བོད་ལྗོངས་ཉིན་རེའི་ཚགས་པར་ཁང་དུ་ལྷ་ས་ནས་ཟླ་3ཚེས་29ཉིན་གནས་ཚུལ་འབྱོར་གསལ། གོང་ཚེས་ཉིན་གྱི་སྔ་དྲོ་ལྷ་ས་གྲོང་ཁྱེར་སྒྲིག་ཨུད་ཀྱི་སྐབས་བདུན་པའི་ཨུ་ཡོན་ཚང་འཛོམས་ཚོགས་འདུ་ཐེངས་ལྔ་པ་འཚོགས་ནས་ཀྲུང་དབྱང་སྒྲིག་ཨུད་དང་ལྗོངས་སྒྲིག་ཨུད་ཀྱི་ཚང་འཛོམས་ཚོགས་འདུའི་དགོངས་དོན་ལག་བསྟར་དོན་འཁྱོལ་དང་། 2010ལོའི་གྲོང་ཁྱེར་དེ་ཡོངས་ཀྱི་ཏང་སྲོལ་སྲིད་གཙང་འཛུགས་སྐྱོང་དང་རུལ་སུངས་ལ་ངོ་རྒོལ་བྱེད་པའི་ལས་དོན་ལ་ཕྱིར་དྲན་ཕྱོགས་སྡོམ། 2011ལོའི་ལས་འགན་ལ་ཞིབ་འཇུག་བཀོད་སྒྲིག་བཅས་བྱས་པ་རེད།

    རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་ལྷ་ས་གྲོང་ཨུད་ཀྱི་ཧྲུའུ་ཅི་ཆིན་དབྱི་ཀྲི་ཚོགས་འདུར་ཕེབས་པ་མ་ཟད་གསུང་བཤད་ཀྱང་གནང་བ་རེད།

    ཆིན་དབྱི་ཀྲིས་ཀྲུང་དབྱང་སྒྲིག་ཨུད་དང་ལྗོངས་སྒྲིག་ཨུད་ཀྱི་ཚང་འཛོམས་ཚོགས་འདུའི་དགོངས་དོན་སློབ་སྦྱོང་དང་གོ་བ་ནན་ཏན་བླངས་ནས་མི་རྩ་བར་འཛིན་པ་དང་དམངས་དོན་དུ་སྲིད་སྐྱོང་རྒྱུ་མཐའ་འཁྱོངས་བྱེད་པའི་འགན་འཁྲིའི་བསམ་པ་དང་རང་རྟོགས་རང་བཞིན་ཏན་ཏིག་ངང་ཆེ་རུ་གཏོང་བ་དང་། མི་རྩ་བར་འཛིན་པ་དང་དམངས་དོན་དུ་སྲིད་སྐྱོང་བའི་བླང་བྱ་དེ་ཏང་གི་གཞི་རྩའི་དམིགས་ཡུལ་དང་སྲིད་སྐྱོང་འདུ་ཤེས་ལག་ལེན་གྱི་བྱ་སྤྱོད་དངོས་ལ་བརྩི་བ་དང་ཚན་རིག་དང་མཐུན་པའི་འཕེལ་རྒྱས་དང་། མཆོང་སྐྱོད་ལྟ་བུའི་འཕེལ་རྒྱས། ཡུན་རིང་བདེ་འཁོད་བཅས་ལ་སྐུལ་མ་གཏོང་བའི་གལ་ཆེའི་བྱ་ཐབས་ལ་བརྩི་བ་བཅས་བྱས་ཏེ་ཆོད་སེམས་སྔར་བས་བརྟན་པ་དང་ནུས་པ་སྔར་བས་ཆེ་བའི་བྱ་ཐབས་ལ་བརྟེན་ནས་རུལ་སུངས་ལ་ཆད་པ་མཐའ་གཅིག་ཏུ་གཅོད་པ་དང་རུལ་སུངས་སྔོན་འགོག་ནུས་ལྡན་བྱས་ཏེ་རུལ་རྒོལ་གཙང་སྤེལ་ཐད་ཀྱི་ཚན་རིག་ཅན་གྱི་ཆུ་ཚད་ཟམ་མི་ཆད་པར་གོང་མཐོར་གཏོང་དགོས་པའི་བླང་བྱ་བཏོན་གནང་བ་རེད།