གུས་པར་འོས་པའི་ལས་བྲལ་དང་ལས་འཁྱུར་ངལ་གསོ་རྒྱག་མཁན་བློ་མཐུན་རྣམ་པ་ཚོ།

    ཁྱེད་རྣམས་སྐུ་ཁམས་བཟང་། ལྗོངས་ཡོངས་ཀྱི་གོང་འོག་ཚང་མས་ཏང་གི་སྐབས་བཅུ་བདུན་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་ལྔ་པ་དང་། ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ལྔ་པ། ལྗོངས་ཏང་ཨུད་ཀྱི་སྐབས་བདུན་པའི་ཨུ་ལྷན་ཚང་འཛོམས་གྲོས་ཚོགས་ཐེངས་བདུན་པ་བཅས་ཀྱི་དགོངས་དོན་སློབ་སྦྱོང་ལག་བསྟར་གཏིང་ཟབ་བྱེད་པ་དང་ལྗོངས་ཡོངས་ཀྱི་མི་རིགས་ཁག་གི་མི་དམངས་ཚོས་བོད་ཞི་བས་བཅིངས་འགྲོལ་བཏང་ནས་ལོ་ངོ་60འཁོར་བར་དགའ་སྤྲོའི་ངང་བསུ་བ་ཞུ་བའི་སྐབས་སུ་ང་ཚོས་འབྲས་བུ་གཡུར་དུ་ཟ་བ་ཐོབ་པའི་2010ལོར་སྐྱེལ་མ་ཞུས་ནས་འགྲན་སློང་དང་གོ་སྐབས་ཀྱིས་ཁེངས་པའི་2011ལོར་བསུ་བ་ཞུས་ཡོད། ལོ་ཪྙིང་ལ་སྐྱེལ་མ་ཞུས་ནས་ལོ་གསར་བསུ་བའི་དུས་བཟང་དེར་རང་སྐྱོང་ལྗོངས་ཏང་ཨུད་དང་སྲིད་གཞུང་གི་བཀའ་མངགས་ལྟར་ཁྱེད་རྣམ་པར་བྱམས་བརྩེའི་འཚམས་འདྲི་དང་སྨོན་འདུན་བཟང་པོ་ཞུ་རྒྱུ་ཡིན།

    2010་ལོ་ནི་རང་ལྗོངས་ཀྱིས “ལོ་ལྔ་ཚན་བཅུ་གཅིག་པའི ”འཆར་འགོད་དམིགས་ཚད་ཕྱོགས་ཡོངས་ནས་ལེགས་སྒྲུབ་ཀྱིས་དཔལ་འབྱོར་དང་སྤྱི་ཚོགས་འཕེལ་རྒྱས་ལ་ཡར་རྒྱས་ཆེན་པོ་བྱུང་བའི་ལོ་ཞིག་ཡིན། ཏང་ཀྲུང་དབྱང་གི་སྲ་ཞིང་བརྟན་པའི་འགོ་ཁྲིད་འོག་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་ལྗོངས་ཡོངས་ཀྱི་མི་རིགས་ཁག་གི་ལས་བྱེད་པ་དང་མང་ཚོགས་ལ་སྣེ་ཁྲིད་ཀྱིས་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་རླབས་ཆེན་དར་ཆ་མཐོན་པོར་བསྒྲེངས་པ་དང་ཏེང་ཞའོ་ཕིང་གི་རིགས་པའི་གཞུང་ལུགས་དང “མཚོན་བྱེད་གསུམ ”གྱི་དགོངས་པ་གལ་ཆེན་གྱིས་མཛུབ་ཁྲིད་དུ་བྱེད་རྒྱུ་མཐའ་འཁྱོངས་བྱས་པའི་ཐོག་ཚན་རིག་དང་མཐུན་པའི་གོང་འཕེལ་ལྟ་བ་ལག་བསྟར་དོན་འཁྱོལ་གཏིང་ཟབ་བྱས་པ་དང་། ཏང་གི་ཚོགས་ཆེན་བཅུ་བདུན་པ་དང་སྐབས་བཅུ་བདུན་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པ་དང་། བཞི་པ། ལྔ་པ་བཅས་ཀྱི་དགོངས་དོན་ལག་བསྟར་དོན་འཁྱོལ་ནན་ཏན་ བྱས་པ། ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ལྔ་པ་དང་། ནུབ་རྒྱུད་ཐོན་འབྱེད་ཆེ་མོའི་ལས་དོན་ཚོགས་འདུ། ཧྲུའུ་ཅི་ཧུའུ་ཅིན་ཐའོ་ཡིས་རྒྱལ་ཡོངས་མི་དམངས་འཐུས་ཚོགས་སྐབས་བཅུ་གཅིག་པའི་ཚོགས་འདུ་ཐེངས་གསུམ་པའི་བོད་ཀྱི་འཐུས་མི་ཚོགས་པའི་གྲོས་ཞིབ་ནང་ཞུགས་སྐབས་གསུངས་པའི་གལ་ཆེའི་གསུང་བཤད་བཅས་ཀྱི་དགོངས་དོན་ཕྱོགས་ཡོངས་ནས་ལག་བསྟར་དོན་འཁྱོལ་བྱས་ཏེ་རང་སྐྱོང་ལྗོངས་ཀྱི་ཏང་གི་འཐུས་མི་ཚོགས་ཆེན་ཐེངས་བདུན་པ་དང་སྐབས་བཅུ་བདུན་པའི་ཨུ་ལྷན་ཚང་འཛོམས་གྲོས་ཚོགས་ཐེངས་དྲུག་པ་དང་བདུན་པའི་བཀོད་སྒྲིག་གཞིར་བཟུང་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ལ་སྐུལ་འདེད་གཏོང་བའི་བརྗོད་བྱ་གཙོ་བོ་དེ་སྟངས་འཛིན་ནན་པོ་བྱས་ཏེ་བློ་བརྟན་འགྱུར་མེད་ངང་འཕེལ་རྒྱས་ལ་དམ་འཛིན་བྱས་པ་དང་། དར་ཆ་གསལ་སྟོན་གྱིས་ཁ་ཕྲལ་ལ་ངོ་རྒོལ་བྱས་པ། སེམས་ནུས་ཡོད་རྒུས་དམངས་འཚོ་དོན་གཉེར་བྱས་པ། རྒྱུན་སྲིང་ལྷོད་མེད་ངང་ཏང་འཛུགས་སྐྱོང་ལ་དམ་འཛིན་བྱས་པས་སྤྱི་ཚོགས་རིང་ལུགས་ཀྱི་དཔལ་འབྱོར་འཛུགས་སྐྲུན་དང་། ཆབ་སྲིད་འཛུགས་སྐྱོང་། རིག་གནས་འཛུགས་སྐྱོང་། སྤྱི་ཚོགས་རིང་ལུགས་འཛུགས་སྐྲུན་བཅས་དང་དེ་བཞིན་སྣོད་བཅུད་ཤེས་དཔལ་འཛུགས་སྐྱོང་དང་ཏང་འཛུགས་སྐྱོང་ལ་འཕེལ་རྒྱས་གསར་པ་བྱུང་ཡོད། དེའང་ཞིང་འབྲོག་པ་མི་རེའི་ཆ་སྙོམས་ཡོང་འབབ་ཁེ་གཙང་སྔོན་དཔག་བྱས་ན་སྒོར་3990ལོན་རྒྱུ་ཡིན་པ་དེ་དུས་མཚུངས་ལས་13%འཕར་ནས་བསྟུད་མར་ལོ་8གྲངས་གནས་གཉིས་ཀྱི་འཕར་ཚད་རྒྱུན་འཁྱོངས་ཐུབ་རྒྱུ་དང་། ས་གནས་ནོར་སྲིད་ཀྱི་སྤྱིར་བཏང་སྔོན་རྩིས་ཡོང་འབབ་དང་གཏོང་ཆ་སྒོར་དུང་ཕྱུར་36.1དང་སྒོར་དུང་ཕྱུར་550སོ་སོར་ཟིན་རྒྱུ་ཡིན་པ་དེ་དུས་མཚུངས་ལས་20%དང་17%སོ་སོར་འཕར་རྒྱུ་ཡིན་ཞིང་། དཔལ་འབྱོར་མཆོང་སྐྱོད་ལྟ་བུའི་འཕེལ་རྒྱས་འགྲོ་རྒྱུ་རྒྱུན་འཁྱོངས་བྱུང་ནས་མི་དམངས་ཀྱི་འཚོ་བའི་ཆུ་ཚད་མངོན་གསལ་དོད་པོས་མཐོ་རུ་ཕྱིན་པ་དང་། གཞི་རྩའི་སྤྱི་པའི་ཞབས་ཞུའི་ནུས་པ་མངོན་གསལ་དོད་པོས་ཆེ་རུ་ཕྱིན་པ། རྨང་གཞིའི་སྒྲིག་བཀོད་འཛུགས་སྐྲུན་ལ་འཕེལ་རྒྱས་ཆེན་པོ་བྱུང་བ། སྣོད་བཅུད་ཁོར་ཡུག་སྔར་བས་ལེགས་སུ་ཕྱིན་པ། སྒྱུར་བཅོས་སྒོ་དབྱེ་རྒྱུན་ཆད་མེད་པར་གཏིང་ཟབ་ཏུ་ཕྱིན་པ། སྤྱི་ཚོགས་ཁྱོན་ཡོངས་ཀྱི་དུས་བབ་མུ་མཐུད་བརྟན་ལྷིང་ཡོང་རྒྱུ་རྒྱུན་འཁྱོངས་ཐུབ་ཡོད། དེ་དང་ཆབས་ཅིག་ལྗོངས་ཡོངས་ཀྱི་ལས་བྱེད་པ་རྒན་གྲས་ཀྱི་ལས་དོན་ལ་ཡང་རྒྱུན་ཆད་མེད་པར་ཤུགས་སྣོན་ཐེབས་ནས་ལས་བྱེད་པ་རྒན་གྲས་ཀྱི་ཐོབ་ཐང་ཁག་དོན་འཁྱོལ་ཅུང་ལེགས་པོ་བྱུང་ཡོད། གོང་གསལ་གྲུབ་འབྲས་དེ་དག་ནང་རྒྱ་ཆེའི་ལས་བྲལ་དང་ལས་འཁྱུར་ངལ་གསོ་རྒྱག་མཁན་ལས་བྱེད་པ་ཚོའི་བློ་གྲོས་དང་སེམས་ནུས་འདུས་ཡོད་ལ་གྲུབ་འབྲས་དེ་དག་ཐོབ་པར་ཁྱེད་རྣམ་པས་ལོ་མང་ནང་རྨང་གཞི་བརྟན་པོ་བཏིང་པ་དང་ཁ་འབྲལ་ཐབས་མེད་ལ་ཁྱེད་རྣམ་པའི་ཤུགས་ཆེའི་རྒྱབ་སྐྱོར་དང་རོགས་རམ་དང་ཡང་ཁ་འབྲལ་ཐབས་མེད་པར་བརྟེན་འདིར་ཁྱེད་རྣམ་པར་སྙིང་དབུས་ནས་ཐུགས་རྗེ་ཆེ་ཞུ་རྒྱུ་དང་འབྲེལ་བླ་ན་མེད་པའི་གུས་འདུད་ཞུ་རྒྱུ་ཡིན།

    2011ལོ་ནི་བོད་ཞི་བས་བཅིངས་འགྲོལ་བཏང་ནས་ལོ་ངོ་60འཁོར་བའི་ལོ་ཞིག་ཡིན་ལ་རང་ལྗོངས་ཀྱིས “ལོ་ལྔ་ཚན་བཅུ་གཉིས་པའི ”འཆར་འགོད་ལག་བསྟར་བྱེད་པའི་ལོ་ཐོག་མ་དེ་ཡང་ཡིན་པ་དང་ལོ་དེར་འགྲན་སློང་དང་གོ་སྐབས་མཉམ་དུ་གནས་ཡོད་ལ་དཀའ་ངལ་དང་རེ་བ་ཡང་མཉམ་དུ་གནས་ཡོད། ལོ་གསར་པའི་ནང་ལྗོངས་ཡོངས་ཀྱི་གོང་འོག་ཚང་མས་ཚན་རིག་དང་མཐུན་པའི་གོང་འཕེལ་ལྟ་བ་ལག་བསྟར་དོན་འཁྱོལ་གཏིང་ཟབ་བྱེད་པ་དང་ཏང་གི་སྐབས་བཅུ་བདུན་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་ལྔ་པ་དང་། ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ལྔ་པ། ནུབ་རྒྱུད་ཐོན་འབྱེད་ཆེ་མོའི་ལས་དོན་ཚོགས་འདུ་བཅས་ཀྱི་དགོངས་དོན་ཕྱོགས་ཡོངས་ནས་ལག་བསྟར་དོན་འཁྱོལ་བྱེད་པའི་ཐོག་དུས་སྐབས་གསར་པའི་བོད་ཀྱི་ལས་དོན་སྐོར་གྱི་ཀྲུང་དབྱང་གི་མཛུབ་ཁྲིད་བསམ་བློ་མཐའ་འཁྱོངས་བྱེད་པར་གཡོ་འགུལ་མི་གཏོང་རྒྱུ་དང་བློ་བརྟན་འགྱུར་མེད་ངང་ཀྲུང་གོའི་ཁྱད་ཆོས་དང་བོད་ཀྱི་དམིགས་བསལ་ཁྱད་ཆོས་ལྡན་པའི་འཕེལ་རྒྱས་ཀྱི་ལམ་བུའི་ཐོག་བསྐྱོད་དེ་ཚན་རིག་དང་མཐུན་པའི་འཕེལ་རྒྱས་དང་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ཀྱིས་བརྗོད་བྱ་གཙོ་བོར་བྱེད་པ་དང “ཐོན་ལས་དང་པོ་ཆུ་ཚད་དུ་སླེབས་པ་བྱེད་པ་དང་། ཐོན་ལས་གཉིས་པའི་གཙོ་གནད་དམ་འཛིན་བྱེད་པ། ཐོན་ལས་གསུམ་པ་འཕེལ་རྒྱས་ཤུགས་ཆེན་གཏོང་བ ”བཅས་ཀྱི་དཔལ་འབྱོར་འཕེལ་རྒྱས་ཀྱི་འཐབ་ཇུས་ལག་བསྟར་བྱེད་རྒྱུ་དང་དཔལ་འབྱོར་འཕེལ་རྒྱས་གཏོང་སྟངས་ལ་འགྱུར་ལྡོག་མགྱོགས་སུ་གཏོང་རྒྱུས་གཙོ་བོར་བྱེད་པ། སྒྱུར་བཅོས་སྒོ་དབྱེ་འགུལ་ཤུགས་སུ་བྱེད་པ། མི་རིགས་མཐུན་སྒྲིལ་གྱིས་འགན་ལེན་བྱེད་པ། དམངས་འཚོ་འགན་ལེན་དང་ལེགས་གཏོང་བྱེད་རྒྱུས་འགོ་འཛུགས་ས་དང་དོན་ལ་བབ་ས་བྱེད་པ། སྣོད་བཅུད་ཁོར་ཡུག་སྲུང་སྐྱོང་དང་འཛུགས་སྐྲུན་བྱེད་རྒྱུས་ནང་དོན་གལ་ཆེན་དུ་བྱེད་པ་བཅས་བྱས་ཏེ “ལོ་ལྔ་ཚན་བཅུ་གཅིག་པའི ”འཕེལ་རྒྱས་ཀྱི་གྲུབ་འབྲས་སྲ་བརྟན་དང་རྒྱ་ཆེར་བཏང་ནས་དཔལ་འབྱོར་ལེགས་ལ་མྱུར་བའི་སྒོ་ནས་གོང་འཕེལ་ཆེན་པོ་ཡོང་བ་དང་སྤྱི་ཚོགས་མཐུན་སྦྱོར་བརྟན་ལྷིང་ཡོང་རྒྱུར་སྐུལ་འདེད་བཏང་སྟེ་རང་ལྗོངས་ཀྱི་དཔལ་འབྱོར་དང་སྤྱི་ཚོགས་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ཀྱི་ལེའུ་གསར་པ་བརྩམ་རྒྱུ་རེད།

    འདས་ཟིན་པའི་ནང་ཐོབ་པའི་གྲུབ་འབྲས་མཐའ་དག་དང་། ལས་དོན་མཐའ་དག་ལ་ཐོབ་པའི་ཡར་རྒྱས། སྒྱུར་བཅོས་ཀྱི་བྱེད་ཐབས་ཁག་དོན་འཁྱོལ་བྱུང་བ་ཚང་མ་རྒྱ་ཆེའི་ལས་བྲལ་དང་ལས་འཁྱུར་ངལ་གསོ་རྒྱག་མཁན་ལས་བྱེད་པ་ཚོའི་སེམས་ཁུར་དང་། བསམ་ཤེས། རྒྱབ་སྐྱོར་བཅས་དང་ཁ་འབྲལ་ཐབས་མེད། ཁྱེད་རྣམ་པ་ལས་གནས་དང་བྲལ་རུང་སེམས་པ་བྱ་གཞག་ལ་བཅངས་ནས་ཆབ་སྲིད་ཐད་ཡར་བརྩོན་ཧུར་ཐག་བྱས་ནས་དར་ཆ་གསལ་སྟོན་དང་ལངས་ཕྱོགས་བརྟན་པོ་ཡོང་བ་བྱས་ནས་བླ་ན་མེད་པའི་ཚེ་མཇུག་གི་ལ་རྒྱ་རྒྱུན་འཁྱོངས་བྱས་པ་དང་། འཚོ་བའི་ཐད་གསར་བརྗེའི་སྲོལ་རྒྱུན་དར་སྤེལ་བཏང་ནས་དཀའ་སྤྱད་བབ་ཆགས་དང་དཀའ་ངལ་ཁྱད་བསད་བྱས་ཏེ་ལྗོངས་ཡོངས་ཀྱི་ལས་དོན་ཁག་ལ་རྒྱབ་སྐྱོར་བྱས་པ། ལས་དོན་ཐད་བོད་ཀྱི་བྱ་གཞག་ལ་སེམས་ཁུར་གྱིས་ཐབས་བརྒྱ་ཇུས་སྟོང་ངང་ཐབས་དང་ཇུས་བཏོན་ནས་རང་ཉིད་ཀྱི་ཚེ་མཇུག་གི་ནུས་པ་ལེགས་སྐྱེས་སུ་ཕུལ་ཡོད། ཁྱེད་རྣམ་པའི་ལུས་ཐོག་ནས་མཐུན་སྒྲིལ་འབད་འཐབ་དང་སྤྲོ་བ་ཆེན་པོས་ཡར་རྒྱས་བརྩོན་ལེན་བྱེད་པའི་སྟོབས་ཤུགས་ཤིག་མངོན་ལ་ཁྱེད་རྣམ་པའི་ལུས་ཐོག་ནས་ང་ཚོར་མྱོང་ཚོར་གཏིང་ཟབ་བྱུང་བ་ནི་བླ་ན་མེད་པའི་གཤིས་བཟང་དང་། རབ་ཏུ་ཁེངས་པའི་སྙིང་སྟོབས། སྒེར་སེམས་མེད་པའི་ལེགས་སྐྱེས་བཅས་ཡིན། ལོ་གསར་པའི་ནང་ང་ཚོས་ལས་བྱེད་པ་རྒན་གྲས་ཀྱི་ལས་དོན་སྐོར་གྱི་ཀྲུང་དབྱང་དང་ལྗོངས་ཏང་ཨུད་ཀྱི་བྱེད་ཕྱོགས་དང་སྲིད་ཇུས་རབ་དང་རིམ་པ་སྔར་བས་ལག་བསྟར་དོན་འཁྱོལ་བྱེད་པ་དང་ ལས་བྱེད་པ་རྒན་གྲས་ཀྱི་ཆབ་སྲིད་དང་འཚོ་བའི་ཐོབ་ཐང་སྔར་བས་དོན་འཁྱོལ་ནན་ཏན་བྱས་ཏེ་དུས་སྐབས་གསར་པའི་ལས་བྱེད་པ་རྒན་གྲས་ཀྱི་ཞབས་ཞུ་དང་དོ་དམ་གྱི་ལས་དོན་ཡག་པོ་བསྒྲུབ་རྒྱུ་དང་ལས་བྲལ་དང་ལས་འཁྱུར་ངལ་གསོ་རྒྱག་མཁན་ལས་བྱེད་པར་བརྩི་འཇོག་དང་། སེམས་ཁུར། གཅེས་སྐྱོང་བཅས་བྱེད་པའི་དར་སྲོལ་བཟང་པོ་ཞིག་འབད་བརྩོན་ཆེན་པོས་བཏོད་དེ་རྒྱ་ཆེའི་ལས་བྲལ་དང་ལས་འཁྱུར་ངལ་གསོ་རྒྱག་མཁན་ལས་བྱེད་པ་ཚོར་ཚེ་མཇུག་སྐྱིད་པོ་ཞིག་དང་ལུས་བདེ་ཚེ་རིང་ཡོང་བ་བྱེད་པ་དང་སྒྱུར་བཅོས་དང་འཕེལ་རྒྱས་ཀྱི་གྲུབ་འབྲས་མཉམ་སྤྱོད་ཀྱིས་ལས་བྲལ་དང་ལས་འཁྱུར་ངལ་གསོ་རྒྱག་མཁན་ལས་བྱེད་པའི་ལས་དོན་གྱི་རྣམ་པ་གསར་པ་རྒྱུན་ཆད་མེད་པར་གཏོད་རྒྱུ་ཡིན།

    ལོ་གསར་པར་རྒྱང་ལྟ་བྱེད་སྐབས་འཕུར་མཆོང་གི་དཔེ་རིས་ནི་མི་རྣམས་ལ་ཡར་སྐུལ་ཐེབས་པ་ཞིག་ཡོད་པ་དང་མཆོང་སྐྱོད་ཀྱི་ལམ་བུ་ནི་ལས་འགན་ལྕི་ལ་ལམ་ཐག་རིང་བ་ཞིག་ཡོད་པས་2011ལོའི་ལས་དོན་ཡག་པོ་བསྒྲུབ་རྒྱུ་དེ་སྔར་བཞིན་ལྗོངས་ཡོངས་ཀྱི་རྒྱ་ཆེའི་ལས་བྲལ་དང་ལས་འཁྱུར་ངལ་གསོ་རྒྱག་མཁན་ལས་བྱེད་པ་ཚོའི་སེམས་ཁུར་དང་རྒྱབ་སྐྱོར་དང་ཁ་འབྲལ་ཐབས་མེད། ང་ཚོས་རྒྱ་ཆེའི་ལས་བྲལ་དང་ལས་འཁྱུར་ངལ་གསོ་རྒྱག་མཁན་ལས་བྱེད་པ་ཚོས་ལུས་སེམས་བདེ་ཐང་ཡོང་རྒྱུ་རྒྱུན་འཁྱོངས་ཀྱིས་ཚེ་མཇུག་སྐྱིད་པོ་ཞིག་སྐྱེལ་བ་དང་སྦྲགས་ཚེ་མཇུག་གི་ནུས་པ་མུ་མཐུད་འདོན་སྤེལ་གྱིས་ཐབས་དང་ཇུས་ཧུར་ཐག་བཏོན་ནས་སྔར་རྒྱུན་བཞིན་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སེམས་ཁུར་དང་རྒྱབ་སྐྱོར་གྱིས་ཐུན་མོང་ཐོག་བོད་འདི་དེ་བས་མཛེས་སྡུག་ལྡན་པ་ཞིག་ཏུ་འཛུགས་སྐྲུན་བྱ་རྒྱུའི་རེ་བ་ཟམ་མོ་འདོན་རྒྱུ་ཡིན།

    ཁྱེད་རྣམ་པ་དཔྱིད་གསར་དུས་ཆེན་སྤྲོ་པོ་དང་། ནད་མེད་ཚེ་རིང་། ཁྱིམ་ཚང་བདེ་སྐྱིད་བཅས་ཡོང་བའི་བཀྲ་ཤིས་སྨོན་འདུན་སྙིང་ཐག་པ་ནས་ཞུ་རྒྱུ་ཡིན།

    ཀྲུང་གུང་བོད་རང་སྐྱོང་ལྗོངས་ཨུ་ཡོན་ལྷན་ཁང་རྩ་འཛུགས་པུའུ་དང་ཀྲུང་གུང་བོད་རང་སྐྱོང་ལྗོངས་ཨུ་ཡོན་ལྷན་ཁང་གི་ལས་བྱེད་པ་རྒན་གྲས་ཅུས་ནས།

    2010ལོའི་ཟླ་12ཚེས་29ཉིན།