འདི་ནི་བསྐལ་ལ་ཕུག་ལམ་རྒྱས་སྐྲུན་ལས་གྲྭའི་ལས་ཡུལ་དངོས་སུ་བློ་བཟང་རྒྱལ་མཚན་གྱིས་འཛུགས་སྐྲུན་ནང་ཞུགས་མཁན་ཚོར་དཀར་གཙང་མཇལ་དར་བསྒྲོན་ནས་དུས་ཆེན་གྱི་སྨོན་འདུན་བཟང་པོ་ཞུ་བའི་གནས་ཚུལ་ཡིན་པ། འགྲིམ་འགྲུལ་གྱི་གཙོ་གནད་ལས་གྲྭ་དུས་བཀག་ལྟར་ལས་མཇུག་འགྲིལ་ནས་རླངས་འཁོར་ཤར་གཏོང་ཐུབ་པའི་འགན་ལེན་བྱ་ཆེད་འཛུགས་སྐྲུན་པ་ཆིག་སྟོང་ལྷག་ཙམ་གྱིས་དཔྱིད་གསར་དུས་ཆེན་དང་བོད་ཀྱི་ལོ་གསར་རིང་སྔར་བཞིན་ཨར་ལས་ཀྱི་འཐབ་ཕྱོགས་དང་པོར་བྲེལ་འཚུབ་ཆེན་པོའི་སྒོ་ནས་འབད་འཐབ་བྱེད་བཞིན་ཡོད། དཔྱིད་གསར་དུས་ཆེན་རིང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་བློ་བཟང་རྒྱལ་མཚན་ལྷ་ཉིང་མཐོ་རིམ་གཞུང་ལམ་ལྷ་ས་ནས་མལ་གྲོ་གུང་དཀར་བར་གྱི་དུམ་བུ་དང་། བསྐལ་ལ་ཕུག་ལམ། ཡར་ཀླུང་གཙང་པོའི་ཟམ་ཆེན་རྒྱས་སྐྲུན་ལས་གྲྭ་བཅས་འཛུགས་སྐྲུན་བྱ་ཡུལ་དུ་ཕེབས་ནས་རང་སྐྱོང་ལྗོངས་ཏང་ཨུད་དང་སྲིད་གཞུང་དང་། ལྗོངས་ཡོངས་ཀྱི་མི་རིགས་ཁག་གི་མི་དམངས། ཧྲུའུ་ཅི་ཁྲེན་ཆོན་གོ་བཅས་ཀྱི་ཚབ་ཞུས་ཏེ་འཐབ་ཕྱོགས་དང་པོའི་ཐོག་ལས་གནས་བརྟན་སྲུང་བྱེད་མཁན་གྱི་འཛུགས་སྐྲུན་པ་ཚོར་བྱམས་བརྩེའི་ངང་གཟིགས་པ་དང་། ལས་གྲྭ་འཛུགས་སྐྲུན་ཆེད་དཀའ་སྤྱད་འབད་བརྩོན་གྱིས་ངལ་རྩོལ་དང་སེམས་ཤུགས་ཡོད་རྒུ་བཏོན་ནས་འཛུགས་སྐྲུན་ནང་ཞུགས་མཁན་ཚོར་བྱམས་བརྩེའི་ངང་འཚམས་འདྲི་གནང་བ་རེད།
ལྷ་ཉིང་མཐོ་རིམ་གཞུང་ལམ་དེ་2013ལོའི་ཟླ་5ཚེས་23ཉིན་འཛུགས་སྐྲུན་བྱེད་འགོ་ཚུགས་པ་དང་། མིག་སྔར་ལྷ་ཉིང་མཐོ་རིམ་གཞུང་ལམ་གྱི་ལས་ཚུགས་ལམ་དུམ་དེ་ལས་གྲྭའི་སྤྱི་འབོར་གྱི་75%ཡན་ལེགས་གྲུབ་ཟིན་ཞིང་། འདི་ལོའི་ཟླ་7པའི་ཟླ་མཇུག་ཏུ་རླངས་འཁོར་ཁྱོན་ཡོངས་ནས་ཤར་གཏོང་ཐུབ་རེ་ཡོད་པ་དང་། བྲག་ཡིབ་ནས་སྨན་གླིང་བར་གྱི་གནམ་ཐང་ཆེད་སྤྱོད་གཞུང་ལམ་དེ་2014ལོའི་ཟླ་7པའི་ཚེས་6ཉིན་ལས་འགོ་བཙུགས་ནས་འདི་ལོའི་ཟླ་12པའི་ཟླ་མཇུག་ཏུ་རླངས་འཁོར་ཤར་གཏོང་ཐུབ་རེ་ཡོད་པ་རེད།
བློ་བཟང་རྒྱལ་མཚན་གྱིས་ལྷ་ཉིང་མཐོ་རིམ་གཞུང་ལམ་དང་བྲག་ཡིབ་ནས་སྨན་གླིང་བར་གྱི་གནམ་ཐང་ཆེད་སྤྱོད་གཞུང་ལམ་ནི་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་བོད་ཀྱི་མཆོང་སྐྱོད་ལྟ་བུའི་འཕེལ་རྒྱས་དང་ཡུན་རིང་བདེ་འཁོད་ལ་སྐུལ་འདེད་མགྱོགས་པོ་གཏོང་རྒྱུར་གཞི་ཚུགས་པ་དང་འགྲིམ་འགྲུལ་འཕེལ་རྒྱས་གཏོང་རྒྱུའི་དགོས་གཏུགས་ལ་དམིགས་པའི་ཐབས་ཇུས་གལ་ཆེན་ཞིག་རེད་ལ་རང་ལྗོངས་ཀྱིས་མ་འཇོག་ལ་སྐུལ་འདེད་ཤུགས་ཆེན་གཏོང་བ་དང་དངུལ་རྩའི་འདེགས་ཤིང་ལག་བསྟར་བྱེད་པའི་འགྲིམ་འགྲུལ་མཆོང་སྐྱོད་ལྟ་བུའི་འཕེལ་རྒྱས་གཏོང་བའི་རྣམ་གྲངས་དང་པོ་དེ་ཡང་རེད། འབྲེལ་ཡོད་ས་ཁུལ་དང་གྲོང་ཁྱེར་དང་། སྡེ་ཚན། འཛུགས་སྐྲུན་ནང་ཞུགས་མཁན་ཚན་པ་ཁག་གིས་ངོས་འཛིན་སྔར་བས་མཐོར་གཏོང་དང་འགན་འཁྲིའི་སེམས་པ་དང་དགོས་གཏུགས་ཀྱི་སེམས་པ་ཆེ་རུ་ཏན་ཏིག་བཏང་སྟེ་མཐུན་སྦྱོར་དམ་ཟབ་དང་གཞོགས་འདེགས་མཉམ་འཐབ་ཀྱིས་གཏན་ལ་ཕབ་པའི་ལས་འགན་གྱི་བླང་བྱ་ལྟར་ལས་གྲྭ་འཛུགས་སྐྲུན་ལ་ཚ་ཚ་འུར་འུར་ངང་སྐུལ་འདེད་བཏང་ནས་ལས་གྲྭའི་བདེ་འཇགས་དང་སྤུས་ཚད་འགན་ལེན་དང་། གཞུང་ལམ་འཛུགས་སྐྲུན་དང་སྣོད་བཅུད་འཛུགས་སྐྱོང་མཉམ་དུ་བྱ་རྒྱུ་འགན་ལེན། དུས་བཀག་ལྟར་འཛུགས་སྐྲུན་ལེགས་གྲུབ་ཡོང་བའི་འགན་ལེན་བཅས་བྱས་ནས་རང་སྐྱོང་ལྗོངས་དབུ་བརྙེས་ནས་ལོ་ངོ་50འཁོར་བར་ཕྱག་རྟགས་འབུལ་དགོས་ཞེས་གསུངས་པ་རེད།
བསྐལ་ལ་ཕུག་ལམ་དང་ཡར་ཀླུང་གཙང་པོའི་ཟམ་ཆེན་རྒྱས་སྐྲུན་ལས་ཡུལ་དུ་བློ་བཟང་རྒྱལ་མཚན་གྱིས་ལས་གྲྭ་སྐྲུན་འགོ་ཚུགས་པ་ནས་བཟུང་བློ་མཐུན་ཚོས་ལེགས་སྐྱེས་འབུལ་རྒྱུར་སྣང་ཆེན་དང་སྤྱི་ཡོངས་ལ་སྣང་ཆེན་གྱིས་ཁྱིམ་ཆུང་བློས་གཏོང་གིས་ཁྱིམ་ཆེན་བསྐྱངས་ཏེ་བོད་ཀྱི་འཕེལ་རྒྱས་བརྟན་ལྷིང་དང་བོད་ཀྱི་མི་རིགས་ཁག་གི་མི་དམངས་རྣམས་བདེ་སྐྱིད་ལྡན་པའི་འཚོ་བ་ཞིག་སྐྱེལ་རྒྱུ་ཡོང་བ་བྱ་ཆེད་དཀའ་སྤྱད་འབད་བརྩོན་གྱིས་ངལ་རྩོལ་བྱས་པས་ལས་དོན་དེར་ཁས་ལེན་བྱེད་འོས་པ་དང་སྙིང་སྟོབས་ལ་གུས་བཀུར་ཞུ་འོས་པ་ཞིག་འདུག་ཅེས་གསུངས་པ་དང་། ཁོང་གིས་ལས་གྲྭ་འཛུགས་སྐྲུན་ནང་ཞུགས་མཁན་ཚན་པ་དང་འཛུགས་སྐྲུན་པ་ཚོར་ཡང་འབད་བསྐྱར་འབད་དང་དཀའ་སྤྱད་འབད་བརྩོན་གྱིས་ཡར་རྒྱས་བརྩོན་ལེན་བྱས་ཏེ་དུས་བཀག་ལྟར་རླངས་འཁོར་ཤར་གཏོང་ཐུབ་པའི་འགན་ལེན་བྱེད་དགོས་པའི་བླང་བྱ་བཏོན་གནང་བ་རེད།