དེ་རིང་ནི་བོད་ཀྱི་ཞིང་བྲན་ཁྲི་ཚོ་བརྒྱར་བཅིངས་འགྲོལ་ཐོབ་པའི་དྲན་གསོའི་ཉིན་མོ་བཙུགས་ནས་ལོ་གཉིས་འཁོར་བའི་ཉིན་ཡིན་ཞིང་། བཀྲ་ཤིས་པའི་ཉིན་མོ་འདིར་ངས་བཞུགས་མོལ་ཚོགས་འདུར་ཞུགས་པ་དང་འབྲེལ་རང་ལྗོངས་ཀྱི་ཆོས་ལུགས་ལས་རིགས་ཀྱི་མི་སྣའི་ཚབ་ཞུས་ནས་གཏམ་བཤད་བྱེད་རྒྱུ་བྱུང་བར་སེམས་འགུལ་ཚད་མེད་ཐེབས་པ་དང་སྤོབས་སེམས་དཔག་མེད་སྐྱེས་བྱུང་། ཏང་གི་འོད་ཟེར་སྟོང་ལྡན་གྱི་སྲིད་ཇུས་ཀྱི་མཛུབ་ཁྲིད་འོག་མཛེས་སྡུག་ལྡན་པའི་གངས་ལྗོངས་ས་མཐོར་བོད་ཞི་བས་བཅིངས་འགྲོལ་བཏང་ནས་ལོ་ངོ་60འཁོར་བའི་བཀྲ་ཤིས་པའི་ཉིན་མོ་བསུས་པ་དང་མི་རིགས་ཁག་འཆམ་མཐུན་མཉམ་གནས་དང་བདེ་སྡོད་ལས་བརྩོན་བྱུང་ཡོད། མི་དམངས་ལ་ཆོས་དད་རང་མོས་ཡོད་པ་དང་། གྲུབ་མཐའ་ཁག་དབར་འདྲ་མཉམ་གྱི་ལྟ་སྟངས་འཛིན་པ་དང་ཕན་ཚུན་བརྩི་འཇོག་བྱེད་པ། ཁྲིམས་ལུགས་དྲིལ་བསྒྲགས་སློབ་གསོ་མི་སེམས་ལ་ཟུག་པ། སྒྲིག་བཀུར་ཁྲིམས་སྲུང་གི་འདུ་ཤེས་མངོན་གསལ་དོད་པོས་ཤུགས་ཆེར་ཕྱིན་པ་བཅས་བྱུང་ནས་དུས་བདེ་མཐུན་སྦྱོར་གྱི་བོད་ལྗོངས་མཉམ་གཏོད་བྱས་ཡོད། བོད་དུ་དམངས་གཙོའི་བཅོས་སྒྱུར་བྱས་ཚུན་ཀྲུང་གོ་གུང་ཁྲན་ཏང་གི་འགོ་ཁྲིད་འོག་བོད་མི་དམངས་ལ་རང་ཐག་རང་གཅོད་ཀྱི་དབང་ཆ་གང་ལེགས་བྱུང་བ་དང་དཔལ་འབྱོར་དང་། རིག་གནས། སྨན་བཅོས་སོགས་སྤྱི་ཚོགས་ཀྱི་བྱ་གཞག་ཁག་དབྱར་མཚོ་རྒྱས་པ་ལྟར་འཕེལ་རྒྱས་བྱུང་ཐོག་ཏང་གི་ཆོས་དད་རང་མོས་ཀྱི་སྲིད་ཇུས་ལག་བསྟར་དོན་འཁྱོལ་ཡང་དག་བྱུང་ཡོད། ཆོས་ལུགས་ལས་རིགས་ཀྱི་མི་སྣ་ཡིན་པའི་ངས་ཏང་གི་ཆོས་དད་རང་མོས་ཀྱི་སྲིད་ཇུས་བོད་དུ་ལག་བསྟར་དོན་འཁྱོལ་བྱེད་ཚུལ་དེ་དབུ་ཁྲིད་རྣམ་པ་དང་གྲོགས་པོ་རྣམ་པར་རང་ཉིད་ཀྱི་མྱོང་ཚོར་གླེང་རྒྱུ་ཡིན། བོད་ཀྱི་དམངས་གཙོའི་བཅོས་སྒྱུར་གྱིས་མུན་ནག་རྗེས་ལུས་ཀྱི་བཀས་བཀོད་རྒྱུད་འཛིན་ཞིང་བྲན་ལམ་ལུགས་མགོ་རྟིང་བསློགས་ནས་མི་དམངས་རང་ཐག་རང་གཅོད་ཀྱི་སྤྱི་ཚོགས་རིང་ལུགས་ཀྱི་བོད་གསར་བསྐྲུན་ཡོད། ཀྲུང་གོ་གུང་ཁྲན་ཏང་གི་འགོ་ཁྲིད་དང་སྤུན་ཟླའི་ཞིང་ཆེན་དང་གྲོང་ཁྱེར་ཁག་གི་སྒེར་སེམས་མེད་པའི་རྒྱབ་སྐྱོར་འོག་བོད་ཀྱི་མི་རིགས་ཁག་དང་ལས་རིགས་ཁག་གི་མང་ཚོགས་ཀྱིས་དཀའ་སྤྱད་འབད་འཐབ་བྱས་པ་བརྒྱུད་བོད་ཀྱི་བྱ་གཞག་ཁག་དབྱར་མཚོ་རྒྱས་པ་ལྟར་འཕེལ་རྒྱས་བྱུང་བ་དང་མི་དམངས་བདེ་སྡོད་ལས་བརྩོན་དང་སྤྱི་ཚོགས་མཐུན་སྦྱོར་བརྟན་ལྷིང་བྱུང་ཡོད།    

    གཅིག ཏང་གི་ཆོས་དད་རང་མོས་སྲིད་ཇུས་ལག་བསྟར་དོན་འཁྱོལ་ཡང་དག་བྱུང་ཡོད། བོད་ཀྱི་མི་རིགས་ཁག་གི་དད་ལྡན་མང་ཚོགས་ཀྱིས་རྩ་ཁྲིམས་དང་བཅའ་ཁྲིམས་ཀྱི་སྲུང་སྐྱོང་འོག་རྒྱུན་གཏན་གྱི་ཆོས་ལུགས་བྱེད་སྒོ་སྤེལ་བའི་རང་དབང་གང་ལེགས་ཡོད་པ་དང་ཏང་གི་ཆོས་དད་རང་མོས་ལག་བསྟར་དོན་འཁྱོལ་ཡག་པོ་བྱུང་ཡོད། 1. ཆོས་ལུགས་བྱེད་སྒོ་སྤེལ་ཡུལ་སྲུང་སྐྱོང་དང་ཉམས་གསོ་བྱས་པ། རིམ་ཁག་ཏང་ཨུད་དང་སྲིད་གཞུང་གིས་ཏང་གི་མི་རིགས་ཆོས་ལུགས་སྲིད་ཇུས་ལག་བསྟར་དོན་འཁྱོལ་ནན་ཏན་བྱས་ནས་ཆོས་ལུགས་བྱེད་སྒོ་སྤེལ་ཡུལ་སྲུང་སྐྱོང་དང་ཉམས་གསོ་དང་། རྒྱུན་གཏན་གྱི་ཆོས་ལུགས་བྱེད་སྒོ་སྲུང་སྐྱོང་། དགོན་སྡེའི་གྲྭ་བཙུན་གྱི་དངོས་ཡོད་དཀའ་ངལ་སེལ་རོགས་བཅས་བྱས་པ་དཔེར་ན། རང་ཉིད་གནས་ཡུལ་ལྷུན་གྲུབ་རྫོང་གིས་ཆོས་ལུགས་བྱེད་སྒོ་སྤེལ་ཡུལ་38སྔ་རྗེས་སུ་སྲུང་སྐྱོང་དང་ཉམས་གསོ་བྱས་པ་དང་དགོན་སྡེའི་ཆུ་དང་། གློག ལམ། རླུང་འཕྲིན་བཪྙན་འཕྲིན་སོགས་ཤར་གཏོང་གི་ལས་གྲྭ་ལག་བསྟར་བྱས་པས་རྒྱ་ཆེའི་གྲྭ་དམངས་ཀྱི་འཚོ་བའི་ཆ་རྐྱེན་ཧ་ཅང་གིས་ལེགས་སུ་ཕྱིན་པ་དང་གྲྭ་བཙུན་གྱི་རིག་གནས་འཚོ་བ་ཕུན་སུམ་ཚོགས་སུ་ཕྱིན་ཡོད། 2. བོད་ཀྱི་མི་རིགས་ཁག་གི་དད་ལྡན་མང་ཚོགས་ཀྱིས་རང་ཉིད་ཀྱི་འདོད་འདུན་གཞིར་བཟུང་ཁྲིམས་ལུགས་ལྟར་རྒྱུན་གཏན་གྱི་ཆོས་ལུགས་ཀྱི་མཆོད་འབུལ་བྱེད་སྒོ་སྤེལ་བ་དང་ཆོས་ལུགས་ཀྱི་བྱེད་སྒོ་ཁག་ནང་ཞུགས་པའི་རང་དབང་ལ་བརྩི་འཇོག་དང་སྲུང་སྐྱོང་གང་ལེགས་ཐོབ་ཡོད། 3.ཏང་དང་སྲིད་གཞུང་གིས་བོད་ཀྱི་ཆོས་ལུགས་དང་རིག་གནས་ཐད་ཧ་ཅང་མཐོང་ཆེན་དང་སྲུང་སྐྱོང་བྱས་ནས་བོད་བརྒྱུད་ནང་བསྟན་གྱི་གསུང་རབ་མང་པོ་མྱུར་སྐྱོབ་རང་བཞིན་གྱི་སྲུང་སྐྱོང་དང་ཚན་རིག་དང་མཐུན་པའི་བཅོས་སྒྲིག་བྱུང་ནས་ཆོས་གཞུང་འཚོལ་བསྡུ་དང་། ལེགས་སྒྲིག པར་སྐྲུན། ཞིབ་འཇུག་བཅས་ཀྱི་ལས་དོན་ལ་ཤུགས་སྣོན་ཟམ་མི་ཆད་པ་ཐེབས་ཡོད།

    གཉིས། དགོན་སྡེའི་ཁྲིམས་ལུགས་དྲིལ་བསྒྲགས་དང་སློབ་གསོའི་བྱེད་སྒོར་གྲུབ་འབྲས་མངོན་གསལ་དོད་པོ་ཐོབ་ཡོད། ལོ་གསུམ་རིང་གི་དགོན་སྡེའི་ཁྲིམས་ལུགས་དྲིལ་བསྒྲགས་སློབ་གསོ་དང་ལས་དོན་ཚོགས་ཆུང་གི་བློ་མཐུན་ཚོའི་ངང་རིང་ཞིབ་ཚགས་ཀྱི་ལས་དོན་བརྒྱུད་རྒྱ་ཆེའི་གྲྭ་དམངས་ཚོས་ཡང་དག་པའི་མེས་རྒྱལ་གྱི་འདུ་ཤེས་དང་། སྲིད་གཞུང་གི་འདུ་ཤེས། ཁྲིམས་ལུགས་ཀྱི་འདུ་ཤེས། སྤྱི་དམངས་ཀྱི་འདུ་ཤེས་བཅས་བཙུགས་ཐུབ་པ་བྱུང་ཡོད། དགོན་སྡེའི་གྲྭ་བཙུན་ཁྲོད་རྒྱལ་གཅེས་ཆོས་གཅེས་དང་། སྒྲིག་བཀུར་ཁྲིམས་སྲུང་། ནང་བསྟན་སྒོམ་སྒྲུབ། འཆམ་མཐུན་མཉམ་གནས་བཅས་ཀྱི་རྣམ་པ་བཟང་པོ་རིམ་བཞིན་ཆགས་པ་དང་གྲྭ་བཙུན་ཚོས་རང་རྟོགས་ངང་མེས་རྒྱལ་གཅིག་གྱུར་དང་མི་རིགས་མཐུན་སྒྲིལ་ལ་སྲུང་སྐྱོང་དང་ཁ་ཕྲལ་ལ་ངོ་རྒོལ་བྱས་ཏེ་སྲིད་ཇུས་དང་ཁྲིམས་ལུགས་ཀྱི་ཆོག་པའི་ཁྱབ་ཁོངས་ནང་ཆོས་ལུགས་ཀྱི་བྱེད་སྒོ་སྤེལ་བ་དང་དུས་བདེ་དང་མཐུན་སྦྱོར་ལྡན་པའི་དགོན་སྡེ་གཏོད་པའི་བྱེད་སྒོ་ཧུར་ཐག་སྤེལ་ནས་དགོན་སྡེའི་མཐུན་སྦྱོར་དང་བརྟན་ལྷིང་འགན་ལེན་བྱས་ཡོད། རང་ཉིད་ཆོས་ལུགས་ལས་རིགས་ཀྱི་མི་སྣ་ཞིག་ཡིན་པའི་ངོས་ནས་སྲིད་གཞུང་གི་འབོད་སྐུལ་དང་ལེན་ཧུར་ཐག་བྱས་ཏེ་དགོན་སྡེ་དང་ཆོས་དད་མང་ཚོགས་ཁྲོད་བསྐྱོད་དེ་ཏང་གི་མི་རིགས་ཆོས་ལུགས་སྲིད་ཇུས་དང་བཅའ་ཁྲིམས་དང་ཁྲིམས་སྲོལ་རྒྱ་ཁྱབ་ངང་དྲིལ་བསྒྲགས་བྱས་ཏེ་ཁོང་ཚོའི་སྣེ་ཁྲིད་ནས་སྒྲིག་བཀུར་ཁྲིམས་སྲུང་དང་རྒྱལ་གཅེས་ཆོས་གཅེས་ཀྱི་སྤྱི་དམངས་ཤིག་བྱེད་པ་དང་བཅའ་ཁྲིམས་དྲིལ་བསྒྲགས་སློབ་གསོ་བརྒྱུད་རང་ཉིད་ལའང་སློབ་གསོ་གཏིང་ཟབ་ཐེབས་བྱུང་ལ་རྒྱལ་གཅེས་ཆོས་གཅེས་ཀྱི་དད་སེམས་བརྟན་དུ་ཕྱིན་སོང་། རྒྱལ་ཡོངས་མི་རིགས་ཁག་གི་མི་དམངས་ཚོས་མཉམ་དུ་བོད་ཞི་བས་བཅིངས་འགྲོལ་བཏང་ནས་ལོ་60འཁོར་བར་རྟེན་འབྲེལ་ཞུ་བའི་དམིགས་བསལ་གྱི་དུས་དེར་གསར་སྐྱེས་ཀྱི་གཞོན་ནུ་ཞིག་ཡིན་པའི་ངོས་ནས་རང་ཉིད་ལ་དྲིན་ཚོར་གྱི་བསམ་པ་གཏིང་ཟབ་དང་། ཚོར་སྣང་ཟབ་མོ། འགན་འཁྲི་ལྕི་པོ་ཡིན་པ་བཅས་ཤེས་རྟོགས་བྱུང་། ཆོས་སྤེལ་འགྲོ་ཕན་གྱི་ཐོག་ནས་མཐུན་སྦྱོར་དང་འཕེལ་རྒྱས་ལ་སྐུལ་མ་གཏོང་བ་དང་རྒྱལ་སྲུང་དང་གནོད་འཚེ་ཉུང་དུ་བཏང་ནས་འབྱོར་འབྲིང་སྤྱི་ཚོགས་ནུས་ཤུགས་ཡོད་རྒུས་འགན་ལེན་བྱ་རྒྱུ་དེ་ནི་ནང་བསྟན་གྱི་དགོངས་པ་དང་། བྱང་སེམས་ཀྱི་སྙིང་པོ། གསུང་རབ་ཀྱི་ནང་དོན་བཅས་ཡིན་ལ་ང་ཚོ་ཆོས་ལུགས་ལས་རིགས་མི་སྣའི་འགན་འཁྲིའང་རེད། ཆོས་ལུགས་ལས་རིགས་ཀྱི་འཐུས་མིས་གྲྭ་བཙུན་ལ་སློབ་གསོ་དང་ཁྲིད་སྟོན་བྱ་རྒྱུར་ཤུགས་སྣོན་བརྒྱབ་ནས་སྡོམ་ཁྲིམས་ནན་པོ་སྲུང་སྟེ་སྤྱི་ཚོགས་བརྟན་ལྷིང་ལ་སྲུང་སྐྱོང་བྱས་ཐོག་རང་ལྗོངས་ཀྱི་མཐུན་སྦྱོར་དང་བརྟན་ལྷིང་དང་འབྱོར་འབྲིང་སྤྱི་ཚོགས་སྒོ་ཀུན་ནས་འཛུགས་སྐྲུན་བྱ་ཆེད་འབུལ་དགོས་ངེས་ཀྱི་ལེགས་སྐྱེས་འབུལ་དགོས།