འཐུས་མི་ཀེང་ཙུན་ཀྲུའུ་ཡིས་གསུངས་དོན།
ཡུལ་མི་ཚོས་རེ་སྒུག་བྱེད་པ་ནི་ང་ཚོས་སྒྲུབ་དགོས་པ་དེ་ཡིན།
“དགུན་གྲོ་ལྗང་པ་ཐོན་ནས་ཚིགས་གཏོང་བའི་དུས་སུ་སླེབས་ནའང་དཔྱིད་གྲང་དུས་སུ་ད་དུང་སྔོན་འགོག་བྱེད་དགོས”ཞེས་བཅའ་སྡོད་བྱ་ཡུལ་དུ་རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་ཧྲན་ཏུང་ཞིང་ཆེན་ལེའོ་ཁྲེང་གྲོང་ཁྱེར་ཁྲེ་ཕིང་ཆུས་ཅ་ཀྲའེ་གྲོང་རྡལ་ཀེང་ཏེན་གྲོང་གསར་གྱི་ཏང་ཨུད་ཀྱི་ཧྲུའུ་ཅི་ཀེང་ཙུན་ཀྲུའུ་ཡིས་ཁ་པར་ནང་ཡུལ་མི་ཚོར་མངགས་བཅོལ་ཡང་ཡང་བྱས། དཔྱིད་དུས་ཞིང་ཁར་གཡོག་བྱ་རྒྱུ་དེ་གནད་འགག་ཆེ་ས་ཡིན་པས་ཁོང་ལ་སེམས་ཁྲལ་ཆེན་པོ་བྱུང་།
རྒྱལ་ཡོངས་མི་དམངས་འཐུས་ཚོགས་སྐབས་གཉིས་ཀྱི་འཐུས་མི་ཀེང་ཙུན་ཀྲུའུ་ལ་གོམས་གཤིས་བརྟན་པོ་ཞིག་ཡོད་པ་སྟེ། དུས་དང་རྣམ་པ་ཀུན་ཏུ་ཟིན་བྲིས་དེབ་ཅིག་ཁྱེར་ཞིང་། གང་དུ་སླེབས་ན་དེ་རུ་ཟིན་བྲིས་རྒྱག་པ་དེ་རེད། ཡུལ་མིའི་ཁྱིམ་ཚང་གི་གནས་ཚུལ་ནས་ཞིང་ཁའི་ནང་གི་ལོ་ཏོག་གི་སྐྱེ་འཚར་བར་གང་ཞིག་ཡིན་རུང་ཚང་མ་གཅིག་གཅིག་གཉིས་གཉིས་སུ་ཟིན་ཐོར་འགོད་ཀྱི་ཡོད།
ལོ་འདི་དག་རིང་ཀེང་ཙུན་ཀྲུའུ་ཡི་བརྟག་ཞིབ་བྱེད་ཕྱོགས་ནི་ཐོག་མཐའ་བར་གསུམ་དུ་འབྲུ་རིགས་ཡིན་ཞིང་། ལོ་འགའ་ཞིག་གོང་དུ་འདྲི་རྟོག་བྱེད་པར་སྐྱོད་སྐབས་ཡུལ་མི་ཞིག་གིས་མུ་ཁར་ཙོག་པུར་བསྡད་དེ་ཁོང་ལ“འཕྲུལ་ཆས་འཛོམས་པོ་མེད་པས་མི་ཤུགས་ལ་བརྟེན་རྒྱུ་ལས་མ་འདས། དཀའ་ལས་ཚད་མེད་བརྒྱབ་རུང་ཡོང་འབབ་དེ་ཙམ་མང་པོ་མེད། ད་ཆ་ཕྱིར་གླ་པར་སྐྱོད་དགོས་བྱུང་ནའང་ཞིང་ཁ་འདེབས་འདོད་བྱེད་མཁན་གཞོན་ནུ་རེ་གཉིས་ལས་མི་འདུག ཕྱིས་སུ་ཞིང་ཁ་དག་སུས་འདེབས་སམ”ཞེས་སེམས་ཁྲལ་ཆེན་པོས་བཤད།
“ཞིང་ལས་དར་རྒྱས་གཏོང་དགོས་ན་ཐོག་མར་ཞིང་པར་འབྲུ་རིགས་འདེབས་འདོད་ཡོད་པ་དང་འབྲུ་རིགས་ཡག་པོ་འདེབས་རྒྱུ་ཡོད་པ་བྱེད་དགོས” ན་ནིང་རྒྱལ་ཡོངས་ཀྱི་ཚོགས་འདུ་གཉིས་ལ་ཀེང་ཙུན་ཀྲུའུ་ཡིས་བརྟག་ཞིབ་བྱས་ནས་བྲིས་པའི་གྲོས་འགོ་ཞིག་བསྣམས་ཕེབས་པ་སྟེ། རྨང་གཞིའི་སྒྲིག་བཀོད་ལ་མ་དངུལ་གཏོང་ཤུགས་མུ་མཐུད་ཆེ་རུ་བཏང་ནས་ཚད་གཞི་མཐོ་བའི་ཞིང་ཁ་དེ། ལོ་གཅིག་ལ་སྟོན་ཐོག་གཉིས་ཀྱི་མུའུ་རེའི་འབྲུ་རིགས་ཐོན་ཚད་སྤྱི་རྒྱ་1500ཟིན་པའི་ཞིང་ཁ་བསྐྲུན་རྒྱུ་དང་། ཁེ་ཕན་ཁ་གསབ་ལམ་སྲོལ་འཐུས་སྒོ་ཚང་དུ་བཏང་ནས་ཁ་གསབ་དང་འགན་བཅོལ་སོགས་ཀྱི་རྒྱབ་སྐྱོར་སྲིད་ཇུས་དོན་འཁྱོལ་བྱས་ཏེ། ཞིང་པའི་འབྲུ་རིགས་འདེབས་པའི་སེམས་ཤུགས་ཆེ་རུ་གཏོང་དགོས་པའི་འབོད་སྐུལ་གནང་ཡོད།
ཡུན་རིང་མ་སོང་བར་ཞིང་ལས་གྲོང་གསེབ་པུའུ་ཡིས་ལན་བརྒྱབ་ཡོད་ལ། ཧྲན་ཏུང་ཞིང་ཆེན་ཞིང་ལས་གྲོང་གསེབ་ཐིང་གིས་ཀྱང་ཁོང་ཆེད་མངགས་བཙལ་ནས་གྲོས་འགོ་ལག་བསྟར་ཐུབ་མིན་གྱི་སྐོར་ཞིབ་པར་གླེང་། ཀེང་ཙུན་ཀྲུའུ་བློ་མགུ་པོ་བྱུང་བ་ཞིག་ནི་རྒྱལ་ཁབ་ཀྱིས་ཚད་གཞི་མཐོ་བའི་ཞིང་ཁ་འཛུགས་སྐྲུན་ལ་རྒྱབ་སྐྱོར་བྱེད་ཤུགས་མུ་མཐུད་ཆེ་རུ་བཏང་བ་དང་ཧྲན་ཏུང་ཞིང་ཆེན་གྱི་འབྲེལ་ཡོད་ནོར་སྲིད་ཁ་གསབ་ཚད་གཞི་རིམ་བཞིན་མཐོ་རུ་བཏང་ནས་རང་ཉིད་ཀྱི་གྲོས་འགོར་གྲོས་ལན་ཐོབ་པ་དེ་རེད།
འབྲེལ་ཡོད་གསར་འགྱུར།