མི་དམངས་ཉིན་རེའི་ཚགས་པར་ཁང་དུ་གནས་ཚུལ་འབྱོར་གསལ། ཀྲུང་གོ་བོད་ལྗོངས་དྲ་བའི་ཐོག་གནས་ཚུལ་སྤེལ་བ་གཞིར་བཟུང་། ཉེ་ཆར་རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་འོད་ཟེར་གྱིས་བོད་ཀྱི་འཐུས་མི་ཚོགས་པའི་ཚོགས་ཆུང་ཁག་བགོས་ཀྱི་གྲོས་ཞིབ་ནང་ཞུགས་སྐབས་ཝུའུ་པང་གོས་གནང་བའི་རྒྱལ་ཡོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གི་ལས་དོན་སྙན་སྒྲོན་ནང་འབྲེལ་ཡོད་མི་རིགས་ལས་དོན་གྱི་བཅའ་ཁྲིམས་གང་མགྱོགས་བཟོ་བ་དང་འཐུས་ཚང་དུ་གཏོང་དགོས་ལུགས་བསྟན་ཡོད་ཅེས་གསུངས་པ་རེད།
འོད་ཟེར་གྱིས་ད་ལྟ་ལག་བསྟར་བྱེད་བཞིན་པའི་བཅའ་ཁྲིམས་236ནང་མི་རིགས་ས་ཁུལ་དང་འབྲེལ་བ་ཡོད་པ 《མི་རིགས་ས་ཁོངས་རང་སྐྱོང་བཅའ་ཁྲིམས 》ཁོ་ན་ལས་མེད་པ་དང་དེ་ནི་མི་རིགས་མང་བའི་རྒྱལ་ཁབ་ཏུ་ལག་བསྟར་བྱ་ཚུལ་དང་འཕེལ་རྒྱས་ཀྱི་དགོས་མཁོ་དང་གཏན་ནས་འཚམ་གྱི་མེད། རྒྱལ་ཡོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གིས་མི་རིགས་ལས་དོན་དང་འབྲེལ་བ་ཡོད་པའི་བཅའ་ཁྲིམས་དང་ཁྲིམས་སྲོལ་གང་མགྱོགས་བཟོ་བ་དང་འཐུས་ཚང་དུ་བཏང་སྟེ 《མི་རིགས་ས་ཁོངས་རང་སྐྱོང་བཅའ་ཁྲིམས 》ལག་བསྟར་བྱ་ཐབས་དང་རང་སྐྱོང་སྲོལ་ཡིག་དང་ཁྲིམས་འཛུགས་ཀྱི་གོམ་སྟབས་མགྱོགས་སུ་གཏོང་རྒྱུར་མཛུབ་ཁྲིད་དང་ལྟ་སྐུལ་བྱ་རྒྱུ་དང་། མི་དམངས་སྲིད་གཞུང་གི་ཚད་ལྡན་ཡིག་ཆའི་ཐོ་འགོད་སྙན་སེང་གི་ཞིབ་དཔྱད་ལས་དོན་ལ་ཤུགས་སྣོན་རྒྱག་པ་དང་ལྟ་སྐུལ་ཞིབ་བཤེར་ལ་ཤུགས་སྣོན་བརྒྱབ་ནས་སྲིད་གཞུང་གིས་བཟོས་པའི་སྲིད་ཇུས་བྱ་ཐབས་དེ་བཅའ་ཁྲིམས་ཀྱི་བླང་བྱ་དང་མཐུན་པའི་འགན་ལེན་བྱ་རྒྱུའི་རེ་བ་ཡོད་ཅེས་གསུངས་པ་རེད།
འཐུས་མི་འོད་ཟེར་གྱིས་གཅིག་ནས་ཞིང་ལས་ཚན་རྩལ་ཐད་ཀྱི་བཅའ་ཁྲིམས་དང་ཁྲིམས་སྲོལ་སྔར་བས་འཐུས་ཚང་དུ་གཏོང་དགོས་པ་དང་། གཉིས་ནས་བཅའ་ཁྲིམས་དྲིལ་བསྒྲགས་སློབ་གསོར་ཤུགས་སྣོན་རྒྱག་དགོས་པ། གསུམ་ནས་བཅའ་ཁྲིམས་དང་ཁྲིམས་སྲོལ་ནང་གི་འབྲེལ་ཡོད་གྲངས་ཉུང་མི་རིགས་ཀྱི་སྐད་ཡིག་ཡིག་སྒྱུར་ལས་དོན་གྱི་ནང་དོན་ཞིབ་གླེང་བྱ་རྒྱུར་ཤུགས་སྣོན་རྒྱག་དགོས་པ་བཅས་ཀྱི་གྲོས་འགོ་བཏོན་པ་དང་། རྒྱལ་ཡོངས་མི་དམངས་འཐུས་ཚོགས་ཀྱིས་འཐུས་མིའི་གྲོས་འགོ་དང་ལྷག་པར་དུ་དམངས་འཚོའི་གནད་དོན་སྐོར་གྱི་ལས་དོན་ལ་སྔར་བས་མཐོང་ཆེན་གྱིས་གནད་དོན་དངོས་ཐག་གཅོད་ཏན་ཏིག་གནང་རྒྱུའི་རེ་བ་ཡོད་ཅེས་གསུངས་པ་རེད།