རྒྱལ་ཡོངས་མི་དམངས་འཐུས་ཚོགས་སྐབས་བཅུ་གཅིག་པའི་ཚོགས་འདུ་ཐེངས་བཞི་པའི་ཐོག་ཇི་ལྟར་བྱས་ནས་ཚན་རིག་དང་མཐུན་པའི་འཕེལ་རྒྱས་དང་། མཆོང་སྐྱོད་ལྟ་བུའི་འཕེལ་རྒྱས། ཡུལ་རིང་བདེ་འཁོད་བཅས་ལ་རིག་སྟོབས་ཐོག་ནས་འདེགས་སྐྱོར་བྱེད་རྒྱུ་དེ་རང་ལྗོངས་ཀྱི་རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་ཚོས་སེམས་ཁུར་བྱེད་པའི་གླེང་གཞི་ཞིག་ཏུ་གྱུར་ཡོད་པ་རེད། “ཉེ་བའི་ལོ་ཤས་རིང་བོད་ཀྱི་སློབ་གསོའི་བྱ་གཞག་དབྱར་མཚོ་རྒྱས་པ་ལྟར་འཕེལ་རྒྱས་འགྲོ་བ་དང་སློབ་གསོ་དང་། གསོ་སྦྱོང་། ནང་འདྲེན་སོགས་ཀྱི་བྱ་ཐབས་སྣ་ཚོགས་ལ་བརྟེན་ནས་ཤེས་ལྡན་མི་སྣའི་དཔུང་ཁག་རྒྱུན་ཆད་མེད་པར་ཆེ་རུ་ཕྱིན་པས་དཔལ་འབྱོར་དང་སྤྱི་ཚོགས་འཕེལ་རྒྱས་གཏོང་བའི་ཐད་ཀྱི་ཤེས་ལྡན་མི་སྣའི་དགོས་མཁོའི་གནོན་ཤུགས་ཚད་མི་འདྲ་བའི་སྒོ་ནས་ཆུང་དུ་ཕྱིན་ཡོད། གཞུང་ཕྱོགས་ནས་བལྟས་ན་ཤེས་ལྡན་མི་སྣའི་གྲངས་འབོར་རྒྱུན་ཆད་མེད་པར་མང་དུ་དང་བྱང་ཚད་མངོན་གསལ་དོད་པོས་མཐོ་རུ་ཕྱིན་ཡོད། འཕྲེད་ཕྱོགས་ནས་བསྡུར་ན་ཤེས་ལྡན་མི་སྣའི་མི་གྲངས་ཉུང་བ་དང་ལྷག་དོན་དུ་མཐོ་རིམ་གྱི་ཤེས་ལྡན་མི་སྣ་དཀོན་པོ་ཡོད ”ཅེས་རང་ཉིད་ཀྱི་ལས་ཀའི་དོན་དངོས་དང་བཟུང་འབྲེལ་བྱས་ནས་རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་རང་སྐྱོང་ལྗོངས་འབྲོག་ལས་དང་ཕྱུགས་ནད་སྨན་པ་ཞིབ་འཇུག་སོའོ་ཡི་སོའོ་ཀྲང་གཞོན་པ་གསལ་སྒྲོན་གྱིས་བཤད་པ་དང་ཁོང་གིས་རང་སྐྱོང་ལྗོངས་ཀྱི་མཆོང་སྐྱོད་ལྟ་བུའི་འཕེལ་རྒྱས་ཀྱི་བླང་བྱ་ནས་བརྗོད་ན། ཤེས་ལྡན་མི་སྣའི་ཐོན་ཁུངས་རྩ་བ་ནས་འདང་གི་མེད་པས་རྒྱལ་ཁབ་ཀྱིས་སྲིད་ཇུས་བཏོན་ནས་གཞི་རིམ་གྱི་ཞིང་འབྲོག་ཚན་རྩལ་མི་སྣའི་ཐོབ་ཐང་དམའ་བ་སོགས་ཀྱི་གནད་དོན་ལ་ཐུགས་ཁུར་བྱེད་རྒྱུའི་རེ་བ་ཡོད་ཅེས་བཤད་པ་རེད།
རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་རང་སྐྱོང་ལྗོངས་མི་དམངས་སྨན་ཁང་གཉིས་པའི་ཞིབ་བཤེར་ཁོའོ་ཡི་ཀྲུའུ་རེན་གསལ་སྒྲོན་གྱིས་སྨན་དང་སྨན་རྫས་འཕྲོད་བསྟེན་སྒྲིག་གཞིའི་སྒྱུར་བཅོས་བརྟན་པོའི་ངང་སྐུལ་འདེད་གཏོང་བ་དང་འགན་བཅོལ་ནང་ཞུགས་མཁན་མི་སྣ་མང་དུ་ཕྱིན་པ། འགྲིམ་འགྲུལ་གྱི་ཆ་རྐྱེན་ལེགས་སུ་ཕྱིན་པ། ཕྱོགས་མི་མང་དུ་ཕྱིན་པ་བཅས་ལས་བོད་དུ་སྨན་བཅོས་ལག་རྩལ་མི་སྣ་ཧ་ཅང་དཀོན་པའི་གནས་ཚུལ་ཐོན་ཡོད། རང་ལྗོངས་ཀྱི་སྤྱི་པའི་འཕྲོད་བསྟེན་ཞབས་ཞུའི་མ་ལག་ལ་གཏོང་ཆ་གཏོང་ཤུགས་སྔར་བས་ཆེ་རུ་གཏོང་བ་དང་སྨན་བཅོས་འཕྲོད་བསྟེན་གྱི་ཆེད་ལས་ཤེས་ལྡན་མི་སྣ་གསོ་སྦྱོང་བྱ་ཤུགས་ཆེ་རུ་གཏོང་དགོས་པའི་བསམ་འཆར་འདོན་རྒྱུ་ཡིན། དུས་མཚུངས་བོད་འདི་ཉིད་ས་རྒྱ་ཆེ་ལ་མི་གྲངས་ཉུང་བའི་རྐྱེན་གྱིས་གཞི་རིམ་ཚན་རྩལ་མི་སྣའི་སྒྲིག་ཁུངས་མང་དུ་བཏང་ནས་ཚན་རྩལ་ལས་དོན་མི་སྣའི་ཞབས་འདེགས་ཞུ་ཡུལ་ཆེ་བའི་གནད་དོན་ཐག་གཅོད་ཏན་ཏིག་བྱ་རྒྱུའི་བསམ་འཆར་འདོན་རྒྱུ་ཡིན་ཞེས་བཤད་པ་རེད།
འཐུས་མི་ཚོས་སླད་ཕྱིན་ལས་དོན་ཁྲོད་ངེས་པར་དུ་རང་སྐྱོང་ལྗོངས་ཏང་ཨུད་དང་སྲིད་གཞུང་གི་གཅིག་གྱུར་བཀོད་སྒྲིག་ལ་གཞིགས་ནས་ཤེས་ལྡན་མི་སྣའི་ལས་དོན་ལ་སྔར་བས་ཚད་མཐོའི་མཐོང་ཆེན་བྱས་ཐོག་མིག་འགྱངས་རིང་པོའི་ཐོག་ནས་ཤེས་ལྡན་མི་སྣར་སྣང་ཆེན་བྱེད་པ་དང་བློ་རྩེ་གཅིག་སྒྲིམ་ངང་ཤེས་ལྡན་མི་སྣ་གསོ་སྐྱོང་བྱེད་པ། སྲོལ་ལུགས་གཅིག་གི་འཆིང་རྒྱ་ལས་གྲོལ་ཏེ་ཤེས་ལྡན་མི་སྣ་བེད་སྤྱོད་པ། ལམ་སྲོལ་གསར་པ་གཏོད་ནས་ཤེས་ལྡན་མི་སྣ་སྡོད་ཐུབ་པ་བྱེད་པ། མི་རྩ་བར་འཛིན་ནས་ཤེས་ལྡན་མི་སྣར་གཅེས་སྤྲས་བྱེད་པ། ཤེས་ལྡན་མི་སྣར་བརྟེན་ནས་ལྗོངས་སྟོབས་ཆེར་གཏོང་བའི་འཐབ་ཇུས་ལག་ལེན་ཤུགས་ཆེན་བསྟར་བར་ཤེས་ལྡན་མི་སྣའི་བྱ་གཞག་འཕེལ་རྒྱས་མགྱོགས་སུ་བཏང་བ་བཅས་ཀྱི་ཐོག་ནས་རང་ལྗོངས་ཀྱི་མཆོང་སྐྱོང་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ཆེད་ཤེས་ལྡན་མི་སྣ་དང་རིག་སྟོབས་ཀྱི་ཐོག་ནས་རྒྱབ་སྐྱོར་ཤུགས་ཆེན་བྱ་རྒྱུའི་འགན་ལེན་བྱེད་ཀྱི་ཡིན་ཞེས་བཤད་པ་རེད།