ཟླ་3ཚེས་3ཉིན། རྒྱལ་ཡོངས་སྲིད་གྲོས་སྐབས་བཅུ་བཞི་པའི་ཚོགས་འདུ་ཐེངས་བཞི་པའི་གསར་འགྱུར་ཡོངས་བསྒྲགས་ཚོགས་འདུ་པེ་ཅིང་མི་དམངས་ཚོགས་ཁང་ཆེ་མོར་འཚོགས་ཤིང་། ཚོགས་ཆེན་གྱི་གསར་འགྱུར་མགྲིན་ཚབ་པ་ལིའུ་ཅེ་དབྱི་ཡིས་ཀྲུང་གོ་དང་ཕྱི་རྒྱལ་གྱི་སྨྱན་སྦྱོར་ལ་ཚོགས་ཆེན་གྱི་འབྲེལ་ཡོད་གནས་ཚུལ་ངོ་སྤྲོད་གནང་བ་དང་འབྲེལ། གསར་འགོད་པའི་དྲི་བར་ཡང་ལན་བསྐྱོན་པ་རེད། འདི་ནི་གསར་འགོད་པས་གསར་འགྱུར་ཡོངས་བསྒྲགས་ཚོགས་འདུའི་ཐོག་ལག་པ་བརྐྱངས་ནས་དྲི་བ་འདོན་བཞིན་པ།

ཤིན་ཧྭ་གསར་འགྱུར་ཁང་པེ་ཅིང་ནས་ཟླ་3ཚེས་3ཉིན་གློག་འཕྲིན་འབྱོར་གསལ། ཚེས་3ཉིན་གྱི་ཕྱི་དྲོ་རྒྱལ་ཡོངས་སྲིད་གྲོས་སྐབས་བཅུ་བཞི་པའི་ཚོགས་འདུ་ཐེངས་བཞི་པའི་གསར་འགྱུར་ཡོངས་བསྒྲགས་ཚོགས་འདུ་མི་དམངས་ཚོགས་ཁང་ཆེ་མོར་འཚོགས་ཤིང་། ཚོགས་ཆེན་གྱི་གསར་འགྱུར་མགྲིན་ཚབ་པ་ལིའུ་ཅེ་དབྱི་ཡིས་རྒྱལ་ཡོངས་སྲིད་གྲོས་སྐབས་བཅུ་བཞི་པའི་ཚོགས་འདུ་ཐེངས་བཞི་པ་ཟླ་3ཚེས་4ཉིན་གྱི་ཕྱི་དྲོའི་ཆུ་ཚོད་3པར་མི་དམངས་ཚོགས་ཁང་ཆེ་མོར་འཚོགས་ནས་ཟླ་3ཚེས་11ཉིན་གྱི་སྔ་དྲོ་མཇུག་འགྲིལ་རྒྱུ་དང་ཚོགས་ཡུན་ཉིན་7རེད་ཅེས་ངོ་སྤྲོད་གནང་བ་རེད།

གསར་འགྱུར་ཡོངས་བསྒྲགས་ཚོགས་འདུའི་ཐོག་གསར་འགྱུར་མགྲིན་ཚབ་པས་ཀྲུང་གོ་དང་ཕྱི་རྒྱལ་གྱི་གསར་འགོད་པ་དང་སྤེལ་རེས་གཏིང་ཟབ་གནང་བ་དང་ཆུ་ཚོད་1ལྷག་ཙམ་ནང་ཀྲུང་གོ་དང་ཕྱི་རྒྱལ་གྱི་གསར་འགོད་པའི་དྲི་བ་བཅུ་གྲངས་ལ་ལན་བསྐྱོན་པ་རེད།

ལྟེ་བར་དམིགས་པ་དང་སྤྱི་ཡོངས་ལ་ཞབས་འདེཌ་ཞུས་ཏེ“ལོ་ལྔ་ཚན་བཅུ་བཞི་པའི”མཇུག་བསྡུ་བ་དང“ལོ་ལྔ་ཚན་བཅོ་ལྔ་པའི”ཐབས་འདོན་ཇུས་འབུལ་བྱེད་པར་རམ་འདེགས་བྱས་པ།

མི་དམངས་ཚོགས་ཁང་ཆེ་མོའི་ཐོག་སོ་དང་པོའི་གསར་འགྱུར་ཡོངས་བསྒྲགས་ཚོམས་ཆེན་དུ་མི་ཧ་ཅང་མང་ཞིང་། ཀྲུང་གོ་དང་ཕྱི་རྒྱལ་གྱི་གསར་འགོད་པ་སྔ་ས་ནས་ཚོགས་རར་སླེབས་ཏེ་བརྙན་ལེན་འཕྲུལ་ཆས་དང་། པར་ཆས། ལག་ཐོགས་ཁ་པར་སོགས་སྒྲིག་ཆས་སྤྱད་དེ་འཛམ་གླིང་ས་ཆ་ཁག་ལ་ཡོངས་བསྒྲགས་ཚོགས་འདུའི་གནས་ཚུལ་གསར་ཤོས་དུས་ཐོག་ཏུ་གཏོང་སྤེལ་བྱེད་ཀྱི་ཡོད་པ་རེད།

ལིའུ་ཅེ་དབྱི་ཡིས་གསུངས་དོན། ཚོགས་ཆེན་རིང་། འགོ་ཚུགས་ཚོཌ་འདུ་དང་མཇུག་འགྲིལ་ཚོགས་འདུ་འཚོག་རྒྱུ་དང་དེ་བཞིན་ཚོགས་ཆེན་ཐོག་གཏམ་བཤད་ཐེངས་2སྤེལ་རྒྱུ། ཨུ་ཡོན་ཁག་གི་བཞུགས་གནས་སུ་ཁག་སོ་སོར་རིགས་ཁོངས་དང་ཚོགས་ཆུང་གི་ཚོགས་འདུ་ཐེངས་མང་འཚོག་རྒྱུ། རིགས་ཁོངས་ཁག་གཅིག་གིས་ད་དུང་རིགས་ཁོངས་ཀྱི་གྲོས་མོལ་ཚོགས་འདུ་འཚོག་རྒྱུ་རེད། འགོ་ཚུགས་ཚོགས་འདུ་དང་མཇུག་འགྲིལ་ཚོགས་འདུའི་ཐོག་ཀྲུང་གོར་བཅའ་སྡོད་ཕྱི་རྒྱལ་གྱི་ཕོ་ཉ་ཟུར་ཉན་བྱེད་པར་གདན་དྲངས་ཡོད་པ་རེད། ཚོགས་ཆེན་གྱིས“ཨུ་ཡོན་བགྲོད་ལམ”གྱི་བཅར་འདྲིའི་བྱེད་སྒོ་ཐེངས་3གཉེར་རྒྱུ་ཡིན་པ་རེད།

2025ལོ་ནི“ལོ་ལྔ་ཚན་བཅུ་བཞི་པའི”འཆར་འགོད་མཇུག་བསྡུའི་ལོ་དང“ལོ་ལྔ་ཚན་བཅོ་ལྔ་པའི”འཆར་འགོད་ལ་འཐབ་འགོད་ཇུས་འདོན་བྱེད་པའི་ལོ་ཞིག་རེད།

ལིའུ་ཅེ་དབྱི་ཡིས་གསུངས་དོན། ལོ་ལྔའི་རིང་། རྒྱལ་ཡོངས་སྲིད་གྲོས་ཀྱིས“ལོ་ལྔ་ཚན་བཅུ་བཞི་པའི”འཆར་འགོད་ཁྲོད་ཀྱི་གནད་དོན་གལ་ཆེན་ལ་དམིགས་ནས་བརྟག་དཔྱད་ཞིབ་འཇུག་དང་སྤུས་ཚད་མཐོ་བའི་གྲོས་མོལ་གྲོས་འདོན་ཏན་ཏིག་བྱས་ཏེ། ཐབས་ཇུས་ལེགས་གཏོང་དང་ཐབས་ཇུས་དོན་འཁྱོལ་ལ་སྐུལ་འདེད་གཏོང་རོགས་བྱས་ནས“ལོ་ལྔ་ཚན་བཅུ་བཞི་པའི”འཆར་འགོད་ཀྱི་དམིགས་ཚད་དང་ལས་འགན་ལེགས་གྲུབ་ཡོང་བའི་མཉམ་ཤུགས་ཤིག་ཆགས་པར་སྐུལ་འདེད་བཏང་ཡོད།

“ཚན་རིག་དང་མཐུན་པའི་སྒོ་ནས‘ལོ་ལྔ་ཚན་བཅོ་ལྔ་པའི’འཆར་འགོད་བཟོ་བར་རམ་འདེགས་བྱེད་པ་ནི་རྒྱལ་ཡོངས་སྲིད་གྲོས་ཀྱི་2025ལོའི་ལས་དོན་གྱི་ལས་འགན་གལ་ཆེན་ཞིག་རེད”ཅེས་ལིའུ་ཅེ་དབྱི་ཡིས་གསུངས་པ་དང་། ཁོང་གིས་རྒྱལ་ཡོངས་སྲིད་གྲོས་ཀྱིས“ལོ་ལྔ་ཚན་བཅོ་ལྔ་པའི”རིང་གི་དཔལ་འབྱོར་དང་སྤྱི་ཚོགས་འཕེལ་རྒྱས་ཁྲོད་ཀྱི་འགག་རྩའི་རང་བཞིན་དང་ཐག་གཅོད་རང་བཞིན་གྱི་རྒྱུ་རྐྱེན་དང་། ཀྲུང་གོའི་ལུགས་ཀྱི་དེང་རབས་ཅན་གྱི་འཛུགས་སྐྲུན་ཁྲོད་ཐག་གཅོད་བྱེད་དགོས་པའི་རིགས་པའི་གཞུང་ལུགས་དང་ལག་ལེན་གྱི་གནད་དོན་གལ་ཆེན། རྒྱལ་ལམ་གསར་པའི་ཐོག་འཕེལ་ཕྱོགས་རང་བཞིན་དང་ཆོས་ཉིད་རང་བཞིན་ལྡན་པའི་འཕེལ་རྒྱས་དང་འགྱུར་ལྡོག་དང་རྒྱང་ལྟའི་རང་བཞིན་དང་ཁྲིད་སྟོན་རང་བཞིན་ལྡན་པའི་འཐབ་ཇུས་ཀྱི་ལས་འགན་ལ་དམིགས་ནས། ཆེད་དོན་སྲིད་གླེང་རང་བཞིན་གྱི་རྒྱུན་ལས་ཨུ་ལྷན་གྱི་ཚོགས་འདུ་འཚོགས་པ་སོགས་གྲོས་མོལ་སྲིད་གླེང་གི་བྱེད་སྒོ་སྤེལ་ཏེ། ཨུ་ཡོན་གྱི་བསམ་འཆར་དང་གྲོས་འགོ་རྒྱ་ཁྱབ་བསྡུ་ལེན་བྱས་ནས“ལོ་ལྔ་ཚན་བཅོ་ལྔ་པའི”འཆར་འགོད་བཟོ་བར་དཔྱད་གཞི་གལ་ཆེན་མཁོ་འདོན་བྱས་ཡོད་ཅེས་གསུངས་པ་རེད།

སྲིད་དོན་ཇུས་འབུལ་ཧུར་ཐག་བྱས་ནས་སྤུས་ཚད་མཐོ་བའི་འཕེལ་རྒྱས་ལ་སྟོབས་ཤུགས་སྐྱེས་སུ་ཕུལ་བ།

དཔལ་འབྱོར་གྲོས་གཞི་ནི་སྲིད་གྲོས་ཀྱིས་གྲོས་མོལ་སྲིད་གླེང་བྱེད་པའི་གཙོ་གནད་ཡིན། ལིའུ་ཅེ་དབྱི་ཡིས། འདས་ཟིན་པའི་ལོ་གཅིག་ནང་རྒྱལ་ཡོངས་སྲིད་གྲོས་ཀྱིས་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་རིགས་པའི་གཞུང་ལུགས་དང་ལག་ལེན་གྱི་གནད་དོན་གལ་ཆེན་ལ་དམིགས་ནས་ཞིབ་འཇུག་གཏིང་ཟབ་བྱས་ཏེ། དུས་ཚིགས་རེར་གཞི་ཆེའི་དཔལ་འབྱོར་གྱི་དུས་བབ་ལ་དབྱེ་ཞིབ་བྱེད་པའི་བཞུགས་མོལ་ཚོགས་འདུ་འཚོག་གི་ཡོད། སྒྱུར་བཅོས་འཕེལ་རྒྱས་ཀྱི་གནས་ཚུལ་གསར་པ་དང་གནད་དོན་གསར་པར་དམིགས་ནས་གྲོས་མོལ་ཐབས་འདོན་བྱས་ཏེ་འབྲེལ་ཡོད་ཕྱོགས་ཀྱི་ཐབས་ཇུས་ལ་དཔྱད་གཞི་མཁོ་འདོན་བྱས་ཡོད། འཕེལ་རྒྱས་ཀྱི་གདེང་ཚོད་བརྟན་དུ་གཏོང་རྒྱུར་དམིགས་ནས་སེམས་ནུས་གཅིག་སྒྲིལ་གྱིས་ལས་དོན་ཡག་པོ་བསྒྲུབས་ཏེ་ཀྲུང་གུང་ཀྲུང་དབྱང་གི་ལས་དོན་བཀོད་སྒྲིག་དེ་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་ཞིབ་ཕྲའི་བྱ་སྤྱོད་ཐོག་འཁྱོལ་བར་བྱས་ཡོད་ཅེས་ངོ་སྤྲོད་གནང་བ་རེད།

དེང་གི་དུས་རབས་འདིར་ཚན་རྩལ་ནི་ཐོན་སྐྱེད་ནུས་ཤུགས་ཨང་དང་པོ་ཡིན་པ་དང་། ཤེས་ལྡན་པ་ནི་ཐོན་ཁུངས་ཨང་དང་པོ་ཡིན་པ། གསར་གཏོད་ནི་སྒུལ་ཤུགས་ཨང་དང་པོ་ཡིན་པ། སློབ་གསོ་ནི་དེ་གསུམ་པོའི་འབྲེལ་ཐག་དང་ཐབས་ལམ་ལ་གྱུར་ཡོད།

ལིའུ་ཅེ་དབྱི་ཡིས་གསུངས་དོན། སློབ་གསོ་དང་། ཚན་རྩལ། ཤེས་ལྡན་པ་འཕེལ་རྒྱས་ལ་གཞི་གཅིག་ཏུ་སྐུལ་འདེད་གཏོང་ཆེད། རྒྱལ་ཡོངས་སྲིད་གྲོས་ཀྱིས་སློབ་གསོ་ཚན་རྩལ་གྱི་ཤེས་ལྡན་པའི་སྒྲིག་གཞི་དང་ལམ་སྲོལ་གཞི་གཅིག་སྒྱུར་བཅོས་ལ་སྐུལ་འདེད་གཏོང་བའི་གཙོ་གནད་ལས་འགན་གཏན་འཁེལ་བྱས་པ་དང་། གཟིགས་ཞིབ་དང་། རྟོག་ཞིབ། བརྟག་ཞིབ་བཅས་དང་། གྲོས་མོལ་སྲིད་གླེང་སྒྲིག་འཛུགས་བྱས་ཏེ་འབྲེལ་ཡོད་གྲོས་གཞི་ཁག་103ཕུལ་ཡོད།

ལིའུ་ཅེ་དབྱི་ཡིས་གསུངས་དོན། འདས་ཟིན་པའི་ལོ་གཅིག་ནང་རྒྱལ་ཡོངས་སྲིད་གྲོས་ཀྱིས་ཆུ་ཚད་དེ་བས་མཐོ་བའི་སྒོ་དབྱེ་རྣམ་པའི་དཔལ་འབྱོར་སྒྲིག་སྲོལ་གསར་པ་འཛུགས་སྐྱོང་དང་། ཕྱི་ཕྱོགས་མ་འཇོག་གི་དོ་དམ་ཞབས་ཞུའི་མ་ལག་འཐུས་སྒོ་ཚང་དུ་གཏོང་བ། ནུབ་རྒྱུད་སྐམ་མཚོའི་བགྲོད་ལམ་གསར་པ་འཛུགས་སྐྲུན་སོགས་ལ་དམིགས་ནས་རྟོག་ཞིབ་གཏིང་ཟབ་བྱས་པས། སྤུས་ཚད་མཐོ་བའི་ཞིབ་འཇུག་སྙན་ཞུ་ཞིག་གྲུབ་སྟེ། ཕྱི་ཕྱོགས་ཚོང་དོན་གྱི་སྤུས་འབྲས་ལེགས་གཉེར་ལ་སྐུལ་འདེད་གཏོང་བ་དང་རྒྱལ་ནང་དང་རྒྱལ་སྤྱིའི་འཁོར་རྒྱུག་གཉིས་པོ་ཤར་གཏོང་ཐུབ་རྒྱུར་ཐབས་ཇུས་ཀྱི་དཔྱད་གཞི་མཁོ་འདོན་བྱས་ཡོད།

ཨུ་ཡོན་གྱི་བྱེད་པོའི་ནུས་པ་བཏོན་ནས་འགན་འཁྲི་སྒྲུབ་ནུས་ཆེ་རུ་དང་ཆུ་ཚད་མཐོ་རུ་བཏང་བ།

གྲོས་གཞིའི་ལས་དོན་ནི་མི་དམངས་སྲིད་གྲོས་ཀྱིས་རང་འགན་གཙང་སྒྲུབ་བྱེད་པའི་བྱ་ཐབས་གལ་ཆེན་ཞིག་ཡིན། ལིའུ་ཅེ་དབྱི་ཡིས།2025ལོར་རྒྱལ་ཡོངས་སྲིད་གྲོས་ཀྱིས་གྲོས་གཞིའི་ལས་དོན་གྱི་སྤུས་ཚད་མཐོ་རུ་གཏོང་བའི་ཐད་འཚོལ་ཞིབ་དང་གསར་གཏོད་ནུས་ལྡན་བྱས་ནས“གྲོས་འགོ་ཡག་པོ་འདོན་པ”དང“ལས་དོན་ཡག་པོ་སྒྲུབ་པ”“ལྟ་སྐུལ་ཡག་པོ་བྱེད་པ”བཅས་ཀྱི་ཐད་ཕན་འབྲས་མངོན་གསལ་དོད་པོ་ཐོན་ཡོད་ཅེས་ངོ་སྤྲོད་གནང་བ་རེད།

དཔེར་ན། ན་ནིང་སློབ་གསོ་པུའུ་སོགས་སྡེ་ཚན་ལྔས་མཉམ་འབྲེལ་ཐོག《སློབ་མའི་གཟུགས་གཞི་བདེ་ཐང་གི་འཆར་གཞི་ལག་བསྟར་བྱ་རྒྱུའི་སྐོར་གྱི་བསམ་འཆར》བཀྲམ་སྟེ། ཕྱོགས་8ཐད་ནས་བྱ་ཐབས་ཁག་20བཏོན་ནས་དུས་རབས་གསར་པའི་སློབ་མའི་ལུས་སེམས་བདེ་ཐང་ཡོང་བའི་སྲིད་ཇུས་ཀྱི་འཆར་གཞི་བཀོད་ཡོད། ལིའུ་ཅེ་དབྱི་ཡིས། བྱ་ཐབས་ཁག་20དེ་དག་གིས་བྱིས་པ་དང་གཞོན་ནུ་ལོ་ཆུང་གི་གཟུགས་གཞི་བདེ་ཐང་གི་ཆུ་ཚད་མཐོ་རུ་གཏོང་རྒྱུའི་སྐོར་གྱི་རྒྱལ་ཡོངས་སྲིད་གྲོས་ཀྱི་གྲོས་གཞིའི་ཁྲོད་ཀྱི་བསམ་འཆར་དང་གྲོས་འགོ་བསྡུ་ལེན་གང་ལེགས་བྱས་ཏེ་གསོ་སྐྱོང་ལྔ་དུས་གཅིག་ཏུ་བྱེད་པ་དང་མི་སྐྱོང་མཉམ་འདྲེས་ལ་སྐུལ་འདེད་གཏོང་བར་དགེ་མཚན་ལྡན་པའི་ནུས་པ་འདོན་སྤེལ་བྱས་ཡོད་ཅེས་ངོ་སྤྲོད་གནང་བ་རེད།

དམངས་གཙོའི་ལྟ་སྐུལ་ནི་མི་དམངས་སྲིད་གྲོས་ཀྱི་འགན་ནུས་གཙོ་བོའི་གྲས་ཤིག་ཡིན། “འདས་ཟིན་པའི་ལོ་ལྔའི་རིང་རྒྱལ་ཡོངས་སྲིད་གྲོས་ཀྱི་ཆེད་དོན་ཨུ་ཡོན་ལྷན་ཁང་བཅུ་སོ་སོས‘ལོ་ལྔ་ཚན་བཅུ་བཞི་པའི’འཆར་འགོད་ལག་བསྟར་བྱེད་རིང་གི་གནད་དོན་གལ་ཆེན་བདམས་ནས་ལོ་ལྔ་རྒྱུན་མཐུད་དང་སྐབས་གཉིས་རྗེས་མཐུད་ཀྱི་ཆེད་དོན་དམངས་གཙོའི་ལྟ་སྐུལ་བྱས་ཡོད”ཅེས་ལིའུ་ཅེ་དབྱི་ཡིས་གསུངས་པ་དང་། ཁོང་གིས། རྒྱལ་ཡོངས་སྲིད་གྲོས་ཀྱི་ཨུ་ཡོན་མི་ཐེངས་779ཆེད་དོན་དམངས་གཙོའི་ལྟ་སྐུལ་བཅུ་པོ་དེའི་ནང་ཞུགས་ནས་ལྟ་སྐུལ་བསམ་འཆར་ཁག་323བཏོན་ཏེ“ལོ་ལྔ་ཚན་བཅུ་བཞི་པའི”འཆར་འགོད་དོན་འཁྱོལ་ལ་རམ་འདེགས་བྱས་ཡོད་ཅེས་གསུངས་པ་རེད།

ཨུ་ཡོན་གྱིས“དམངས་ལ་ཞབས་འདེགས་ཞུ་བའི”འགན་སྒྲུབ་བྱེད་སྒོ་ནི་རྒྱལ་ཡོངས་སྲིད་གྲོས་སྐབས་བཅུ་བཞི་པའི་གསར་གཏོད་ཀྱི་བྱ་ཐབས་ཤིག་རེད། 2023ལོར་གསར་འཛུགས་བྱས་ཚུན་རིམ་རྩིས་བརྒྱབ་ན་བྱེད་སྒོ་ཁྲི་1.5ལྷག་ཙམ་སྤེལ་བའི་ནང་ན་ནིང་ཁོ་ནར་བྱེད་སྒོ་6000ལྷག་ཙམ་སྤེལ་ནས“ཁྱིམ་ཚང་ཆེན་པོ”ཡར་ངོའི་ཟླ་བཞིན་འཕེལ་རྒྱས་ཡོང་བ་དང“ཁྱིམ་ཚང་ཆུང་ངུ”ཚ་སོབ་སོབ་ཡོང་བར་སྟོབས་ཤུགས་སྐྱེས་སུ་ཕུལ་ཡོད།

མཐུན་སྒྲིལ་ཆེན་པོ་དང་མཉམ་འབྲེལ་ཆེན་པོ་མཐའ་འཁྱོངས་བྱས་ཏེ་སེམས་ནུས་གཅིག་སྒྲིལ་གྱིས་མཐུན་ཆ་ཆེ་ཤོས་ཡག་པོ་བྲིས་པ།

2025ལོ་ནི་བོད་རང་སྐྱོང་ལྗོངས་དབུ་བརྙེས་ནས་ལོ་ངོ་60འཁོར་བ་དང་ཤིན་ཅང་ཡུ་གུར་རང་སྐྱོང་ལྗོངས་དབུ་བརྙེས་ནས་ལོ་ངོ་70འཁོར་བའི་ལོ་ཞིག་རེད། ལིའུ་ཅེ་དབྱི་ཡིས། ལོ་གཅིག་རིང་རྒྱལ་ཡོངས་སྲིད་གྲོས་ཀྱིས་མི་རིགས་ལས་དོན་གྱི་གཙོ་རྐང་ལ་དམ་པོར་དམིགས་པ་དང་། ཀྲུང་ཧྭ་མི་རིགས་གཅིག་མཐུན་ཚོགས་པ་འཛུགས་པའི་གཙོ་གནད་གནད་དོན་ལ་དམིགས་ནས་ཞིབ་འཇུག་བྱེད་པ། དུས་རབས་གསར་པའི་ཏང་གི་མི་རིགས་རིགས་པའི་གཞུང་ལུགས་རིགས་ལམ་ཅན་གྱི་རྒྱས་བཤད་དང་མ་ལག་ཅན་འཛུགས་སྐྱོང་ལ་རམ་འདེགས་བྱེད་པ། “ལོ་ལྔ་ཚན་བཅོ་ལྔ་པའི”རིང་མི་རིགས་ས་ཁུལ་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་དོ་ཁུར་བྱེད་དགོས་པའི་གནད་དོན་འགར་དམིགས་ནས་བརྟག་ཞིབ་སོགས་བྱས་ཏེ། ཀྲུང་ཧྭ་མི་རིགས་གཅིག་མཐུན་ཚོགས་པ་འཛུགས་པར་ཞབས་འདེགས་ཞུ་ཆེད་རང་འགན་གཙང་སྒྲུབ་དང་ཐབས་འདོན་ཤུགས་འདོན་བྱས་ཡོད་ཅེས་གསུངས་པ་རེད།

“རང་རྒྱལ་གྱི་མི་རིགས་56ཚང་མའི་ནང་རྒྱལ་ཡོངས་སྲིད་གྲོས་ཀྱི་ཨུ་ཡོན་ཡོད”ཅེས་ལིའུ་ཅེ་དབྱི་ཡིས་ངོ་སྤྲོད་གནང་བ་དང་། ཁོང་གིས། རྒྱལ་ཡོངས་སྲིད་གྲོས་ཀྱིས་ལེགས་ཆ་དེ་འདོན་སྤེལ་གང་ལེགས་བྱས་ཏེ་མི་རིགས་ཁག་དབར་འགྲོ་འོང་དང་། སྤེལ་རེས། མཉམ་འདྲེས་བཅས་བྱེད་པར་སྐུལ་འདེད་གཏོང་བའི“ཨུ་ཡོན་གྱིས་འགྲོ་འོང་དང་། སྤེལ་རེས། མཉམ་འདྲེས་བཅས་ལ་སྐུལ་འདེད་གཏོང་བའི”བྱེད་སྒོ་རབ་དང་རིམ་པ་ཧུར་ཐག་སྤེལ་ནས། མི་རིགས་ཁག་དབར་ཁྲག་རྒྱུན་གཅིག་འདྲེས་དང་། དད་སེམས་གཅིག་མཚུངས། རིག་གནས་གཅིག་འབྲེལ། དཔལ་འབྱོར་བརྟེན་རེས། བརྩེ་བ་ཟབ་པ་བཅས་ཀྱི་ཐུན་མོང་གི་ངོས་འཛིན་ཟབ་ཏུ་བཏང་ཡོད་ཅེས་གསུངས་པ་རེད།

ད་ལྟའི་གཡོད་ཀང་ཨའོ་ཁུག་ཆེན་ཁུལ་དུ་ས་གནས་གསུམ་པོ་ལམ་དང་། གྲོང་ཁྱེར། མི་སེམས་བཅས་གཅིག་ཏུ་སྦྲེལ་ནས། རྒྱལ་སྤྱིའི་ཁུག་ཆེན་ཁུལ་རྩེ་གྲ་དང་འཛམ་གླིང་རིམ་པའི་ཡུག་འབྲེལ་གྲོང་ཚོགས་ཤིག་མགྱོགས་མྱུར་དར་བཞིན་ཡོད། རྒྱལ་ཡོངས་སྲིད་གྲོས་ཀྱིས་ཤང་ཀང་དང་ཨའོ་མོན་རྒྱལ་ཁབ་འཕེལ་རྒྱས་ཀྱི་སྤྱི་ཡོངས་སུ་མཉམ་འདྲེས་ཡོང་བར་སྐུལ་འདེད་གཏོང་བའི་ཐད་སྲིད་དོན་ཇུས་འབུལ་ཧུར་ཐག་བྱས་ཡོད།

ལིའུ་ཅེ་དབྱི་ཡིས་གསུངས་དོན། ད་ལོ་རྒྱལ་ཡོངས་སྲིད་གྲོས་ཀྱིས་ཤང་ཀང་དང་ཨའོ་མོན་དང་ནང་སའི་མཉམ་ལས་ལ་ཤུགས་སྣོན་རྒྱག་པ་དང་ཤང་ཀང་དང་ཨའོ་མོན་གྱིས་རྒྱལ་སྤྱིའི་ཤེས་ལྡན་པ་རྩེ་གྲ་འདུ་འཛོམས་ཀྱི་མཐོ་ས་གཏོད་པར་རྒྱབ་སྐྱོར་བྱེད་པ་སོགས་ཀྱི་བརྗོད་དོན་གཙོ་བོར་དམིགས་ནས་སྲིད་གླེང་ཇུས་འདོན་ཧུར་ཐག་བྱས་ཏེ། ཤང་ཀང་དང་ཨའོ་མོན་འདི་ཉིད་རྒྱལ་ཁབ་འཕེལ་རྒྱས་ཀྱི་སྤྱི་ཡོངས་སུ་དེ་བས་ལེགས་པའི་སྒོ་ནས་མཉམ་འདྲེས་ཡོང་བ་དང་དེར་ཞབས་འདེགས་ཞུ་བར་སྐུལ་འདེད་གཏོང་ཆེད་ལེགས་སྐྱེས་གསར་པ་དེ་བས་ཆེ་བ་འབུལ་རྒྱུ་ཡིན།