བོད་ལྗོངས་ཉིན་རེའི་ཚགས་པར་ཁང་དུ་ལྷ་ས་ནས་ཟླ་3ཚེས་30ཉིན་གནས་ཚུལ་འབྱོར་གསལ། ཚེས་30ཉིན་གྱི་སྔ་དྲོ་ལྗོངས་ཏང་ཨུད་སྲིད་ཁྲིམས་ཨུ་ལྷན་གྱིས་བཪྙན་འཕྲིན་ཁ་པར་ཚོགས་འདུ་འཚོགས་ཏེ་ལྗོངས་ཡོངས་ཀྱི་སྲིད་ཁྲིམས་ཁོངས་གཏོགས་སུ “སྲོལ་རྒྱུན་དར་སྤེལ་དང་། དད་སེམས་བརྟན་པོ། དམངས་ཆེད་ཁྲིམས་འཛིན ”བཅས་ཀྱི་བརྗོད་དོན་གཙོ་བོའི་སློབ་གསོའི་ལག་ལེན་བྱེད་སྒོ་སྤེལ་ནས་སྐུལ་སློང་དང་བཀོད་སྒྲིག་བྱས་པ་རེད།

    རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་། རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ། ལྗོངས་ཏང་ཨུད་སྲིད་ཁྲིམས་ཨུ་ལྷན་གྱི་ཧྲུའུ་ཅི་བཅས་ཡིན་པའི་ཧའོ་ཕུང་ཚོགས་འདུར་ཕེབས་པ་དང་འབྲེལ་གསུང་བཤད་ཀྱང་གནང་ཞིང་། རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་དང་། རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ། ལྗོངས་ཏང་ཨུད་སྲིད་ཁྲིམས་ཨུ་ལྷན་གྱི་ཧྲུའུ་ཅི་གཞོན་པ་བཅས་ཡིན་པའི་བློ་བཟང་རྒྱལ་མཚན་གྱིས་ཚོགས་འདུ་གཙོ་སྐྱོང་གནང་བ་རེད།

    ཧའོ་ཕུང་གིས་གསུང་བཤད་གནང་སྐབས “སྲོལ་རྒྱུན་དར་སྤེལ་དང་། དད་སེམས་བརྟན་པོ། དམངས་ཆེད་ཁྲིམས་འཛིན ”བཅས་ཀྱི་བརྗོད་བྱ་གཙོ་བོའི་སློབ་གསོའི་ལག་ལེན་བྱེད་སྒོ་སྤེལ་བ་དེ་ནི་ཏང་ཀྲུང་དབྱང་དང་ལྗོངས་ཏང་ཨུད་ཀྱིས་སྲིད་ཁྲིམས་འཐབ་ཕྱོགས་ཀྱི་སྔོན་གཏོད་ལེགས་བརྩོན་གྱི་བྱེད་སྒོར་སྐུལ་འདེད་གཏིང་ཟབ་གཏོང་རྒྱུ་དང་བྱ་སྤྱོད་དངོས་ཀྱི་ཐོག་ནས་ཀྲུང་གོ་གུང་ཁྲན་ཏང་དབུ་བཪྙེས་ནས་ལོ་90འཁོར་བ་དང་བོད་ཞི་བས་བཅིངས་འགྲོལ་བཏང་ནས་ལོ་60འཁོར་བར་བསུ་བ་ཞུ་བའི་བཀོད་སྒྲིག་གལ་ཆེན་ལ་དམིགས་ཏེ་སྲིད་ཁྲིམས་ལས་ཁུངས་ཀྱི་ཏང་འཛུགས་སྐྱོང་དང་དཔུང་ཁག་འཛུགས་སྐྱོང་ལ་ཤུགས་སྣོན་རྒྱག་རྒྱུ་དང་ལྗོངས་ཡོངས་ཀྱི་སྲིད་ཁྲིམས་ལས་དོན་སྐས་རིམ་གསར་པ་ཞིག་ཏུ་སླེབས་རྒྱུར་སྐུལ་འདེད་གཏོང་རྒྱུར་དངོས་ཡོད་ཀྱི་དོན་སྙིང་གལ་ཆེན་ལྡན་ཡོད་ཅེས་གསུངས་པ་རེད། ཧའོ་ཕུང་གིས་ད་ཐེངས་ཀྱི་བརྗོད་བྱ་གཙོ་བོའི་སློབ་གསོའི་ལག་ལེན་བྱེད་སྒོའི་སྤྱིའི་བླང་བྱ་ནི་ཁ་ཕྲལ་ལ་ངོ་རྒོལ་བྱེད་པའི་འཐབ་རྩོད་གཏིང་ཟབ་སྤེལ་རྒྱུ་དང་སྤྱི་ཚོགས་བརྟན་ལྷིང་སྲུང་སྐྱོང་གིས་ལྟེ་བར་བྱེད་པ་དང་། གཟི་བརྗིད་སྲོལ་རྒྱུན་དར་སྤེལ་གཏོང་རྒྱུ་དང་། ཕུགས་བསམ་དང་དད་སེམས་བརྟན་དུ་གཏོང་རྒྱུ། དམངས་ཆེད་ཁྲིམས་འཛིན་བྱ་རྒྱུ། སྲིད་ཁྲིམས་ལས་དོན་ལ་སྐུལ་འདེད་གཏོང་རྒྱུ་བཅས་ནང་དོན་གཙོ་བོར་བྱེད་པ། གཙོ་གནད་ལས་དོན་གསུམ་ཟབ་ཏུ་གཏོང་རྒྱུ་ཤུགས་རྒྱག་སར་བྱེད་པ། སྲིད་ཁྲིམས་ལས་ཁུངས་ཀྱི་ཏང་འཛུགས་སྐྱོང་ལ་ཤུགས་སྣོན་རྒྱག་རྒྱུ་འགན་ལེན་དུ་བྱེད་པ་བཅས་བྱས་ཏེ་རྒྱ་ཆེའི་ལས་བྱེད་ཉེན་རྟོག་པས་ཆབ་སྲིད་ཀྱི་འདུ་ཤེས་དང་། སྤྱི་ཡོངས་ཀྱི་འདུ་ཤེས། དམིགས་ཡུལ་གྱི་འདུ་ཤེས། འགན་འཁྲིའི་འདུ་ཤེས་བཅས་བརྟན་པོ་འཛུགས་རྒྱུར་སློབ་གསོ་དང་ཁྲིད་སྟོན་བྱས་ཏེ་རང་ལྗོངས་ཀྱི་སྲིད་ཁྲིམས་ལས་བྱེད་ཉེན་རྟོག་པའི་བསམ་བློ་དང་། བསམ་པའི་ཉམས་འགྱུར། ལས་ཀའི་ཆུ་ཚད་བཅས་ཆེས་ཆེར་མཐོ་རུ་བཏང་ནས་ཆབ་སྲིད་ཐད་བློས་འགེལ་ཆོག་པ་དང་། ལས་སྒོ་བྱང་ཆུབ་པ། སྤྱོད་ཚུལ་བཟང་བ། ཁྲིམས་འཛིན་དྲང་གཞག་བཅས་ཀྱི་སྲིད་ཁྲིམས་དཔུང་ཁག་ཅིག་ཧུར་ཐག་སྐྲུན་རྒྱུ་དེ་ཡིན། ལྗོངས་ཡོངས་ཀྱི་སྲིད་ཁྲིམས་ལས་ཁུངས་ཀྱིས་བརྗོད་བྱ་གཙོ་བོའི་སློབ་གསོའི་ལག་ལེན་བྱེད་སྒོ་སྤེལ་རྒྱུའི་མཛུབ་ཁྲིད་བསམ་བློ་དང་དམིགས་ཚད་ལས་འགན་ཁོང་དུ་ཆུད་པ་བྱས་ཏེ་བརྗོད་བྱ་གཙོ་བོའི་སློབ་གསོའི་ལག་ལེན་བྱེད་སྒོར་མཐུན་སྦྱོར་དང་ཏན་ཏིག་གི་སྒོ་ནས་སྐུལ་འདེད་གཏོང་བའི་ཐད་གཤམ་གསལ་ཕྱོགས་དྲུག་གི་ཐད་གཞོལ་བ་དང་འབྲེལ་ཕན་འབྲས་ཐོན་ཐུབ་པ་བྱེད་དགོས་པ་སྟེ། གཅིག་ནི་གསར་བརྗེའི་སྲོལ་རྒྱུན་རྒྱུན་འཛིན་བྱས་ཏེ་ཕུགས་བསམ་དང་དད་སེམས་སྔར་བས་བརྟན་དུ་གཏོང་བ་དང་། གཉིས་ནི་ཁ་ཕྲལ་ལ་ངོ་རྒོལ་བྱེད་པའི་འཐབ་རྩོད་གཏིང་ཟབ་སྤེལ་ཏེ་ཆབ་སྲིད་ལངས་ཕྱོགས་སྔར་བས་བརྟན་དུ་གཏོང་བ། གསུམ་ནི་གཞུང་དྲང་ཁྲིམས་འཛིན་ལ་དམིགས་ཏེ་ཉེན་རྟོག་པ་དང་མི་དམངས་དབར་དང་ལས་བྱེད་པ་དང་མང་ཚོགས་དབར་གྱི་འབྲེལ་བ་སྔར་བས་ཟབ་ཏུ་གཏོང་བ། བཞི་ནི་ཉེན་རྟོག་ནན་སྐྱོང་བྱ་རྒྱུ་མཐའ་སྐྱོང་བྱས་ཏེ་སྲིད་ཁྲིམས་དཔུང་ཁག་གི་དོ་དམ་ལ་སྔར་བས་ཤུགས་སྣོན་རྒྱག་པ། ལྔ་ནི་སྔོན་གཏོད་ལེགས་བརྩོན་ལ་སྐུལ་མ་བཏང་སྟེ་སྲིད་ཁྲིམས་ལས་ཁུངས་ཀྱི་ཏང་འཛུགས་སྐྱོང་ལ་སྔར་བས་ཤུགས་སྣོན་རྒྱག་པ། དྲུག་ནི “བོད་སྐྱོད་པ་རྒན་གྲས་ཀྱི་སྙིང་སྟོབས ”རྒྱུན་འཛིན་དང་དར་སྤེལ་བཏང་སྟེ་ཉེན་རྟོག་གི་འཐབ་སེམས་སྔར་བས་ཆེ་རུ་གཏོང་བ་བྱེད་དགོས་ཞེས་ནན་གསུངས་གནང་བ་རེད།

    མཇུག་ཏུ་ཧའོ་ཕུང་གིས་ལྗོངས་ཡོངས་ཀྱི་རིམ་ཁག་སྲིད་ཁྲིམས་ལས་ཁུངས་ཀྱིས་ངེས་པར་དུ་བསམ་བློ་དང་བྱ་སྤྱོད་ཀྲུང་དབྱང་སྲིད་ཁྲིམས་ཨུ་ལྷན་གྱི་བླང་བྱ་དང་རང་སྐྱོང་ལྗོངས་ཏང་ཨུད་ཀྱི་བཀོད་སྒྲིག་ཐོག་གཅིག་གྱུར་ཡོང་བ་བྱས་ཏེ་སྒྲིག་འཛུགས་ཞིབ་ཚགས་དང་། དོན་འཁྱོལ་དམ་འཛིན། ཏན་ཏིག་བཅས་ཀྱི་སྒོ་ནས་བརྗོད་བྱ་གཙོ་བོའི་སློབ་གསོའི་ལག་ལེན་བྱེད་སྒོ་ཡག་པོ་སྤེལ་བ་དང་ཏན་ཏིག་གི་སྒོ་ནས་སྤྱི་ཚོགས་བརྟན་ལྷིང་སྲུང་སྐྱོང་བྱེད་པའི་ལས་དོན་ཁག་ཡག་པོ་བསྒྲུབ་སྟེ་གཟེངས་སུ་ཐོན་པའི་བྱེད་སྒོའི་གྲུབ་འབྲས་དང་ཕུལ་བྱུང་གི་ལས་ཀའི་གྲུབ་འབྲས་ཐོག་ནས་ཀྲུང་གོ་གུང་ཁྲན་ཏང་དབུ་བཪྙེས་ནས་ལོ་90འཁོར་བ་དང་བོད་ཞི་བས་བཅིངས་འགྲོལ་བཏང་ནས་ལོ་60འཁོར་བར་བསུ་བ་ཞུ་དགོས་ཞེས་ནན་གསུངས་གནང་བ་རེད།

    (གཞན་ཡང་གནས་ཚུལ་འབྱོར་གསལ )ཟླ་3ཚེས་24ཉིན་གྱི་ཕྱི་དྲོ་ལྗོངས་ཏང་ཨུད་སྲིད་ཁྲིམས་ཨུ་ལྷན་གྱིས་2011ལོའི་ཚོགས་འདུ་ཐེངས་གཉིས་པ་འཚོགས་ཤིང་། ཧའོ་ཕུང་གིས་ཚོགས་འདུ་གཙོ་སྐྱོང་གནང་བ་དང་འབྲེལ་གསུང་བཤད་ཀྱང་གནང་བ་དང་བློ་བཟང་རྒྱལ་མཚན་དང་། ལི་ཀྲའོ། ནོར་བུ་དོན་གྲུབ། ཀྲང་ཕེ་ཀྲུང་། དབྱང་ཧྲོང་ཅུན། ཀུའོ་དབྱི་ལི་སོགས་ཚོགས་འདུར་ཞུགས་པ་རེད།