ཟླ་3ཚེས་21ཉིན་ཁ་ན་ཏའི་རྒྱལ་ས་ཨོ་ཐེ་ཝའི་གྲོས་ཚོགས་ཀྱི་ཐོག་བརྩེགས་ཁང་ཆེན་དུ་ཁ་ན་ཏའི་དམངས་གྲོས་ཁང་གི་དབྱི་ཀྲང་པི་ཏེ ·སྨི་ལི་ཁེན (གཡས )གྱིས་རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་དང་། ཀྲུང་གུང་བོད་རང་སྐྱོང་ལྗོངས་ཨུ་ལྷན་གྱི་ཧྲུའུ་ཅི་གཞོན་པ། རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རེན་བཅས་ཡིན་པའི་བྱམས་པ་ཕུན་ཚོགས (གཡོན )ཀྱིས་ཚོགས་གཙོ་གནང་བའི་རྒྱལ་ཡོངས་མི་དམངས་འཐུས་ཚོགས་བོད་ལྗོངས་འཐུས་མི་ཚོགས་པ་དང་མཇལ་འཛོམས་གནང་བ།

    བོད་ལྗོངས་ཉིན་རེའི་ཚགས་པར་ཁང་དུ་ཨོ་ཐེ་ཝ་ནས་གློག་འཕྲིན་འབྱོར་གསལ། ཚེས་21ཉིན་གྱི་ཕྱི་དྲོ་ཁ་ན་ཏའི་དམངས་གྲོས་ཁང་གི་དབྱི་ཀྲང་པི་ཏེ ·སྨི་ལི་ཁེན་གྱིས་ཁ་ན་ཏའི་གྲོས་ཚོགས་ཁང་ཆེན་དུ་བྱམས་པ་ཕུན་ཚོགས་ཀྱིས་ཚོགས་གཙོ་གནང་བའི་རྒྱལ་ཡོངས་མི་དམངས་འཐུས་ཚོགས་བོད་ཀྱི་འཐུས་མི་ཚོགས་པ་དང་མཇལ་འཛོམས་གནང་བ་རེད།

    སྨི་ལི་ཁེན་གྱིས་ཀྲུང་གོའི་བོད་ལྗོངས་ཀྱི་མི་དམངས་འཐུས་ཚོགས་ཀྱི་འཐུས་མི་ཁ་ན་ཏ་རུ་འཚམས་འདྲི་གནང་བ་ཕེབས་པར་སྤྲོ་སེམས་འཁོལ་བའི་སྒོ་ནས་དགའ་བསུ་ཞུ་རྒྱུ་དང་གདོང་འཕྲད་ནས་སྤེལ་རེས་བྱས་ན་ཕྱོགས་གཉིས་ཀའི་ཕན་ཚུན་བསམ་ཤེས་དང་མཛའ་གྲོགས་ཟབ་ཏུ་འགྲོ་རྒྱུར་ཕན་པ་ཡོད་ཅེས་གསུངས་པ་རེད།

    བྱམས་པ་ཕུན་ཚོགས་ཀྱིས་བོད་ཀྱི་ལས་དོན་ཐད་འཛིན་པའི་ཀྲུང་གོའི་ཀྲུང་དབྱང་སྲིད་གཞུང་གི་སྲིད་ཇུས་དང་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་ཐོབ་པའི་གྲུབ་འབྲས་ཆེན་པོ་ངོ་སྤྲོད་ཞིབ་ཕྲ་གནང་རྗེས་ཉེ་བའི་ལོ་ཤས་རིང་ཀྲུང་གོ་དང་ཁ་ན་ཏ་རྒྱལ་ཁབ་གཉིས་ཀྱི་གྲོས་ཚོགས་དབར་སྤེལ་བའི་སྤེལ་རེས་དང་མཉམ་ལས་ལ་གདེང་འཇོག་བཟང་པོ་གནང་བ་རེད།

    བྱམས་པ་ཕུན་ཚོགས་ཀྱིས་བོད་ཀྱི་མི་རིགས་ཁག་གི་མི་དམངས་ཀྱིས་བདམས་པའི་མི་དམངས་འཐུས་ཚོགས་ཀྱི་འཐུས་མི་ཞིག་གི་ངོས་ནས་ཁ་ན་ཏའི་གྲོས་ཁང་གི་གྲོས་མི་དང་མཉམ་དུ་འབད་བརྩོན་བྱས་ནས་རྒྱལ་ཁབ་གཉིས་ཀྱི་འབྲེལ་བ་སྐྱོན་བྲལ་ངང་འཕེལ་རྒྱས་འགྲོ་རྒྱུར་ཕན་པ་ཡོད་པའི་བྱ་བ་མང་ཙམ་སྒྲུབ་འདོད་ཡོད། ཁ་ན་ཏའི་གྲོས་ཚོགས་དང་སྲིད་གཞུང་དང་སྤྱི་ཚོགས་ལས་རིགས་ཁག་གིས་ཏཱ་ལའི་རུ་ཚོགས་ཀྱི་ངོ་བོ་སྔར་བས་གསལ་རྟོགས་བྱས་ཏེ་ཏཱ་ལ་ནི་ཆོས་ལུགས་ཀྱི་མི་སྣ་ཁོ་ན་མིན་པར་ཆོས་ལུགས་ཁ་ལ་འཁྱེར་ནས་རྒྱལ་སྤྱིའི་ཐོག་མེས་རྒྱལ་ཁ་ཕྲལ་གྱི་བྱེད་སྤྱོད་སྤེལ་མཁན་ཆབ་སྲིད་ཀྱི་ཡུལ་གྱར་བ་ཞིག་ཡིན་པ་ངོས་འཛིན་ཐུབ་རྒྱུའི་རེ་བ་ཡོད་ཅེས་གསུངས་པ་རེད།

    བྱམས་པ་ཕུན་ཚོགས་ཀྱིས་ཁ་ན་ཏ་ཕྱོགས་ལ་ཏཱ་ལའི་རུ་ཚོགས་ལ་མེས་རྒྱལ་ཁ་ཕྲལ་གཏོང་བའི་བྱེད་སྤྱོད་སྤེལ་ཡུལ་གང་རུང་ཞིག་མཁོ་འདོན་བྱེད་མི་རུང་བའི་ལྕག་སྐུལ་གནང་བ་རེད།