“གློག་ཤུགས་ལས་དོན་ནི་གློག་འགན་ལེན་བྱེད་པ་ཙམ་མ་ཡིན་པར། དམངས་སེམས་སྦྲེལ་མཐུད་དང་འཕེལ་རྒྱས་ལ་ཞབས་འདེགས་ཞུ་བའི‘སེམས་སྦྲེལ་ཟམ་པ’དེ་བས་ཀྱང་རེད། མང་ཚོགས་ཀྱི་ཕྱོགས་སུ་ལངས་ན་གཞི་ནས་དམངས་འཚོའི་རེ་སྒུག་གང་ཡིན་པ་ཤེས་ཐུབ་ལ། གཞི་རིམ་གྱི་འཐབ་ས་དང་པོའི་རེ་བ་དག་དངོས་དངོས་རྗེན་རྗེན་གྱི་སྲིད་ཇུས་ཀྱི་དྲོ་སྐྱིད་དུ་བསྒྱུར་ཐུབ” འདི་ནི་རྒྱལ་ཡོངས་མི་དམངས་འཐུས་ཚོགས་སྐབས་བཅུ་བཞི་པའི་འཐུས་མི་དང་ལྷོ་ཕྱོགས་གློག་དྲ་ཀོང་ཤིས་ཆིན་ཀྲོའུ་གློག་འདོན་ཅུས་ཚད་འཇལ་ལྟེ་གནས་ཀྱི་ཏང་ཀྲི་པུའི་ཧྲུའུ་ཅི་དང་ཅིང་ལི་སུའུ་ཡོན་ཡོན་གྱིས་ལོ་མང་རིང་གཞི་རིམ་དུ་གཞི་ཚུགས་ཏེ་ལས་ཀ་བྱས་པའི་མྱོང་ཚོར་ཟབ་ཤོས་དེ་རེད།

གློག་ཤུགས་མི་སྣ་ཞིག་ཡིན་པའི་སུའུ་ཡོན་ཡོན་གྱིས་ཉིན་ལྟར་གློག་སྤྱོད་གྲངས་གཞི་སྣ་ཚོགས་དང་། སྣེ་མང་རྙོག་འཛིང་ཆེ་བའི་ཚོང་ཤག་གི་རེ་ཞུ། རྣམ་པ་སྣ་ཚོགས་ཀྱི་གློག་ཤུགས་སྒྲིག་ཆས་བཅས་ཀྱི་ལས་ཀ་བྱེད་ཀྱི་ཡོད། མང་ཚོགས་ཀྱི་སྙིང་གཏམ་ཇི་ལྟར་ཤེས་པར་བྱེད་དགོས་སམ།

གནད་དོན་དེའི་དྲིས་ལན་སུའུ་ཡོན་ཡོན་གྱི་རྒྱུན་གཏན་འཚོ་བའི་ནང་ནས་མངོན་ཡོད། ལས་ཀར་འགྲོ་བའི་ལམ་བར་དུ་གྲོང་མི་དང་སྤེལ་རེས་བྱེད་པ་དང་། ཁེ་ལས་སུ་འཚམས་འདྲིར་སྐྱོད་སྐབས་དགོས་མཁོ་ཟིན་ཐོར་འགོད་པ། “གྲོང་དྲ་མཉམ་སྐྲུན”གྱི་ཞབས་ཞུའི་ས་ཚིགས་དང་དྲ་ཐོག་ལས་སྟེགས་སོགས་བྱ་ཐབས་སྣ་མང་བརྒྱུད་དེ་མང་ཚོགས་ཀྱི་སྙིང་གཏམ་ཉན་གྱི་ཡོད་པ་རེད།

ཁོང་གི་བག་ཆགས་ཟབ་ཤོས་ཤིག་ནི། སྡེ་ཁུལ་དུ་བསྐྱོད་དེ་ཚོང་ཤག་ལ་ཞབས་འདེགས་ཞུ་སྐབས། དོ་དམ་བྱེད་མཁན་གྱི་སྡེ་ལས་མེད་པ་དང་། གཙོ་གཉེར་བྱེད་མཁན་གྱི་སྡེ་ཚན་མེད་པ། ཁང་བདག་ཨུ་ལྷན་མེད་པ་བཅས་ཀྱི“གསུམ་མེད”སྡེ་ཁུལ་རྙིང་པ་ཁག་གཅིག་གི་མང་ཚོགས་ཀྱིས་བཏོན་མང་བའི་གློག་རླངས་སྒྲིག་ཆས་ལ་སྐྱོན་ཤོར་ཡང་ཇུས་གཏོགས་བྱེད་མཁན་མེད་པ་དང་གློག་འགན་ལེན་མ་ཐུབ་པ་སོགས་ཀྱི་གློག་སྤྱོད་དཀའ་གནད་ཤེས་རྟོགས་བྱུང་བ་དེ་རེད། ཁོང་གིས་གནད་དོན་དེ་རིགས་ལ་གཞིགས་ནས། མང་ཚོགས་ཀྱི་རེ་ཞུ་གསེད་བཀྲོལ་ནན་ཏན་དང་འབྲེལ་གཏུག་མཐུན་སྦྱོར་ཧུར་ཐག་བྱས་ནས། གློག་འདོན་སྡེ་ཚན་གྱིས“གསུམ་མེད”སྡེ་ཁུལ་གྱི་ཚོང་ཤག་གི་གློག་རླངས་རྒྱུ་ནོར་རྩིས་ལེན་དོ་དམ་བྱས་པ་བརྒྱུད། ད་ཡོད་ཀྱི་གནད་དོན་ཐག་གཅོད་བྱེད་པར་སྐུལ་འདེད་བཏང་བ་རེད།

ཁོང་གིས། ང་ནི་སྦྲེལ་ཟམ་ཞིག་དང་འདྲ་བར། ཕྱོགས་གཅིག་ནས་རྒྱལ་ཁབ་ཀྱི་གློག་དྲ་འཆར་འགོད་དང་། གློག་རིན་སྲིད་ཇུས། ནུས་རྒྱུ་གསར་པའི་གཟིགས་སྐྱོང་སོགས་ཆེད་ལས་ཀྱི་ཆ་འཕྲིན་དག་གོ་བདེ་ཤེས་སླའི་ཐོག་ནས་མང་ཚོགས་ལ་བརྒྱུད་སྤྲོད་བྱེད་པ་དང་། ཕྱོགས་གཞན་ཞིག་ནས་མང་ཚོགས་ཀྱིས་གློག་སྤྱོད་དང་གློག་ལས་སྒྲུབ་སྐབས་འཕྲད་པའི་ཞིབ་ཕྲའི་དཀའ་ངལ་དག་འབྲེལ་ཡོད་ཚན་པར་སྙན་སེང་ཞུ་བ་དང་རྗེས་འདེད་ཐག་གཅོད་བྱས་ནས། སྲིད་ཇུས་དང་མི་དམངས་ཀྱི་འདོད་བློ་གཉིས་མོས་ཡོང་བར་བྱེད་ཀྱི་ཡོད་ཅེས་བརྗོད།

2025ལོའི་རྒྱལ་ཡོངས་ཚོགས་འདུ་གཉིས་ཀྱི་ཐོག ཁོང་གིས《གློག་ཤུགས་དང་ཆིང་ནུས་མཉམ་སྡེབ་སྐོར་གྱི་གྲོས་འགོ》བཏོན་ཡོད། གྲོས་འགོ་འདི་ནི་ཁོང་གིས་ཀོང་ཤིས་ཆིན་ཀྲོའུ་རུ་ལྷོ་ཕྱོཌ་ཞིང་ཆེན(ལྗོངས)ལྔ་ཡི་གློག་ཤུགས་དང་ཆིང་ནུས་མཉམ་སྡེབ་ཚོད་ལྟའི་རྣམ་གྲངས་ལ་བརྟག་ཞིབ་བྱས་པ་ལས་བྱུང་བ་རེད། ཁོང་གིས་གློག་ཤུགས་དང་ཆིང་ནུས་མཉམ་སྡེབ་འཕེལ་རྒྱས་ཀྱི་དཀའ་གནད་གསེད་བཀྲོལ་བྱས་ཤིང་། རིགས་གཅིག་མཁས་ཅན་གདན་དྲངས་ཏེ་རིགས་པས་ཁུངས་སྐྱེལ་བྱས་རྗེས། ཚན་རྩལ་འགག་སྒྲོལ་བྱེད་ཤུགས་ཆེ་རུ་གཏོང་བ་དང་། དཔེ་སྟོན་བཀོལ་སྤྱོད་རྒྱ་སྐྱེད་གཏོང་བ། སྲིད་ཇུས་མ་ལག་འཐུས་སྒོ་ཚང་དུ་གཏོང་བ་སོགས་ཀྱི་གྲོས་འགོ་བཏོན་ཏེ། ཆེད་ལས་ཀྱི་ནུས་རྒྱུའི་གྲོས་གཞི་དེ་ལག་བསྟར་ཆོག་པའི་སྲིད་ཇུས་ལ་འགྱུར་བར་འབད་བརྩོན་ཧུར་ཐག་བྱས་ཡོད།

གྲོས་འགོ་བཏོན་པ་ནི་གོམ་སྟབས་དང་པོ་ཙམ་ཡིན་པ་དང་། དོན་འཁྱོལ་ལ་སྐུལ་འདེད་གཏོང་བ་ནི་འགག་རྩ་ཡིན། སུའུ་ཡོན་ཡོན་གྱིས་གྲོས་འགོ་སྒྲུབ་གཉེར་གྱི་གནས་ཚུལ་ལ“ཕྱིར་མིག་བལྟ་བ”མཐའ་འཁྱོངས་ཀྱིས། སྒྲུབ་གཉེར་སྡེ་ཚན་དང་དུས་བཀག་ལྟར་མཐུན་སྦྱོར་བྱེད་ཀྱི་ཡོད། གྲོས་འགོ་འདིར་རྒྱལ་ཁབ་འཕེལ་སྒྱུར་ཨུ་ལྷན་གྱིས་བཟོ་ལས་དང་ཆ་འཕྲིན་ཅན་པུའུ་དང་། ནོར་སྲིད་པུའུ། སྐྱེ་ཁམས་ཁོར་ཡུག་པུའུ། རྒྱལ་ཁབ་ནུས་རྒྱུ་ཅུས་སོགས་སྡེ་ཚན་དང་གྲོས་མོལ་བྱས་རྗེས་ལན་ཁ་གསལ་བསློགས་པ་དང་འབྲེལ། བྱ་ཐབས་རབ་དང་རིམ་པ་སྤེལ་ནས་ཆིང་ནུས་ཐོན་ལས་འཕེལ་རྒྱས་ལ་སྐུལ་འདེད་བཏང་ཡོད། མིག་སྔར། “གློག་ཤུགས་དང་ཆིང་ནུས་ཀྱི་དཔེ་སྟོན་རྣམ་གྲངས”ལག་བསྟར་ཐུབ་མིན་གྱི་ཞིབ་འཇུག་དང་བསྐྲུན་ཡུལ་འདེམས་པ་སོགས་ཀྱི་དུས་འགོའི་ལས་དོན་བསྒྲུབས་ཟིན་པ་རེད།

རང་ཉིད་ཀྱི་གྲོས་འགོ་དེ་ཤོག་ངོས་ནས་དོན་ཐོག་ཏུ་འཁྱོལ་བ་མཐོང་སྐབས། སུའུ་ཡོན་ཡོན་ལ་གྲུབ་འབྲས་ཐོབ་སྣང་ཟབ་མོ་བྱུང་ཡོད་པ་རེད།