བོད་ལྗོངས་ཉིན་རེའི་ཚགས་པར་ཁང་དུ་ལྷ་ས་ནས་གནས་ཚུལ་འབྱོར་གསལ། ཟླ་3ཚེས་24ཉིན་ཉིང་ཁྲི་ས་ཁུལ་སྤོ་བོ་རྫོང་གི་མངའ་ཁོངས་གཞུང་ལམ་གྱི་དགའ་ལུང་ལའི་གཞུང་ལམ་17Kནས་18Kདུམ་བུར་གངས་ཉིལ་ནས་ལས་ཡུལ་དངོས་སུ་ཨར་སྐྲུན་བྱེད་མཁན་ལས་མི་དང་མང་ཚོགས་100ལྷག་ཙམ་ཉེན་ཁར་གྱར་ཡོད་པ་རེད། གནོད་འཚེ་ཐོན་རྗེས་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་ཚད་མཐོའི་མཐོང་ཆེན་བྱས་ཏེ་ལྷོ་ཁ་ས་ཁུལ་ལྷོ་བྲག་རྫོང་དང་མཚོ་སྨད་རྫོང་དུ་ལས་དོན་བརྟག་ཞིབ་གནང་བཞིན་པའི་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཀྲང་ཆིང་ལིས་ད་ཐེངས་ཀྱི་གནོད་འཚེར་ངེས་པར་དུ་ཚད་མཐོའི་མཐོང་ཆེན་གྱིས་དུས་ཚོད་སྐར་ཆ་ཙམ་ཡང་བརྩོན་ལེན་དང་། ཐབས་བརྒྱ་ཇུས་སྟོང་། ནུས་ཤུགས་ཡོད་རྒུས་ཉེན་གྱར་མི་སྣ་བསྐྱབས་ཏེ་མང་ཚོགས་ཀྱི་ཚེ་སྲོག་བདེ་འཇགས་འགན་ལེན་བྱེད་དགོས་ཞེས་འཕྲལ་དུ་མཛུབ་སྟོན་གནང་བ་དང་སྦྲགས་ཉིང་ཁྲི་ས་ཁུལ་དུ་ཡོད་པའི་རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་ཏེང་ཞའོ་ཀང་ལམ་སེང་གནོད་འཚེ་ཐོན་ཡུལ་དུ་ཉེན་སེལ་རོགས་སྐྱོབ་ཀྱི་ལས་དོན་ལ་བཀོད་འདོམས་བྱེད་པར་འགྲོ་རྒྱུའི་བླང་བྱ་བཏོན་པ་རེད། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་པད་མ་འཕྲིན་ལས་ཀྱིས་ཀྱང་རོགས་སྐྱོབ་ལས་དོན་ལ་གལ་ཆེའི་མཛུབ་སྟོན་གནང་བ་རེད།
རང་སྐྱོང་ལྗོངས་འགྲིམ་འགྲུལ་སྐྱེལ་འདྲེན་ཐིང་དང་། དྲག་ཆས་ཉེན་རྟོག་དཔུང་སྡེའི་དཔོན་དམག ཉིང་ཁྲི་ས་ཨུད་དང་སྲིད་འཛིན་ཀུང་ཧྲུའུ་བཅས་ཀྱིས་རང་སྐྱོང་ལྗོངས་ཏང་ཨུད་དང་སྲིད་གཞུང་གི་བཀོད་སྒྲིག་གཞིར་བཟུང་ལམ་མགྱོགས་མྱུར་སྟོབས་ཤུགས་སྒྲིག་འཛུགས་ཀྱིས་གནོད་འཚེ་ཐོན་ཁུལ་དུ་རོགས་སྐྱོབ་ལས་དོན་སྤེལ་བ་རེད། ཟླ་3ཚེས་25ཉིན་རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཝུའུ་དབྱིན་ཅེས་རང་སྐྱོང་ལྗོངས་མི་དམངས་སྲིད་གཞུང་གི་ཛ་དྲག་གི་ཆེད་དོན་ཚོགས་འདུ་གཙོ་སྐྱོང་དང་སྐོང་ཚོགས་གནང་སྟེ་གངས་ཉིལ་བའི་རོགས་སྐྱོབ་ལས་དོན་ལ་ཞིབ་འཇུག་བཀོད་སྒྲིག་གནང་བ་དང་སྦྲགས་བོད་ལྗོངས་འགྲིམ་འགྲུལ་འཕྲལ་སྡོམ་འཕྲིན་གཏོང་བཀོད་འདོམས་ལྟེ་གནས་ཀྱི་རོགས་སྐྱོབ་ལས་དོན་ལ་བཀོད་འདོམས་གནང་བར་ཕེབས་པ་རེད།
ཛ་དྲག་དང་གོ་རིམ་ལྡན་པའི་སྒོ་ནས་ནུས་ཤུགས་ཡོད་རྒུས་རོགས་སྐྱོབ་བྱས་པ་བརྒྱུད་ཟླ་3ཚེས་26ཉིན་ཉེན་གྱར་མང་ཚོགས་ཚང་མ་ཉེན་ཁ་མེད་སར་ཕྱིར་འཐེན་བྱས་པ་དང་ཧྲུའུ་ཅི་ཀྲང་ཆིང་ལི་དང་། ཀྲུའུ་ཞི་པད་མ་འཕྲིན་ལས། ཀྲུའུ་ཞི་གཞོན་པ་ཧའོ་ཕུང་བཅས་ཀྱིས་ངེས་པར་དུ་མང་ཚོགས་ཚོའི་འཚོ་བ་དང་སྨན་བཅོས་སོགས་ཀྱི་འགན་ལེན་ལས་དོན་ཁག་བཀོད་སྒྲིག་འོས་འཚམས་བྱས་ཏེ་ཁོང་ཚོར་ཏང་དང་སྲིད་གཞུང་གི་དྲོ་སྐྱིད་ཚོར་བ་བྱེད་དགོས་ཞེས་སླར་ཡང་མཛུབ་སྟོན་གནང་བ་རེད།
ཤེས་རྟོགས་བྱུང་བར་གཞིགས་ན། གངས་ཉིལ་བའི་གནོད་འཚེའི་ཁྲོད་མང་ཚོགས་10ལྷག་ཙམ་གར་སོང་ཆ་མེད་དུ་གྱུར་ཞིང་། མིག་སྔར་ནུས་ཤུགས་ཡོད་རྒུས་འཚོལ་སྐྱོབ་ལས་དོན་སྤེལ་བཞིན་ཡོད་པ་རེད།