མི་དམངས་ཉིན་རེའི་ཚགས་པར་ཁང་དུ་གློག་འཕྲིན་འབྱོར་གསལ། བོད་ལྗོངས་ཉིན་རེའི་ཚགས་པར་ཐོག་གནས་ཚུལ་སྤེལ་བར་གཞིགས་ན། ཟླ་3ཚེས་11ཉིན་གྱི་སྔ་དྲོ་རྒྱལ་ཡོངས་སྲིད་གྲོས་སྐབས་བཅུ་གཅིག་པའི་ཚོགས་འདུ་ཐེངས་བཞི་པར་ཞུགས་མཁན་བོད་ཀྱི་ཨུ་ཡོན་རྣམས་ཀྱིས་རིགས་ཁོངས་ཁག་ཏུ་རང་ཉིད་ཀྱི་འགན་སྒྲུབ་ལག་ལེན་དངོས་དང་ཟུང་འབྲེལ་བྱས་ཏེ་སྲིད་གྲོས་ལས་དོན་ལ་ཤུགས་སྣོན་རྒྱག་སྟངས་དང་ལེགས་སུ་གཏོང་སྟངས་ཐད་གྲོས་བསྡུར་བྱས་པ་རེད།
བོད་ཀྱི་ཨུ་ཡོན་པ་སངས་དོན་གྲུབ་དང་། བློ་བཟང་རྒྱལ་མཚན། བསམ་སྡིངས་རྡོ་རྗེ་ཕག་མོ་བདེ་ཆེན་ཆོས་སྒྲོན། ལྕགས་རྭ་བློ་བཟང་བསྟན་འཛིན། སྒྲུབ་ཁང་ཐུབ་བསྟན་མཁས་གྲུབ། ཚེ་སྨོན་གླིང་བསྟན་འཛིན་འཕྲིན་ལས། རྫོང་ལོ་བྱམས་པ་མཁས་གྲུབ། ས་ལུང་ཕུན་ལགས་སོགས་སོ་སོས་རིགས་ཁོངས་ཁག་གི་ཚོགས་ཆུང་གྲོས་བསྡུར་ནང་ཞུགས་ཡོད་པ་རེད།
ཨུ་ཡོན་རྣམས་ཀྱིས་ཉེ་བའི་ལོ་ཤས་རིང་རིམ་ཁག་ཏང་ཨུད་དང་སྲིད་གཞུང་གིས་སྲིད་གྲོས་ལས་དོན་ལ་སྔར་བས་མཐོང་ཆེན་བྱས་པ་དང་ཨུ་ཡོན་གྱིས་འགན་ནུས་སྒྲུབ་པའི་ཐད་རྒྱབ་སྐྱོར་གྱི་བྱེད་ཐབས་ཧ་ཅང་མང་པོ་བཏོན་པས་སྲིད་གྲོས་ཨུ་ཡོན་གྱི་ནུས་པ་སྔར་བས་འདོན་སྤེལ་བྱེད་པར་སྐུལ་འདེད་ནུས་ལྡན་བཏང་ཡོད་པ་དང་རིམ་ཁག་སྲིད་གྲོས་རྩ་འཛུགས་ཀྱིས་ཀྱང་རང་ངོས་འཛུགས་སྐྱོང་ལ་ཤུགས་སྣོན་ཆེན་པོ་བརྒྱབ་ནས་བྱེད་ཐབས་སྣ་མང་སྤྱད་དེ་སྲིད་གྲོས་ཨུ་ཡོན་གྱི་གཙོ་རྐང་ནུས་པ་འདོན་སྤེལ་གང་ལེགས་བྱས་པ་དང་ཨུ་ཡོན་རྣམས་ཀྱིས་ཆབ་སྲིད་གྲོས་མོལ་དང་། དམངས་གཙོའི་ལྟ་སྐུལ། སྲིད་ཞུགས་སྲིད་གླེང་བཅས་བྱེད་པའི་ཨུ་ཡོན་རྣམས་ཀྱི་ཧུར་བརྩོན་རང་བཞིན་སྐུལ་སློང་གང་ལེགས་བྱས་པའི་ངོས་འཛིན་བྱེད་ཀྱི་ཡོད།
གྲོས་བསྡུར་ཁྲོད་བོད་ཀྱི་སྲིད་གྲོས་ཨུ་ཡོན་རྣམས་ཀྱིས་གཟིགས་ཞིབ་དང་། བརྟག་དཔྱད་ཞིབ་འཇུག གྲོས་གཞི་འདོན་པ་སོགས་ལས་དོན་དངོས་དང་ཟུང་འབྲེལ་བྱས་ནས་རང་ཉིད་ཀྱི་ཚོར་སྣང་ལྷུག་གླེང་བྱས་པ་རེད། ཚང་མས་སྲིད་གྲོས་ཀྱི་ཨུ་ཡོན་ཞིག་ལ་མཚོན་ན་ཆབ་སྲིད་གྲོས་མོལ་དང་། དམངས་གཙོའི་ལྟ་སྐུལ། སྲིད་ཞུགས་སྲིད་གླེང་བཅས་ཀྱི་གོ་རིམ་ཁྲོད་རྒྱལ་ཁབ་ཀྱི་སྲིད་ཇུས་ཆེ་མོར་གྲོས་འགོ་བཏོན་ནས་ཐུན་མོང་ཐོག་མཐུན་སྦྱོར་ལྡན་པའི་ཀྲུང་གོ་འཛུགས་སྐྱོང་བྱེད་པར་ཧ་ཅང་སྤོབས་པ་སྐྱེས་ཀྱི་འདུག་ཅེས་ངོས་འཛིན་བྱས་པ་རེད།