ས་ཁུལ （གྲོང་ཁྱེར ）ཁག་གི་ཤེས་དཔལ་སྲོལ་གཏོད་ཨུ་ལྷན་དང་། ལྗོངས་ཤེས་དཔལ་སྲོལ་གཏོད་ཨུ་ལྷན་གྱི་ཁོངས་མིའི་ཚན་པ། ལྗོངས （ཀྲུང་དབྱང ）ཐད་གཏོགས་ཀྱི་ཚན་པ་བཅས་ལ།

    ད་ཕན་ལོ་ཤས་རིང་། རང་སྐྱོང་ལྗོངས་ཏང་ཨུད་དང་སྲིད་གཞུང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག་ལྗོངས་ཡོངས་ཀྱི་རིམ་པ་ཁག་དང་སྡེ་ཚན་ཁག་དང་རྒྱ་ཆེའི་ལས་བྱེད་མང་ཚོགས་ཚོས་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ཀྱི་ལས་ཀའི་སྤྱི་ཡོངས་ལ་དམ་པོར་དམིགས་ནས་ཀུན་སྤྱོད་འཛུགས་སྐྱོང་ལ་སྐུལ་འདེད་ཤུགས་ཆེན་གཏོང་བ་དང་། སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་སྐྱེད་སྲིང་དང་ལག་བསྟར་བྱེད་པ། སྤྱི་ཚོགས་རིང་ལུགས་ཀྱི་བསམ་པའི་དཔལ་ཡོན་སྲོལ་གཏོད་ཀྱི་བྱེད་སྒོ་གཏིང་ཟབ་སྤེལ་བ་བཅས་བྱས་པར་བརྟེན། ཀྲུང་ཧྭའི་ཀུན་སྤྱོད་བཟང་པོ་རྒྱུན་འཛིན་དང་དུས་རབས་ཀྱི་སྙིང་སྟོབས་མངོན་པའི་ཀུན་སྤྱོད་དཔེ་བཟང་བ་ཁག་གཅིག་ཐོན་ཡོད། ཁོང་ཚོའི་མེས་རྒྱལ་ལ་དགའ་ཞེན་དང་སྒྲིག་བཀུར་ཁྲིམས་སྲུང་གི་མིག་དཔེའི་སྟོབས་ཤུགས་ཤིག་དང་། གཞན་ལ་དགའ་གཅེས་དང་གཞན་ཕན་སྒྲུབ་ལ་སྤྲོ་བའི་ཀུན་སྤྱོད་ཀྱི་བསམ་པ། བདེན་པའི་རྒྱབ་ལངས་དང་འགན་འཁུར་ཕོད་པའི་ཞུམ་མེད་སྙིང་སྟོབས། གཞན་ལ་ལྷག་བསམ་ཟོལ་མེད་དང་ཁ་དན་ཚིག་གནས་ཀྱི་ཀུན་སྤྱོད་བཟང་པོ། ལས་བཀུར་ལེགས་སྐྱེས་དང་ལས་དོན་ཧུར་ཐག་སྒྲུབ་པའི་ལས་རིགས་སྤྱོད་བཟང་། རྒན་བཀུར་གཉེན་གཅེས་དང་ཁྲག་རྩ་གཅིག་ཏུ་འདྲེས་པའི་ཆེས་མཛེས་སྡུག་ལྡན་པའི་བརྩེ་སེམས་བཅས་ཀྱི་ཐོག་ནས་མི་ཡུལ་གྱི་བརྩེ་སེམས་ཆེན་པོ་དང་མི་གཤིས་ཀྱི་སྤྱོད་ཚུལ་བཟང་པོ་མངོན་ཡོད་ལ། སྤྱི་ཚོགས་ཧྲིལ་པོར་སེམས་འགུལ་ཐེབས་པ་དང་། གངས་ལྗོངས་ས་མཐོར་དྲོ་སྐྱིད་ཀྱང་སྦྱིན་ཡོད། ཁོང་ཚོ་ནི་བོད་ལྗོངས་གསར་པའི་ཀུན་སྤྱོད་ཀྱི་ཚད་ཤིང་ཞིག་དང་། སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་གསོན་ཉམས་དོད་པོས་མངོན་མཁན་ཞིག ཀྲུང་ཧྭའི་སྲོལ་རྒྱུན་སྤྱོད་བཟང་རྒྱུན་འཛིན་གྱི་ལག་ལེན་པ་ཞིག ལྗོངས་ཡོངས་ཀྱི་མི་རིགས་ཁག་གི་མི་དམངས་ཚོས་སློབ་སྦྱོང་བྱེད་དགོས་པའི་དུས་རབས་ཀྱི་མིག་དཔེ་ཞིག་བཅས་ཡིན།

    ཀུན་སྤྱོད་དཔེ་བཟང་གི་མིག་དཔེ་འདེམས་གཏོད་བྱ་ཆེད། འདི་ལོའི་ཟླ་གསུམ་པ་ནས་བཟུང་རང་སྐྱོང་ལྗོངས་ཤེས་དཔལ་སྲོལ་གཏོད་ཨུ་ཡོན་ལྷན་ཁང་གི་ཆོག་མཆན་ཐོབ་པ་བརྒྱུད། རང་སྐྱོང་ལྗོངས་ཏང་ཨུད་དྲིལ་བསྒྲགས་པུའུ་དང་། རང་སྐྱོང་ལྗོངས་ཤེས་དཔལ་སྲོལ་གཏོད་གཞུང་དོན་ཁང་། བོད་དམག་ཁུལ་ཁང་ཆབ་སྲིད་པུའུ། དྲག་ཆས་ཉེན་རྟོག་བོད་ལྗོངས་སྤྱི་ཁྱབ་རུ་ཁག་གི་ཆབ་སྲིད་པུའུ། རང་སྐྱོང་ལྗོངས་སྤྱི་ཁྱབ་བཟོ་ཚོགས། སྡེ་ཚོགས་ལྗོངས་ཨུ་ལྷན། རང་སྐྱོང་ལྗོངས་བུད་མེད་མཉམ་འབྲེལ་ལྷན་ཚོགས་བཅས་ཀྱིས་སྐབས་བཞི་པའི་བོད་རང་སྐྱོང་ལྗོངས་ཀྱི་ཀུན་སྤྱོད་དཔེ་བཟང་དཔྱད་འདེམས་ལས་དོན་སྤེལ་ཡོད། མང་ཚོགས་ཀྱིས་འོས་སྦྱོར་བྱེད་པ་དང་། ཐོབ་ཐང་ཞིབ་བཤེར་བྱེད་པ། སྨྱན་སྦྱོར་ཐོག་ནས་ཡོངས་བསྒྲགས་བྱེད་པ། འདེམས་ཤོག་འཕེན་ནས་དཔྱད་འདེམས་བྱེད་པ། ཕྱོགས་བསྡུས་ཞིབ་དཔྱད་སོགས་ཀྱི་བརྒྱུད་རིམ་བརྒྱུད། རང་སྐྱོང་ལྗོངས་ཤེས་དཔལ་སྲོལ་གཏོད་ཨུ་ཡོན་ལྷན་ཁང་གིས་དཀའ་ཆེན་བློ་བཟང་ཕུན་ཚོགས་སོགས་བློ་མཐུན་12ལ་སྐབས་བཞི་པའི “བོད་རང་སྐྱོང་ལྗོངས་ཀྱི་ཀུན་སྤྱོད་དཔེ་བཟང་བའི ”མཚན་སྙན་སྤྲོད་རྒྱུ་དང་བློ་བཟང་བསྟན་འཛིན་སོགས་བློ་མཐུན་30ལ་སྐབས་བཞི་པའི “བོད་རང་སྐྱོང་ལྗོངས་ཀྱི་ཀུན་སྤྱོད་དཔེ་བཟང་བའི་མིང་འདོན་བྱ་དགའ ”སྤྲོད་རྒྱུའི་གཏན་འབེབས་བྱས་ཡོད།

    གཟེངས་བསྟོད་ཐོབ་མཁན་བློ་མཐུན་ཚོས་གཟི་བརྗིད་ལ་གཅེས་འཛིན་དང་ཡང་འབད་བསྐྱར་འབད་བྱས་ཏེ་སྤྱི་དམངས་ཀྱི་ཀུན་སྤྱོད་འཛུགས་སྐྱོང་ནང་མིག་དཔེ་སྣེ་ཁྲིད་ཀྱི་ནུས་པ་མུ་མཐུད་འདོན་རྒྱུའི་རེ་བ་ཡོད། ས་གནས་ཁག་དང་སྡེ་ཚན་ཁག་དང་རྒྱ་ཆེའི་ལས་བྱེད་པ་དང་མང་ཚོགས་ཚོས་ཏང་གི་ཚོགས་ཆེན་བཅོ་བརྒྱད་པ་དང་སྐབས་བཅོ་བརྒྱད་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པ་དང་བཞི་པའི་དགོངས་དོན་སློབ་སྦྱོང་ལག་བསྟར་དང་། སྤྱི་ཁྱབ་ཧྲུའུ་ཅི་ཞིས་ཅིན་ཕིང་གི་གསུང་བཤད་གལ་ཆེན་གྱི་དགོངས་དོན་རབ་དང་རིམ་པ་སློབ་སྦྱོང་དང་ལག་བསྟར། སྤྱི་དམངས་ཀུན་སྤྱོད་འཛུགས་སྐྱོང་སྐོར་གྱི་ཀྲུང་དབྱང་དང་རང་སྐྱོང་ལྗོངས་ཀྱི་ཐབས་ཇུས་བཀོད་སྒྲིག་གལ་ཆེན་ལག་བསྟར་དོན་འཁྱོལ། སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་སྐྱེད་སྲིང་དང་ལག་ལེན་ཧུར་ཐག སྤྱི་ཚོགས་རིང་ལུགས་ཀྱི་བསམ་པའི་དཔལ་ཡོན་སྲོལ་གཏོད་ལ་སྐུལ་འདེད་ཤུགས་ཆེན་གཏོང་བ། སྤྱི་ཚོགས་ཡོངས་སུ་ཀུན་སྤྱོད་དཔེ་བཟང་བར་སློབ་སྦྱོང་དང་དྲིལ་བསྒྲགས་བྱེད་པའི་བྱེད་སྒོ་རྒྱ་ཁྱབ་ངང་སྤེལ་བ། བདེན་ལེགས་མཛེས་གསུམ་དར་སྤེལ་གཏོང་བ། དྲང་ནུས་བརྒྱུད་བསྒྲགས་བྱེད་པ། མི་རྣམས་ཀྱིས་ཀུན་སྤྱོད་བཟང་བའི་མིར་སློབ་སྦྱོང་བྱ་རྒྱུ་ཁྲིད་སྟོན་བཅས་བྱས་ཏེ་འབྱོར་ཕྱུག་དང་། ཞི་མཐུན། བདེ་སྐྱིད། ཁྲིམས་སྐྱོང་། ཤེས་དཔལ། མཛེས་སྡུག་བཅས་ལྡན་པའི་སྤྱི་ཚོགས་རིང་ལུགས་ཀྱི་བོད་གསར་འཛུགས་སྐྲུན་བྱ་རྒྱུ་དང་། འབྱོར་འབྲིང་སྤྱི་ཚོགས་སྒོ་ཀུན་ནས་བསྐྲུན་རྒྱུ། ཀྲུང་ཧྭ་མི་རིགས་ཀྱི་རླབས་ཆེན་བསྐྱར་དར་གྱི་ཀྲུང་གོའི་ཕུགས་འདུན་མངོན་འགྱུར་བཅས་བྱ་ཆེད་འབད་འཐབ་ཧུར་ཐག་བྱེད་རྒྱུའི་སྐུལ་ལྕག་བྱེད་དགོས།

    བོད་རང་སྐྱོང་ལྗོངས་བསམ་པའི་དཔལ་ཡོན་སྲོལ་གཏོད་མཛུབ་ཁྲིད་ཨུ་ཡོན་ལྷན་ཁང་གིས།

    2014ལོའི་ཟླ་12ཚེས་2ཉིན།