གཞུང་འཁྱོངས་གསར་འབྱེད་ཅེས་པ་ནི་ཡང་དག་པའི་བྱ་བ་བརྟན་སྲུང་བྱེད་པ་མ་ཟད། སྐད་ཆ་གསར་པ་ཤོད་པ་དང་བྱ་བ་གསར་པ་སྒྲུབ་པར་ཡང་ཟེར། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས“ང་ཚོས་སྒྲུབ་བཞིན་པ་ནི་སྔར་བྱུང་མ་མྱོང་བའི་བྱ་གཞག་རླབས་པོ་ཆེ་ཡིན་པས། གཞུང་འཁྱོངས་བྱས་ན་གཞི་ནས་ཁ་ཕྱོགས་མི་འཛོལ་བ་དང་རྩ་སློག་རང་བཞིན་གྱི་ནོར་འཁྲུལ་ཤོར་མི་སྲིད་ལ། གསར་འབྱེད་བྱས་ན་གཞི་ནས་དུས་རབས་ལ་སྟངས་འཛིན་དང་དུས་རབས་ལ་སྣེ་ཁྲིད་བྱེད་ཐུབ”ཅེས་གསུངས་ཡོད། མར་ཁེ་སི་རིང་ལུགས་ཀྲུང་གོ་ཅན་དང་དུས་རབས་ཅན་གྱི་གནས་ཚད་གསར་པ་ཟམ་མི་ཆད་པར་གཏོད་པར་ངེས་པར་དུ་གཞུང་འཁྱོངས་གསར་འབྱེད་མཐའ་འཁྱོངས་བྱེད་དགོས།

གཞུང་ཅི་ཞིག་འཁྱོངས་དགོས་ཤེ་ན། མར་ཁེ་སི་རིང་ལུགས་ཀྱི་གཞུང་འདི་འཁྱོངས་དགོས། མར་ཁེ་སི་རིང་ལུགས་ཀྲུང་གོ་ཅན་དང་དུས་རབས་ཅན་གྱི་བརྗོད་གཞི་གལ་ཆེན་འདི་ཉིད་ལས་ང་ཚོས་ཕྱོགས་གཅིག་ནས་བླ་སྲོག་ལྟ་བུའི་མར་ཁེ་སི་རིང་ལུགས་འདི་གཏན་ནས་འདོར་མི་རུང་བར་ངེས་པར་དུ་ཏང་དང་རྒྱལ་ཁབ་འཛུགས་པ་དང་ཏང་དང་རྒྱལ་ཁབ་དར་རྒྱས་གཏོང་བའི་རྩ་བ་ཡིན་པའི་མར་ཁེ་སི་རིང་ལུགས་འདིར་གཡོ་འགུལ་མི་འགྲོ་བ་མཐའ་འཁྱོངས་བྱེད་དགོས་པ་དང་། ཕྱོགས་གཞན་ཞིག་ནས་ང་ཚོས་རྩ་བ་ཡིན་པའི་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་གཏན་ནས་འདོར་མི་རུང་བར། ངེས་པར་དུ་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་དེ་སྤྱི་ཚོགས་རིང་ལུགས་སྤྱི་ཚོགས་དང་འཚམ་མཐུན་ཡོང་བར་སྐུལ་འདེད་གཏོང་བ་དང་། ཀྲུང་ཧྭ་མི་རིགས་ཀྱི་ཐུན་མོང་མ་ཡིན་པའི་བསམ་པའི་མཚོན་རྟགས་ངོམ་སྟེ་ཀྲུང་གོའི་སྙིང་སྟོབས་དང་། ཀྲུང་གོའི་རིན་ཐང་། ཀྲུང་གོའི་སྟོབས་ཤུགས་བཅས་སྔར་བས་ལེགས་པར་གཏོད་དགོས་པ་ཐག་བཅད་ཡོད། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས“ཏང་གི་ཕྱོགས་ཡོངས་ཀྱི་འགོ་ཁྲིད་མཐའ་འཁྱོངས་དང་། མར་ཁེ་སི་རིང་ལུགས་མཐའ་འཁྱོངས། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་མཐའ་འཁྱོངས། མི་དམངས་དམངས་གཙོའི་སྲིད་དབང་སྒེར་འཛིན་མཐའ་འཁྱོངས་བཅས་བྱས་ཏེ། སྤྱི་ཚོགས་ཀྱི་དྲང་སྙོམས་དྲང་བདེན་ལ་སྐུལ་འདེད་གཏོང་བ་དང་མི་དམངས་ཀྱི་བདེ་རྩ་ཆེ་རུ་གཏོང་རྒྱུ་དེ་འགོ་འཛུགས་ས་དང་དོན་ལ་འབབ་སར་བྱེད་པ་འདི་དག་ཚང་མ་རྩ་བ་དང་། ཁ་ཕྱོགས། ཕུགས་བཅས་ལ་ཕན་པ་ཞིག་ཡིན་ཞིང་། དེ་ཐོག་ནས་ཏང་གི་ངོ་བོ་དང་དམིགས་ཡུལ་མཚོན་ལ། རང་རྒྱལ་གྱི་རྒྱལ་བབ་དང་མཐུན་པ་དང་མི་དམངས་ཀྱི་རྩ་བའི་ཁེ་ཕན་དང་ཡང་མཐུན་པས། དུས་གང་རུང་ཞིག་དང་གནས་ཚུལ་གང་འདྲ་ཞིག་གི་འོག་ཏུའང་གཡོ་འགུལ་སྤུ་ཙམ་ཡང་གཏོང་མི་རུང”ཞེས་ནན་བཤད་གནང་ཡོད།

གསར་པ་གང་ཞིག་གཏོད་དགོས་ཤེ་ན། འཛམ་གླིང་ལ་དུས་དང་རྣམ་པ་ཀུན་ཏུ་འགྱུར་ལྡོག་འགྲོ་བཞིན་ཡོད་ལ། ཀྲུང་གོར་ཡང་དུས་དང་རྣམ་པ་ཀུན་ཏུ་འགྱུར་ལྡོག་འགྲོ་བཞིན་ཡོད་པས། ང་ཚོས་ངེས་པར་དུ་རིགས་པའི་གཞུང་ལུགས་ཐད་ནས་དུས་རབས་ཀྱི་རྗེས་ཟིན་པ་དང་། ཆོས་ཉིད་ལ་རྒྱུན་ཆད་མེད་པར་ངོས་འཛིན་བྱས་ཏེ། རིགས་པའི་གཞུང་ལུགས་ཀྱི་གསར་གཏོད་དང་། ལག་ལེན་གྱི་གསར་གཏོད། ལམ་ལུགས་ཀྱི་གསར་གཏོད། རིག་གནས་ཀྱི་གསར་གཏོད་བཅས་དང་། དེ་བཞིན་ཕྱོགས་གཞན་པའི་གསར་གཏོད་ལ་སྐུལ་འདེད་རྒྱུན་ཆད་མེད་པར་གཏོང་དགོས། རིགས་པའི་གཞུང་ལུགས་ཀྱི་གསར་གཏོད་མཐའ་འཁྱོངས་བྱེད་པར་ཕྱོགས་གཅིག་ནས་ངེས་པར་དུ་སྐད་ཆ་གསར་པ་ཤོད་དགོས་ཤིང་། ང་ཚོས་མར་ཁེ་སི་ལེ་ཉིང་རིང་ལུགས་སློབ་སྦྱོང་བྱེད་དགོས་མོད། འོན་ཀྱང་མར་ཁེ་སི་ལེ་ཉིང་རིང་ལུགས་ཀྱི་གསུང་རབ་བཀའ་རྩོམ་གྱིས་དོན་དངོས་ཀྱི་གནད་དོན་ཐག་གཅོད་བྱེད་པར་ཐད་ཀའི་ལན་འདེབས་མི་ཐུབ་པས། དེའི་རྩ་བའི་རིགས་པ་དང་། ལངས་ཕྱོགས། ལྟ་བ། ཐབས་ཤེས་བཅས་སྤྱད་དེ། རང་ཉིད་ཀྱི་འཚོལ་ཞིབ་དང་། བསམ་གཞིག གསར་གཏོད་བཅས་ལ་བརྟེན་ནས་ལན་འདེབས་དགོས་པ་དང་། ཕྱོགས་གཞན་ཞིག་ནས་ངེས་པར་དུ་རང་རྒྱལ་ཁབ་དང་རང་མི་རིགས་ཀྱི་ལོ་རྒྱུས་རིག་གནས་ཀྱི་ས་གཞི་གཤིན་པོར་རྩ་བ་ཚུགས་ཏེ་མར་ཁེ་སི་རིང་ལུགས་འཕེལ་རྒྱས་གཏོང་མཚམས་མི་འཇོག་པ་མཐའ་འཁྱོངས་བྱེད་པ་དང་། ལོ་རྒྱུས་ཀྱི་གདེང་ཚོད་དང་རིག་གནས་ཀྱི་གདེང་ཚོད་བརྟན་དུ་གཏོང་བ། གནའ་བཟང་དེང་སྤྱོད་དང་རྙིང་འབུད་གསར་འདོན་མཐའ་འཁྱོངས་བྱེད་པ། མར་ཁེ་སི་རིང་ལུགས་ལ་བརྟེན་ནས་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་ཁྲོད་ཀྱི་སྐྱེ་སྟོབས་མ་ཉམས་པའི་གཞི་རྒྱུ་དག་གི་གསོན་ཤུགས་འཕེལ་བར་བྱེད་པ་དང་འབྲེལ་དུས་རབས་ཀྱི་ནང་དོན་གསར་པ་སྣོན་པ། ཀྲུང་ཧྭ་མི་རིགས་ཀྱི་སྙིང་སྟོབས་རླབས་པོ་ཆེ་དང་ཕུན་སུམ་ཚོགས་པའི་བློ་གྲོས་དེ་དག་མར་ཁེ་སི་རིང་ལུགས་ནང་དེ་བས་གཏིང་ཟབ་པོས་འཇུག་པ་བཅས་བྱས་ཏེ། རིགས་པའི་གཞུང་ལུགས་ཀྱི་ལེགས་ཆ་གསར་པ་ཞིག་ཏུ་འགྱུར་བ་བྱས་ནས། བསམ་བློའི་མཐོ་ཚད་གསར་པར་མུ་མཐུད་འཛེག་དགོས།

གཞུང་འཁྱོངས་གསར་འབྱེད་མཐའ་འཁྱོངས་བྱེད་པ་ནི་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པའི་རིགས་པའི་གཞུང་ལུགས་ཀྱི་ཆུ་ཚད་ཅིག་རེད། ང་ཚོས་ཚན་རིག་དང་མཐུན་པའི་རྣམ་འགྱུར་གྱི་ཐོག་ནས་ཚན་རིག་ལ་ལྟ་སྟངས་འཛིན་པ་དང་། བདེན་དོན་གྱི་སྙིང་སྟོབས་ལ་བརྟེན་ནས་བདེན་དོན་དོན་གཉེར་བྱེད་པ། མར་ཁེ་སི་རིང་ལུགས་ཀྱི“མདའ་མོ”སྤྱད་དེ་དུས་རབས་གསར་པའི་ཀྲུང་གོའི“འབེན”ལ་འཕེན་རྒྱུ་མཐའ་འཁྱོངས་བྱེད་པ། ལྷག་བསམ་རྣམ་པར་དག་པའི་སྒོ་ནས་གསར་ཐོན་བྱ་དངོས་ཡོད་ཚད་ལ་ལྟ་སྟངས་འཛིན་པ། ངོས་འཛིན་གྱི་རྒྱ་ཆེ་ཚད་དང་གཏིང་ཟབ་ཚད་རྒྱུན་ཆད་མེད་པར་ཆེ་རུ་གཏོང་བ། སྔ་རབས་པས་བཤད་མ་མྱོང་བའི་སྐད་ཆ་གསར་པ་ཤོད་ཕོད་པ་དང་། སྔ་རབས་པས་བསྒྲུབས་མ་མྱོང་བའི་བྱ་བ་སྒྲུབ་ཕོད་པ། རིགས་པའི་གཞུང་ལུགས་གསར་པས་ལག་ལེན་གསར་པར་མཛུབ་ཁྲིད་བཅས་བྱས་ཏེ་ལག་ལེན་གྱི་རྨང་གཞིའི་ཐོག་རིགས་པའི་གཞུང་ལུགས་ཀྱི་གསར་གཏོད་ལ་སྐུལ་འདེད་རྒྱུན་ཆད་མེད་པར་གཏོང་དགོས།