རྒྱལ་ཡོངས་ཀྱི་ཚོགས་འདུ་གཉིས་གྲོལ་རྗེས་ཚེས་16ཉིན་གྱི་ཕྱི་དྲོ་ཀྲུང་གོ་དངུལ་འཛིན་ལྟ་སྐུལ་དོ་དམ་ཨུ་ཡོན་ལྷན་ཁང་དང་རང་སྐྱོང་ལྗོངས་ཀྱིས་བོད་ཀྱི་མ་རྩའི་ཁྲོམ་ར་འཕེལ་རྒྱས་ལ་རྒྱབ་སྐྱོར་བྱེད་པའི་བཞུགས་མོལ་ཚོགས་འདུ་འཚོགས་པ་རེད།

ཀྲུང་གོ་དངུལ་འཛིན་ལྟ་སྐུལ་དོ་དམ་ཨུ་ཡོན་ལྷན་ཁང་ཏང་ཨུད་ཀྱི་ཧྲུའུ་ཅི་ཀྲུའུ་ཞི་ཤའོ་ཀང་དང་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཁྲེན་ཆོན་གོས་གསུང་བཤད་གནང་བ་དང་།　རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་བློ་བཟང་རྒྱལ་མཚན་གྱིས་ཤིས་ཚིག་གསུངས་པ།　རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཏིང་ཡེ་ཤན་དང་ཀྲུང་གོ་དངུལ་འཛིན་ལྟ་སྐུལ་དོ་དམ་ཨུ་ཡོན་ལྷན་ཁང་གི་ཀྲུའུ་ཞི་གཞོན་པ་ཀྲོང་ཤིན་དབྱི་ཚོགས་འདུར་ཕེབས་ཡོད།　བཞུགས་མོལ་ཚོགས་འདུ་དེ་ཀྲུང་གོ་དངུལ་འཛིན་ལྟ་སྐུལ་དོ་དམ་ཨུ་ཡོན་ལྷན་ཁང་གི་ཀྲུའུ་ཞི་གཞོན་པ་ཡའོ་ཀང་གིས་གཙོ་སྐྱོང་གནང་བ་རེད།

ཤའོ་ཀང་གིས་ཉེ་བའི་ལོ་ཤས་ནང་ཀྲུང་གོ་དངུལ་འཛིན་ལྟ་སྐུལ་དོ་དམ་ཨུ་ཡོན་ལྷན་ཁང་གིས་བོད་ཀྱི་ལས་དོན་སྐོར་གྱི་ཐབས་ཇུས་བཀོད་སྒྲིག་ལག་བསྟར་ནན་ཏན་དང་བོད་ཀྱི་ལས་དོན་གྱི་དོན་སྙིང་གལ་ཆེན་ལ་ངོས་འཛིན་གཏིང་ཟབ་ཀྱིས་རང་རྒྱལ་གྱི་མ་རྩའི་ཁྲོམ་རའི་དོན་དངོས་དང་ཟུང་འབྲེལ་བྱས་ཏེ་རྒྱལ་ཡོངས་ཀྱི་གཅིག་སྡུད་གཅིག་གྱུར་གྱི་ལྟ་སྐུལ་དོ་དམ་དང་བོད་སོགས་མི་རིགས་ས་ཁུལ་འཕེལ་རྒྱས་ལ་རྒྱབ་སྐྱོར་ཧུར་ཐག་བྱེད་པའི་འབྲེལ་བ་སྟངས་འཛིན་ཡང་དག་བྱས་ཏེ་དམིགས་སའི་རང་བཞིན་ཡོད་པའི་རྒྱབ་སྐྱོར་བྱ་ཐབས་རབ་དང་རིམ་པ་བཏོན་ཡོད་ལུགས་བརྗོད།

ཤའོ་ཀང་གིས་མིག་སྔར་རང་རྒྱལ་གྱི་དཔལ་འབྱོར་འཕེལ་རྒྱས་དེ་རྒྱུན་རྣམ་གསར་པར་སླེབས་ཡོད་པས་མ་རྩའི་ཁྲོམ་ར་སྒྱུར་བཅོས་འཕེལ་རྒྱས་ཐད་སྲ་ཞིང་བརྟན་པའི་རྨང་གཞི་དང་བར་མཐོངས་རྒྱ་ཆེན་པོ་ཞིག་མཁོ་འདོན་བྱས་ཡོད།　མ་རྩའི་ཁྲོམ་རས་བོད་ཀྱི་འཕེལ་རྒྱས་ལ་རྒྱབ་སྐྱོར་བྱེད་པའི་ཁྲོད་བྱས་རྗེས་ཆེན་པོ་འཇོག་ཐུབ་ངེས་རེད།　ཀྲུང་གོ་དངུལ་འཛིན་ལྟ་སྐུལ་དོ་དམ་ཨུ་ཡོན་ལྷན་ཁང་གིས་བོད་ཀྱི་མ་རྩའི་ཁྲོམ་ར་འཕེལ་རྒྱས་ལ་ཁ་གཏད་རོགས་སྐྱོར་བྱེད་པའི་ཕུགས་ཕན་ལམ་སྲོལ་འཛུགས་པ་དང་འཐུས་སྒོ་ཚང་དུ་གཏོང་རྒྱུ་དེ་གཙོ་བོ་ཕྱོགས་ལྔའི་ཐད་ཀྱི་ལས་དོན་དམ་འཛིན་བྱེད་དགོས་པ་སྟེ།　གཅིག་ནས་བོད་ཀྱི་ཁེ་ལས་ལ་རྒྱབ་སྐྱོར་བྱས་ཏེ་རིམ་པ་མང་བའི་རྐང་དབང་ཁྲོམ་ར་འཕེལ་རྒྱས་དང་རྒྱ་སྟོབས་ཆེ་རུ་གཏོང་དགོས་ཤིང་།　ཁེ་ལས་ཁྲོམ་རའི་ཐོག་ཐོག་མར་ཐོན་སྐབས་སྔོན་ལ་ཞིབ་བཤེར་བྱེད་པའི་སྲིད་ཇུས་མུ་མཐུད་ལག་བསྟར་བྱས་ཏེ“གྲུབ་གསར་གསུམ”གྱི་ཁྲོམ་རས་བོད་ལ་རྒྱབ་སྐྱོར་བྱེད་ཤུགས་སྔར་བས་ཆེ་རུ་གཏོང་བ་དང་བོད་ཀྱི་ཁེ་ལས་མཉམ་ཉོ་བསྐྱར་སྒྲིག་ལ་མུ་མཐུད་རྒྱབ་སྐྱོར་བྱས་ནས་རིགས་སྒྱུར་རིམ་སྤོར་ཡོང་བ་བྱེད་དགོས་པ་དང་།　གཉིས་ནས་བོད་ཀྱི་ཁེ་ལས་ཀྱིས་བུན་འཛིན་དང་མ་དངུལ་མཉམ་འདྲེས་བྱ་རྒྱུར་རྒྱབ་སྐྱོར་བྱེད་དགོས་ཤིང་།　ཆ་རྐྱེན་ཚང་བའི་བོད་ཀྱི་ཁེ་ལས་ལ་ཧྲང་ཧའེ་དང་ཧྲེན་ཀྲེན་དངུལ་འཛིན་ཉོ་ཚོང་ཁང་དང་།　“གྲུབ་གསར་གསུམ”　སྒྲིག་གཞིའི་དབར་གྱི་རིན་གོང་གསལ་ཞུ་བྱེད་པའི་མ་ལག་དང་དངུལ་འཛིན་ཀུང་སིའི་སྒྲོམ་སྟེགས་ཁྲོམ་རའི་འགྲེམས་སྤེལ་ཀུང་སིའི་བུན་འཛིན་བཅས་ལ་རྒྱབ་སྐྱོར་ཧུར་ཐག་བྱས་ཏེ་ཐད་ཀའི་མ་དངུལ་མཉམ་འདྲེས་ཀྱི་གཞི་ཁྱོན་སྔར་བས་ཆེ་རུ་གཏོང་དགོས།　བོད་ཀྱི་ཁེ་ལས་ལ་མ་རྩའི་དངུལ་འཛིན་ཅན་གྱི་གསོག་ཐེབས་ཕན་སྒྱུར་དང་མ་དངུལ་གྱི་ཡོང་ཁུངས་རྒྱ་ཆེར་གཏོང་རྒྱུར་རྒྱབ་སྐྱོར་བྱེད་དགོས་པ།　གསུམ་ནས་དུས་བཅད་ཚོང་ཟོག་ཁྲོམ་རས་བོད་ཀྱི་དཔལ་འབྱོར་འཕེལ་རྒྱས་ལ་རྒྱབ་སྐྱོར་བྱེད་པའི་ནུས་པ་འདོན་སྤེལ་གང་ལེགས་བྱེད་དགོས་ཤིང་།　ཉོ་ཚོང་ལམ་སྲོལ་འཐུས་སྒོ་ཚང་དུ་གཏོང་བ་དང་ཉོ་ཚོང་འགྲོ་སོང་ཆག་ཡང་དང་རྩ་ཆག་གཏོང་བ་སོགས་ཀྱི་བྱེད་ཐབས་ཞིབ་འཇུག་གིས་བཏོན་ནས་བོད་ཀྱི་དངོས་ཚན་ཁེ་ལས་ལ་དུས་བཅད་ཚོང་ཟོག་ཁྲོམ་རར་དུས་བཀག་གི་རིན་གོང་མ་ཆག་པ་བྱ་རྒྱུར་སྐུལ་མ་བཏང་ནས་ཁྲོམ་རའི་རིན་གོང་འཕར་ཆག་གི་ཉེན་ཁར་དོ་དམ་ནན་པོ་བྱེད་དགོས་པ།　བཞི་ནས་བོད་ཀྱི་དངུལ་འཛིན་གྱི་དུས་བཅད་ཚོང་ཟོག་ཞབས་ཞུའི་ལས་རིགས་ཀྱི་གསར་གཏོད་འཕེལ་རྒྱས་ལ་སྐུལ་མ་གཏོང་དགོས་ཤིང་།　ནང་སའི་དངུལ་འཛིན་གྱི་དུས་བཅད་ཚོང་ཟོག་གཉེར་སྐྱོང་སྒྲིག་གཞི་དང་རྩིས་བཤེར་དཔྱད་དཔོག་སྒྲིག་གཞིས་བོད་དུ་ཉིང་ལག་སྒྲིག་གཞི་འཛུགས་པ་དང་འབྲེལ་ཡོད་ལས་སྒོ་སྤེལ་རྒྱུར་སྐུལ་མ་གཏོང་དགོས།　བོད་ཀྱི་དངུལ་འཛིན་དུས་བཅད་ཚོང་ཟོག་གཉེར་སྐྱོང་སྒྲིག་གཞིས་ལས་སྒོ་གཉེར་བ་དང་ཐོན་རྫས་དང་རྩ་འཛུགས་གསར་གཏོད་བྱ་རྒྱུར་སྐུལ་མ་གཏོང་དགོས།　ལྗོངས་ཕྱི་ནང་གི་སྒེར་གྱི་ཞལ་འདེབས་ཐེབས་རྩས་བོད་ཀྱི་ཁེ་ལས་ལ་མ་དངུལ་གཏོང་རྒྱུར་རྒྱབ་སྐྱོར་བྱས་ཏེ་དངོས་ཚན་དཔལ་འབྱོར་ཐད་མ་དངུལ་མཉམ་འདྲེས་བྱ་ཐབས་སྣ་ཚོགས་གཏོད་དགོས་པ།　ལྔ་ནས་ལས་བྱེད་པ་དང་རིག་སྟོབས་བོད་སྐྱོར་ལས་དོན་ཡག་པོ་སྒྲུབ་དགོས་ཤིང་།　ཤེས་ལྡན་མི་སྣ་གཏོང་བ་དང་སྲིད་ཇུས་བློ་འདྲི་བྱ་རྒྱུ་ཕན་ཚུན་ཟུང་འབྲེལ་བྱེད་པའི་ལས་ཀའི་ལམ་སྲོལ་འཛུགས་པ་དང་འཐུས་སྒོ་ཚང་དུ་བཏང་ནས་བོད་ཀྱི་མ་རྩའི་ཁྲོམ་ར་འཕེལ་རྒྱས་ཆེད་ཤེས་ལྡན་མི་སྣ་དང་རིག་སྟོབས་ཀྱི་རྒྱབ་སྐྱོར་བྱེད་དགོས་པ་བཅས་ཀྱི་ནན་བཤད་བྱས་པ་རེད།

ཁྲེན་ཆོན་གོས་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཚབ་ཞུས་ཏེ་ཀྲུང་གོ་དངུལ་འཛིན་ལྟ་སྐུལ་དོ་དམ་ཨུ་ཡོན་ལྷན་ཁང་དང་དངུལ་འཛིན་སྒྲིག་གཞི་ཁག་གིས་དུས་ཡུན་རིང་པོའི་ནང་བོད་ཀྱི་ལས་དོན་དང་ལྷག་པར་དུ་བོད་ཀྱི་མ་རྩའི་ཁྲོམ་ར་འཕེལ་རྒྱས་ཀྱི་ལས་དོན་ཐད་ཚད་མཐོའི་མཐོང་ཆེན་དང་རྒྱབ་སྐྱོར་ཤུགས་ཆེན་བྱས་པར་སྙིང་དབུས་ནས་ཐུགས་རྗེ་ཆེ་ཞུས་པ་མ་ཟད་བླ་ན་མེད་པའི་གུས་འདུད་ཀྱང་ཞུས་པ་རེད།

ཁྲེན་ཆོན་གོས་ཀྲུང་གོ་དངུལ་འཛིན་ལྟ་སྐུལ་དོ་དམ་ཨུ་ཡོན་ལྷན་ཁང་དང་དངུལ་འཛིན་སྒྲིག་གཞི་ཁག་གི་མཐོང་ཆེན་དང་རྒྱབ་སྐྱོར་འོག་བོད་ཀྱི་དངུལ་འཛིན་ཁྲོམ་ར་དེ་མེད་པ་ནས་ཡོད་པའི་བར་དང་ཆུང་བ་ནས་ཆེ་བའི་བར་ནུས་པ་ཟམ་མི་ཆད་པར་འཐུས་སྒོ་ཚང་དུ་འགྲོ་བའི་མ་རྩའི་ཁྲོམ་རའི་མ་ལག་སྤྱིར་ཆགས་ནས་གཞུང་ཁོངས་ཁེ་ལས་སྒྱུར་བཅོས་གཏིང་ཟབ་ཏུ་གཏོང་བ་དང་།　དཔལ་འབྱོར་གྲུབ་ཆ་ལེགས་སྒྲིག　ཁྱད་ལྡན་ཐོན་ལས་འཕེལ་རྒྱས།　དམངས་འཚོ་ལེགས་སུ་གཏོང་རྒྱུ་འགན་ལེན།　ས་གནས་འཕེལ་རྒྱས་ལ་སྐུལ་གཏོང་བཅས་ཐད་ནུས་པ་གལ་ཆེན་འདོན་སྤེལ་བྱས་ཡོད་ཅེས་གསུངས་པ་རེད།

ཁྲེན་ཆོན་གོས་དངུལ་འཛིན་ལས་སྒོ་ནི་དངུལ་རྩའི་ཐོན་ལས་ཀྱི་གྲུབ་ཆ་གལ་ཆེན་ཞིག་ཡིན་པ་དང་དངུལ་འཛིན་ཁྲོམ་ར་ནི་ཁེ་ལས་ཀྱིས་སྤྱི་ཚོགས་ཀྱི་མ་དངུལ་གྲབས་གསོག་བྱེད་པའི་ཐབས་ལམ་གལ་ཆེན་ཞིག་ཡིན་པས་དཔལ་འབྱོར་དང་སྤྱི་ཚོགས་འཕེལ་རྒྱས་ཐད་སྐུལ་འདེད་ཀྱི་ནུས་པ་གལ་ཆེན་ཐོན་ཡོད།　ཀྲུང་གོ་དངུལ་འཛིན་ལྟ་སྐུལ་དོ་དམ་ཨུ་ཡོན་ལྷན་ཁང་གིས་སྲིད་ཇུས་ཀྱི་རྒྱབ་སྐྱོར་བྱེད་ཤུགས་སྔར་བས་ཆེ་རུ་གཏོང་བ་དང་བོད་ཀྱི་ཁེ་ལས་ཀྱི་ཐད་ཀའི་མ་དངུལ་མཉམ་འདྲེས་ཀྱི་གཞི་ཁྱོན་ཆེ་རུ་བཏང་སྟེ་ཁྲོམ་རའི་ཐོག་སྐྱོད་པའི་ཆ་རྐྱེན་དམའ་རུ་གཏོང་བ་དང་།　ཞིབ་མཆན་འགོད་པའི་གོ་རིམ་ཉུང་དུ་གཏོང་བ།　ཞིབ་མཆན་འགོད་པའི་མྱུར་ཚད་མགྱོགས་སུ་གཏོང་བ།　“ལྗང་མདོག་བགྲོད་ལམ”འཛུགས་པ་བཅས་བྱས་ཏེ་ཤེས་ལྡན་མི་སྣའི་གསོ་སྦྱོང་དང་སྤེལ་རེས་ལ་ཤུགས་སྣོན་བརྒྱབ་ཐོག་བོད་ཀྱི་མ་རྩའི་ཁྲོམ་ར་རྒྱུན་མཐུད་བརྟན་ལྷིང་དང་སྐྱོན་བྲལ་ངང་འཕེལ་རྒྱས་འགྲོ་རྒྱུར་སྐུལ་མ་བཏང་ནས་མ་རྩའི་ཁྲོམ་ར་དང་དངོས་ཚན་དཔལ་འབྱོར་མཉམ་འདྲེས་གཏིང་ཟབ་ཐུབ་པ་བྱས་ཏེ་བོད་ཀྱི་དཔལ་འབྱོར་དང་སྤྱི་ཚོགས་ལེགས་ལ་མྱུར་བའི་སྒོ་ནས་འཕེལ་རྒྱས་འགྲོ་རྒྱུར་སྒུལ་ཤུགས་ཆེན་པོ་འདོན་རྒྱུའི་རེ་བ་ཡོད།　རང་སྐྱོང་ལྗོངས་ཏང་ཨུད་དང་སྲིད་གཞུང་གིས་ད་རེས་ཀྱི་བཞུགས་མོལ་ཚོགས་འདུ་དེ་གོ་སྐབས་སུ་བྱས་ཏེ་དངུལ་འཛིན་ལས་དོན་ལ་སྔར་བས་ཚད་མཐོའི་མཐོང་ཆེན་བྱས་ནས་དངུལ་འཛིན་ལས་སྒོ་འཕེལ་རྒྱས་གཏོང་རྒྱུ་དེ་དེ་བས་གལ་ཆེ་བའི་གནས་བབ་ཐོག་བཞག་སྟེ་བྱེད་ཐབས་འཐུས་སྒོ་ཚང་དུ་གཏོང་བ་དང་ཞབས་ཞུ་ལེགས་སུ་བཏང་ཐོག་དངུལ་འཛིན་སྒྲིག་གཞི་སྣ་ཚོགས་བོད་དུ་འཁོར་སྐྱོད་ཚོང་གཉེར་དང་འཕེལ་རྒྱས་ཡོང་རྒྱུར་མཐུན་རྐྱེན་བཟང་པོ་སྐྲུན་པ་དང་ཁོར་ཡུག་བཟང་པོ་གཏོད་རྒྱུ་ཡིན་ཞེས་གསུངས་པ་རེད།　བློ་བཟང་རྒྱལ་མཚན་གྱིས་ཤིས་ཚིག་གསུངས་སྐབས་ཀྲུང་གོ་དངུལ་འཛིན་ལྟ་སྐུལ་དོ་དམ་ཨུ་ཡོན་ལྷན་ཁང་གིས་བོད་ཀྱི་འཕེལ་རྒྱས་ཐད་ཐོག་མཐའ་བར་གསུམ་དུ་ཐུགས་ཁུར་གྱིས་བོད་ཀྱི་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ལ་སྐུལ་མ་གཏོང་རྒྱུའི་སྐོར་གྱི་ཀྲུང་དབྱང་གིས་གཏན་འབེབས་བྱས་པའི་དམིགས་བསལ་གྱི་གཟིགས་སྐྱོང་སྲིད་ཇུས་དོན་འཁྱོལ་ནན་ཏན་བྱས་ནས་བོད་ཀྱི་མ་རྩའི་ཁྲོམ་ར་འཕེལ་རྒྱས་ལ་མཛུབ་ཁྲིད་ཤུགས་ཆེན་དང་ཆ་རྐྱེན་ཚང་བའི་བོད་ཀྱི་ཁེ་ལས་ཁྲོམ་རའི་ཐོག་བསྐྱོད་རྒྱུར་རྒྱབ་སྐྱོར་ཧུར་ཐག་བྱས་ཏེ་བོད་ཀྱི་ཁེ་ལས་རྒྱལ་ཡོངས་ཀྱི་གཅིག་གྱུར་ཁྲོམ་ར་ཆེ་མོའི་ནང་ཚུད་པ་བྱེད་པ་དང་བོད་ཀྱི་ཁེ་ལས་འབྲིང་ཆུང་འཕེལ་རྒྱས་འགྲོ་རྒྱུར་སྐུལ་འདེད་ཀྱི་ནུས་པ་གལ་ཆེན་ཐོན་ཡོད་ཅེས་གསུངས་ཤིང་།　ཡང་ཁོང་གིས་ཀྲུང་གོ་དངུལ་འཛིན་ལྟ་སྐུལ་དོ་དམ་ཨུ་ཡོན་ལྷན་ཁང་གིས་བོད་ཀྱི་ལས་དོན་ཐད་རྒྱབ་སྐྱོར་བྱེད་ཤུགས་སྔར་བས་ཆེ་རུ་བཏང་ནས་བོད་ཀྱི་མ་རྩའི་ཁྲོམ་ར་འཕེལ་རྒྱས་ཀྱི་ཧེ་བག་ལྡན་པའི་སྲིད་ཇུས་ཞིབ་འཇུག་གིས་བཟོས་ནས་བོད་ཀྱི་ཁེ་ལས་ཁྲོམ་རའི་ཐོག་བསྐྱོད་དེ་མ་དངུལ་མཉམ་འདྲེས་བྱ་རྒྱུར་མུ་མཐུད་རྒྱབ་སྐྱོར་བྱེད་པ་དང་།　བོད་ཀྱི་རིམ་པ་སྣ་ཚོགས་ཀྱི་མ་རྩའི་ཁྲོམ་རའི་མ་ལག་མགྱོགས་མྱུར་འཐུས་སྒོ་ཚང་དུ་གཏོང་བ།　དངུལ་འཛིན་སྒྲིག་གཞིའི་ཁ་གཏད་བོད་སྐྱོར་གྱི་ཕུགས་ཕན་ལམ་སྲོལ་འཛུགས་པ་བཅས་བྱས་ཏེ་བོད་ཀྱི་དཔལ་འབྱོར་དང་སྤྱི་ཚོགས་རྒྱུན་མཐུད་དང་།　མགྱོགས་མྱུར།　སྐྱོན་བྲལ་བཅས་ཀྱི་སྒོ་ནས་འཕེལ་རྒྱས་འགྲོ་རྒྱུར་སྐུལ་མ་ཏན་ཏིག་གཏོང་རྒྱུའི་ཐུགས་རེ་གནང་བ་རེད།

བཞུགས་མོལ་ཚོགས་འདུའི་ཐོག་ཧྲང་ཧའེ་ཉོ་ཚོང་ཁང་དང་།　ཧྲེན་ཀྲེན་ཉོ་ཚོང་ཁང་།　ཧྲང་ཧའེ་དུས་བཅད་ཚོང་ཟོག་ཁང་།　རྒྱལ་ཡོངས་མ་རྐང་གཞན་སྒྱུར་ཀུང་སི།　བོད་ལྗོངས་ཐུང་ཤིན་དངུལ་འཛིན་ཀུང་སི་བཅས་ཀྱི་འགན་འཁུར་བས་གཏམ་བཤད་སྤེལ་བ་རེད།