ཟླ་3ཚེས་16ཉིན་ཨ་རིའི་རྒྱལ་ས་ཝ་ཧྲིང་ཐོན་དུ་རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་དང་། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ། རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རེན་བཅས་ཡིན་པའི་བྱམས་པ་ཕུན་ཚོགས (གཡས་ཀྱི་དང་པོ )དང་ཀྲུང་དབྱི་ཡོན་གྱི་ཨ་རི་དང་ཀྲུང་གོའི་ལས་དོན་ཚོགས་ཆུང་གི་ཐུན་མོང་ཀྲུའུ་ཞི་པོ་སི་ཐན་ཉི (གཡོན་གྱི་དང་པོ )དང་ལ་སེན (གཡོན་གྱི་གཉིས་པ )གྲོས་མོལ་གནང་བ།

    ཤིན་ཧྭ་གསར་འགྱུར་ཁང་དུ་ཝ་ཧྲིང་ཐོན་ནས་ཟླ་3ཚེས་17ཉིན་གློག་འཕྲིན་འབྱོར་གསལ། ཟླ་3ཚེས་16དང་ཚེས་17ཉིན་བྱམས་པ་ཕུན་ཚོགས་ཀྱིས་ཚོགས་གཙོ་གནང་བའི་རྒྱལ་ཡོངས་མི་དམངས་འཐུས་ཚོགས་བོད་ལྗོངས་འཐུས་མི་ཚོགས་པས་སྔ་རྗེས་སུ་ཝ་ཧྲིང་ཐོན་དུ་ཨ་རིའི་རྒྱལ་ཚོགས་དམངས་གྲོས་ཁང་གི་ཨེ་ཤེ་ཡ་དང་ཞི་བདེ་རྒྱ་མཚོ་ཆེན་པོའི་ཚོགས་ཆུང་ཨུ་ཡོན་ལྷན་ཁང་གི་དབུ་བཞུགས་ཁོངས་མི་ཧྥ་ལི་ཨའོ་མ་ཝུའེ་ཅ་དང་། དམངས་གྲོས་ཁང་ཨ་ཀྲུང་ལས་དོན་ཚོགས་ཆུང་གི་ཐུན་མོང་ཀྲུའུ་ཞི་པོ་སི་ཐན་ཉི་དང་ལ་སེན། རྒྱལ་ཚོགས་ཀྱི་དབྱི་ཡོན་གྲོས་མིའི་ལས་རོགས་ཀྱི་འཐུས་མི། དེ་བཞིན་རྒྱལ་ཚོགས་ཞིབ་འཇུག་པུའུ་ཡི་རིགས་གཅིག་མཁས་ཅན་བཅས་དང་བཞུགས་མོལ་གནང་བ་དང་འབྲེལ་ཨ་རིའི་རྒྱལ་དོན་ཁང་གི་འབྲེལ་ཡོད་སྡེ་ཚན་གྱི་འགན་འཁུར་བ་དང་མཇལ་འཛོམས་གནང་བ་རེད།

    བཞུགས་མོལ་དང་མཇལ་འཛོམས་གནང་སྐབས་བྱམས་པ་ཕུན་ཚོགས་ཀྱིས་ཞིབ་ཅིང་ཕྲ་བའི་ལོ་རྒྱུས་ཀྱི་དཔྱད་ཡིག་ཐོག་ནས་བོད་ཪྙིང་པའི་ཞིང་བྲན་ལམ་ལུགས་ཀྱི་རྗེས་ལུས་དང་གདུག་རྩུབ་གསལ་བཤད་གནང་བ་དང་འབྲེལ་དངོས་ཡོད་ཀྱི་གྲངས་གཞི་དྲངས་ནས་བོད་ཞི་བས་བཅིངས་འགྲོལ་བཏང་ནས་ལོ་60རིང་ཐོབ་པའི་གྲུབ་འབྲས་ཆེན་པོ་མངོན་པ་གནང་ཁར་རྩོད་ཐབས་བྲལ་བའི་དོན་དངོས་ཀྱི་ཐོག་ནས་ཏཱ་ལའི་རུ་ཚོགས་ཀྱིས་རྒྱལ་སྤྱིའི་ཐོག་འཁྱོག་བཤད་བྱས་པའི་གཏམ་འཆལ་སྣ་ཚོགས་ལ་དགག་པ་བསྐྱོན་གནང་བ་རེད། བྱམས་པ་ཕུན་ཚོགས་ཀྱིས་མི་ཁ་ཤས་ཀྱིས་ཁ་གདངས་ཚད་ལ་འགྲོ་བ་མིའི་ཐོབ་ཐང་ཤོད་མོད། འོན་ཀྱང་བོད་ཀྱི་འགྲོ་བ་མིའི་ཐོབ་ཐང་གི་ཆེས་མུན་ནག་གི་དུས་སྐབས་ནི་ཏཱ་ལ་སྐྱེ་ཕྲེང་བཅུ་བཞི་པས་དབང་ཆ་བཟུང་བའི་སྐབས་སུ་ཡིན། ཏཱ་ལས་གང་སར “བོད་མི་དམངས་ཀྱི་མགྲིན་ཚབ་པ ”ཡིན་ཞེས་རང་རློམ་བྱེད་མོད། འོན་ཀྱང་ལོ་ལྔ་བཅུ་ལྷག་ཙམ་ནང་ཁོ་པས་བོད་མི་དམངས་ལ་ཕན་པའི་བྱ་བ་སྣ་གཅིག་ཀྱང་སྒྲུབ་མྱོང་མེད། ཆོས་གོས་གྱོན་པའི་ཏཱ་ལས་བོད་ཀྱི་གནས་ཚུལ་འཁྱོག་བཤད་བྱས་པར་བརྟེན་ཨ་རི་སོགས་ནུབ་ཕྱོགས་སྤྱི་ཚོགས་ཀྱི་མི་ཁ་ཤས་ལ་ཤུགས་རྐྱེན་ངན་པ་ཐེབས་པ་དང་ལོག་འགྲེལ་བྱུང་ཡོད། མགོ་སྐོར་འོག་ཚུད་པའི་ནུབ་ཕྱོགས་སྤྱི་ཚོགས་ཀྱི་མི་སྣ་ཚོས་བོད་དུ་ཡོང་ནས་གཟིགས་ཙམ་གནང་སྟེ་ཡང་དག་པའི་ལན་ཞིག་ཐོབ་རྒྱུའི་རེ་བ་ཡོད་ལ་ཨ་རི་ཕྱོགས་ཀྱིས་བོད་ནི་ཀྲུང་གོའི་མངའ་ཁོངས་ཀྱི་ཁ་འབྲལ་ཐབས་མེད་པའི་ཆ་ཤས་ཡིན་པ་དང “བོད་རང་བཙན ”ལ་ངོ་རྒོལ་བྱེད་པའི་ཁས་ལེན་ལ་སྲུང་བརྩི་ཞུས་ནས་ཀྲུང་གོ་ཕྱོགས་ཀྱི་ལངས་ཕྱོགས་ལ་བསམ་ཤེས་དང་བརྩི་འཇོག་གང་ལེགས་བྱ་རྒྱུའི་རེ་བ་ཡོད་ཅེས་གསུངས་པ་རེད།

    མཇལ་འཛོམས་ནང་ཞུགས་མཁན་ཨ་རིའི་རྒྱལ་ཚོགས་ཀྱི་གྲོས་མི་དང་རྒྱལ་དོན་ཁང་གི་འཐུས་མིས་ཀྲུང་གོའི་བོད་ནས་ཕེབས་པའི་མི་དམངས་འཐུས་ཚོགས་ཀྱི་འཐུས་མི་ཨ་རིར་འཚམས་འདྲིར་ཕེབས་པར་སྤྲོ་སེམས་འཁོལ་བའི་ངང་དགའ་བསུ་ཞུས་གནང་བ་དང་ཨ་ཀྲུང་གི་འབྲེལ་བ་ནི་དུས་རབས་ཉེར་གཅིག་པའི་ཆེས་གལ་འགངས་ཆེ་བའི་ཕྱོགས་གཉིས་པོའི་འབྲེལ་བ་ཞིག་ཡིན། ཨ་རིས་སྟོབས་ཆེ་དང་། གྲ་རྒྱས། གྲུབ་འབྲས་ཐོབ་པ། རྒྱལ་སྤྱིའི་ལས་དོན་ཁྲོད་ནུས་པ་དེ་བས་ཆེ་བ་འདོན་སྤེལ་བྱེད་མཁན་བཅས་ཀྱི་ཀྲུང་གོར་དགའ་བསུ་ཞུ་རྒྱུ་ཡིན། བོད་ནི་ཀྲུང་གོའི་ཆ་ཤས་ཤིག་ཡིན་པའི་ཨ་རིའི་ལངས་ཕྱོགས་ནི་རྦད་དེ་ཁ་གསལ་ཡིན། ཕྱོགས་གཉིས་པོས་འབྲེལ་བ་བྱ་རྒྱུར་ཤུགས་སྣོན་རྒྱག་པ་དང་ཤེས་རྟོགས་བྱེད་ཚད་ཟབ་ཏུ་བཏང་ནས་ཐུན་མོང་ཐོག་ཨ་ཀྲུང་གི་འབྲེལ་བ་གཏིང་ཟབ་ཀྱི་ཕྱོགས་སུ་འཕེལ་རྒྱས་འགྲོ་རྒྱུར་སྐུལ་འདེད་གཏོང་དགོས་ཞེས་གསུངས་པ་རེད།