ད་ཕན་ལོ་ཤས་རིང་རང་སྐྱོང་ལྗོངས་ཏང་ཨུད་དང་སྲིད་གཞུང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག་བོད་ལྗོངས་སྤྱི་བདེ་མེ་ཟོན་སྤྱི་ཁྱབ་རུ་ཁག་གིས་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་རླབས་ཆེན་དར་ཆ་མཐོན་པོར་བསྒྲེངས་བ་དང་། ཏེང་ཞའོ་ཕིང་གི་རིགས་པའི་གཞུང་ལུགས་དང “མཚོན་བྱེད་གསུམ ”གྱི་དགོངས་པ་གལ་ཆེན་མཛུབ་ཁྲིད་དུ་བྱེད་པ། ཚན་རིག་དང་མཐུན་པའི་གོང་འཕེལ་ལྟ་བ་ལག་བསྟར་དོན་འཁྱོལ་གཏིང་ཟབ་བྱེད་པ། ཏང་གི་བཀོད་འདོམས་ལ་མཐའ་གཅིག་ཏུ་ཉན་པ། བློ་གཅིག་སེམས་གཅིག་གིས་བོད་ཀྱི་མི་དམངས་ལ་ཞབས་འདེགས་ཞུ་བ། བོད་ཀྱི་ལས་དོན་སྐོར་གྱི་ཀྲུང་དབྱང་གི་མཛུབ་ཁྲིད་བསམ་བློ་སྟངས་འཛིན་ནན་པོ་བྱེད་པ། མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ལ་སྐུལ་འདེད་གཏོང་བའི་བོད་ཀྱི་ལས་དོན་གྱི་བརྗོད་བྱ་གཙོ་བོ་དམ་འཛིན་ནན་པོ་བྱེད་པ། མེ་འགོག་མེ་གསོད་དང་། འཕྲལ་སྡོམ་རོགས་སྐྱོབ། བརྟན་ལྷིང་སྲུང་སྐྱོང་དང་ཐོལ་བྱུང་གནད་དོན་ཐག་གཅོད་བཅས་ཀྱི་གཙོ་ཤུགས་དམག་གི་ནུས་པ་འདོན་སྤེལ་གང་ལེགས་བྱས་པར་བརྟེན་ལོ་བཅུ་བསྟུད་མར་ལྗོངས་ཡོངས་སུ་མེ་ཟོན་བདེ་འཇགས་ཀྱི་དོན་རྐྱེན་ཚབས་ཆེན་ཐོན་མེད་པའི་གཡུར་ཟའི་གྲུབ་འབྲས་ཐོབ་སྟེ་བོད་ཀྱི་བརྟན་ལྷིང་སྲུང་སྐྱོང་དང་། རྒྱལ་ཁབ་ཀྱི་བདེ་འཇགས་འགན་ལེན། ཚན་རིག་དང་མཐུན་པའི་འཕེལ་རྒྱས་ལ་སྐུལ་འདེད། སྤྱི་ཚོགས་མཐུན་སྦྱོར་ལ་སྐུལ་འདེད་བཅས་ཀྱི་ཐད་ལེགས་སྐྱེས་མངོན་གསལ་དོད་པོ་ཕུལ་ཡོད། ཡུན་རིང་དང་ལྷག་པར་དུ་ད་ཕན་ལོ་ཤས་རིང་བོད་ཀྱི་སྤྱི་བདེ་མེ་ཟོན་སྤྱི་ཁྱབ་རུ་ཁག་གི་དཔོན་དམག་ཚོས་སྤྱི་ཁྱབ་ཧྲུའུ་ཅི་ཧུའུ་ཅིན་ཐའོ་ཡི “བློ་སེམས་དཀར་ལ་བློས་འགེལ་ཆོག་པ་དང་། མི་དམངས་ལ་ཞབས་འདེགས། ལྷག་བསམ་རྣམ་དག་ངང་ལེགས་སྐྱེས་འབུལ་བ ”བཅས་ཀྱི་སྤྱིའི་བླང་བྱ་བློ་གཅིག་སེམས་གཅིག་ངང་ལག་ལེན་བསྟར་ཏེ་མེ་ཟོན་མེ་གསོད་དང་བརྟན་ལྷིང་སྲུང་སྐྱོང་གི་འཐབ་ཕྱོགས་དང་པོའི་ཐོག་དཀའ་ཚེགས་ཆེན་པོས་དམག་འཐབ་བྱས་ཐོག་བོད་ཀྱི་དཔལ་འབྱོར་དང་སྤྱི་ཚོགས་ལེགས་ལ་མྱུར་བའི་སྒོ་ནས་འཕེལ་རྒྱས་འགྲོ་ཆེད་འཕྱར་བ་གྲུ་འདེགས་བྱས་ཡོད། ཁོང་ཚོས་ཆབ་སྲིད་ལ་བརྟེན་ནས་དྲག་ཆས་ཉེན་རྟོག་གི་དཔུང་ཁག་འཛུགས་པ་དང་ཚན་རྩལ་ལ་བརྟེན་ནས་དྲག་ཆས་ཉེན་རྟོག་གི་དཔུང་ཁག་སྟོབས་ཆེར་གཏོང་བ་དང་། “བོད་སྐྱོད་པ་རྒན་གྲས་ཀྱི་སྙིང་སྟོབས ”དར་སྤེལ་ཤུགས་ཆེན་གཏོང་བ། ཏང་གི་བཀོད་འདོམས་ལ་ཉན་པ་དང་། མི་དམངས་ལ་ཞབས་འདེགས་ཞུ་བ། དཔའ་མཛངས་བརྟུལ་ལ་དམག་འཐབ་མཁས་པ་བཅས་གངས་ལྗོངས་ས་མཐོར་བདེ་འཇགས་ཀྱི “མེ་ཟོན་གྱང ”བརྟན་པོ་ཞིག་བསྐྲུན་པ་དང་། བོད་ཀྱི་འཕེལ་རྒྱས་ལ་ཞབས་འདེགས་དང་ས་གནས་ཀྱི་འཛུགས་སྐྲུན་ནང་ཞུགས་རྒྱུ་མཐའ་འཁྱོངས་བྱས་པར་བརྟེན་དམག་གིས་དམངས་ལ་གཅེས་པ་དང་། དམངས་ཀྱིས་དམག་ལ་བཀུར་བ། དམག་དམངས་དབར་ཉ་ཆུ་ལྟ་བུའི་བརྩེ་སེམས་བཅས་ཀྱི་གསོན་ཉམས་དོད་པའི་རྣམ་པ་བཏོད་པ། “འཐབ་ན་རྒྱལ་ཁ་ལེན་ཐུབ་པའི ”དམིགས་ཚད་དེ་མཐའ་འཁྱོངས་དང་བོད་ཀྱི་བརྟན་ལྷིང་སྲུང་སྐྱོང་གི་བླ་ན་མེད་པའི་འོས་འགན་མཐའ་གཅིག་ཏུ་བསྒྲུབས་ཏེ་གཞིས་རྩེའི་འབྲོང་པ་དང་ལྷ་སའི་འདམ་གཞུང་གི་ས་ཡོམ་གྱི་གེགས་འགོག་གེགས་སེལ་དང་། ཆབ་མདོ་བཅིངས་འགྲོལ་བཏང་ནས་ལོ་དྲུག་ཅུ་འཁོར་བའི་རྟེན་འབྲེལ་ཆེ་མོའི་མེ་ཟོན་བདེ་འཇགས་སྲུང་སྐྱོང་། མཚོ་སྔོན་ཡུལ་ཤུལ་གྱི་ས་ཡོམ་རོགས་སྐྱོབ་སོགས་ཉེན་སེལ་གྱི་ལས་འགན་རབ་དང་རིམ་པ་ཕུན་སུམ་ཚོགས་པོའི་ངང་ལེགས་སྒྲུབ་བྱས་ཡོད། ལྷག་པར་དུ་ལྷ་སའི “3.14”རྡུང་གཅོག་འཕྲོག་སྲེག་གི་ཚབས་ཆེའི་གཏུམ་སྤྱོད་ཉེས་གསོག་གི་དོན་རྐྱེན་ཐག་གཅོད་བྱེད་སྐབས་བོད་ལྗོངས་སྤྱི་བདེ་མེ་ཟོན་སྤྱི་ཁྱབ་རུ་ཁག་གི་དཔོན་དམག་ཡོངས་ཀྱིས་བཀའ་དང་ལེན་དང་། བཀོད་འདོམས་ལ་ཉན་པ། མདུན་དུ་ཤོར་བ། འགན་ལྕི་འཁུར་བ། ངལ་དུབ་ལ་མི་སྐྲག་པ། བསྟུད་མར་དམག་འཐབ་བྱེད་པ་བཅས་བྱས་ཏེ་གང་དུ་ཉེན་ཁ་དང་གང་དུ་དཀའ་ཚེགས་ཀྱི་ལས་འགན་ཡོད་ན་དེར་ཤོར་ནས་བྱ་སྤྱོད་ངོ་མའི་ཐོག་ནས “དམག་འཐབ་ནང་ཞུགས་ན་རྒྱལ་ཁ་ལེན་རྒྱུའི ”བརྗིད་ཆེའི་དམ་བཅའ་བློ་གཅིག་སེམས་གཅིག་ངང་ལག་ལེན་བྱས་པར་བརྟེན་ལྗོངས་ཡོངས་ཀྱི་རིམ་ཁག་ཏང་ཨུད་དང་སྲིད་གཞུང་གི་གདེང་འཇོག་གང་ལེགས་ཐོབ་པ་མ་ཟད། མི་རིགས་ཁག་གི་ལས་བྱེད་པ་དང་མང་ཚོགས་ཀྱི་ཚད་མཐོའི་བསྔགས་བརྗོད་ཐོབ་ཡོད།
སྔོན་ཐོན་ལ་གཟེངས་བསྟོད་དང་། དཔོན་དམག་གི་ངར་ཤུགས་འཕེལ་བ། འཐབ་སེམས་ལ་སྐུལ་ལྕག་བཅས་བྱ་ཆེད་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་བོད་ལྗོངས་སྤྱི་བདེ་མེ་ཟོན་སྤྱི་ཁྱབ་རུ་ཁག་ལ་མཉམ་སྡེབ་ཀྱི་བྱ་དགའ་རིམ་པ་དང་པོ་སྤྲོད་རྒྱུའི་གཏན་འབེབས་བྱས་ཡོད། བོད་ལྗོངས་སྤྱི་བདེ་མེ་ཟོན་སྤྱི་ཁྱབ་རུ་ཁག་ཏང་ཨུད་དང་ལྗོངས་ཡོངས་ཀྱི་མེ་ཟོན་དཔོན་དམག་ཚོས་གཟི་བརྗིད་མཚན་སྙན་ལ་གཅེས་སྤྲས་དང་། ང་རྒྱལ་དང་འཚབ་འཚུབ་སྤོང་བ། ཡང་འབད་བསྐྱར་འབད། སླར་ཡང་བྱས་རྗེས་གསར་པ་འཇོག་པ་བཅས་བྱས་ཏེ་བོད་ཀྱི་བརྟན་ལྷིང་སྲུང་སྐྱོང་དང་། མི་རིགས་མཐུན་སྒྲིལ་ལ་སྐུལ་འདེད། རྒྱལ་ཁབ་ཀྱི་བདེ་འཇགས་འགན་ལེན། བོད་ཀྱི་འཕེལ་རྒྱས་ལ་སྐུལ་འདེད་བཅས་ཀྱི་ཆེད་ལེགས་སྐྱེས་གསར་པ་དེ་བས་ཆེ་བ་འབུལ་རྒྱུའི་རེ་བ་ཡོད། ལྗོངས་ཏང་ཨུད་དང་སྲིད་གཞུང་གིས་ལྗོངས་ཡོངས་ཀྱི་ཏང་སྲིད་དམག་ཉེན་དམངས་བཅས་ཀྱིས་བོད་ལྗོངས་སྤྱི་བདེ་མེ་ཟོན་སྤྱི་ཁྱབ་རུ་ཁག་གི་རྒྱ་ཆེའི་དཔོན་དམག་མིག་དཔེར་བྱས་ཏེ་དེ་བས་ཆེ་བའི་འཐབ་སེམས་དང་། དེ་བས་ཆེ་བའི་སྤྲོ་སེམས། དེ་བས་ཏན་ཏིག་གི་སྤྱོད་ཚུལ་བཅས་ཀྱི་ཐོག་ནས་ཚན་རིག་དང་མཐུན་པའི་གོང་འཕེལ་ལྟ་བ་ལག་བསྟར་དོན་འཁྱོལ་གཏིང་ཟབ་དང་། ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ལྔ་པའི་དགོངས་དོན་སྒོ་ཀུན་ནས་ལག་བསྟར་བྱ་རྒྱུ་མཐའ་འཁྱོངས། བོད་ཀྱི་ལས་དོན་སྐོར་གྱི་ཀྲུང་དབྱང་གི་མཛུབ་ཁྲིད་བསམ་བློ་མཐའ་འཁྱོངས། བློ་བརྟན་འགྱུར་མེད་ངང་ཀྲུང་གོའི་ཁྱད་ཆོས་དང་བོད་ཀྱི་དམིགས་བསལ་ཁྱད་ཆོས་ལྡན་པའི་ལམ་བུའི་ཐོག་སྐྱོད་པ། “ཐོན་ལས་དང་པོ་ཆུ་ཚད་དུ་སླེབས་པ་བྱེད་པ་དང་། ཐོན་ལས་གཉིས་པའི་གཙོ་གནད་དམ་འཛིན་བྱེད་པ། ཐོན་ལས་གསུམ་པ་འཕེལ་རྒྱས་ཤུགས་ཆེན་གཏོང་བ ”བཅས་ཀྱི་དཔལ་འབྱོར་འཕེལ་རྒྱས་ཀྱི་འཐབ་ཇུས་ལག་བསྟར་ཤུགས་ཆེན་བྱེད་པ། བློ་གཅིག་སེམས་གཅིག གསར་འབྱེད་ཡར་བརྩོན། ལས་དོན་ཏན་ཏིག་སྒྲུབ་པ་བཅས་བྱས་ཏེ་མཐུན་སྒྲིལ་དང་། དམངས་གཙོ། འབྱོར་ཕྱུག ཤེས་དཔལ། མཐུན་སྦྱོར་བཅས་ལྡན་པའི་སྤྱི་ཚོགས་རིང་ལུགས་ཀྱི་བོད་གསར་འཛུགས་སྐྲུན་བྱ་ཆེད་འབད་འཐབ་ལྷོད་མེད་བྱེད་དགོས་པའི་འབོད་སྐུལ་བྱ་རྒྱུ་ཡིན།