བོད་ལྗོངས་ཉིན་རེའི་ཚགས་པར་ཁང་དུ་པེ་ཅིང་ནས་གནས་ཚུལ་འབྱོར་གསལ། ཟླ་3ཚེས་12ཉིན་རྒྱལ་ཡོངས་མི་དམངས་འཐུས་ཚོགས་སྐབས་བཅུ་གཅིག་པའི་ཚོགས་འདུ་ཐེངས་བཞི་པའི་བོད་ཀྱི་འཐུས་མི་ཚོགས་པས་ཆེས་མཐོའི་མི་དམངས་ཁྲིམས་ཁང་གི་ལས་དོན་སྙན་སྒྲོན་དང་ཆེས་མཐོའི་མི་དམངས་ཞིབ་དཔྱོད་ཁང་གི་ལས་དོན་སྙན་སྒྲོན་ལ་གྲོས་ཞིབ་གནང་བ་རེད། འཐུས་མི་ཚོས་ཁང་གཉིས་ཀྱི་ལས་དོན་སྙན་སྒྲོན་གྱི་ནང་དོན་ཕུན་སུམ་ཚོགས་པ་དང་བསམ་ཕྱོགས་ཁ་གསལ་ལ་དངོས་ཐོག་བདེན་འཚོལ་གྱི་སྒོ་ནས་འདས་པའི་ལོ་གཅིག་ནང་གི་ཆེས་མཐོའི་མི་དམངས་ཁྲིམས་ཁང་དང་ཆེས་མཐོའི་མི་དམངས་ཞིབ་དཔྱོད་ཁང་གི་ལས་དོན་ལ་ཕྱོགས་སྡོམ་གནང་བ་མ་ཟད་འདི་ལོའི་ལས་དོན་བཀོད་སྒྲིག་གནང་བས་ཚང་མས་ཡོངས་སུ་མོས་མཐུན་བྱ་རྒྱུའི་ངོས་འཛིན་གནང་བ་རེད།

    རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཀྲང་ཆིང་ལི་དང་། རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་དང་། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ། རང་སྐྱོང་ལྗོངས་མི་དམངས་འཐུས་ཚོགས་རྒྱུན་ཨུད་ཀྱི་ཀྲུའུ་རེན་བཅས་ཡིན་པའི་བྱམས་པ་ཕུན་ཚོགས་གྲོས་ཞིབ་ལ་ཕེབས་པ་དང་རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་དང་། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ། རང་སྐྱོང་ལྗོངས་ཀྱི་ཀྲུའུ་ཞི་བཅས་ཡིན་པའི་པད་མ་འཕྲིན་ལས་ཀྱིས་ཚོགས་འདུ་གཙོ་སྐྱོང་གནང་བ་རེད།

    རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་དང་། རྒྱལ་ཡོངས་མི་དམངས་འཐུས་ཚོགས་རྒྱུན་ཨུད་ཀྱི་ཨུ་ཡོན། རྒྱལ་ཡོངས་མི་དམངས་འཐུས་ཚོགས་མི་རིགས་ཆོས་ལུགས་ཨུ་ཡོན་ལྷན་ཁང་གི་ཀྲུའུ་རེན་ཨུ་ཡོན་གཞོན་པ་བཅས་ཡིན་པའི་ལེགས་མཆོག་གྲོས་ཞིབ་ལ་ཕེབས་ཡོད་པ་རེད།

    འཐུས་མི་ཚོས་གྲོས་ཞིབ་གནང་སྐབས་2010ལོར་ཆེས་མཐོའི་མི་དམངས་ཁྲིམས་ཁང་དང་ཆེས་མཐོའི་མི་དམངས་ཞིབ་དཔྱོད་ཁང་གིས་བློ་མཐུན་ཧུའུ་ཅིན་ཐའོ་ཡིས་སྤྱི་ཁྱབ་ཧྲུའུ་ཅི་གནང་བའི་ཏང་ཀྲུང་དབྱང་གི་སྲ་ཞིང་བརྟན་པའི་འགོ་ཁྲིད་འོག་རྒྱལ་ཡོངས་མི་དམངས་འཐུས་ཚོགས་དང་དེའི་རྒྱུན་ལས་ཨུ་ཡོན་ལྷན་ཁང་གི་ལྟ་སྐུལ་ནུས་ལྡན་འོག་ཏང་གི་ཚོགས་ཆེན་བཅུ་བདུན་པ་དང་རྒྱལ་ཡོངས་མི་དམངས་འཐུས་ཚོགས་སྐབས་བཅུ་གཅིག་པའི་ཚོགས་འདུ་ཐེངས་གསུམ་པའི་དགོངས་དོན་ལག་བསྟར་ནན་ཏན་དང་ཚན་རིག་དང་མཐུན་པའི་གོང་འཕེལ་ལྟ་བ་ལག་བསྟར་དོན་འཁྱོལ་གཏིང་ཟབ་བྱས་ཏེ་ལས་དོན་ཁག་ལ་འཕེལ་རྒྱས་གསར་པ་བྱུང་ཡོད། ལོ་གཅིག་ནང་ཆེས་མཐོའི་མི་དམངས་ཁྲིམས་ཁང་གིས་སྤྱི་ཚོགས་ཀྱི་འགལ་ཟླ་སེལ་རྒྱུ་དང་། སྤྱི་ཚོགས་ཀྱི་དོ་དམ་གསར་གཏོད། གཞུང་དྲང་སྤྱོད་གཙང་ངང་ཁྲིམས་ལག་བསྟར་བཅས་ཀྱི་གཙོ་གནད་ལས་དོན་གསུམ་ལ་དམ་པོར་དམིགས་ཏེ་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་ཁྲིམས་འཛིན་དགོས་མཁོར་ཚད་མཐོའི་དོ་ཁུར་བྱས་ནས་དཔལ་འབྱོར་དང་སྤྱི་ཚོགས་ལེགས་ལ་མྱུར་བའི་སྒོ་ནས་འཕེལ་རྒྱས་ཡོང་བར་ཞབས་འདེགས་ཧུར་ཐག་ཞུས་པ་དང་། ནག་ཉེས་བསགས་པར་ཁྲིམས་ལྟར་ཉེས་ཆད་བཅད་པ་དང་འགལ་བ་འོས་འཚམ་བསལ་ནས་སྤྱི་ཚོགས་མཐུན་སྦྱོར་བརྟན་ལྷིང་ཡོང་བར་སྐུལ་མ་བཏང་བ། མི་དམངས་མང་ཚོགས་ཀྱི་དོ་ཁུར་དང་རེ་སྒུག་ལ་སེམས་ཁུར་ཧུར་ཐག་བྱས་ཏེ་མི་དམངས་ཀྱི་ཁེ་དབང་ཁྲིམས་ལྟར་སྲུང་སྐྱོང་བྱས་པ། ཁྲིམས་འཛིན་སྒྱུར་བཅོས་ལ་མུ་མཐུད་སྐུལ་མ་བཏང་ནས་ཁྲིམས་འཛིན་གཞུང་དྲང་ཡོང་བར་སྲུང་སྐྱོང་བྱས་པ། ཁྲིམས་ཁང་གི་དཔུང་ཁག་འཛུགས་སྐྱོང་གི་འགག་རྩའི་ལྷུ་ཚིགས་ལ་དམ་པོར་དམིགས་ནས་ཁྲིམས་འཛིན་བྱེད་ནུས་དང་ཆུ་ཚད་སྔར་བས་གོང་མཐོར་བཏང་བ། ལྟ་སྐུལ་དང་ལེན་བྱ་རྒྱུར་སྔར་བས་མཐོང་ཆེན་དང་ལྟ་སྐུལ་ལམ་ལུགས་དང་ལམ་སྲོལ་འཛུགས་སྐྱོང་ལ་ཤུགས་སྣོན་བརྒྱབ་སྟེ་ལས་དོན་ཁག་ལ་འཕེལ་རྒྱས་གསར་པ་བྱུང་བ་བཅས་ཀྱི་ངོས་འཛིན་མཐའ་གཅིག་ཏུ་གནང་བ་རེད། འཐུས་མི་ཚོས་འདི་ལོ་ནི་རང་རེའི་ཏང་དབུ་བཪྙེས་ནས་ལོ་90དང་བོད་ཞི་བས་བཅིངས་འགྲོལ་བཏང་ནས་ལོ་60འཁོར་བ་མ་ཟད “ལོ་ལྔ་ཚན་བཅུ་གཉིས་པའི ”འགོ་འཛུགས་པའི་ལོ་ཞིག་ཀྱང་ཡིན་པས། མི་དམངས་ཁྲིམས་ཁང་དང་ཞིབ་དཔྱོད་ཁང་གི་འགན་འཁྲི་ནི་གཟི་བརྗིད་དང་ལས་འགན་ནི་ཧ་ཅང་ཆེན་པོ་ཞིག་རེད་ཅེས་བཤད་པ་རེད།