འདི་ནི་བྲག་རྩ་གྲོང་ཚོའི་བྱིས་གསོ་ཁང་གི་བྱིས་པ་ཚོས་སྤྲོ་འཕེལ་རོལ་རྩེད་རྩེ་བཞིན་པ།

འདི་ནི་བྲག་རྩ་གྲོང་ཚོའི་གནས་སྤོས་ཡུལ་མིའི་སྡོད་ཁང་ཡིན་པ།

འདི་ནི་བྲག་རྩ་གྲོང་ཚོའི་ཏང་ཀྲི་པུའི་ཧྲུའུ་ཅི་དང་པོ་ཕུར་བུ་བསྟན་འཛིན་ཡིན་པ།

འདི་ནི་བྲག་རྩ་གྲོང་ཚོའི་སློབ་ཆུང་གི་སློབ་ཁང་ཡིན་པ།

དེ་བས་མང་བའི་ནང་དོན་ཤེས་འདོད་ན་རྩ་གཉིས་ཨང་རྟགས་འདི་བཤེར་རོགས།

ཆ་སྙོམས་ས་བབ་མཐོ་ཚད་སྨི་4600ཙམ་གྱི་སར་གནས་པའི་བྲག་རྩ་གྲོང་ཚོར་སྐྱི་སེར་རླུང་བུ་བསིལ་བསིལ་དུ་ལྡང་ཞིང་། རྒྱང་ནས་བལྟས་ན་ཡངས་པའི་རྩྭ་ཐང་གསེར་ཞུན་ཐང་ལ་བརྡལ་བ་དང་འདྲ་བར་སེར་ཐིང་ངེར་གནས་པ་དང་། ཉེ་འགྲམ་གྱི་རྩྭ་ཕྲན་སེར་པོའི་གསེབ་ན་གསོན་ཤུགས་ཀྱིས་ཁེངས་པའི་རྩྭ་གསར་དག་མགོ་བོ་བུས་ནས་རྩྭ་ཁར་དོན་ལ་ཁད་དུ་སྣང་། རྩྭ་ཆུར་རོལ་བཞིན་པའི་རྒྱང་རིང་གི་ནོར་ནག་དང་། གཡང་དཀར་ལུ་གུ་ནི་ནམ་མཁའི་སྐར་ཚོགས་ས་ལ་འཕོས་པ་དང་འདྲ་ལ། རྐྱང་དང་། དགོ་བ། གཉན་སོགས་བདག་མེད་སྲོག་ཆགས་རེ་ཟུང་གྲོང་ཚོ་དང་མི་རིང་བའི་སར་ཅི་དགར་རྒྱུ་བཞིན་མཆིས། བྲག་རྩ་གྲོང་ཚོ་ནི་འབྲོག་ལས་རྐྱང་པའི་གྲོང་ཚོ་ཞིག་ཡིན་ཞིང་། ས་བབ་མཐོ་ལ། གསོ་རླུང་དཀོན་པ་དང་གནམ་གཤིས་གྲང་ངར་ཆེ། དེ་ལྟར་ནའང་ཏང་གི་དམངས་ཕན་སྲིད་ཇུས་བཟང་པོའི་འོད་ཟེར་བྲག་རྩ་གྲོང་ཚོར་འཕྲོས་པ་དང་གྲོང་གསེབ་དར་རྒྱས་ཀྱི་བྱ་གཞག་ལ་དཔྱིད་དཔལ་རབ་ཏུ་བཞད།

ཡང་སྒོས་ལས་ལ་བརྩོན་པའི་བྲག་རྩ་གྲོང་ཚོའི་ཡུལ་མི་ཚོས་དཀའ་སྤྱད་ཀྱི་རྔུལ་ཆུས་འབྱོར་འབྲིང་འཚོ་བའི་ཞིང་ས་བརླན་ནས་མི་སྨོན་རང་སྐྱིད་ཀྱི་བདེ་སྐྱིད་ལྡན་པའི་འཚོ་བའི་ལམ་ཆེན་དུ་སྐྱོད་བཞིན་ཡོད། 2018ལོའི་ཟླ་དང་པོར་བྲག་རྩ་གྲོང་ཚོའི་གནས་སྤོ་བཀོད་སྒྲིག་རྣམ་གྲངས་ལས་འགོ་ཚུགས་པ་དང་། རི་འདབས་ཀྱི་ཡངས་ཤིང་འཁོད་སྙོམས་པའི་ཐང་སྡེར་དུ་སྤོ་རྒྱུའི་སེམས་ཐག་བཅད། སྐབས་དེ་དུས་ཡུལ་མི་མང་པོ་ཞིག་རི་སྟེང་གི་འཚོ་བར་གོམས་ནས་རི་འདབས་སུ་སྤོ་འདོད་དེ་ཙམ་མི་བྱེད་པས། གྲོང་ཚོའི་ཀྲི་པུའི་ཧྲུའུ་ཅི་བཀྲ་ཤིས་ཕུན་ཚོགས་ཀྱིས་ཚང་མའི་ཁྱིམ་དུ་བསྐྱོད་དེ། དེ་གའི་རྨང་གཞིའི་སྒྲིག་བཀོད་དང་། ཁང་པའི་གྲུབ་ཆ་དང་། རྒྱ་ཁྱོན། བཟོ་ལྟ། ནུས་པ་སོགས་ཡང་བསྐོར་བསྐྱར་བསྐོར་གྱིས་འགྲེལ་བཤད་གསལ་པོ་བརྒྱབ། མཐར་2020ལོའི་ཟླ་བ་དྲུག་པར་དུད་ཚང་169ཡི་མང་ཚོགས་788ཁང་པ་གསར་པར་སྤོས་པ་དང་། དེ་དག་ལས་དུད་ཚང་79ཡི་མང་ཚོགས་290ནི་ཡིག་ཚགས་དང་གཱ་བཟོས་པའི་དུད་ཚང་དབུལ་པོ་ཡིན་པ་རེད། ཡིག་ཚགས་དང་གཱ་བཟོས་པའི་དུད་ཚང་དབུལ་པོ་རེས་སྒོར་ཁྲི་གཅིག་ལས་གྲབས་གསོག་བྱེད་མི་དགོས་པ་དང་། དུད་ཚང་གཞན་དག་གིས་ཁང་པའི་མ་དངུལ་བསྡོམས་འབོར་གྱི་30%ལས་གྲབས་གསོག་བྱེད་དགོས་ཀྱི་མེད་པས། མང་ཚོགས་དཔལ་འབྱོར་གྱི་ཁུར་པོ་ཡང་དུ་ཕྱིན་པ་མ་ཟད། སྡོད་ཁང་གི་ཆ་རྐྱེན་ཡང་དེ་སྔ་ལས་ལྡབ་ཁ་ཤས་ཀྱིས་ལེགས་སུ་ཕྱིན་པ་རེད།

གསར་འགོད་པ་དེ་གར་སླེབས་སྐབས། གྲལ་སྟར་སྒྲིག་པའི་ཁང་པ་གསར་པའི་བཀོད་པ་མཛེས་ལ། སྒོ་ར་རྒྱ་ཆེ་ཞིང་དཀར་ཆ་དོད་པ་དང་། ཁང་པའི་ནང་གསང་སྤྱོད་དང་འཁྲུད་ཁང་ཡོད་པ་མ་ཟད། བརྙན་འཕྲིན་དང་འཁྱགས་སྒམ། དྲོད་སྙོམས་འཕྲུལ་ཆས་སོགས་དེང་རབས་ཀྱི་ཁྱིམ་ཆས་གང་དགོས་ཚང་འདུག གྲོང་ཚོའི་ཁོ་ར་ཁོར་ཡུག་ཀུན་ཏུ་གཙང་སྦྲ་ཤིན་ཏུ་དོད་ལ། ལམ་དང་། གློག དྲ་རྒྱ། ཆུ་ཀ་ལ། གསང་སྤྱོད། ལུས་སྦྱོང་སྒྲིག་ཆས། ཏང་ཡོན་དང་མང་ཚོགས་ཀྱི་བྱེད་སྒོ་ཁང་། འབྲོག་པའི་དཔེ་ཁང་། དུས་རབས་གསར་པའི་ཤེས་དཔལ་ལག་ལེན་ས་ཚིགས། རིག་གནས་ཐང་ཆེན། གད་སྙིགས་བསྡུ་རུབ་ས་ཚིགས། རླངས་འཁོར་འཇོག་ས། སྦྲག་ལས། སློབ་གྲྭ་སོགས་རྨང་གཞིའི་སྒྲིག་བཀོད་འཐུས་སྒོ་ཤིན་ཏུ་ཚང་བས། དེ་སྔ་བར་ཐག་སྨི་500ཡི་སར་ཆུ་ཟོམ་སྒལ་པར་ཁུར་ནས་ཆུ་ལེན་པ་དང་། ས་རྡོ་ལས་གྲུབ་པའི་ཁང་པ་རྒྱ་ཆུང་ལ། དཀར་ཆ་དོད་པོ་མེད་པས་ཉིན་མོའང་གློག་སྤོར་དགོས་པ་དང་ཁང་པའི་རྒྱབ་མདུན་གང་སར་གད་སྙིགས་མང་ལ་ཟང་ཟིང་ཆེ་བ། སློབ་གྲྭ་དང་སྨན་ཁང་རི་འདབས་སུ་གནས་པས་རྐང་ཐང་མར་ཆུ་ཚོད་ཕྱེད་ཀ་ཙམ་སྐྱོད་དགོས་པ་སོགས་ཀྱི་རྣམ་པར་རྦད་དེ་འགྱུར་ལྡོག་འགྲོ་གི་རེད་སྙམ་པ་ཡུལ་མི་རྣམས་ཀྱི་བསམ་པའི་ཡུལ་ལའང་མེད། ད་ལྟ་གྲོང་ཚོའི་བུ་བཅོལ་ཁང་དུ་སློབ་གྲྭར་འགྲོ་མུས་ཀྱི་བྱིས་པ་64དང་། གྲོང་ཚོའི་སློབ་ཆུང་དུ་སློབ་གྲྭར་འགྲོ་མུས་ཀྱི་བྱིས་པ་190ཡོད་ཅིང་། ཟས་གོས་སྡོད་གསུམ་ལ་སེམས་ཁྲལ་མེད་ལ། རང་ཁྱིམ་གྱི་ཉེ་འགྲམ་ནས་ལོ་དགུའི་ལམ་ལུགས་ཀྱི་འོས་འགན་སློབ་གསོ་མྱོང་ཐུབ་ཀྱི་ཡོད་པས། ཚང་མས་མགྲིན་གཅིག་ཏུ་རི་འདབས་སུ་སྤོས་ན་གང་ཅིའི་ཐད་སྟབས་བདེ་པོ་འདུག་ཅེས་དགའ་ཚོར་ཆེན་པོས་བརྗོད་ཀྱི་ཡོད།

བྲག་རྩ་གྲོང་ཚོར་འབྲོག་ལས་བཟང་ནའང་། འབྲོག་དུད་ཚན་པར་བྱས་པའི་སྲོལ་རྒྱུན་གྱི་རག་ལས་རྣམ་པའི་འབྲོག་ལས་ཐོན་སྐྱེད་བྱེད་སྟངས་ཁོ་ནར་བརྟེན་ན། རང་ཁ་རང་གསོ་ཙམ་ལས་ཁྲོམ་རར་ཕྱོགས་མི་ཐུབ་པས། ཡོང་འབབ་དེ་ཙམ་བཟང་པོ་མེད། དོན་དེར་དམིགས་ནས་གྲོང་ཚོའི་ཨུ་ལྷན་གཉིས་ཚན་ཁག་གི་ཁོངས་མིས་བརྟག་དཔྱད་གང་ལེགས་དང་མང་ཚོགས་ཀྱི་བསམ་ཚུལ་ཉན་རྗེས་ལེགས་བསྡུས་ཞིབ་གཉེར་བྱས་ཏེ་གྲོང་ཚོའི་རྩྭ་ར་དང་ཕྱུགས་རིགས་སོགས་ཐོན་སྐྱེད་རྒྱུ་ཆ་གྲོང་ཚོའི་ཚོགས་ཆུང་16གིས་གཅིག་གྱུར་དོ་དམ་བྱེད་པའི་ཐབས་ཤེས་བཏོན་པ་སྟེ། ཕྱུགས་རིགས་ཀྱི་མགོ་གྲངས་གཞིར་བཟུང་ཕྱུགས་འཚོ་བའི་ཉིན་གྲངས་གཏན་འཁེལ་བྱས་པ་དང་། མཉམ་ལས་ཚོགས་ཆུང་བཙུགས་ཏེ་བཞོན་མ་མགོ་གྲངས་18ཡན་ཟིན་པར་འོ་མ་བཞོ་བའམ། མར་འདོན་པ། ཡང་ན་ཕྱུར་བ་བཟོ་མཁན་གྱི་མི་གཅིག་གཏོང་དགོས་པ་དང་། བཞོན་མ་18ཡན་མ་ཟིན་པར་འབྲོག་དུད་ཆེ་བར་བཅོལ་ནས་བཞོན་མའི་མགོ་གྲངས་གཞིར་བཟུང་གླ་ཆ་སྤྲོད་དགོས་པའི་གཏན་འབེབས་བྱས་པ་རེད།

ཆོས་ཉིད་ཕུན་ཚོགས་ནི་བྲག་རྩ་གྲོང་ཚོའི་ཕྱིར་ཚོང་ལས་ལ་སྐྱོད་མཁན་ཐོག་མའི་གྲས་ཡིན་ཞིང་། ལོ་25ལས་མ་སོན་པའི་ཆོས་ཉིད་ཕུན་ཚོགས་ཀྱིས་1995ལོར་རང་ཁྱིམ་གྱི་ཕྱུགས་ཟོག་བཙོངས་པའི་སྒོར་900མ་རྩར་བྱས་ནས་ཚོང་གི་སྒོ་མོ་ཐོག་མར་ཕྱེ། ཕ་ཚ་བུ་རྒྱུད་འབྲོག་ལས་གཙོ་བོར་བྱེད་པའི་བྲག་རྩ་བ་མང་པོ་ཞིག་གིས་ཁོང་གི་བྱེད་སྟངས་དེ་གླེན་རྟགས་ཚ་པོ་ཞིག་ལ་བརྩི་ནའང་སྲོལ་རྒྱུན་གྱི་ལྟ་བ་རྙིང་པ་དོར་ནས་གྲོང་ཁྱེར་དུ་རང་མགོ་ཐོན་པར་བྱེད་པའི་དམ་བཅའ་བརྟན་པོ་བཞག་ཟིན་པས། རྒྱ་སྐད་ཐ་རེ་ཐོ་རེ་སྦྱོང་ཞོར་ལྷ་སའི་ཁྲོམ་གཟིགས་སྒང་གི་ཟུར་དུ་ཕྱུར་བ་བཙོངས་ནས་བསྡད། ཞོགས་སྔ་ལངས་དང་དགོང་ཕྱི་ཉལ་གྱིས་ཕྱུར་བ་འགྱིག་ཤོག་རེ་རེ་བཙོངས་ནས་བསགས་བསགས་གྲུང་གྲུང་བྱས་པའི་དངུལ་གྱིས་བར་སྐོང་ཚོང་ཁྲོམ་དུ་ཁྲོམ་བཀྱག་བཞི་ཉོས་པ་དང་། དེ་ནས་ཡང་ལྷ་སར་ཁང་པ་ཉོས་པའི་བར། ལོ་བཅུ་གྲངས་ཁ་ཤས་ཉིན་གཅིག་ལྟར་དཀའ་སྤྱད་རྔུལ་ཆུས་འཚོ་བའི་ཞིང་ས་བརླན་པ་ནི་ཟུར་བལྟས་ལེབ་མཐོང་རེད།

སངས་རྒྱས་ཀྱི་ཁྱིམ་ཚང་2016ལོར་དུད་ཚང་དབུལ་པོ་ལ་གཏན་འཁེལ་བྱས་པ་དང་། གྲོང་ཚོའི་ཡུལ་མི་མི་ཉུང་བ་ཞིག་ཕྱིར་ཚོང་ལས་ལ་བསྐྱོད་ནས་ཕྱུག་པོར་གྱུར་བ་མཐོང་དུས། སངས་རྒྱས་ཀྱིས་ཀྱང་རང་ཁྱིམ་གྱི་འབྲོག་ཟོག་ལྷ་སར་འཚོང་བའི་སེམས་ཐག་བཅད་པ་དང་། སྐབས་ཤིག་ལ་རྩྭ་རས་དཔུང་པར་ཁྱེར་ནས་དབྱར་ཉི་མའི་ཚ་གདུག་དང་དགུན་ལྷགས་པའི་གྲང་ངར་གདོང་གིས་བསུས་ནས་ལྷ་སའི་ཁྲོམ་གཞུང་དང་སྲང་ལམ་གང་སར་ཉུལ་བས་ན། ཡུན་ཐུང་ལོ་འགའི་ནང་ལྷ་སར་ཁྲོམ་བཀྱག་ཉོ་ཐུབ་པ་མ་ཟད། དབུལ་པོའི་གནས་ལས་གྲོལ་ནས་ལོའི་ཡོང་འབབ་སྒོར་ཁྲི་10ཙམ་ཟིན་ཡོད། ཆོས་ཉིད་ཕུན་ཚོགས་དང་སངས་རྒྱས་ནི་ཕྱིར་ཚོང་ལས་ལ་སྐྱོད་མཁན་བྲག་རྩ་བ་གྲངས་ལས་འདས་པའི་དཔེ་མཚོན་ཙམ་རེད།

བྲག་རྩ་གྲོང་ཚོའི་ཏང་ཀྲི་པུའི་ཧྲུའུ་ཅི་དང་པོ་ཕུར་བུ་བསྟན་འཛིན་གྱིས་ངོ་སྤྲོད་བྱས་པར་གཞིགས་ན། 2021ལོ་ཁོ་ནར། དུད་ཁྱིམ་485ཡི་མང་ཚོགས་2150ལས་ཕྱིར་ཚོང་ལས་དང་གླ་པར་འགྲོ་མཁན་789ཟིན་པ་དང་། ལོ་མཇུག་ཏུ་མང་ཚོགས་ཀྱི་བཅོལ་དངུལ་སྒོར་ཁྲི་6000ཡན་ཟིན་ནས་སྒོར་ཁྲི་བརྒྱ་ཡན་གྱི་ཕྱུག་བདག་མི་ཉུང་བ་ཐོན་ཡོད་པ་རེད།

ད་ཆ་བྲག་རྩ་གྲོང་ཚོ་ནི“ཐོན་ལས་དར་ཞིང་རྒྱས་པ་དང་། སྐྱེ་ཁམས་ལེགས་ཤིང་སྡོད་མལ་ལ་འཚམ་པ། ཡུལ་སྲོལ་གོམས་གཤིས་བཟང་བ། བཅོས་སྐྱོང་ལེགས་པ། འཚོ་བ་འབྱོར་ཞིང་ཕྱུག་པ”བཅས་གྲོང་གསེབ་དར་རྒྱས་ཀྱི་དཔེ་མཚོན་གྲོང་ཚོ་ཞིག་ཏུ་གྱུར་ཡོད།