་ཅན་གྱི་ཉི་འོད་ནུས་པའི་འོད་ཕུའུ་གློག་ཁང་གི་དུས་ཐེངས་དང་པོའི་རྣམ་གྲངས་ལས་མཇུག་འགྲིལ་བ་དང་དུས་ཐེངས་གཉིས་པའི་རྣམ་གྲངས་ལས་འགོ་ཚུགས་པའི་མཛད་སྒོར་ཕེབས་པ་དེས་ང་ཚོར་སྒུལ་ཤུགས་དང་དྲོ་སྐྱིད་སྦྱིན་པ་དང་རང་ལྗོངས་ཀྱི་ནུས་རྒྱུ་འཛུགས་སྐྲུན་དེ་སླར་ཡང་སྐས་རིམ་གསར་པ་ཞིག་ཏུ་སླེབས་རྒྱུར་སྐུལ་མ་ཐེབས་ངེས་རེད་ཅེས་གསུངས་པ་རེད།
དབྱང་ཧའེ་པིན་གྱིས་ཀྲང་ཆིང་ལི་སོགས་རང་སྐྱོང་ལྗོངས་ཀྱི་འགོ་ཁྲིད་ཀྱིས་མཇལ་འཛོམས་གནང་བར་ཐུགས་རྗེ་ཆེ་ཞུས་པ་མ་ཟད། རང་ལྗོངས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་ཐོབ་པའི་གྲུབ་འབྲས་གསར་པས་སྐུལ་མ་ཆེན་པོ་ཐེབས་བྱུང་ཞེས་དང་ཁོང་གིས་སླད་ཕྱིན་གྱི་ལས་དོན་ནང་ཀྲུང་གོ་རྒྱལ་ཁབ་གློག་ཤུགས་ཚོགས་པ་ཀུང་སིས་ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ལྔ་པའི་བླང་བྱ་གཞིར་བཟུང་བོད་ལ་རྩ་བ་ཚུགས་པ་དང་། བོད་ལ་ཞབས་འདེགས་ཞུ་བ། བོད་ལ་ལེགས་སྐྱེས་འབུལ་བ་བཅས་བྱས་ཏེ་བོད་ཀྱི་མི་སེར་དེ་བས་མང་བར་གློག་སྤྱོད་ཐུབ་པ་དང་གློག་ཡག་པོ་སྤྱོད་ཐུབ་པ་བྱས་ནས་རང་སྐྱོང་ལྗོངས་ཏང་ཨུད་དང་སྲིད་གཞུང་དང་མི་རིགས་ཁག་གི་མང་ཚོགས་ཀྱི་འདུན་པ་ཆུད་ཟོས་སུ་མི་གཏོང་རྒྱུ་ཡིན་ཞེས་གསུངས་པ་རེད།